EKIRAJAAYA 26
JAYEECHI 123 Jaa müshii waya nümüin Maleiwa
Wayaawatüinjatü aaʼu eein tü kasa nnojotkat watüjaain saaʼu
«Isasü wachiki wayaawatüin saaʼu süpüshuaʼa tü kasa naaʼinrakat chi Pülashikai maʼin» (JOB 37:23).
TÜ WATÜJEETKAT
Mayaainjeʼe eein kasa nnojotka watüjaain saaʼu süchiki tü kasa alatüinjatkat mapeena, wachechereerü waaʼin soʼunnaa müliaa weʼitaale waaʼin nünain Jehová jee wayaawatüle saaʼu eein tü kasa isakat wachiki.
1. (1) ¿Kasa nukumajaka apüla waya Jehová? (2) ¿Jamüsü nukumajakaʼa waya suluʼu müin wakuwaʼipa?
NUKUMAJÜIN waya Jehová süpüla pansaainjatüin tü jülüjakat waaʼin, süpüla watüjaain aaʼu wanee kasa jee wayaawatüin saaʼu sümaa waaʼinrüin shia. Nukumajüin waya Jehová suluʼu müin wakuwaʼipa süpüla watüjaain saaʼu tü nütüjaakalü aaʼu otta süpüla pansaainjatüin tü jülüjakat waaʼin sümaa tü nüchekakat wapüleerua jee waneeküin tü kasa anakat noʼuluʼu (Prov. 2:1-5; Roma 12:1).
2. (1) ¿Kasa tü isakat wachiki? (Job 37:23, 24; piirakaa sümüin tü ayaakuaakat). (2) ¿Jamüsü aneetkaʼa wakuwaʼipa wayaawatüle saaʼu eein tü isakat wachiki?
2 Mayaainjeʼe nukumajüin waya Jehová süpüla watüjaain saaʼu wanee kasa, isasü wachiki watüjaain saaʼu süpüshuaʼa tü nütüjaakalü aaʼu Maleiwa (paashajeʼera Job 37:23, 24). Jülüjataa waaʼin nukuwaʼipa Job. Asakinnüshi nia nutuma Jehová süpüla niyaawatüin saaʼu eein wainma kasa nnojotka nütüjaain aaʼu. Sükajee tia, niyaawata aaʼu Job nunouteʼerüinjatüin tü jülüjakat naaʼin jee nnojoluinjatü yaletüin naaʼin (Job 42:3-6). Müshiʼiya wayakana, aneerü wakuwaʼipa jülüjale waaʼin eein tü kasa nnojotkat watüjaain aaʼu. Waaʼinrüle tia, nnojoleerü yaletüin waaʼin jee kanouleena waya sünain nüküjeerüin wamüin Jehová tü watüjaainjatkalü aaʼu süpüla anain tü kasa waneekakat (Prov. 2:6).
Maʼaka naaʼin Job eesü tü kasa anasü weʼrakat sünainjee nnojoluin watüjaain saaʼu waneirua kasa. (Paashajeʼera tü pütchikat 2).
3. ¿Kasa wekirajaainjatka anain sünain ekirajaayakat tüü?
3 Sünain ekirajaayakat tüü, wekirajaajeerü anain süchiki tü kasa nnojotkat watüjaain aaʼu otta jamüin kapüleeka wamüin nnojoluin watüjaain saaʼu tia. Wekirajaajeerü anain jamüin aneetka wakuwaʼipa sünainjee nnojoluin watüjaain saaʼu waneirua kasa. Wekirajaapa sünain tia, katchinjeerü wanoula sünain nüküjeerüin wamüin Jehová tü watüjaainjatkalü aaʼu, jama nütüjaain saaʼu süpüshuaʼa kasa (Job 37:16).
NNOJOTSÜ WATÜJAAIN AAʼU TÜ KAʼI SAJAʼLAJAAINJATKALÜ OʼU TÜ KASA ALATAKAT SAINKÜIN MMA
4. ¿Kasa tü nnojotkat watüjaain aaʼu saashin Mateo 24:36?
