1, 2. (1) ¿Kasa naʼyataainjatka maʼin anain na anoujashiikana saashin Mateo 28:18-20? (2) ¿Kasa wekirajaainjatka anain sünain ekirajaayakat tüü?

SÜCHIKIJEE nüsoʼireʼennüin aaʼin Jesuu, nüküjain namüin na nikirajüinkana nüntiraainjachin namaa saaʼu wanee namüna chaa Galilea. Talatakajasaʼa naaʼin soʼu noutkajaain sünain aʼatapajaa Jesuu (Mat. 28:16). Alatüshii suulia 500 na wawalayuu eejanakana jutkatüin nüpüla (1 Cor. 15:6). ¿Kasapülajanache nuutkajeʼeraka naya Jesuu? Shia süpüla nuluwataain naya sünain wanee aʼyatawaa anasü maʼin, anuu nünüiki: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sünoujainjatüin tanain. Jikirajeena naya süpüla nayainjanain na tekirajüinkana» (paashajeʼera Mateo 28:18-20).

² Na wayuu aapajakana nünüiki Jesuu, anoujashii naya mapa wanaa namaa na nikirajüinkana. Shia naʼyataainjatka maʼin anain nekirajüin wayuu süpüla nanoujainjanain nünain Jesuu. * Maaʼulu yaa, watta naalii wawalayuu aʼyataakana sünain tü nuluwataakalü anain Jesuu sainküin tü Mmakat. Sünain ekirajaayakat tüü, wekirajaweerü anain susoutia pienchisü pütchi: ¿Jamüshii wekirajüinjanaka wayuu? ¿Kasache waaʼinrajatka süpüla wountuin tia aʼyatawaakat? ¿Akaalinjiraashiiche waya wapüshuaʼa sünain ekirajaa wayuu? ¿Jamüshii nnojoliinjanaka wakulajaain aaʼin sünain ekirajaa wayuu?

3. ¿Jamüshii wekirajüinjanaka wayuu saashin Juan 14:6 otta 17:3?

³ ¿Jamüshii wekirajüinjanaka wayuu? Shia süka nayain neʼe arütkaain nünainmüin Maleiwa na oushikajaakana süchiirua nukuwaʼipa Kürisüto. Jee anasü nakuwaʼipa maaʼulu yaa otta naʼatapajüin neʼrüinjanain anaa süpüla kaʼika süpüshuaʼa (paashajeʼera Juan 14:6; Juan 17:3, TNM). Niʼitaain Jesuu wajapuluʼu wekirajüinjatüin wayuu, nnojoliipejeʼe nüpütüin waya wamüiwaʼa. Naashin Pablo aʼyataajiraashi nia nümaa Maleiwa namaʼaleʼeya waneinnua anoujashii (1 Cor. 3:9, TNM). Nüneeküin waya Jeʼwaa nümaa Jesuu süpüla waʼyataajiraainjanain nümaa.

4. ¿Kasa watüjaka sünainjee tü naaʼinrakat Iván süpüla nikirajüin wayuu sümaa Matilde?

⁴ Eeshii süpüla talatüin maʼin waya sutuma wekirajüin wayuu. Jülüjataa waaʼin tü naaʼinrakat Iván süpüla nikirajüin wayuu sümaa Matilde tü nuʼwayuusekat, Kolonpiajeʼewalii naya. Aküjashii naya pütchi nümüin wanee jimaʼai kanüliashi Davier. «Tanouteein tü takuwaʼipakat, isapejeʼe shia tachiki», nümaka Davier namüin. Asheʼejiraai nia, akaijai otta asüi maʼin. Kepiajiraashi nia sümaa Érika, tü nümüraajüinkat. Anuu nünüiki Iván: «Oʼunawaishii waya sünain ekirajaa nia, wattasü nipia, kamaʼa waya saaʼu wisiküleeta suluʼupünaa wopu poopoosü. Ekirajaasü Érika sünain tü Wiwüliakat sutuma shiʼrüin sunoutaain nukuwaʼipa Davier». Jee mapa maʼin, ooʼulaashi Davier suulia akaijaa, asaa jee suulia asheʼejirawaa. Kasaatkalaka nia sümaa tü nümüraajüinkat. Anuu sünüiki Matilde: «Soʼu woutiisain Davier sümaa Érika soʼu 2016, sotojoosü taaʼin nümapuʼuin: ‹Tanouteein tü takuwaʼipakat, isapejeʼe shia tachiki›. Ojutuusü waaʼin sutuma tia». Jaʼyasü waaʼu talatüin waya sutuma wekirajüin na wayuukana süpüla noushikajaain süchiirua nukuwaʼipa Jesuu.

