1. ¿Jamüsü naaʼin na wawalayuu ojuʼitinnakana apüshi naʼakajee na wawalayuukana?

MOJUSHAATASÜ naaʼin na wawalayuu ojuʼitinnakana apüshi naʼakajee na wawalayuukana. Anuu tü sümakat wanee wawala, Hilda sünülia *: «Mojusü maʼin taaʼin nünaajaapa chi taʼwayuusekai, 41 juya kasaalüin taya nümaa. Mojushaataleepejeʼe maʼin taaʼin nujuʼitinnapa chi tachonkai naʼakajee na wawalayuukana, nuuʼulaain nuʼwayuuse jee nüpütüin nüchonnii».

2, 3. Saashin Salmo 78:40, 41, ¿jamüsü naaʼin Jeʼwaa nuuʼulaale suulia anoujaa wanee aʼyataai nümüin?

² Aikajasaʼa maʼin nümüin Jeʼwaa neʼrüliijaapa wayumüin nümüin waneinnua aapiee (Jud. 6). Otta mojusia maʼin naaʼin neʼrüliijaapa wayumüin kojuyatua na israeliitakana nümüin, jama alin naya nüpüla (paashajeʼera Salmo 78:40, 41). Nuuʼulaale suulia anoujaa wanee wayuu aikai maʼin wapüla, aisü tia wamüin otta nümüin Jeʼwaa. Süka niyaawatüin saaʼu Jeʼwaa jamüin waaʼin, nükaalinjeena waya jee nümüliajeerü waaʼin.

³ Sünain ekirajaayakat tüü, wekirajaajeerü anain tü waaʼinrajatkat süpüla nükaalinjain waya Jeʼwaa nujuʼitinnüle wanee wapüshi naʼakajee na wawalayuukana otta tü waaʼinrajatkat süpüla wakaalinjain na alatakana amüin tia. Wekirajaa palajana tü nnojotkalü anain süpüla jülüjain waaʼin.

4. ¿Jamüsü naaʼin na wawalayuukana nuuʼulaale wanee nachon suulia anoujaa?

⁴ Nuuʼulaale suulia anoujaa nüchon wanee wawala eesüjaʼa jülüjale naaʼin nnojolin nükaalinjain maʼin nia süpüla ayatüin nia sünain anoujaa. Anuu nünüiki wanee wawala kanüliakai Luke ojuʼitinnakai achon naʼakajee na wawalayuukana: «Tayayaa taaʼinruʼu  kasitkai tü alatakat, mojusü taʼlapüin sutuma. Aʼyalajawaishi taya sutuma mojuin maʼin taaʼin». Shiaʼaya tü alatakat sümüin wanee wawala, Elizabeth sünülia, anuu sünüiki: «‹¿Kasache mojuka tatuma?›, maa müsü taaʼin waneepia. Jülüjapuʼusü taaʼin müin nukuwaʼipa chi tachonkai süka nnojolin tekirajüin maʼin nia nüchiki Jeʼwaa».

5. Nuuʼulaale wanee wayuu suulia anoujaa nünain Jeʼwaa, ¿jarai kasitka tia?

⁵ Soto waaʼin nuuʼulaain waya Jeʼwaa waneeküin süka waaʼin wamüiwaʼa tü waaʼinrajatkat. Müsüjeseʼe wayainjanain aneeküin waʼyataainjanale nümüin (Jos. 24:15). Eeshii waneinnua jimaʼalii jee majayünnüü nnojoliikana anain nakuwaʼipa nashi jee nei napüleerua, naneekapejeʼe naʼyataain nümüin Jeʼwaa jee waneepiain naya nümaa. Eeshii waneinnua wawalayuu anakana akuwaʼipa napüleerua nachonnii, nnojoliipejeʼe ayatüin nachonnii sünain anoujaa miyoʼuyuupa naya. Jiakana kachonshiikana, nuuʼulaale suulia anoujaa wanee jüchon, nnojo jülüjain jaaʼin jiain kasirüin tia.

6. ¿Jameerü naaʼin wanee wawala nuuʼulaale chi nüshikai jee shiale tü niikat suulia anoujaa?

