1. Püküja waneirua kasa shapaaka atuma waaʼin.

 JÜLÜJATAA WAAʼIN tü alatakat namüin waneinnua wawalayuu. Jamüshijaʼa Néstor sümaa María, tü nuʼwayuusekat, akolojoweeshii naya eere palitchon wawalayuu süpüla naküjain pütchi. * Nooʼulaainjatü waneirua kasa süpüla naaʼinrüin tia. Mmotpejeʼe naya sünain aaʼinraa tia, jama jülüjain naaʼin nnojoleenain talatüin naya paliʼirüle kasa namaʼana. Anuu joo nukuwaʼipa Biniam, kepiashi nia suluʼu wanee mma eere shiyoutuin wayuu tü waʼyataainkat. Woutiisapa nia niyaawata aaʼu süpüleerüeerüin naaʼin wayuu, mmotshi nia sutuma tia. Tü mmotkalü maʼin aaʼujee nia shia tü saainjeekat nüpüshi nüka sütüjaapa saaʼu nüküjalin pütchi nüchiki Jehová. Jülüjataa waaʼin joo sukuwaʼipa wanee wawalayaa, Valeria sünülia, kansetsü shia. Saaʼinreein tü sümakat tü Bibliakat süchiki tü ishakat. Wainma kasa saaʼinraka süpüla suusütüin anain wanee tottoolu kojutuinjachika amüin tü süneekakat. Mmotsü shia seema outaa, malaaka joo tü alatakat sümüin.

2. ¿Jamüsü wachecherüinjatka waaʼin suulia mmoluin maʼin waya?

² ¿Eeichia mmoluin pia maʼaka naaʼin naya wawalayuukana sutuma tü alatakat pümüin? Eeshii makana akuwaʼipa. Matüjainre waya achecheraa waaʼin suulia mmoluu, eesü süpüla waneeküin wanee kasa mojeetka atuma wakuwaʼipa nümaa Jehová. Shiaʼaya keeʼireeka naaʼin tia Satanás. Najayateein wakuwaʼipa mmotpa waya süpüla nnojoluinjatüin woonooin sümaa tü nuluwataakalü anain waya Jehová maʼaka saaʼin tü aküjaakat pütchi (Alat. Map. 12:17). Mayaainjeʼe mojulaain nia, niʼrülin wayumüin jee pülain nia, eesü wanee kasa wayamüleechika aka nia, ¿jarat shia?

3. ¿Kasa waaʼinrajatka süpüla wayamülüin tü mmoluwaakat?

 ³ Nnojoleena waya niimolojuin Satanás watüjaale maʼin saaʼu alin maʼin waya nüpüla Jehová otta eein nia wamaa (Sal. 118:6). Wainma kasa alataka nümüin chi ashajakai Salmo 118. Wainma nüʼünüü, naʼakajee nüʼünüü eejana na kojutukana sutuma wayuu (wetsiikulo 9 otta 10). Eesü kaʼi nüchecherüinjatka oʼu naaʼin soʼunnaa tü alatakat nümüin (wetsiikulo 13). Otta nüchiaain nia Jehová (wetsiikulo 18). Mayaainjeʼe sülatüin tia nümüin, «nnojoleechi taya mmoluin» müshi nia suluʼu tü jayeechi nukumajakat. ¿Jamüshi nnojoika mmoluin nia? Süka nütüjaain saaʼu alin maʼin nia nüpüla Jehová mayaainjeʼe nüchiaain nia. Nütüjaa aaʼu chi salmistakai nükaalinjeechin nia chi Maleiwa aipüraikai jaʼitasü kasain alatüin nümüin (Sal. 118:29).

4. ¿Kasa mmoluu wayamüleetka wayaawatüle saaʼu alin waya nüpüla Jehová?

