1. ¿Kasa naapaka Jeʼwaa wamüin?

NAATAYAA müsü tü aʼyatawaa naapakat Jeʼwaa wamüin suluʼu tü outkajaaleekat. Mayaainjeʼe müin tia, kojutushii waya wapüshuaʼa nümüin otta choʼujaashii wamüin waneʼewai nakua na wawalayuukana. Wayaawata aaʼu tia sünainjee tü nümakat chi aluwataaushikai Pablo. Wekirajaa sünain tia.

2. Sünainjee tü sümakat Éfeso 4:16, ¿jamüshii kojutuinjanaka wamüin na wawalayuukana otta paaʼinwajiraainjanaka waya namaa?

² Maʼaka süküjünüin sünain tü pütchi ashajünakat suʼttiajee ekirajaayakat tüü, nüküjain Pablo nnojoluin anain wamüle nümüin wanee wawala: «Nnojotsü kasain paamüin tamüin» (1 Cor. 12:21). Süpüla anajiraain waya namaa na wawalayuukana, kojutuinjanain naya wamüin otta aʼyataajiraainjana waya namaa (paashajeʼera Éfeso 4:16, TNM). Paaʼinwale waya sünain aʼyatawaa namaa na wawalayuukana, aijiraajeena waya namaa otta katchinjeerü wanoula.

3. ¿kasa wekirajaainjatka anain sünain ekirajaayakat tüü?

³ Sünain ekirajaayakat tüü, wekirajaajeerü anain tü naaʼinrajatkat wanee laülaashi süpüla kojutuinjanain nutuma na laülaashiikana wanaa nümaa. Wekirajaajeerü anain tü waaʼinrajatkat wapüshuaʼaleʼeya süpüla kojutuinjanain wamüin na wawalayuu maʼwayuusekana. Otta wekirajaajeerü anain tü waaʼinrajatkat süpüla kojutuin wamüin na wawalayuu ekirajaakana sünain wanüikipala.

4. ¿Kasa naaʼinrajatka na laülaashiikana saashin Roma 12:10?

⁴ Napüshuaʼa na laülaashiikana suluʼu tü outkajaaleekat aneekünüshii  naya nutuma Jeʼwaa nükajee chi naaʼinkai. Mayaainjeʼe müin tia, naatayaa müsü tü kasa natüjakalü apüleerua nutuma (1 Cor. 12:17, 18). Eeshii na laülaashii aneekünakana jekenainka otta eesüjaʼa nnojorüle natüjain maʼin süpüleerua tü naʼyataainkat. Eetaashii joo na isainnakana achiki tü naʼyataainkat süka laülaayuuinnain jee ayuulin naya. Nnojoipejeʼe süpüla nümüin wanee laülaashi nümüin wane laülaashi: «Nnojotsü kasain paamüin tamüin» shia naaʼinrajatkat tü nümakat Pablo suluʼu Roma 12:10 (paashajeʼera).

5. (1) ¿Kasa naaʼinrajatka wanee laülaashi süpüla kojutuinjanain nümüin na wane laülaashiikana? (2) ¿Jamüsü naaʼinrajatka tia?

⁵ Jülüjainjatü maʼin naaʼin wanee laülaashi tü namakat na wane laülaashiikana, naaʼinrüinjatü tia süpüla kojutujiraain naya. Choʼujaapejeʼe maʼin naaʼinrüin na laülaashiikana tia noutkajaapa süpüla nanoutuin sukuwaʼipa wanee kasa. Jülüja waaʼin tü aküjünakat suluʼu Aapiria Wayuu ojuʼitaka oʼutuupüroʼu 1 soʼu 1988, anuu sünüiki: «Süpüla nanoutajatüin na laülaashiikana sukuwaʼipa wanee kasa jee süpüla anainjatüin süneekia natuma wanee kasa, soteesü naaʼin eein süpüla naapüin Maleiwa chi naaʼinkai nümüin wanee laülaashi süpüla nüküjainjatüin wanee pütchi suluʼujeejatü tü Wiwüliakat (Aluw. 15:6-15). Eeshi chi naaʼinkai Maleiwa naaʼu napüshuaʼa na laülaashiikana suluʼu tü outkajaaleekat, nnojoishi waneeshin chi eekai aaʼu nia».

6. (1) ¿Kasa naaʼinrajatka na laülaashiikana süpüla paaʼinwainjanain naya sünain aʼyatawaa? (2) ¿Kasa anasü neʼreetka na wawalayuukana paaʼinwale na laülaashiikana?