5. ¿Kasa waaʼinrajatka palajana süpüla wekirajüin wayuu?

⁵ Tü palajatkat kasa waaʼinrajatka süpüla wekirajüin wayuu shia wachajaain na atüjaweekana saaʼu nüchiki Jeʼwaa (Mat. 10:11, TNM). Nayaawateerü aaʼu na wayuukana waküjaliin pütchi nüchiki Jeʼwaa waashajaale namaa eepünaale waya. Jee nayaawateerü aaʼu woushikajaain süchiirua nukuwaʼipa Jesuu waküjale pütchi namüin.

6. ¿Kasa waaʼinrajatka süpüla naapajüinjatüin na wayuukana tü pütchikat?

⁶ Eeshii wayuu atüjaweekana saaʼu tü sümakat tü Wiwüliakat. Eepejeʼe na nnojoliikana aapajeein paala tia pütchikat, shiakalaka anain kemeʼeriale wanüiki namüin süpüla naapajeein nünüiki Maleiwa. Acheküsü watüjainjanain süpüleerua tü wanüikinjatkat süpüla naapajüin tü pütchikat. Shia anaka waneeküle tü pütchi kamalainjeetkat namüin na wayuukana jee wakumaja sukuwaʼipa tü wanüikinjatkat namüin.

7. (1) ¿Kasa eeka süpüla waashajaain achiki namaa na wayuukana? (2) ¿Jamüsüche jülüjainjatka waaʼin tü namakat na wayuukana otta kojutuinjatka nanüiki wamüin?

⁷ Eesü süpüla müin wanüiki namüin: «Watta saalii kasa mojusü alataka wamüin maaʼulu yaa. ¿Choʼujaashiche wanee aluwataai ajaʼttirajachika tü wamülialakat? ¿Jamüsüjaʼa saaʼin pümüin?». Jee süchikijee tia, eesü süpüla waashajeʼerüin tü sümakat Daniel 2:44. Anuu sooʼomüin tü eekat süpüla waashajaain achiki: «¿Kasache anaka sümüin tepichi süpüla anainjatüin shipijia?». Eekalaka süpüla waashajeʼerüin tü sümakat Deuteronomio 6:6, 7. Jaʼitasü jaralüin tü pütchi waneekakat shia anaka aluʼu müleka jülüjale waaʼin yootuinjanale waya sümaa wayuu miyoʼu. Jülüja waaʼin aneerüin nakuwaʼipa sutuma wekirajüin naya süchiki tü Wiwüliakat. Jülüjainjatü waaʼin tü namakat wamüin jee kojutuinjatü wamüin nanüiki. Waaʼinrüle tia, wayaawateerü aaʼu jamüin makaʼa nakuwaʼipa otta eesü naapajeerüle wanüiki.

8. ¿Jamüsü kojuyatuainjatka wakua namaʼanamüin na wayuukana?

 ⁸ Eesüjaʼa choʼujaale kojuyatuainjatüin wakua namaʼanamüin na wayuukana süpüla wekirajüin naya sünain tü Wiwüliakat. ¿Jamüsüche waaʼinrajatka tia? Shia süka eein süpüla nnojoliin naya wapüla nepialuʼu jee wainmale kasa naʼyataaka anain. Otta eesü süpüla mojushiin namüin soʼu tü palajatkat wakua süpüla nekirajaain sünain tü Wiwüliakat. Jamüsüjaʼa wanee wunuʼulia süpüla miyoʼuinjatüin shia choʼujaasü kojuyatuain shiʼyotunüin wüin saaʼu, akaataajaʼa neʼe nakuwaʼipa na wayuukana, shia anaka kojuyatuale wakua namaʼanamüin süpüla alinjachin Jeʼwaa napüla nümaa Kürisüto.

9, 10. ¿Kasa maka aka saaʼin tü waaʼinrakat süpüla wantüin nanain na ekirajaweekana sünain tü Wiwüliakat?

⁹ Wapüshuaʼa wayakana Aküjaliikana pütchi, akaalinjiraashii waya süpüla wantüin nanain na wayuu ekirajaweekana sünain tü Wiwüliakat. Tü waaʼinrakat müsü aka saaʼin tü naaʼinrakat waneinnua wayuu achajaakana nüchiki wanee jintüi machikisai, apünüin nuuyase. Jülüjataa waaʼin tü naaʼinrakat süpüla nantüin nünain. Eejana maʼaka 500 wayuu achajaakana nüchiki. Sülatapa maʼaka 20 oora süchikijee machikin chia jintüikai, nüntünaka anain nutuma wanee wayuu saʼaka suuʼulia maiki. Nnojoipejeʼe nia aʼwaataain süka niain antüshin nünain chi jintüikai, anuu nünüiki: «Wanta anainchi nia süka wakaalinjiraain wapüshuaʼa».