⁴ Wayaawatüinjatü saaʼu alin waya nüpüla Jehová waneʼewai wakua. Watüjaale saaʼu tia, nnojoleena waya mmoluin seema iseerüin wachiki waapüin tü kasa choʼujaakat sümüin wapüshi, nnojoleena mmoluin waya seema wayuu otta seema outaa. Na wawalayuu wachuntakana anülia suluʼu pütchi waneesia nayamülüin tü mmotkalü eema naya süka nayaawatüin saaʼu alin naya nüpüla Jehová.

5. Püküja waneirua kasa shapaaka atuma naaʼin wanee wayuu laülaakai saaʼu nüpüshi. (Piirakaa sümüin tü ayaakuaa sünainkat süta tü rewiisütakat).

⁵ Na wawalayuu laülaakana saaʼu napüshi, kojutusü maʼin namüin naaʼinmajüin napüshi (1 Tim. 5:8). Piale wanee laülaakai saaʼu püpüshi, eesüjaʼa shapaale paaʼin suulia amüloulin piʼyataain soʼunnaa tü ayuuliikat COVID-19. Eesüjaʼa shapaale paaʼin süka iseerüin püchiki paapüin tü neküinjatkat otta tü nepiainjatkat. Eesüjaʼa jülüjale paaʼin nnojoleechin talatüin pia palitchonle kasa pümaʼana maʼaka tü jülüjakat naaʼin Néstor sümaa María. Sutuma mmoluin wayuu seema tia, wainma na wawalayuu najayatakana Satanás süpüla nooʼulaain suulia aʼyatawaa nümüin Jehová.

6. ¿Kasa keeʼireeka naaʼin Satanás wekiiruʼuinjatüin?

⁶ Keeʼireesü naaʼin Satanás wekiiruʼuinjatüin nnojoluin jülüjain waya naaʼin Jehová waneʼewai wakua otta nnojoleenain waya kachipünaain naaʼin soʼunnaa choʼujaain kasa sümüin wapüshi. Wekiiruʼule tia, shieerü waaʼinmaaka maʼin tü waʼyataainkat jaʼitasü waaʼinrüin wanee kasa nnojotka anain saashin tü Bibliakat.

7. ¿Kasa nüküjaka wamüin Jesús?

⁷ Nia neʼe Jesús eʼraajaka maʼin nukuwaʼipa chi Nüshikai, müshijeseʼe nümüin wamüin mayaa: «Süpülapünaa jüchuntüin, nütüjaa aaʼut chi Jüshikai Maleiwa süpüshua tü cheʼojaakat jümüin» (Mat. 6:8). Nütüjaa aaʼu naapeein maʼin wamüin Jehová tü kasa choʼujaakat wamüin. Laülaashi waaʼu Jehová, müsüjeseʼe naaʼinreerüin wapüleerua tü nuluwataakalü anain na laülaakana saaʼu napüshi, tü aküjünakat suluʼu 1 Timoteo 5:8.

8. (1) Süpüla nnojoluin mmoluin waya seema iseerüin wachiki waapüin tü choʼujaakat sümüin wapüshi, ¿kasa wayaawatüinjatka aaʼu? (Mateo 6:31-33). (2) ¿Kasa waaʼinrajatka süpüla washatüin nukuwaʼipa chi wawalakai sümaa tü nuʼwayuusekat suluʼuka tü ayaakuaakat?

⁸ Wayaawatüle saaʼu shiimain alin waya nüpüla Jehová otta alin nüpüla na wapüshikana, nnojoleerü wainmajüin waaʼin sünain naapeerüin tü kasa choʼujaakat sümüin wapüshi (paashajeʼera Mateo 6:31-33, TNM). Naapüin tü kasa choʼujaakat wamüin süka alin waya nüpüla, nnojotsü kasain naʼalijirüin Jehová woulia. Nukumajaiwaʼaya tü Mmakat nnojotsü niʼitaain neʼe tü kasa katüinjatkalü atuma woʼu, nukumajüinya tü kasa talatüinjatkalü atuma  waaʼin (Gén. 2:9). Jaʼitairü palitchon kasa wamaʼanaka soʼukaiwai, waapüinjatü analuʼut nümüin Jehová süka eein shia nutuma (Mat. 6:11). Sotuinjatü waaʼin anaʼleein maʼin tü kasa naapakat wamüin Jehová suulialeʼeya tü kasa wapütakat süpüleerua waʼyataain nümüin otta naapeerü wamüin kataa oʼuu süpüla kaʼika süpüshuaʼa. Shiaʼaya tia tü niyaawatakalü aaʼu Néstor sümaa María (Is. 65:21, 22).