⁶ Eeshijaʼa niale nüshi jee shiale nii wanee wawala ooʼulaaka suulia anoujaa, eeshiijaʼa noʼunajaale nepialuʼujee (Sal. 27:10). Tia shia wanee kasa mojushaataka atuma naaʼin na nachonniikana süka neʼrapuʼuin anain nakuwaʼipa napüleerua. Anuu tü sümakat Esther süchiki jamüin saaʼin sutuma nujuʼitinnüin chi süshikai naʼakajee na wawalayuukana: «Aʼyalajawaisü taya waneepia süka nnojoluin teʼitaain naaʼu chi tashikai nuuʼulaainjachin suulia anoujaa, nnojotsü jaʼyain naaʼu müinjatüin nukuwaʼipa. Shapaʼawaisü taaʼin naaʼu chi tashikai müleka anale nia. Eesü süntajaawaipuʼule tanainmüin wanee mmoluu, eesü isawaire tachiki tachecherüin taaʼin».

7. ¿Jamüsü naaʼin Jeʼwaa naaʼu wanee jimaʼai jee wanee majayüt ooʼulaakai nashi jee shiale nei suulia anoujaa?

⁷ Jiakana jimaʼaliikana jee majayünnüükana, müleka nujuʼitinnüle naʼakajee na wawalayuukana chi jüshikai jee shiale tü jiikat, aisia wamüin tü alatakat jümüin. Nütüjaa aaʼu Jeʼwaa jamüin jaaʼin, aishii jia nüpüla jee talatüsü naaʼin süka ayatüin jiʼyataain nümüin. Müshiʼiya wayakana, aishii jia wapüla jee talatüsü waaʼin jümaa. Soto jaaʼin, nnojoliin jiain kasirüin tü naneekakat na kachooinkana jia. Nuuʼulaain Jeʼwaa waneeküin süka waaʼin wamüiwaʼa waʼyataainjanale nümüin. Watüjaa aaʼu «wasouktinneenain waneʼewai wakua nuʼupala Maleiwa soʼuweena wane kaʼi saaʼu süpüshua tü waaʼinrakat» (Gal. 6:5).

8. ¿Kasa naaʼinrajatka na wawalayuukana sümaʼinruʼu naʼatapajüin nüleʼejüin nüchikuaʼa nünainmüin Jeʼwaa chi napüshikai? (Paashajeʼera tü pütchikat « Keeʼireesü naaʼin Jeʼwaa püleʼejüin püchikuaʼa nünainmüin»).

⁸ Nuuʼulaapa suulia anoujaa wanee wayuu aikai maʼin püpüla, piʼree amüinchi nia nüleʼejüin nüchikuaʼa nünainmüin Jeʼwaa. ¿Kasa paaʼinrajatka sümaʼinruʼu tia? Ayata pükatchinrüin punoula. Paaʼinrüle tia, aneerü pukuwaʼipa süpüleerua püpüshi, nüpüleerua chi ojuʼitinnakai otta katchinjeerü paaʼin süpüla nnojoluin mojuin maʼin paaʼin. Wekirajaa jooluʼu sünain tü paaʼinrajatkat süpüla ayatüin katchin punoula.

9. ¿Kasa paaʼinrajatka süpüla ayatüin katchin punoula? (Paashajeʼera tü pütchikat « Pütchiirua atütüleʼereetka paaʼin nuuʼulaale wanee püpüshi suulia anoujaa»).

⁹ ¿Kasa paaʼinrajatka süpüla ayatüin katchin punoula? Aleewainjachi maʼin pia nümaa Jeʼwaa  jee pükaalinjainjana na püpüshikana süpüla naaʼinrüin tiaya. Puunteerü tia paashajeʼerüle tü Bibliakat waneepia sümaa püsakireʼerüin paaʼin sünain jee puʼunawaire sünain tü outkajawaakat. Jülüjataa waaʼin sukuwaʼipa Joanna, ooʼulaashi suulia anoujaa chi süshikai jee tü suwalakat. Anuu sünüiki: «Wanaa sümaa taashajeʼerüin suluʼu tü Bibliakat süchiki Abigaíl, Ester, nüchiki Job, José otta Jesuu, anasü taaʼin sutuma. Jülüjasü maʼin taaʼin tü kasa anasü naaʼinrakat jee jutatüsü taaʼin sutuma. Jee müsia, sütütüleʼerüin maʼin taaʼin tü jayeechi ojuʼitawaikat suluʼu JW Broadcasting».