4 (Paashajeʼera Mateo 24:36). Nnojotsü watüjaain aaʼu tü kaʼi sajaʼlajaainjatkalü oʼu tü kasa alatakat sainküin mma. Jamüshijaʼa Jesús wanaa sümaa yaajachin nia mmapaʼa, nnojotsü nütüjaain aaʼu «tü kaʼi jee tü oora sülatüinjatkalü oʼu tia». a Nüküjapejeʼe namüin na nikirajüinkana niain neʼe Jehová «laülaakai süpüla eʼitawaa tü kaʼi sülatüinjatkalü oʼu tia» (Aluw. 1:6, 7). Nüneeküitpa Jehová tü kaʼi najaʼttirüinjatkalü oʼu tü kasa alatakat sainküin mma. Nia neʼe Jehová atüjaakai saaʼu joujeerüin tia kaʼikat.
5. ¿Kasa eeka süpüla sülatüin wamüin sutuma nnojoluin watüjaain saaʼu tü kaʼi sajaʼttinnüinjatkalü oʼu tü kasa alatakat sainküin mma?
5 Nnojotsü watüjaain saaʼu wattale jee sülüʼülaale tü kaʼi najaʼttirüinjatkalü oʼu Maleiwa tü alatakat sainküin mma. Sutumajee tia, eesüjaʼa süshapajaale waaʼin jee seemiajaale wanoula sünain aʼatapajaa tia kaʼikat, shialeekajaʼa kakaliainnale waʼyataain nümüin Jehová. Eesüjaʼa kapüleere wamüin wachecherüin waaʼin meeʼerapalaale waya atumawaa jee shiale natuma na wapüshikana saaʼujee nnojotyülin süntüin tia kaʼikat (2 Ped. 3:3, 4). «Mapüleejeerü tamüin tachecherüin taaʼin jee taʼatapajüin tia kaʼikat tatüjaale aaʼu tü kaʼi sajaʼttinnüinjatkalü oʼu tü kasa alatakat sainküin mma», eeshiijaʼa wamüle.
6. ¿Kasa atüjaaneetka aaʼu sutuma nnojoluin watüjaain saaʼu tü kaʼi najaʼttirüinjatkalü oʼu Jehová tü kasa alatakat sainküin mma?
6 Sutuma nnojoluin nüküjain wamüin Jehová tü kaʼi najaʼttirüinjatkalü oʼu tü kasa alatakat sainküin mma, atüjaaneerü aaʼu sükajee wakuwaʼipa waʼyataale nümüin Jehová saaʼujee alin nia wapüla jee shiimainre kanoulain waya nünain. Nnojoleena waya ooʼulaain suulia aʼyatawaa nümüin Jehová süntapa tü kaʼi najaʼttirüinjatkalü oʼu tü kasa alatakat sainküin mma. Aʼyataweeshii waya nümüin Jehová süpüla kaʼikat süpüshuaʼa, nnojotsü anain jülüjakuʼu müle waaʼin joujeerüin süntüin tia kaʼikat, shia anaka aluʼu jülüjale waaʼin tü eejeetkat sünainjee. Jülüjale waaʼin tü naaʼinrüinjatkat Maleiwa wapüleerua aleeweena maʼin waya nümaa jee aʼyataweena waya nümüin süka süpüshuaʼa waaʼin maʼaka nücheküin shia wapüleerua (2 Ped. 3:11, 12).
7. ¿Kasa tü watüjaakalü aaʼu?