⁶ Wanee laülaashi kojutuka amüin na laülaashiikana, nnojoishi niain palajaneein sünain asoutaa noutkajaapa na laülaashiikana. Nnojoishi nia alanaʼaleein maʼin sünain aashajawaa otta nnojotsü jülüjain naaʼin sünain shiain anain maʼin tü nümakat waneepia. Tü naaʼinrakat shia nüküjain tü jülüjakat naaʼin sümaa nnojoluin yaletayaain naaʼin. Jülüjasü naaʼin tü namakat na wane laülaashiikana. Shiapejeʼe kapülain maʼin naaʼin naashajeʼerüinjatüin wanee pütchi suluʼujee tü Wiwüliakat otta jülüjasü maʼin naaʼin nuʼunirüinjatüin nukuwaʼipa sükajee tü nümakat chi achepchiee oonookai otta kekiikai maʼin (Mat. 24:45-47). Eejeechi chi naaʼinkai Maleiwa naaʼu na laülaashiikana, aijiraale jee  kojutujiraale naya wanaa sümaa noutkajaain. Nuʼunireerü nakuwaʼipa süpüla naneeküin wanee kasa atütüleʼereetka naaʼin na wawalayuukana (Sant. 3:17, 18).

7. ¿Kojutushiiche nümüin Jesuu na wayuu maʼwayuusekana?

⁷ Suluʼu tü outkajaaleekat, eeshii na wawalayuu kaʼwayuusekana, na kachooinkana otta eetaashii na nnojotkana kaʼwayuusein. ¿Kojutuinjanache wamüin na wawalayuu maʼwayuusekana? Kojutushii naya nümüin Jesuu. Jamüshijaʼa nia wanaa sümaa yaajachin saaʼu tü mmakat, nnojoishi nia kaʼwayuusein. Maʼwayuusesai nia süka shiain naaʼinmaain maʼin tü niʼyataainkat nümüin Jeʼwaa. Nnojotsü nüküjain Jesuu choʼujaain nümüin wanee anoujashi kaʼwayuuseinjachin nia jee maʼwayuuseinjachin nia. Nüküjapejeʼe Jesuu wayainjanain aneeküin tia süka waaʼin wamüiwaʼa (Mat. 19:11, 12). Kojutushii nümüin Jesuu na wayuu maʼwayuusesaliikana. Nnojotsü jülüjain naaʼin anaʼleein maʼin nakuwaʼipa na kaʼwayuusekana noulia na maʼwayuusekana.

8. Saashin tü pütchi nüküjakat Pablo suluʼu 1 Corinto 7:7-9, ¿kasa jülüjainjatka naaʼin na anoujashiikana?

⁸ Jamüshijaʼa chi aluwataaushikai Pablo maʼwayuusesai nia maʼaka naaʼin Jesuu. Shia naaʼinmaaka maʼin tü niʼyataainkat nümüin Jeʼwaa. Nnojotpejeʼe nüküjain Pablo mojuin kaʼwayuusere wanee anoujashi. Nüküjain nüneeküinjachin wanee wayuu süka naaʼin nümüiwaʼa kaʼwayuuseinjachire nia. Mayaainjeʼe müin tia, nüküjain Pablo sünain jülüjainjatüin naaʼin na anoujashiikana eere süpüla naʼyataain nümüin Jeʼwaa sümaa maʼwayuusein naya (paashajeʼera 1 Corinto 7:7-9). Nnojoipejeʼe mojutuyaain nümüin Pablo wanee wayuu eekai maʼwayuusein, müshijeseʼe nüneeküin Timoteo, wanee anoujashi maʼwayuusesai. Nüneeküin nia süpüla niʼyataainjachin nümüin Jeʼwaa sünain wainma kasa (Filip. 2:19-22). * Nnojotsü anain jülüjale waaʼin anain maʼin nukuwaʼipa wanee wawala sutuma kaʼwayuusein nia jee shiale sutuma maʼwayuusein nia (1 Cor. 7:32-35, 38).

9. ¿Jamüinjatü wanüiki nüchiki wanee wayuu eekai kaʼwayuusein jee eekai maʼwayuusein?

