Süküjain tü Bibliakat eein süpüla nüküjain Jehová tü alatajatkat mapeena (Is. 45:21). Nnojotpejeʼe süküjain tü Bibliakat jamüin maʼin sukuwaʼipa nutuma, joujain naaʼinrüin tia otta kasain nütüjaweein aaʼu. Nnojotsü wayaawatüin aaʼu süpüshuaʼa tü naaʼinrakat Jehová süpüla nütüjaain saaʼu tü alatüinjatkat mapeena. Eepejeʼe waneirua kasa watüjaaka aaʼu süchiki tü naaʼinrakat.

Nütüjaa aaʼulu Jehová kasa süpüshuaʼa, eepejeʼe waneirua kasa nnojotka naaʼinrüin. Süka kekiin maʼin nia eesü süpüla nüküjain wanee kasa alatajatka müleka keeʼireere naaʼin (Roma 11:33). Süka lotuin maʼin nukuwaʼipa nüneeküin tü kasa nütüjaweekalü aaʼu süchiki tü alatajatkat (anasü paashajeʼerüle Isaías 42:14).

Naaʼinrüin Jehová kasa eekai eein süpüla nikeraajüin tü nüchekakat. Eesüjaʼa wayaawatüle saaʼu sükajee tia jamüin nuuntaka Jehová nüküjain tü alatajatkat mapeena. Müsü Isaías 46:10: «Taya aküjatüjüikai jamüinjatüin sukuwaʼipa sajaʼttia wanee kasa. Tayaʼala neʼe aküjakai süpüshuaʼa tü kasa nnojoyütkalia alatüin. Chi makai anüiki: ‹Tü pütchi teweetirakat, eejeerü shia waneepia otta tekeraajeerü tü keeʼireekat taaʼin›».

Wane kasa wayaawataka atuma eein süpüla nüküjain Jehová süchiki tü alatajatkat mapeena shia süka pülashin nia, müsüjeseʼe eein süpüla naaʼinrüin tü keeʼireekat naaʼin. Jamüshiijaʼa wanajüle wanee peliikula, eesü wanajüle palajana tü sajaʼttiakat süpüla watüjaain saaʼu tü alatüinjatkat. Nnojotsü müin nukuwaʼipa Jehová süpüla nütüjaain saaʼu tü alatajatkat mapeena. Tü naaʼinrakat shia nüneeküin tü kaʼi sülatüinjatkalü oʼu wanee kasa. Süntapa tia kaʼikat nikeraajüin shia (Éx. 9:5, 6; Mat. 24:36; Aluw. 17:31).

«Takumajüin sukuwaʼipa wanee kasa», «taaʼinreerü shia», maʼwaishi Jehová süpüla nüküjain süchiki waneirua kasa nnojoyütkalia alatüin (2 Rey. 19:25, noota; Is. 46:11). Tia pütchikat suluʼu hebreo sünainjeejatü shia tü naaʼinrakat wanee wayuu atüküikai süka pootshi (Jer. 18:4). Jamüshijaʼa wanee wayuu atüküikai süka pootshi atüjakai maʼin, eesü süpüla nukumajüin wanee iita sümaa anachoin maʼin shia nutuma. Müsia nukuwaʼipa Jehová, eesü süpüla naaʼinrüin wanee kasa wanaapünaa sümaa tü kasa nüchekakat (Éf. 1:11).

Nuuʼulaain Jehová waneeküin tü waaʼinrajatkat. Nnojotsü niʼitaain tü alatüinjatkat sümüin wayuu waneʼewai sukua otta nnojotsü nüpüleeruain naaʼin na wayuu anamiakana süpüla naaʼinrüin wanee kasa mojusü amülouijeenaka aaʼujee naya. Nikirajüin waya süchiki tü anainjatkalü atuma wakuwaʼipa, nuuʼulaapejeʼe waneeküin waneʼewai wakua tü waaʼinrajatkat.

Wekirajaa süchiki piamasü kasa wayaawateetka atuma müin nukuwaʼipa Jehová. Jülüjataa waaʼin nakuwaʼipa na ninivitakana, mojulaashii maʼin naya. Nüküjainjeseʼe Jehová najaʼlajeʼerüinjanain naya. «Niʼrakalaka chi Maleiwa shiimainshikai nayaawajaain suulia naainjala otta sümülialaakalaka naaʼin saalinjee tü nümakat paala namüin, nnojoliika najaʼttirüin naya» (Jon. 3:1-10). Nnojotsü naaʼinrüin Jehová naka na ninivitakana tü nüküjakalü achiki paala süka naapaain sümaa tü nümakat namüin otta nayaawajaain suulia naainjala.

Tü chiiruaajatkat shia tü nümakat Jehová nüchiki Ciro sünain taashinjanain na judíokana nutuma otta nuluwataainjanain naya sünain akumajaa süchikuaʼa tü aʼwaajüleekat Jehová (Is. 44:26–45:4). Ekeraajüsü tia pütchikat nünain Ciro, chi aluwataaikai saaʼu Persia (Esd. 1:1-4). Mayaainjeʼe nnojolin niain Jehová nuʼwaajüin Ciro, nikeraajüin Jehová tü nüküjatüjütkalia achiki paala nükajee otta nnojotsü nüpüleeruain naaʼin süpüla nuʼwaajüin nia (Prov. 21:1).

Eesü waneirua kasa nuuntaka atuma Jehová nüküjain süchiki tü alatajatkat mapeena nnojotka watüjaain aaʼu. Isasü wachiki watüjaain saaʼu süpüshuaʼa tü naaʼinrakat Jehová otta tü jülüjakat naaʼin (Is. 55:8, 9). Watüjaapejeʼe saaʼu lotuin süpüshuaʼa tü naaʼinrakat Jehová jee anain tü naaʼinrakat nüküjapa süchiki tü alatajatkat mapeena.