7 Anasü jülüjale waaʼin tü watüjaakalü aaʼu. Watüjaa aaʼulu sülüʼülüin sükalia süpüla sajaʼttüin tü kasa mojusükat soʼujee 1914. Watüjaa aaʼulu tia sutuma tü nüküjatüjütkalia Jehová suluʼu tü Bibliakat otta saaʼujee nüküjain wamüin jamüinjatüin sukuwaʼipa wayuu soʼu kaʼikat tia. Sutumajee tia, watüjaa aaʼulu sülüʼülüin «tü nükaliakat Jehová» (Sof. 1:14). Wane kasa watüjaka shia waküjainjanain pütchi sümüin wayuu maʼleekalia «süchiki nuluwataainjachin Jehová» (Mat. 24:14). Shia waaʼinraka tia maaʼulu yaa, aküjashii waya pütchi suluʼu 240 mma jee alatüshii suulia 1.000 anüiki waküjakalü aluʼu pütchi. ¿Aashin talatüin waaʼin sünain aküjaa pütchi mayaainjeʼe nnojoliin watüjaain saaʼu tü kaʼi jee tü oora sajaʼttinnajatkalü oʼu tü kasa alatakat sainküin mma?
NNOJOTSÜ WATÜJAAIN SAAʼU TÜ NAAʼINRAJATKAT JEHOVÁ SÜPÜLA NÜKAALINJAIN WAYA
8. ¿Jamaluʼulu tü pütchikat «tü kasa naainjakat Jehová chi Maleiwa shiimainshikai»? (Eclesiastés 11:5).
8 Nnojotsü watüjaain saaʼu «tü kasa naainjakat [Jehová] chi Maleiwa shiimainshikai» (paashajeʼera Eclesiastés 11:5). ¿Jamaluʼulu tia pütchikat? Eesüjaʼa shiale nuuʼulaain Jehová sülatüin wanee kasa jee eeshijaʼa naaʼinrüle wanee kasa süpüla nikeraajüin tü keeʼireekat naaʼin. Nnojotsü watüjaain saaʼu jamüin nuuʼulaaka Maleiwa sülatüin waneirua kasa jee nnojotsü watüjaain saaʼu süpüshuaʼa tü naaʼinrakat Jehová süpüla nükaalinjain waya (Sal. 37:5). Isasü wachiki watüjaain saaʼu tia maʼaka isain nachiki na científicokana natüjaain saaʼu jamakuwaʼipalüin süpüla nimiyoʼulaain wanee joʼuu süleʼeruʼu nii.
9. ¿Kasa eeka süpüla sülatüin wamüin sutuma nnojoluin watüjaain saaʼu tü naaʼinrajatkat Jehová süpüla nükaalinjain waya?
9 Süka nnojoluin watüjaain saaʼu tü naaʼinrajatkat Jehová süpüla nükaalinjain waya, eesüjaʼa wainmajüle waaʼin suulia wakooʼomüinrüin waʼyataain nümüin Jehová jee suulia wakolojooin suluʼumüin wanee mma eere choʼujaain Aküjalii pütchi. Jee eesüjaʼa jülüjale waaʼin nnojoluin talatüin naaʼin Jehová wamaa nnojorüle wountuin wanee kasa waʼyataakalü achiirua, maʼaka saaʼin wojuʼitawalin sünain aküjaa pütchi shiiʼiree wekirajüin wayuu sünain tü Bibliakat sümaa nnojoluin eein wayuu ekirajaweekana wamaa. Eeshiijaʼa wakaalinjale sünain akumajaa piichi eere nuʼwaajünüinjachin Jehová jee sülatalaʼa sümaka wanee kasa ataʼülaka sukuwaʼipa tia aʼyatawaakat. Sülatüle wamüin tia, eesüjaʼa jülüjale waaʼin nnojoluin nükaalinjain waya Jehová.
10. ¿Jameerü wakuwaʼipa sutuma nnojoluin watüjaain saaʼu tü naaʼinrajatkat Jehová süpüla nükaalinjain waya?
