Nüküjain Maleiwa nümüin Abraham anainjatüin sukuwaʼipa wayuu sainküinjee mmakat süpüshuaʼa nünainjee wanee nuuʼuliwoʼu (Génesis 22:18). ¿Jaraiche chi nuuʼuliwoʼukai Abraham?

Eetaairü maʼaka 2.000 juya alataka süchikijee naaʼinrapuʼuin Jesuu kasa pülashaatasü nutuma chi Maleiwakai. Sükajee tü kasa pülasü naainjakat Jesuu, wayaawata aaʼu niain Jesuu chi nuuʼuliwoʼukai Abraham, chi anainjachikai atuma sukuwaʼipa wayuu sainküinjee mmaka süpüshuaʼa (Galacia 3:14).

Sutuma tü kasa pülasü naaʼinrapuʼukat Jesuu ayaawatüna aaʼuchi niain chi nüneekajalakai Maleiwa süpüla anainjatüin sukuwaʼipa wayuu nünainjee. Otta wayaawata aaʼu naaʼinrüinjatüin kasa pülasü mapeena süpüleerua wayuu. Wekirajaa sünain anashaatain maʼin nukuwaʼipa Jesuu.

Aipürai maʼin nia: Niiyajüin Jesuu na ayuuishiikana.

Soʼu wanee kaʼi achuntushi kaalinwaa wanee wayuu ajaʼtta atachi nümüin Jesuu, «tacheküin süpüleerua anainjachin pia, nümakalaka [Jesuu]. Anaichipa joo chi wayuukai. Nnojolüitpa ajaʼttüin tü nütakat» (Marcos 1:40-42).

Asülajüi maʼin: Nikirüin Jesuu watta saalii wayuu.

Nnojotsü anain nümüin Jesuu shiʼrüinjatüin wayuu jamü, kojuyatua naainjain Jesuu kasa pülasü süpüla nikirüinjatüin wayuu, jamüshijaʼa nia wainmajaasü nutuma jeʼrashiichen pan otta jime (Mateo 14:17-21; 15:32-38). Emirapa tü wayuukalüirua, akotchojünüsü watta saalii eküülü napütaainka.

Amüliajüi: Nüsoʼirüin naaʼin na outushiikana.

Amülialaasü naaʼin Jesuu saalinjee wanee wayuu outa aʼwayuuse otta nüsoʼirüin naaʼin chi süchonkai waneeshikaʼaya sümüin (Lucas 7:12-15).