⁹ Nnojotsü nüküjain Jesuu otta Pablo kaʼwayuuseinjachire jee maʼwayuuseinjachire wanee anoujashi. ¿Jamüinjatü wanüiki nüchiki wanee wayuu eekai kaʼwayuusein otta nüchiki eekai maʼwayuusein? Anuu tü ashajünakat suluʼu Aapiria Wayuu ojuʼitaka oʼutuupüroʼu 1 soʼu 2012: «Talatüsü naaʼin wanee wayuu kaʼwayuusere  jee maʼwayuusere nia, nnojotsü jülüjain naaʼin Jeʼwaa mojuinjatüin naaʼin wanee wayuu sutuma maʼwayuusein nia». Sutuma watüjaaitpain saaʼu tia, kojuteeshii wamüin na wawalayuu maʼwayuusekana.

10. ¿Kasa waaʼinrajatka süpüla kojutuin wamüin nakuwaʼipa na wawalayuu maʼwayuusekana?

¹⁰ ¿Kasa waaʼinrajatka süpüla kojutuin wamüin nakuwaʼipa na wawalayuu maʼwayuusekana? Soteesü waaʼin eein na wawalayuu maʼwayuusekana süka aletüjülüinya shia natuma otta eeshii na maʼwayuusekana süka nnojoluin nantüin sünain wanee wayuu wanaawakalü akuwaʼipa namaa. Eetaashii na maʼwayuusekana süka sünaajaain naʼwayuuse. «¿Jamüshi maʼwayuuseka pia?, ¿wakaalinjeechi pia süpüla kaʼwayuusein pia?» ¿Müinjanache waya namüin naya wawalayuukana? ¿Jameetche naaʼin saalinjee tia? Nnojorüle nachuntuin kaalinwaa wamüin eesüjaʼa mojeerüle naaʼin sutuma tü wamakat namüin (1 Tes. 4:11; 1 Tim. 5:13). Wekirajaajeerü anain jooluʼu tü namakat waneinnua wawalayuu maʼwayuusekana.

11, 12. ¿Kasa eeka süpüla mojuin atuma naaʼin na wawalayuu maʼwayuusekana?

¹¹ Naashin wanee wawala alapalaakai naaʼu na wawalayuukana, watta saalii tü kasa anasü niʼrakat sünain aʼyatawaa nümüin Jeʼwaa sümaa maʼwayuusein nia. Eepejeʼe mojule naaʼin naashin namüle na wawalayuukana nümüin: «¿Jamüshi maʼwayuuseyüika pia?». Anuu tü nümakat wanee wawala maʼwayuusekai, aʼyataashi nia suluʼu Weteet: «Naaʼinruʼu waneinnua wawalayuu, mojukuʼu müsü naaʼin wanee wayuu maʼwayuusere nia».

¹² Anuu tü sümakat wanee wawala maʼwayuusesat, aʼyataasü shia suluʼu Weteet: «Eeshii na wawalayuu jülüjakana aaʼin kaʼwayuuseein maʼin na wawalayuu maʼwayuusekana, müshiijeseʼe noʼunawalin sünain miʼiraa. Soʼu wanee kaʼi ajütünüsü taya suluʼumüin wanee mma sünain wanee aʼyatawaa, tantaka aipaʼa sünain tü outkajawaakat. Shiasaʼa tü wawala tatunkajatkalü epialuʼu süküjain tamüin eein piamashii wawalayuu wanaawakana ouyase tamaa. Süküjapejeʼe tamüin nnojoluin saaʼinrüin tia shiiʼiree kaʼwayuuseinjatüin taya. Shiasaʼa wantapa suluʼumüin tü outkajaaleekat, shiʼraajireʼerüin taya namaa naya wawalayuukana, japüliwaasü taaʼin otta japüliwaasü naaʼin na wawalayuukana sutuma tia».

13. ¿Kasa atütüleʼeraka saaʼin wanee wawala maʼwayuusesat?

¹³ Anuu tü sümakat wanee wawala maʼwayuusesat aʼyataakat suluʼu Weteet: «Wainma na wawalayuu pürekutsoot teʼraajakana otta maʼwayuusesalii naya, anashaatasü maʼin nakuwaʼipa naya wawalayuukana, nakaalinjain na wawalayuukana, talatüsü naaʼin sünain aʼyatawaa nümüin Jeʼwaa otta jalouishii naya suluʼu tü outkajaaleekat. Pansaasü tü jülüjakat naaʼin naya wawalayuukana, nnojotsü jülüjain naaʼin anaʼleein maʼin nakuwaʼipa noulia na waneinnua otta nnojotsü jülüjain naaʼin nnojoleerüin talatüin naaʼin sutuma maʼwayuusein naya jee sutuma machoin naya». Anasü naaʼin wanee wayuu kojutule nia namüin na nuwalayuukana, nnojorüle jülüjain naaʼin mojuin naaʼin wanee wayuu sutuma maʼwayuusein nia, nnojorüle süchunjain naaʼin, jalouire nia amüinwaa, nnojorüle jülüjain naaʼin sülanaʼaleein nukuwaʼipa noulia na waneinnua jee nütüjaale saaʼu alin nia apülawaa.