10 Sutuma nnojoluin watüjaain saaʼu tü naaʼinrajatkat Jehová süpüla nükaalinjain waya nnojoleerü yaletüin waaʼin, wayaawateerü aaʼu eein tü isakat wachiki jee wayaawateerü aaʼu niain neʼe Jehová atüjaakai saaʼu tü anainjatkalü atuma wakuwaʼipa (Is. 55:8, 9). Müsüjeseʼe watüjaain saaʼu aneerüin sukuwaʼipa wanee kasa waneekaka jülüjale waaʼin tü nümakat Jehová wamüin. Anale wakuwaʼipa sünain aküjaa pütchi jee sünain akumajaa wanee piichi eere nuʼwaajünüinjachin Jehová, wayaawata aaʼu niain Jehová akaalinjaka waya (Sal. 127:1; 1 Cor. 3:7). Mojukuwaʼiparüle wanee kasa waaʼinraka nnojoleerü shapaain waaʼin süka watüjaain saaʼu niʼrüin Jehová süpüshuaʼa kasa jee nunouteʼereerü sukuwaʼipa wanee kasa soʼu tü kaʼi anakalü oʼu shia nümüin (Is. 26:12). Aʼyataashii waya nümüin Jehová süka süpüshuaʼa waaʼin sümaa watüjaain aaʼu nükaalinjeenain waya. Watüjaa aaʼu nuʼunirüin Jehová wakuwaʼipa mayaainjeʼe nnojoluin naaʼinrüin kasa pülasü wapüleerua maʼaka naaʼinrüin shia sümaiwa (Aluw. 16:6-10).
11. ¿Kasa watüjaaka aaʼu?
11 Aneerü wakuwaʼipa jülüjale waaʼin tü kasa watüjaakalü aaʼu. Jamüshiijaʼa waya watüjaa aaʼulu aipüraliin wayuu Jehová, lotuin nukuwaʼipa, kekiin nia jee kojutusü nümüin tü waaʼinrakat nüpüleerua jee tü waaʼinrakat napüleerua na wawalayuukana otta naapeerü kasa anasü namüin na wayuu waneepiakana nümaa (Heb. 11:6).
NNOJOTSÜ WATÜJAAIN SAAʼU JAMEERÜIN WAKUWAʼIPA WANEEMÜIN KAʼI
12. ¿Kasa nnojotka watüjaain saaʼu saashin Santiago 4:13, 14?
12 (Paashajeʼera Santiago 4:13, 14). Nnojotsü watüjaain saaʼu jameerüin wakuwaʼipa waneemüin kaʼi, eesüjaʼa süpüla sülatalaʼa sümüle wanee kasa wamüin (Ecl. 9:11). Isasü wachiki watüjaain saaʼu aneerüle sukuwaʼipa tü kasa waaʼinrajatkat jee nnojotsü watüjaain saaʼu kateerüle woʼu wanaa sümaa tia.
13. ¿Jamüsü nnojotkaʼa anain jülüjakuʼu müle waaʼin tü eekat süpüla sülatüin wamüin waneemüin kaʼi?
13 Shapaajeerü waaʼin jee mojeerü waaʼin waneepia jülüjakuʼu müle waaʼin tü kasa eekat süpüla sülatüin wamüin waneemüin kaʼi. Eesüjaʼa yüülale waaʼin sülatalaʼa sümüle wanee kasa wamüin. Jee nnojorüle weʼrüin shikeraajüin wanee kasa waʼatapajakat eesüjaʼa sümalajaale waaʼin (Prov. 13:12).
14. ¿Kasa talateetka atuma waaʼin? (Piirakaa sümüin tü ayaakuaakat).
14 Atüjaaneerü aaʼu waʼyataain nümüin chi Washi iipünaajachikai saaʼujee alin nia wapüla wachecherüle waaʼin soʼunnaa müliaa. Watüjaa aaʼulu sünainjee tü sümakat tü Bibliakat nnojoleerüin nüsünneʼerüin Jehová woulia süpüshuaʼa tü müliaa weʼrakat jee nnojoluin niain aneeküin tü alatüinjatkat wamüin waneʼewai wakua. Nütüjaa aaʼulu Jehová nnojoluin neʼe talatüin waaʼin sünainjee watüjaain saaʼu tü alatüinjatkat mapeena, shia talataka atuma waaʼin woonoole sümaa tü nünüikikat (Jer. 10:23). Jülüjale waaʼin tü nümakat Jehová süpülapünaa waneeküin wanee kasa müshii wamakai aaʼin: «Shialejeʼeya nücheküin tia Jehová wapüleerua, waaʼinreetkalaka tüü jee shialejeʼeya tü makat» (Sant. 4:15).