9. ¿Kasa watüjaka sünainjee tü naaʼinrakat Néstor sümaa María?

⁹ Kepiashi Néstor sümaa María chaa Colombia, anasü maʼin nepia otta walaasü maʼin naʼyataain. Anuu nanüiki: «Ooʼulaweeshii waya suulia waneirua kasa süpüla wakooʼomüinrüin waʼyataain sünain aküjaa pütchi. Jülüjapejeʼe waaʼin nnojoleenain talatüin waya palitchonle kasa wamaʼana». ¿Kasa naaʼinraka süpüla nayamülüin tü mmotkalü eema naya? Shia jülüjain naaʼin süpüshuaʼa tü kasa anasü naapakat Jehová namüin. Süka neʼitaain naaʼin sünain naaʼinmajeenain naya Jehová, nooʼulaain tü naʼyataain walaakat, noiküin nepia otta akolojooshii naya eere palitchon na wawalayuu aküjakana pütchi. ¿Jamüsü naaʼin sutuma naaʼinrüin tia? Anuu nünüiki Néstor: «Weʼrüin shiimain shikeraajüin tü sümakat Mateo 6:33. Nnojotsü kasain choʼujaain wamüin. Talatüsü maʼin waaʼin maaʼulu suulialeʼeya paala».

10. ¿Jamüsü nnojotka ponuin waaʼin mmoluin wayuu seema wayuu?

¹⁰ Aaʼinrüshii maʼin kasa mojusü na wayuukana namüin na waneinnua soʼujee niʼrüliijaain wayumüin Adán sümaa Eva (Ecl. 8:9). Eeshii na müliakana atuma wayuu saaʼujee laülaain naya naaʼu, eeshii na kamaʼüraliikana wayuu jee airuʼutka anüiki, eeshii na ojuyaajakana na koleejiajiraakana namaa otta eeshii na eʼrüliikana wayumüin sümüin napüshi. Müsüjeseʼe mmoluin wayuu seema wayuu. ¿Kasa naaʼinraka Satanás süpüla najayatüin wakuwaʼipa soʼunnaa tia?

11, 12. ¿Jamüsü süpüla najayatüin wakuwaʼipa Satanás mmorüle waya seema wayuu?

¹¹ Süka nütüjaain saaʼu Satanás mmoluin waya seema wayuu, aaʼinrüshi nia waneirua kasa süpüla wooʼulaainjanain suulia aküjaa pütchi otta wooʼulaainjanain suulia aaʼinraa waneirua kasa nuluwataaka anain waya Jehová. Nootuin wanainmüin waneinnua sülaülashii mma süpüla napülajüin woulia tü waʼyataainkat nümüin Maleiwa otta süpüla napüleeruain waaʼin (Luc. 21:12; Alat. Map. 2:10). Wainma wayuu aküjaka perulaa jee alawaa wachiki shiiʼiree mojuin pütchi nachiki na aküjaliikana pütchi nüchiki Jehová. Alatüsü tia süka niain Satanás aluwataain naaʼu na manoujainsaliikana.  Nayasaʼa na anoujakana sünain tü alawaa aküjünakat wachiki, eeshii süpüla nayüülajüin waya, nemeeʼerainpalain waya otta müliain waya natuma (Mat. 10:36). Nnojotsü ponuin waaʼin tia süka shiain tü naaʼinrapuʼukat Satanás naka na anoujashii namaiwajanakana (Aluw. 5:27, 28, 40). Eesü waneirua kasa niimolojooko aka waya Satanás.