¹⁰ Watta naalii na wayuu makana akuwaʼipa maʼaka naaʼin chia jintüi machikisaikai. Nnojotsü natüjaain saaʼu tü alatajateetkat mapeena, anashiipajaʼa namüin nakaalinjünüin (Éf. 2:12). Wayakana Aküjaliikana pütchi, alanaʼaleeshiʼiya waya suulia 8 miyoone otta naya wachajaakana achiki na wayuu choʼujaakana amüin akaalinjünaa. Eeshiijaʼa nnojoliire wantüin nanain na wayuu ekirajaweekana sünain  tü Wiwüliakat, eepejeʼe na wawalayuu antakana nanain. Makalaka talatüinjanain waya sutuma nüntüin wanee wawala nünain wanee wayuu ekirajaweekai sünain tü Wiwüliakat.

11. ¿Kasa eeka süpüla waaʼinrüin mekirajüinre waya wayuu sünain tü Wiwüliakat?

¹¹ Mekirajüinre waya wayuu sünain tü Wiwüliakat, eeshi süpüla wakaalinjain wanee wayuu antakai sünain tü outkajawaakat, wasaküin nia jee anain naaʼin watuma. Waaʼinrüle tia, nütüjaajeerü aaʼu alin wayuu napüla na anoujashii shiimainshiikana (Juan 13:34, 35). Akaataajaʼa niʼrüle waya sünain wayalerüin wajapü sümaa wasoutuin sünain tü outkajawaakat, nnojoleechi nia mmoluin sünain ayaleraa najapü jee aneerü nünüiki nusoutapa. Otta wanee kasa eekai süpüla waaʼinrüin shia waküjain pütchi nümaa wanee wawala eekai jekechin sünain aküjaa pütchi, wakaalinjainjachi nia süpüla nütüjain aküjaa pütchi süka tü Wiwüliakat. Sükajee müin shia watuma, wekirajüin chi wawalakai süpüla naaʼinrüin tü naaʼinrapuʼukat Kürisüto (Luc. 10:25-28, TNM).

12. ¿Wayuuinjanache atüjashii waya süpüla wekirajüinjachin wanee wayuu? Püküja süchiki tü saaʼinrakat tü wawalakat Faustina.

¹² Nnojotsü jülüjainjatüin waaʼin wayuuinjanain atüjashii waya süpüla wekirajüinjachin wanee wayuu. Wayaawateerü aaʼu tia sükajee tü saaʼinrakat tü wawalakat Faustina, chejeʼewat shia Bolivia. Matüjainsat shia karaloʼuta shikirajünaiwaʼaya sünain tü Wiwüliakat, eepejeʼe sajatüin maaʼulu. Woutiisasü shia otta kamalainsü maʼin sümüin shikirajüin wayuu sünain tü Wiwüliakat. Jaʼraisü wayuu shikirajaka. Mayaainjeʼe matüjain karaloʼuta tü wawalakat Faustina, eeinna aipiruashii wayuu woutiisaka sükajee shikirajüin naya (Luc. 10:21).

13. ¿Kaseerü weʼraka sünainjee wekirajüin wayuu mayaainjeʼe wainmain waʼyataain?

¹³ Watta naalii wawalayuu wainmakana aʼyataain. Oʼunapejeʼe naya sünain ekirajaa wayuu, müshiijeseʼe talatüin naya sünainjee. Jülüjataa waaʼin tü saaʼinrakat tü wawalakat Melanie, mekiisat suuyase tü süchonkat jee shipijain shia sümüiwaʼa. Aʼyataasü tü wawalakat waneepia sümaa sükaalinjain chi süshikai süka ayuulin nia sutuma cáncer. Kepiasü shia chaa Alaska otta shia neʼe shiakat aküjaka pütchi sümüiwaʼa suluʼu tia mmakat. Achuntawaisü shia kaalinwaa nümüin Jeʼwaa süpüla sujuʼitüin sünain aküjaa pütchi mayaainjeʼe alin tü jemiaikat, saaʼinreein tia süka sünteein sünain wayuu ekirajaweeka sünain tü Wiwüliakat. Süntaka mapa sünain wanee wayuu Sara sünülia, talatüsü saaʼin tia wayuukot süka sütüjaain saaʼu kasaichin nünülia Maleiwa. Shikirajaaka mapa Sara sünain tü Wiwüliakat. Anuu sünüiki Melanie süchiki tia: «Mapüsawaisü maʼin taya piennoʼu aliika, oʼunawaipejeʼe taya sümaa tü tachonkat sünain ekirajaa Sara otta anasü waaʼin sutuma tia. Kamalainsü wamüin wekirajaain süchiki tü sütüjaweekalü aaʼu jee  talatüshii waya sutuma weʼrüin sürütkaain nünainmüin Jeʼwaa». Meimmoluinsat saaʼin Sara soʼu süpüleeruaanüin aaʼin natuma na süpüshikana jee natuma na sunoujiraapuʼukana amaa. Ojuʼitüsü suulia tü iküleesia kaluʼupuʼukat shia jee woutiisaka shia mapa.