Tü anakalü atuma wakuwaʼipa shia woonoole sümaa tü nuluwataakalü anain Jehová. (Paashajeʼera tü pütchikat 14 otta 15). b
15. ¿Kasa watüjaaka aaʼu süchiki tü alatüinjatkat mapeena?
15 Mayaainjeʼe nnojoluin watüjaain saaʼu tü alatüinjatkat waneemüin kaʼi, watüjaa aaʼulu eein süpüla katüin woʼu süpüla kaʼikat süpüshuaʼa nutuma Jehová chaa iipünaa jee shiale yaa saaʼu tü mmakat. Watüjaa aaʼulu nikeraajeerüin Jehová süpüshuaʼa tü nümakat süka niain wanee Maleiwa matüjainkai aküjaa alawaa (Tito 1:2). Müshijeseʼe nümüin: «Taya aküjatüjüikai jamüinjatüin sukuwaʼipa sajaʼttia wanee kasa. Tayaʼala neʼe aküjakai süpüshuaʼa tü kasa nnojoyütkalia alatüin». Ekeraajüsü waneepia tü nümakat Jehová jee ayateeria ekeraajüin tü nnojoyütkalia alatüin (Is. 46:10). Watüjaa aaʼulu nnojoluin eein wanee kasa amalajeʼereetka waalin nüpüla Maleiwa (Roma 8:35-39). Kekiijeena waya nutuma Jehová, nümülialeerü waaʼin jee nükatchinreerü waaʼin weʼrüle müliaa. Watüjaa aaʼulu nükaalinjeenain waya waneepia jee eʼreena waya kasa anasü nutuma (Jer. 17:7, 8).
ISASÜ WACHIKI WAYAAWATÜIN SAAʼU SÜPÜSHUAʼA TÜ NÜTÜJAAKALÜ AAʼU JEHOVÁ WACHIKI
16. ¿Kasa nütüjaaka aaʼu Jehová wachiki? (Salmo 139:1-6).
16 (Paashajeʼera Salmo 139:1-6). Niʼraajüin maʼin wakuwaʼipa chi Kakumalakai waya. Nütüjaa aaʼulu jamüin waaʼin jee tü jülüjakat waaʼin, kachipünaashii waya naaʼin. Nütüjaa aaʼulu Jehová tü suluʼukat waaʼin, jamüin waküjaka wanee kasa, tü waaʼinrakat jee jamüin waaʼinraka shia. Nüküjain David niʼrüin Jehová süpüshuaʼa tü kasa waainjakat jee naaʼinmajüin waya waneepia. Anataʼaleesüjaʼa maʼin wakuwaʼipa süka kachipünaain waya naaʼin chi Laülaashikai saaʼu kasa süpüshuaʼa, chi kakumalakai tü sirumatuʼukat jee tü mmakat, chi Pülashikai maʼin. «Atüjashaatashi maʼin pia, isasü tachiki tayaawatüin saaʼu süpüshuaʼa tü pütüjakat», müshi David (Sal. 139:6).
17. ¿Jamüsü eekaʼa süpüla kapüleein wamüin wayaawatüin saaʼu niʼraajüin maʼin wakuwaʼipa Jehová?
17 Eesüjaʼa kapüleere wamüin jülüjain waaʼin alin waya nüpüla Jehová jee kachipünaain waya naaʼin saaʼujee sukuwaʼipa wepijia, sukuwaʼipa wayuu eere kepiain waya jee tü wanoujapuʼukalü anain. Eesüjaʼa mojule maʼin waaʼin sutuma wanee kasa mojusü waainjaka paala jee jülüjain waaʼin nnojoluin kasajanain waya nümüin Jehová jee nnojoluin aleeweein nia wamaa, mapuʼusia naaʼin David (Sal. 38:18, 21). Wanee wayuu aʼyataakai süchiirua nunouteerüin nukuwaʼipa eesüjaʼa süpüla nüsakireʼerüin naaʼin sünain tüü: «Niʼraajülejeʼe Jehová takuwaʼipa, ¿jamakaʼa nuchuntaka tamüin tayoutuinjatüin wanee kasa anaka saaʼin tamüin?».
