¿Jarat tü wetsiikulo kamalainka pümüin suluʼujee tü Bibliakat? Eesüjaʼa shiale wanee wetsiikulo atütüleʼeraka paaʼin, amülialaka paaʼin jee shiale wanee achecheraaka atuma paaʼin (Sal. 119:11, 111). Eesüjaʼa motowaire paaʼin tü sümakat tia wetsiikulokot jee jalain ashajünüin shia. Anuu waneirua kasa eeka süpüla paaʼinrüin suulia motuin shia paaʼin.

• Piʼitaa wanee etiqueta suluʼu JW Library^®. Paashajeʼerapa tü Bibliakat suluʼu JW Library^® jee kamalainre pümüin wanee wetsiikulo piʼitaa wanee etiqueta sünain jee maa sünülia putuma: «Wetsiikulo kamalainka tamüin».

• Püshaja tü wetsiikulokot sünain wanee karaloʼuta jee piʼitaa shia eere piʼrüinjatüin shia. Eeshii wawalayuu aaʼinrakana tia jee neʼitaain shia sünain narouyain jee sünain supuettoʼuse naneverain. Eeshii na ayuʼlakana shiyaakua tü wetsiikulokot jee neʼitaain namüsia shia sünain nafondoin naserulaatse jee shiale suluʼu nacomputadorse.

• Püshaja tü wetsiikulokot suluʼu wanee tarjeta suulia motuin shia paaʼin. Püshaja sünain tü tarjetakat sunuumerose tü kapiitulokot otta tü wetsiikulokot, süchiiruajee tü tarjetakat püshaja tü sümakat tia wetsiikulokot. Mapa piirakaa sümüin sunuumerose tü kapiitulokot jee puuʼulaka puchuntuin tü sümakat sümaa nnojoluin paashajeʼerüin shia.