14. ¿Kasa waaʼinrajatka süpüla kojutuin wamüin na wawalayuu maʼwayuusekana?

¹⁴ Talatüsü maʼin naaʼin na wawalayuu maʼwayuusekana kojutule naya wamüin sünainjee anain maʼin nakuwaʼipa, nnojotsü shiain sünainjee maʼwayuusein jee kaʼwayuusein naya. «Müliataʼaleeshiijaʼa maʼin naya», nnojoishii müinjanain waya namüin süka maʼwayuusein naya weʼrüin. Kojutuinjana naya wamüin süka anain maʼin nanoula. Waaʼinrüle tia, nnojoleerü jülüjain naaʼin na wawalayuukana müin wanüiki  nachiki: «Nnojotsü kasain paamüin tamüin» (1 Cor. 12:21). Nayaawateerü aaʼu na wawalayuukana kojutuin maʼin naya wamüin.

15. ¿Kasa naaʼinraka waneinnua wawalayuu süpüla nakooʼomüinrüin naʼyataain nümüin Jeʼwaa?

¹⁵ Wainma na wawalayuu ekirajaakana sünain wanee naata anüikii süpüla nakooʼomüinrüinjatüin naʼyataain nümüin Jeʼwaa. Wainma tü kasa naaʼinrakat süpüla nountuin tia. Wawalayuukana naainnua, akolojooshii naya suluʼumüin wanee outkajaalee eere saashajaanüin tü anüikii nekirajaakalü anain otta eere choʼujaain maʼin aküjalii pütchi (Aluw. 16:9). Naneeküin tia sükajee naaʼin namüiwaʼa otta naaʼinrüin shia süpüla naʼyataain maʼin nümüin Jeʼwaa. Mayaainjeʼe kakaliain süpüla natüjain süpüleerua tia anüikiikat jalouishii naya namüin na wawalayuukana. Sutuma anain maʼin nakuwaʼipa akatchinraasü nanoula na wawalayuukana natuma. Kojuteeshii wamüin wawalayuukana naainnua.

16. ¿Kasa jülüjainjatka naaʼin na laülaashiikana naneeküinjachipa wanee wawala süpüla laülaashin jee shiale süpüla niʼyataainjachin neʼipajee na laülaashiikana?

¹⁶ Nüneekünajachipa wanee wawala süpüla laülaashinjachin jee süpüla niʼyataainjachin neʼipajee na laülaashiikana, nnojotsü jülüjainjatüin naaʼin na laülaashiikana nütüjainjachin maʼin süpüleerua tü anüikii nikirajaakalü anain. Shia jülüjainjatka naaʼin tü sümakat tü Wiwüliakat süchiki tü nukuwaʼipainjatkat wanee anoujashi anakai süpüla laülaashinjachin jee süpüla niʼyataainjachin neʼipajee na laülaashiikana. Nnojotsü shiainjatüin jülüjain naaʼin nütüjale süpüleerua tü anüikii nikirajaakalü anain (1 Tim. 3:1-10, 12, 13; Tito 1:5-9).

17. ¿Kasa jülüjainjatka naaʼin wanee wayuu nukolojoole sümaa nüpüshi suluʼumüin wanee mma?

¹⁷ Wainma na wawalayuu akolojookana namaa nachonnii suluʼumüin wanee mma naata süka müliain naya jee shiale süpüla nantüin sünain wanee aʼyatawaa. Sutuma tia, koleejiainjana na tepichikana suluʼu wanee koleejia eere shikirajünüin tü anüikii aashajaanakat suluʼu tia mmakat. Akaataajaʼa na wayuu kachooinkana naya tepichikana, ekirajaainjana sünain tia anüikiikat süpüla mapüleeinjatüin namüin ousütaa sünain aʼyatawaa. ¿Jalainjanache naya outkajaain? ¿Outkajaainjanache naya suluʼu wanee outkajaalee eere saashajaanüin tü anüikii aashajaanakat suluʼu tia mmakat? ¿Shiataapaʼa suluʼu wanee outkajaalee eere saashajaanüin tü anüikii natüjakalü apüleerua?