¹² Nnojoishii neʼe niimolojuin waya Satanás naka na sülaülashiikana mma napüleeruapa waaʼin. Niimolojuinya noʼutku waneinnua süka tü naaʼinreetkat naka na napüshikana natüjaapa saaʼu Naküjaliin pütchi. Keemaleesia tia namüin suulialeʼeya naʼyaatünüin sutuma wayuu. Süka alin napüshi napüla otta keeʼireein naaʼin alin Jehová napüla, aisü namüin naküjale pütchi airuʼutsü nüchiki chi Maleiwa shiimainshikai otta nachiki na aʼyataashiikana nümüin. Eeshii na wapüshi anoujakana mapa süchikijee nayoutapuʼuin shia paala. ¿Kasa waaʼinrajatka naʼleejüle waya na wapüshikana?

13. ¿Jamüsü anaka wayaawatüle saaʼu alin waya nüpüla Jehová wanaa sümaa naʼleejüin waya na wapüshikana? (Salmo 27:10).

¹³ Anataʼaleesüjaʼa maʼin tü pütchi aküjünakat suluʼu Salmo 27:10 (paashajeʼera). Jülüjale waaʼin waneepia alin waya nüpüla Jehová, nnojoleena mmoluin waya seema tü alateetkat wamüin, jaʼitashii nayoutule waya na wapüshikana. Watüjaa aaʼu naapeerüin wamüin Jehová kasa anasü wachecherüle waaʼin soʼunnaa tü alatakat wamüin. Naapeerü wamüin tü choʼujaakat wamüin, tü talateetkalü atuma waaʼin otta tü aleeweenakalü atuma waya nümaa. Nnojoishi eein wanee wayuu eekai süpüla naapüin tia wamüin. Shiaʼaya tia niyaawataka saaʼu Biniam, chi wachuntayüikai anülia suluʼu pütchi waneesia.

14. ¿Kasa watüjaka sünainjee tü naaʼinrakat Biniam?

¹⁴ Nüneekaka Biniam nüküjalin pütchi nüchiki Jehová mayaasüjeʼe nütüjaain saaʼu napüleerueerüin naaʼin na sülaülashiikana mma. Anuu nünüiki: «Kapüleesia tamüin süka napüleeruain taaʼin na sülaülashiikana mma. Mmotpejeʼe maʼin taya seema nayoutuin taya na tapüshikana. Nnojotsü mojeein naaʼin chi tashikai tatuma otta nnojotsü keeʼireein taaʼin mojutuin taya namüin na tapüshikana saalinjee tanoujain». ¿Kasa naaʼinraka Biniam süpüla nnojoluin mmoluin nia? Shia jülüjain naaʼin alin nia nüpüla Jehová otta naaʼinmajüin na aikana apüla nia. Anuu sooʼomüin nünüiki Biniam: «Jülüjasü taaʼin tü naaʼinrakat Jehová napüleerua na eʼitaakana naaʼin nünain soʼunnaa maʼletsein otta na achechetkana naaʼin soʼunnaa nalerajünüin jee  nashutunüin aaʼu sutuma wayuu. Tatüjaa aaʼu aneerüin takuwaʼipa nutuma Jehová tachecheraale maʼin nünain. Kojuyatua tataʼünnüin jee müliain taya atumawaa. Soʼunnaa tü müliaa teʼrakat, tayaawata aaʼu nükaalinjain Jehová na waneepiakana nümaa». Müshi Jehová maʼaka naaʼin wanee nüshi nümüin Biniam otta müshii aka saaʼin nüpüshi nümüin na anoujakana wanaa nümaa.

15. ¿Jamüshii mmotka waya seema outaa?

