»Nnojoishii neʼe kamaneein na Aküjaliikana pütchi sümüin wayuu, kamaneeshii naya namüin na piamashiikana tamüʼlüin. Soʼu wanee kaʼi, eejatü wanee wayuu kanüliasü Elaine sünain aküjaa pütchi süka tü kareetachonkat. Shikitka na piamashiikana tamüʼlüin. Süchikijee tia, kiʼrashii naya, jama nekinnüin natuma.

»Sülatapa waneirua kashi, ayatüsia talatüin naaʼin na teʼetsecheinkana sutuma nekirüin naya. Otta tayakai, yootowaishi taya motsoʼo neʼe namaa. Alatüsü suulia 70 touyase soʼu tia, nnojotsü tatüjaain maʼin saaʼu tü nanoujakalü anain. Kojuyatua takua suluʼu waneirua iküleesia, nnojotpejeʼe anain saaʼin tamüin tü ekirajünakalü anain yala. Müshijeseʼe tekirajaain tamüiwaʼa sünain tü Bibliakat.

»Soʼutpünaa juyakat tia, teʼrapuʼuin pueulopaʼa wainma Aküjalii pütchi shaʼwataka süʼütpaʼa tü kareetachonkat. Kamaneeshii naya napüshuaʼa. Tasakirapa naya sünain wanee pütchi, naküjain shia tamüin sükajee tü Bibliakat, müsüjeseʼe tanoujain shiʼipaʼaya tü nekirajakalü anain.

»Soʼu wanee kaʼi, süsakiraka taya Elaine sünain tüü: ‹Saaʼin pümüin, ¿nüsülajalache wamüin Maleiwa tü mürütkalüirua?›. ‹Jamüsaʼa›, tamaka sümüin. Saashajeʼeraka tamüin Isaías 11:6-9. Soʼuleʼeya kaʼikat tia, ekirajaweeshi taya namaa sünain tü Bibliakat, nnojotpejeʼe taapaain tü karaloʼuta neitajakat na Aküjaliikana pütchi.

»Mayaainjeʼe yootowalin taya motsoʼo namaa, kamalainshaatasü tamüin tü süküjakat tamüin Elaine nümaa Brent, chi suʼwayuusekai. Naküjaka tamüin anain taashajeʼerüle Mateo sünainmüin Aluwataaushikana süpüla tayaawatüin saaʼu tü taaʼinrajatkat süpüla toushikajaain süchiirua nukuwaʼipa Cristo. Taaʼinraka tia. Maʼaka jeʼra kaʼi süchikijee tia, tachekaka tekirajünüin sünain tü Bibliakat nutuma Brent sümaa Elaine. Tia soʼujatü süseʼeruʼu juyakat 2016.

»Taʼatapajüin maʼin tü kaʼi tekirajünüinjachikalü oʼu sünain tü Bibliakat otta süpüla toʼunuinjachin sünain tü outkajawaakat. Talatüsü maʼin taaʼin jee kojutusü tamüin süka tayaawatüitpain saaʼu tü sümakat tü Bibliakat. Shiasaʼa sülatapa wanee juya, woutiisashi taya. Maaʼulu yaa, 79 touyase otta tayaawatüitpa aaʼu shiimain tü tekirajaakalü anain sünain tü Bibliakat. Teʼrüin naʼanasia Maleiwa süka nuuʼulaain taya naʼakain na aʼyataashiikana nümüin».