Sainküin mmakat süpüshuaʼa watta naalii na wayuu müliakana sutuma jamü otta sutuma mepiain naya. Jamaameerü naaʼin noʼutku naya wayuukana süküjünüle namüin anoutaajeerü nakuwaʼipa mapeena. Aneerü wakuwaʼipa nutuma Maleiwa wakaalinjale na waneinnua.

«Chi eekai nükaaliijain chi wayuu maʼletsekai, müshi nujuyaajitkai naaʼin Jeʼwaa, jee nuwalaajeechi nia saaʼu tia naaʼinrakat» (PROVERBIOS 19:17).

Nüküjain Jesuu nüchiki wanee wayuu wanaaka namaa waneirua kaʼruwarannuu, asheʼejünüshi nia otta apütünüshi nia outapünaain (Lucas 10:29-37). Niasaʼa wanee wayuu kamaneekai maʼin nnojoikai niʼraajüin, nümüliajüin nia otta niiyajüin nülioʼu. Nümüliajüin nia mayaainjeʼe naatain nuumain.

Kamaneeshi maʼin wayuukai chii süka nükaalinjain chi wayuu asheʼejünakai otta naapüin tü choʼujaakat nümüin. Nnojotpejeʼe shiain neʼe naaʼinraka tia, nümüliajüin naaʼin.

¿Kasa watüjaka sünainjee tü nümakat Jesuu? Shia nikirajeeka anain Jesuu wachajaainjatüin sukuwaʼipa süpüla wakaalinjain na wayuu eʼrakana müliaa (Proverbios 14:31). Saashin tü Wiwüliakat alüʼütsü sükalia najaʼttirüinjatkalü oʼu Maleiwa tü kasa müliakalü atuma saaʼin wayuu. Eesüjaʼa wasakirüle waaʼin ¿jameerüin sukuwaʼipa tia otta joujaleerü naaʼinraka shia Maleiwa? Sünain tü wane pütchikat wekirajaajeerü anain süchiki tü kasa anasü naapeetkat Maleiwa sümüin wayuu.