18. ¿Jamüsü wayaawatüinjatkaʼa saaʼu niʼraajüin maʼin wakuwaʼipa Jehová woulialeʼeya wayakana? (Piirakaa sümüin tü ayaakuaakat).
18 Wayaawatüinjatü saaʼu niʼraajüin maʼin wakuwaʼipa Jehová woulialeʼeya wayakana. Niʼrüin Jehová tü nnojotkat weʼrüin sünain wakuwaʼipa maʼaka saaʼin tü anakat watuma jee tü mojukat sünain wakuwaʼipa. Ayatüshia alin waya nüpüla Jehová jama niyaawatüin aaʼu jamüin waaʼin jee jamüin waaʼinraka wanee kasa (Roma 7:15). Aʼyataajeena waya nümüin Jehová süka süpüshuaʼa waaʼin sümaa talatüin waaʼin wayaawatapa saaʼu nütüjaain saaʼu Jehová tü eekat süpüla wountuin.
Mayaainjeʼe eein tü kasa nnojotkat watüjaain saaʼu wachecherüin waaʼin soʼunnaa müliaa jama watüjaain saaʼu tü naaʼinrüinjatkat Maleiwa wapüleerua mapeena. (Paashajeʼera tü pütchikat 18 otta 19). c
19. ¿Kasa watüjaka süchiki nukuwaʼipa Jehová?
19 Nnojotsü wainmajüin waaʼin aire waya nüpüla Jehová (1 Juan 4:8). Sutuma alin waya nüpüla Jehová nüküjain wamüin tü waaʼinrajatkat süpüla anain wakuwaʼipa. Niʼreein waya Jehová katüin woʼu süpüla kaʼikat süpüshuaʼa müshijeseʼe naapüin nikii chi Nüchonkai süpüla outajachin nia waaʼu. Saaʼujee naapajiraain nikii Jesús waaʼu eesü süpüla anain wakuwaʼipa noʼuluʼu Jehová mayaainjeʼe waleʼeruʼuin süchiki kaainjalaa (Roma 7:24, 25). Watüjaa aaʼu «nülanaʼaleeinña chi Maleiwakai suulia tü waaʼinkat jee nütüjaa aaʼu kasa süpüshuaʼa» (1 Juan 3:19, 20). Niʼraajüin maʼin wakuwaʼipa Jehová jee nütüjaa aaʼulu nnojoluin isain wachiki waaʼinrüin tü nüchekakat.
20. ¿Jamüsü nnojoluinjatkaʼa shapaakuʼu müin waaʼin saaʼu tü kasa nnojotkat watüjaain aaʼu?
20 Maʼaka wekirajaainnapain nüküjain wamüin Jehová tü watüjaainjatkalü aaʼu. Wayaawatüinjatü saaʼu eein tü kasa isakat wachiki jee nnojotsü shapaakuʼu müinjatüin waaʼin saaʼu tü kasa nnojotkat watüjaain saaʼu. Shia anaka aluʼu jülüjale waaʼin tü nüküjakat wamüin Jehová. Waaʼinrüle tia, jaʼyeerü waaʼu kanoulain waya nünain Jehová, «chi atüjaakai saaʼu kasa süpüshuaʼa» (Job 36:4). Mayaainjeʼe eein tü kasa nnojotkat watüjaain aaʼu, talatüshii waya süka watüjaain saaʼu nikirajeenain waya Jehová waneepia suluʼu tü mma jeketükat (Ecl. 3:11).
JAYEECHI 119 Kooʼomüin maʼin wanoula
a Nieechi Jesús nekiipüʼüka na atkaainjanakana namaa na nümaajanakana Satanás. Sutuma tia wayaawata aaʼulu nütüjaaitpain saaʼu Jesús tü kaʼi süntüinjatkalü oʼu Armagedón jee tü kaʼi nükanajüinjatkalü oʼu na nüʼünüükana (Apoc. 6:2; 19:11-16).