10. Saashin Salmo 32:6-8, ¿kasa waaʼinrajatka shapaale maʼin waaʼin?

¹⁰ Püküja nümüin Jeʼwaa süpüshuaʼa tü shapaakalü atuma paaʼin, shialeekajaʼa soʼu tü kaʼi mojukalü oʼu paaʼin. Puchunta nümüin chi Maleiwa aikai apüla waya süpüla pansaain tü jülüjakat paaʼin, süpüla piyaawatüin saaʼu tü alatakat jee süpüla püneeküin tü paaʼinrajatkat (paashajeʼera Salmo 32:6-8). Eesü kapüleere pümüin püküjain nümüin Jeʼwaa jamüin paaʼin, niyaawatapejeʼe maʼin saaʼu Jeʼwaa jamüin paaʼin, aishaatashi maʼin pia nüpüla jee keeʼireesü naaʼin püküjain nümüin tü suluʼukat paaʼin (Éx. 34:6; Sal. 62:7, 8).

11. Saashin Hebreokana 12:11, ¿jamüsü anainjatka wamüin tü sukuwaʼipa niʼitaakat Jeʼwaa süpüla nujuʼitinnüin wanee anoujashi naʼakajee na wawalayuukana? (Paashajeʼera tü pütchikat « Niʼitaain sukuwaʼipa Jeʼwaa nujuʼitinnüin wanee kaainjalashi süka alin waya nüpüla»).

¹¹ Jüüjüü pia sümüin tü kasa naneekakat na laülaashiikana napüleerua na wawalayuukana. Nia Jeʼwaa chi eʼitaakai sukuwaʼipa süpüla nujuʼitinnüin wanee anoujashi naʼakajee na wawalayuukana. Naainjain tia Jeʼwaa süka alin nüpüla na wawalayuukana jee alin nüpüla chi kaainjalashikai (paashajeʼera Hebreokana 12:11). Eeshiijaʼa süpüla eein wawalayuu mojushiikana amüin tü naneekakat na laülaashiikana nojuʼitirapa wanee anoujashi naʼakajee na wawalayuukana. Nnojoleetpejeʼe naküjain naya wawalayuukana tü mojukat  nutuma chi kaainjalashikai. Soto waaʼin nnojoluin watüjaain saaʼu kasain maʼin wayu tü alatakat. Shia anaka aluʼu jülüjale waaʼin anain tü naneekakat na laülaashii outkajaakana nümaa chi kaainjalashikai, süka jamüin, naaʼinrüin tia wanaapünaa sümaa tü sümakat tü Bibliakat jee jülüjasü naaʼin tü nüchekakat Jeʼwaa nüpüleerua chi kaainjalashikai (2 Crón. 19:6).

12. ¿Kasa neʼraka waneinnua wawalayuu sutuma jüüjüüin naya nümüin Jeʼwaa?

¹² Jüüjüüle pia sümüin tü kasa naneekakat na laülaashiikana eeshi süpüla pükaalinjain chi kaainjalashikai süpüla nüleʼejüinjachin nüchikuaʼa nünainmüin Jeʼwaa. Anuu sünüiki Elizabeth, tü wachuntayütkalü anülia paalapa: «Mayaainjeʼe nütaralaaichin chi wachonkai, aisü maʼin wamüin nnojoliin waashajaain nümaa. Shiasaʼa nüleʼejapa nüchikuaʼa nünainmüin Jeʼwaa, nüküjain wamüin anain tü kasa naaʼinrakat na laülaashiikana nüka jee wainmain kasa nütüjaka suluʼujee tia. Kojutuleeitpa tamüin anain maʼin nüchiaale Jeʼwaa wanee anoujashi». Anuu nünüiki Mark, chi suʼwayuusekai: «Naashin chi wachonkai wane kasa keeʼireeka atuma naaʼin nüleʼejüin nüchikuaʼa nünainmüin Jeʼwaa shia süka jüüjüüin waya sümüin tü sümakat tü Bibliakat süchiki tü wakuwaʼipainjatkat nümaa wanee anoujashi ojuʼitinnakai. Anasü waaʼin sutuma nükaalinjain waya Jeʼwaa süpüla jüüjüüin waya nümüin».

13. ¿Kasa nnojoleetka mojuin maʼin atuma paaʼin?

