Rehoboam nüchon Salomón, chi aluwataakai saaʼu Israel suʼunnaa 40 juya (1 Rey. 11:42). Süchikijee outuin Salomón, oʼunushi Rehoboam Jerusalénjee suluʼumüin tü mmakat Siquem süpüla niʼitaanüinjachin sünain aluwatawaa (2 Crón. 10:1). Eʼnnaajünapuʼushi maʼin Salomón sutuma kekiin maʼin nia. ¿Shapaasüche naaʼin Rehoboam sutuma niainjachin aluwataain nüchikumüin chia wayuu kekiikai maʼin? Atüjaana aaʼu mapa nnojolin kekiin maʼin Rehoboam süpüla anouteʼeraa sukuwaʼipa wanee kasa eekai kapüleein.

Nuʼttaiwaʼaya Rehoboam sünain aluwatawaa, aluwataashii nanüiki na israeliitakana nümüin sutuma jashichin naya saaʼujee müliain naya atumawaa naashin, müshi naya: «Müliashii maʼin waya nutuma chi püshikai süka jawatüin waʼyataain nutuma otta wainmain kasa nuchuntaka wamüin. Jamaamale putuma tü waʼyataainkat jee tü kasa puchuntakat, aʼyataajeenaʼaya waya pümüin» (2 Crón. 10:3, 4).

Nnojotsü nütüjaain aaʼu Rehoboam tü naaʼinrajatkat soʼu tia. Shiale naaʼinrüin tü nachuntakat na israeliitakana nümüin, nnojotsüje eein nümaʼana süpüshuaʼa tü kasa keeʼireekat naaʼin, keeʼireeka saaʼin nüpüshi otta na niʼipajanakana. Otta nnojorüle naaʼinrüin tü nachuntakat na israeliitakana, eeshii süpüla neʼrüliijaain wayumüin nümüin. ¿Kasaka naaʼinrüin Rehoboam? Achuntushi nia palajana kaaliinwaa namüin noʼutku na laülaayuu aʼyataapuʼukana niʼipajee chi nüshikai. Süchikijee tia, nüsakirüin na wayuu wanaawakana ouyase nümaa, müsüjeseʼe niʼitaain suluʼu naaʼin müliainjanain na wayuukana nutuma. Anuujeseʼe nünüiki: «Nütsaajüin jia chi tashikai süka jiiku aainjuushi süka paaʼata, eekajasaʼa tayakai, tatsaajeena jia süka jiiku keʼichisü kachueera» (2 Crón. 10:6-14).

¿Kasa watüjaka sünainjee tia? Shia anaka oonowaa namaa na wayuu laülaayuukana otta laülaakana aaʼin sünain anoujaa. Atüjashii naya ayaawataa saaʼu wanee kasa otta naküjeerü wamüin tü anakat süpüla waaʼinrüin (Job 12:12).

Nuutkajeʼerüin Rehoboam na nusurulaatsekana süpüla nütkaainjachin namaa na polookana eʼiruku Israel. Nuluwataainjeseʼe Jeʼwaa nünüiki nümüin nükajee Semaya: «Nnojoishii jia oʼunuinjanain sünain  atkawaa namaa na juwalayuukana, na nüchonniikana Israel. Jüleʼeja jipialuʼumüin, taya akumajaka sukuwaʼipa süpüla sülatüin tüü» (1 Rey. 12:21-24). *

¿Kapüleesüche nümüin Rehoboam oonowaa sümaa tü nümakat Jeʼwaa nümüin? ¿Jamüsüche nanüiki na israeliitakana nüchiki? ¿Jamüsüche nuuʼulaaka neʼrüliijaain wayumüin na israeliitakana sümaa «tatsaajeena jia süka jiiku keʼichisü kachueera» nümüin namüin? (Anasü paashajeʼerüle 2 Crónicas 13:7). Oonooshi Rehoboam sümaa nünüiki Jeʼwaa otta aleʼejaashi nia namaa na nusurulaatsekana nepialuʼumüin.

¿Kasa watüjaka sünainjee tia? Shia anaka oonowaa sümaa nünüiki Jeʼwaa jaʼitaina meeʼerapalain waya. Waaʼinrüle tia, talateechi Jeʼwaa wamaa otta aneerü wakuwaʼipa nutuma (Deut. 28:2).

Shia naaʼinraka Rehoboam tia, oonooshi nia sümaa nünüiki Jeʼwaa otta nnojoishi nia atkaain namaa na israeliita eʼrüliikana wayumüin. Tü naaʼinrakat shia nukumajirüin waneirua pueulo jeketü suluʼu tü mma nakorotkat na nuuʼuliwoʼukana Judá otta Benjamín. Jee müsia nunouteʼerüin waneirua pueulo süpüla kapüleeinjatüin ashutaa saaʼu (2 Crón. 11:5-12). Shiapejeʼe anaʼleein maʼin noonooin sümaa tü nuluwataakalü anain Jeʼwaa suʼunnaa tia. Mayaapejeʼe naʼwaajüin maleiwayaasü na polookana eʼiruku nuluwataakana aaʼu Jeroboán, wainma na oʼunapuʼukana Jerusalénmüin süka nümaain naya Rehoboam otta süpüla naʼwaajüin chi Maleiwa shiimainshikai (2 Crón. 11:16, 17). Anasü maʼin nuluwataaya Rehoboam soʼu tia süka noonooin sümaa nünüiki Jeʼwaa.