¹⁵ Waʼünüü tü outaakat saashin tü Bibliakat (1 Cor. 15:25, 26, TNM). Eesüjaʼa shapaale maʼin waaʼin sutuma jülüjain waaʼin outeenain waya jee outeenain na wapüshikana, shialeekajaʼa mayeinre waya. ¿Jamüshii mmotka waya seema outaa? Shia süka niʼitaain suluʼu waaʼin Jehová katüinjatüin woʼu waneepia (Ecl. 3:11). Eesü waneirua kasa anasü waaʼinraka sutuma mmoluin waya seema outaa: anasü weküin, aainjashii waya ejercicio, nnojotsü weʼrayaain sümüin wakuwaʼipa, eʼrajeʼetshii waya otta asajüshii waya emiraluushi ayuuire waya.

16. ¿Kasa naaʼinraka Satanás süpüla najayatüin wakuwaʼipa sutuma mmoluin waya seema outaa?

¹⁶ Nütüjaa aaʼu Satanás kojutuin wamüin tü kataakalü oʼuu. Nüküjainjeseʼe waaʼinreerüin kasa eekai eein shiiʼiree katüin woʼu, jaʼitasüjaʼa waaʼinrüin wanee kasa mojeetka atuma wakuwaʼipa noʼuluʼu Jehová (Job 2:4, 5). ¡Alaakaiche maʼin nia! Süka eein süpüla jamajüin waya nutuma, najayatüin mmoluin waya seema outaa süpüla wayüülajüin Jehová (Heb. 2:14, 15). Eeshii süpüla niimolojooin waya Satanás nakajee waneinnua wayuu süpüla naküjain wamüin noʼuteerüin waaʼin nnojorüle wooʼulaain suulia anoujaa. Eesüjaʼa süpüla najayatüin wakuwaʼipa Satanás soʼunnaa pasiruwaain jee ayuuijaain waya shiiʼiree waaʼinrüin wanee kasa nnojotka anain noʼuluʼu Jehová. Eesüjaʼa napüleeruale waaʼin na tottootkana jee nayale na wapüshi manoujainkana shiiʼiree weʼiteʼerüin isha wanain, tü mojukat noʼuluʼu Jehová. Eeshiijaʼa süpüla nemeejüin waya waneinnua wayuu süpüla waapaain wanee tratamiento nnojotka anain saashin tü Bibliakat.

17. Saashin Roma 8:37-39, ¿jamüshii nnojoliinjanaka mmoluin waya seema outaa?

¹⁷ Nnojoishi jaralin outeein waʼakajee. Outule waya watüjaa aaʼu soteenain waya naaʼin Jehová sümaa ayateenain alin waya nüpüla (paashajeʼera Roma 8:37-39). Müshii katakana noʼu nümüin Jehová na naʼaleewainyuu outuinnapakana (Luc. 20:37, 38). Nüsoʼireʼereein maʼin naaʼin (Job 14:15). Naapüin Jehová wanee kasa kojutuka maʼin süpüla katüinjatüin woʼu waneepia (Juan 3:16, TNM). Wayaawatüin maʼin saaʼu alin waya nüpüla sümaa naaʼinmajüin waya. Müshijeseʼe nnojolinjachin wayüülajüin Jehová mayeinre maʼin waya jee woʼutuneere aaʼin. Tü waaʼinrakat soʼunnaa tia shia wachuntuin kaalinwaa nümüin süpüla nümüliajüin waya, süpüla naapüin kekiwaa wamüin otta süpüla nükatchinrüin waaʼin. Shiaʼaya saaʼinrakat tia Valeria nümaa suʼwayuuse (Sal. 41:3).

18. ¿Kasa watüjaka sünainjee tü saaʼinrakat Valeria?