¹³ Paashajaa namaa paʼaleewainyuu amülialeenaka paaʼin. Namaa pia na wawalayuu laülaakana aaʼin sünain anoujaa süpüla nakaalinjain pia süpüla pansaain tü jülüjakat paaʼin (Prov. 12:25; 17:17). Anuu tü sümakat Joanna, tü wachuntayütkalü anülia paalapa: «Süka nuuʼulaain chi tashikai sümaa tü tawalakat suulia anoujaa, müsü tamüiwaʼakai taaʼin. Anapejeʼe taaʼin süka taashajaain namaa na taʼaleewainkana». ¿Kasa paaʼinrajatka nüküjale pümüin wanee wawala wanee pütchi mojeetka atuma paaʼin?

14. ¿Jamüsü motuinjatka waaʼin naainjala na wawalayuukana wamüin?

¹⁴ Püchechera paaʼin suulia jashichin pia sutuma tü namakat na wawalayuukana pümüin. Soto paaʼin, kaainjalashii waya wapüshuaʼa süka wanüiki (Sant. 3:2). Müsüjeseʼe isawalin nachiki na wawalayuukana tü nanüikinjatkat wamüin jee airuʼurule neʼe nanüiki wamüin. Jülüja paaʼin tü nümakat chi aluwataaushikai Pablo, tü makat: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala» (Col. 3:13). Anuu sünüiki wanee wawala ojuʼitinnakai wanee süpüshi naʼakajee na wawalayuukana: «Mayaainjeʼe natütüleʼereein taaʼin waneinnua wawalayuu sükajee nanüiki, nnojotsü anain tü namakat. Nükaalinjapejeʼe taya Jeʼwaa süpüla nnojoluin üttüin taaʼin nanain naya wawalayuukana». Wekirajaa sünain jooluʼu tü waaʼinrajatkat wapüshuaʼa süpüla wakaalinjain na wawalayuu ojuʼitinnakana apüshi naʼakajee na wawalayuukana.

15. ¿Kasa waaʼinrajatka napüleerua na wawalayuu ojuʼitinnakana apüshi naʼakajee na wawalayuukana?

¹⁵ Kamanee waya jee ai wapüla na wawalayuu ooʼulaakana wanee napüshi suulia anoujaa. Saashin wanee wawala kanüliakat Míriam, nnojotsü  oʼuneein shia sünain tü outkajawaakat nujuʼitinnapa chi suwalakai. Anuu sünüiki: «Mmotsü taaʼin sutuma tü aküjüneetkat tamüin nüchiki chi tawalakai, anapejeʼe taaʼin süka eein taʼaleewainyuu suluʼu tü outkajaaleekat mojukana aaʼin wanaa tamaa jee nnojoliikana aküjain pütchi mojuluʼut nüchiki. Süka eein naya tamaa, nnojotsü müin tamüiwaʼakai taaʼin». Anuu sünüiki wane wawala: «Nujuʼitinnapa chi wachonkai naʼakajee na wawalayuukana, antüshii wepialuʼumüin waneinnua wawalayuu kamaneekana maʼin. Eeshii na nnojoliikana atüjaain saaʼu tü nanüikinjatkat wamüin, aʼyalajüshii naya wamaa otta eeshii na ashajakana pütchi atütüleʼeraka waaʼin. Anasü taaʼin sutuma tü naaʼinrakat».

16. ¿Kasa waaʼinrajatka süpüla watütüleʼerüin naaʼin na wawalayuu waneepiakana nümaa Maleiwa?

¹⁶ Ayata wakatchinrüin naaʼin na wawalayuu waneepiakana nümaa Maleiwa, natüjaainjatü aaʼu alin naya wapüla (Heb. 10:24, 25). Eeshii waneinnua wawalayuu ooʼulaakana suulia aashajawaa namaa na wawalayuu ojuʼitinnakana apüshi naʼakajee na wawalayuukana. Mojutaʼaleesüjaʼa waaʼinrüle tia. Watütüleʼerüinjatü naaʼin na jimaʼalii jee na majayünnüü ojuʼitinnakana nashi jee nei naʼakajee na wawalayuukana. Jülüjataa waaʼin tü alatakat sümüin wanee wawala, María sünülia, ojuʼitinnüshi chi suʼwayuusekai naʼakajee na wawalayuukana jee nüpütüin shia. Anuu tü sümakat: «Antüshii tepialuʼumüin waneinnua taʼaleewainyuu, aʼlakajaashii naya wayaaluʼu jee eeshii tamaa tekirajapa tachonnii. Mojusü naaʼin jee aʼyalajüshii naya wanaa tamaa, asoutushii naya taaʼu wanaa sümaa süküjünüin perulaa tachiki. Anasü maʼin tü naaʼinrakat tapüleerua» (Roma 12:13, 15).