Anapa maʼin sukuwaʼipa nuluwataaya Rehoboam, nnojoluichipa oonooin nia sümaa tü nuluwataakalü anain Jeʼwaa otta aʼwaajüshi nia maleiwayaasü. ¿Jamüsüche naaʼinraka tia? Süka ammoniita tü niikat, eesüjaʼa shiale naaʼinrüin atuma tia (1 Rey. 14:21) Nnojotsü watüjaain aaʼu jamüin naaʼinraka tia, nashatapejeʼe tia na wayuu nuluwataakana aaʼu. Sutuma tia, nuuʼulaain Jeʼwaa nushutüin Sisaq, chi aluwataaikai Egipto saaʼu kojuyasü pueulo chajatka Judá. Ashutuna aaʼu tia pueulokalüirua eerejeʼe anain maʼin sukumajia nutuma Rehoboam (1 Rey. 14:22-24; 2 Crón. 12:1-4).

Keemaleesia maʼin tü alatakat nüntapa Sisaq Jerusalénmüin süpüla nushutüin saaʼu. Chajachi aluwataain Rehoboam suʼunnaa tia. Nüküjaka Semaya nünüiki Jeʼwaa nümüin Rehoboam otta namüin na nüchonniikana, müshi nia: «Süka jüpütüin taya, tapütüinjana jia najapuluʼu Sisaq». ¿Kasaka naaʼinrüin Rehoboam nütüjaapa saaʼu tü alatajatkat namüin? Anuu sünüiki tü Wiwüliakat süchiki tia: «Mojukalaka naaʼin na nüchonniikana chi aluwataakai saaʼu Israel otta müshia chi aluwataaikai mojusü naaʼin otta müshii naya: ‹Loto akuwaʼipachi Jeʼwaa›». Sutuma naaʼinrüin tia, nükaaliinjain Jeʼwaa Rehoboam otta nnojotsü nuuʼulaain sajaʼttinnüin Jerusalén (2 Crón. 12:5-7, 12).

Süchikijee tia, ayatüshi aluwataain Rehoboam saaʼu Judá. Shiasaʼa nülüʼütpa süpüla outaa, wainma kasa nüsülajaka namüin nüchonnii. Eesüjaʼa naaʼinrüle tia süpüla nnojoliin neʼrüliijaain wayumüin na nüchonniikana nümüin chi nawala aluwataainjachikai, Abías münakai (2 Crón. 11:21-23). Sutuma naaʼinrüin tia, niiʼiyatüin sünain kekiin maʼin nia suulialeʼeya jimaʼaiwaʼaya nia.

Mayaapejeʼe naaʼinrüin waneirua kasa anasü Rehoboam, nnojoishi talatüin Jeʼwaa nümaa, anuujeseʼe sünüiki tü Wiwüliakat süchiki sukuwaʼipa nuluwataaya: «Aaʼinrüshi nia kasa mojusü». ¿Jamüsüche maka sünüiki tü Wiwüliakat nüchiki? Shia süka nnojolin niʼitaain suluʼu naaʼin nüchajaainjachin Jeʼwaa (2 Crón. 12:14).

¿Kasa watüjaka sünainjee tü nukuwaʼipakat Rehoboam? Mayaapejeʼe noonooin sümaa waneirua kasa nümaka Jeʼwaa nümüin otta naaʼinrüin waneirua kasa anasü süpüleerua nupueulose Jeʼwaa, nnojoishi nia aleewain maʼin nümaa Jeʼwaa otta nnojotsü nüchajaain sukuwaʼipa süpüla talatüin Jeʼwaa nümaa. Aainjashi Rehoboam kasa mojusü otta aʼwaajüshi nia maleiwayaasü. Eeshijaʼa püsakireʼerüle paaʼin sünain tüü: «Soʼu naapaain Rehoboam sümaa tü nüchiaakalü akajee nia Jeʼwaa, ¿shiache sutuma mojuin naaʼin saaʼu naainjala otta keeʼireein naaʼin talatüin Jeʼwaa nümaa? ¿Naaʼinrataapa neʼe tia süka münajalain nümüin?» (2 Crón. 11:3, 4; 12:6). Mapa, aainjashi kasa mojusü Rehoboam nüchikuaʼa. Eetaayaai neʼe nüshatüin nukuwaʼipa David, chi nutuushikai. Mayaapejeʼe naaʼinrapünaain David kasa mojusü, aishi  Jeʼwaa nüpüla waneepia, kojutusü nümüin aʼwaajaa chi Maleiwa shiimainshikai otta ayaawajaashi nia suulia naainjala (1 Rey. 14:8; Sal. 51:1, 17; 63:1).

Eesü wanee kasa watüjaka sünainjee tü süküjakat tü Wiwüliakat nüchiki Rehoboam. Mayaapejeʼe anain maʼin waapüle tü choʼujaaka namüin na wapüshikana jee waaʼinrüle kasa anasü süpüleerua wayuu. Süpüla talatüinjachin Jeʼwaa wamaa waʼwaajüinjachi nia maʼaka nücheküin shia otta aleewainjana maʼin waya nümaa.

Süpüla wountuin waaʼinrüin tia, ayatüinjachi alin maʼin wapüla Jeʼwaa. Maʼaka choʼujaain wojoʼttooin wanee siki suulia shiyokojooin, choʼujaasü waashajeʼerüin tü Wiwüliakat, wasakireʼerüin waaʼin sünain tü waashajeʼerakat otta woʼuraajüin waneepia süpüla nnojoluin shiyokojooin tü naalinkat Jeʼwaa wapüla (Sal. 1:2; Roma 12:12). Aire wapüla Jeʼwaa, waaʼinreerü tü kasa anakat noʼuluʼu. Otta müsia kaainjarale waya, ayaawajaajeena waya suulia waainjala. Nnojoleena müin waya maʼaka naaʼin Rehoboam otta waʼwaajeechi Jeʼwaa waneepia (Jud. 20, 21, TNM).