¹⁸ Wanaa sümaa 35 suuyase Valeria aküjünüsü sümüin eein wanee kanset sünain jashichika maʼin. Jülüjataa waaʼin tü saaʼinrakat süka alin Jehová süpüla. Anuu sünüiki: «Yaataayaai waaʼin süküjünapa kanserüin taya. Shia neʼe shipikat tawaʼnnüinjatüin. Wainma tottoot toʼunakana amaʼanamüin, nnojoishi eein waneeshia eekai nuwaʼleein taya sümaa nnojoluin niʼitaain isha tanain. Ayoʼujaasü maʼin taaʼin, nnojotpejeʼe teʼiteʼerüin isha tanain süpüla toonooinjatüin sümaa nünüiki Maleiwa. Jintuluiwaʼaya taya jee miyoʼupa taya teʼrüin naʼanasia Jehová, eekajasaʼa jooluʼu eesü süpüla taaʼinrüin wanee kasa jaʼyeetka  taaʼu alin nia tapüla. Soʼu süküjünüin tamüin toʼunuin suluʼu mayein taya, akatchinraasü maʼin taaʼin suulia talatüin naaʼin Satanás tatuma, nia neʼe Jehová talateeka atuma taaʼin. Mapa, awaʼnnüsü taya sümaa nnojoluin shiʼitaanüin isha tanain, anakuwaʼipatsü taya. Ayatüsia nnojoluin anain maʼin taaʼin, naapapejeʼe Jehová tü kasa choʼujaakat wamüin. Wanee semaana süpülapünaa süküjünüin tamüin kanserüin taya, wekirajaa anainrü sünain tü outkajawaakat ekirajawaa sünain Aapiria Wayuu, tü pütchikat ‹Afrontemos con valentía los golpes de la vida›. * Akatchinraasü maʼin waaʼin sutuma tia pütchikat. Kojuyatua waashajeʼerüin shia. Sükajee wekirajaain sünain tia jee wekirajaʼawalin sünain tü Bibliakat, jutatüsü taaʼin nümaa taʼwayuuse suulia shapawaa aaʼin otta anasü tü kasa waneekakat».

19. ¿Kaseerü alataka soʼu palit kaʼi?

¹⁹ Wainma wawalayuu sainküin mma alatüinnakana süchikumüin kasa kapüleesü süka nükaalinjain naya Jehová otta müsia nükaalinjain naya süpüla naʼleejüin chi Yolujaakai (1 Ped. 5:8, 9). Akaʼaya piakai, eesü süpüla puuntuin tia. Soʼu palit kaʼi nüküjeerü Jehová nümüin Jesús ooʼulaka namüin na aluwataainjanakana nümaa süpüla najaʼttirüinjatüin tü kasa mojusü naaʼinrakat chi Yolujaakai (1 Juan 3:8). Naaʼinrapa tia, neʼreerü na aʼyataashiikana nümüin Maleiwa shikeraajüin pütchikat tüü yaa mmapaʼa: «Nnojoleerü kasain eimmolojüin pia otta nnojoleerü kasain mmoluin eema pia» (Is. 54:14; Miq. 4:4). Sümaʼinruʼu süntüin tia kaʼikat, ayataʼaya wayamülüin tü mmotkalü eema waya.

20. ¿Kasa waaʼinrajatka süpüla wayamülüin tü mmotkalü eema waya?

²⁰ Weʼitaainjatü maʼin waaʼin alin waya nüpüla Jehová otta sünain nükaalinjeenain waya. ¿Kasa waaʼinrajatka süpüla wountuin tia? Jülüjainjatü waaʼin tü naaʼinrakat Jehová süpüla naaʼinmajüin na aʼyataashiikana nümüin otta waashajaainjatü süchiki tia namaa na waneinnua. Jülüja waaʼin waneepia tü kasa naaʼinrakat Jehová süpüla nükaalinjain waya soʼunnaa tü müliaa weʼrakat. Süka eein Jehová wamaa, eesü süpüla wayamülüin tü mmotkalü eema waya (Sal. 34:4).