17. ¿Kasa naaʼinrajatka na laülaashiikana napüleerua na wawalayuu mojukana aaʼin?

¹⁷ Jiakana laülaashiikana, jüchajaa sukuwaʼipa süpüla jütütüleʼerüin naaʼin na wawalayuu ojuʼitinnakana apüshi naʼakajee na wawalayuukana. Niʼitaain jia Jeʼwaa süpüla jaaʼinrüin tia (1 Tes. 5:14). Jaashajaa namaa süpülapünaa jee süchikijee tü outkajawaakat süpüla jütütüleʼerüin naaʼin. Juwaraijaa naaʼu jee juʼuraaja namaa. Eeshii süpüla jujuʼituin sünain aküjaa pütchi namaa jee juunejaʼawai naya soʼu tü ai juʼwaajakalü oʼu Maleiwa sümaa jüpüshi. Kamaneeinjana na laülaashiikana namüin na wawalayuu mojukana aaʼin jee alinjana naya napüla (1 Tes. 2:7, 8).

18. Sünainjee tü sümakat 2 Pedro 3:9, ¿kasa keeʼireeka naaʼin Jeʼwaa naainjain na ooʼulaakana suulia anoujaa nünain?

¹⁸ Nnojotsü nücheküin Jeʼwaa süpüleerua eeinjatüin wayuu eekai amüloulin (paashajeʼera 2 Pedro 3:9). Jaʼitairü naainjain wanee wayuu wanee kasa mojushaatasü maʼin, keeʼireesü naaʼin Maleiwa niyaawajaain suulia tia. Soto paaʼin, naapüin Jeʼwaa nikii chi Nüchon aishikai nüpüla süpüla nülatirüin waainjala woulia. Nükaalinjeein Maleiwa na ooʼulaakana suulia anoujaa süpüla naleʼejüin nachikuaʼa nünainmüin maʼaka nüleʼejüin nüchikuaʼa chi jimaʼai maaʼinsaikai nünainmüin chi nüshikai, chi nikirajakai achiki Jesuu (Luc. 15:11-32). Wainma wayuu ooʼulaakana suulia anoujaa nünain Jeʼwaa aleʼejakana nachikuaʼa nünainmüin, talatüshii na wawalayuukana namaa jee anasü naaʼin natuma. Talatüsü saaʼin Elizabeth, tü wachuntayütkalü anülia, nüleʼejapa nüchikuaʼa chi süchonkai nünainmüin Jeʼwaa. Anuu sünüiki: «Taapüin analuʼutka namüin na wawalayuu atütüleʼerakana waaʼin süpüla jülüjain waaʼin nüleʼejeechin nüchikuaʼa chi wachonkai nünainmüin Jeʼwaa».

19. ¿Jamüsü ayatüinjatka weʼitaain waaʼin nünain Jeʼwaa?

¹⁹ Weʼitaa waaʼin nünain Jeʼwaa waneepia. Nnojorüleejaʼa süpüla nuluwataain waya sünain aaʼinraa wanee kasa mojeetka atuma wakuwaʼipa. Nia chi Washi kamaneekai jee amüliajakai waya, aishii nüpüla napüshuaʼa na aikana apüla nia jee na aʼwaajakana nia. Nnojoleena nüpütüin waya wamüiwaʼa weʼrapa müliaa (Heb. 13:5, 6). Anuu tü nümakat Mark, chi wachuntayüikai anülia paalapa: «Nnojoishii nüpütüin waya Jeʼwaa wamüiwaʼa weʼrapa müliaa, eeshi nia wamaa waneepia». Nia neʼe Jeʼwaa chi akatchinrakai waaʼin (2 Cor. 4:7). Sutuma tia eesü süpüla ayatüin katchin wanoula, jaʼitashi nuuʼulaain wanee wapüshi suulia anoujaa nünain Jeʼwaa.