18. Sünainjee tü sümakat Galacia 6:5, ¿kasa waaʼinrajatka süpüla kojutuin wamüin tü nüneekakat wanee wawala laülaakai süpüleerua nüpüshi?

¹⁸ Nia aneeküinjachika wanee wayuu laülaakai süpüleerua nüpüshi jalainjanain naya outkajaain. Nüneeküinjatü tia süka naaʼin nümüiwaʼa, jülüjainjatpejeʼe naaʼin tü kasa anainjatkalü atuma sukuwaʼipa nüpüshi (paashajeʼera Galacia 6:5). Nnojoishi wayoujüinjachin chi wawalakai sünainjee tü nüneekakat. Jaʼitasü kasain nüneeküin, kapülainjana naya waaʼin nantapa sünain tü outkajawaakat otta weeʼiyatüinjatü naalin wapüla (Roma 15:7).

19. ¿Kasa nuchuntajatka nümüin Jeʼwaa chi wayuu laülaakai süpüleerua nüpüshi?

 ¹⁹ Eeshii na wayuu outkajaakana namaa nachonnii suluʼu wanee outkajaalee eere saashajaanüin tü anüikii natüjakalü apüleerua, eepejeʼe nnojorüle nayaawatüin maʼin saaʼu na tepichikana tia anüikiikat. Jamüshiijaʼa noutkajaale eere saashajaanüin tü anüikii aashajaanakat suluʼu tia mmakat, eesüjaʼa kapüleejeerüle namüin na tepichikana nayaawatüin maʼin saaʼu tü aküjünakat sünain tü outkajawaakat otta nnojoleerü akooʼomüinraain nanoula. ¿Jamüsü sülataka tia? Shia süka nekirajünüin na tepichikana suluʼu tü koleejiaakat sünain wanee anüikii naataka suulia tü naashajaakat na wayuu kachooinkana naya. Sülatüle tia namüin, achuntuinjachi kaalinwaa nümüin Jeʼwaa chi laülaakai süpüleerua nüpüshi, naaʼinrüinjatü tia süpüla narütkaain na nüchooinkana nünainmüin Jeʼwaa jee sünainmüin tü nupueulosekat. Eeshii süpüla nekirajüin na nachooinkana sünain tü nanüikipalakat jee shiale nakolojooin suluʼumüin wanee outkajaalee eere saashajaanüin tü pütchi nayaawatakalü aaʼu maʼin na tepichikana. Jaʼitasü kasain nüneeküin wanee wayuu süpüleerua nüpüshi, nakolojoole suluʼumüin tü outkajaalee kaluʼukat waya kojutuinjana naya wamüin.

20. ¿Kasa waaʼinrajatka süpüla kojutuin wamüin na wawalayuu ekirajaakana sünain wanüikipala?

²⁰ Wekirajaaitpa anain wattain naalii na wawalayuu achajaakana sukuwaʼipa süpüla nekirajaain sünain wanee anüikii naata. Shiasaʼa sünainjee tia, eesü kapüleere namüin naküjain tü suluʼukat naaʼin. Nnojotpejeʼe shiainjatüin jülüjain maʼin waaʼin isain nachiki tia anüikiikat, shia jülüjainjatka waaʼin alin maʼin Jeʼwaa napüla otta naʼyataweein nümüin. Jülüjale waaʼin anashaatain maʼin nakuwaʼipa naya wawalayuukana, kojuteena maʼin naya wamüin. «Nnojotsü kasain paamüin tamüin», nnojoleena müin waya namüin sünainjee neʼe nnojoluin natüjain süpüleerua wanüikipala.

21, 22. ¿Kasa talataka atuma waaʼin?

²¹ Talatüsü maʼin waaʼin süka naapüin Jeʼwaa aʼyatawaa wamüin suluʼu tü outkajaaleekat. Jaʼitashii tooloyuuin, jieyuuin, maʼwayuusein, kaʼwayuusein, tepichin, laülaayuuin, watüjale jee matüjainre waya süpüleerua wanee anüikii, kojutushii maʼin waya nümüin Jeʼwaa otta namüin na wawalayuukana (Roma 12:4, 5; Col. 3:10, 11).

²² Wainma tü kasa watüjakat sünainjee tü nümakat Pablo süchiki nüʼülia wanee wayuu. Sutuma tia, watüjaajeerü aaʼu tü waaʼinrajatkat süpüla watütüleʼerüin naaʼin na wawalayuukana, alin naya wapüla otta süpüla kojutuin naya wamüin.