14. (1) ¿Kasa wanaawaka atuma tü waʼyataainkat sünain aküjaa pütchi sümaa naʼyataain na ejimejüliikana? (2) ¿Kasa waaʼinrajatka naashin Pablo suluʼu 2 Timoteo 4:1, 2?

¹⁴ Jaʼitasü müin nnojotkai saaʼin jaralüin ekirajaweein sünain tü Wiwüliakat wamaa, ayatajanaʼaya waya achajaain nachiki na wayuu ekirajaweekana. Naashin Jesuu, müshii waya maʼaka naaʼin na wayuu ejimejüliikana. Eeshii nalatirüle maʼaka jeʼra oora sünain masirüin naya. Eeshii nejimejüle saʼwai jee shiale eeiwaʼaya aikat otta wattakuaishii naya süchiirua jime (Luc. 5:5). Akaʼaya wayakana Aküjaliikana pütchi, eeshii walatirüle maʼaka jeʼra oora sünain achajawaa na wayuu ekirajaweekana otta wattakuaishii waya sünain tia. Eekalaka wantüin anain na wayuu kamalainkana amüin tü nüchikikat Maleiwa. Shia anaka aluʼu waküjale pütchi soʼu wanee oora jimataka oʼu na wayuukana otta eere eein naya wapüla (paashajeʼera 2 Timoteo 4:1, 2).

15. ¿Jamüshii nnojoliinjanaka wakulajaain aaʼin nanainjee na wekirajüinkana?

¹⁵ ¿Jamüshiiche nnojoliinjanaka wakulajaain aaʼin sünain ekirajaa wayuu? Wanee kasa waaʼinrajatka anainjee tia shia wekirajüinjachin nia süpüla alinjachin Jeʼwaa nüpüla jee aleewainjachi nia nümaa, kojutuinjatüin nümüin tü Wiwüliakat otta nütüjaainjatüin aaʼu tü sümakat. Nnojoishi wekirajüinjachin  neʼe nia sünain tü nümakat Jesuu, wekirajüinjachi nia sünain naaʼinrajatüin tü nümakat Jesuu. Wakaalinjainjachi nia süpüla naaʼinrüin tü sümakat tü Wiwüliakat. Eeshii wayuu ooʼulaamaatakana suulia tü kasa mojusü jülüjapuʼukat naaʼin otta tü naaʼinrapuʼukat, eepejeʼe waneinnua kakaliakana süpüla nooʼulaain suulia.

16. ¿Kasa watüjaka sünainjee nukuwaʼipa Raúl?

¹⁶ Eeshi wanee wawala misioneeroshi chaa Perú nnojoikai akulajaain aaʼin nanainjee na nikirajüinkana. Anuu nünüiki: «Eejachi wanee wayuu tekirajüin Raúl nünülia, piamasü karaloʼuta najaʼttiraka sünain ekirajawaa. Nnojotpejeʼe nunoutuin tü nukuwaʼipakat. Mojujiraashi nia sümaa tü nuʼwayuusekat, yarüttüsü nünüiki otta mojutusai nia natuma nüchonnii. Waneepiapejeʼe nia sünain tü outkajawaakat otta waneepiashi taya nümaʼanamüin sünain ekirajaa nia sümaa nuʼwayuuse otta nüchonnii. Nunoutuin tü nukuwaʼipakat mapa, woutiisashi nia sülatapa apünüin juya».

17. ¿Kasa wekirajaainjatka anain sünain tü wane ekirajaayakat?

¹⁷ Nuluwataain waya Jesuu sünain ekirajaa wayuu sainküin tü mmakat. Müshiijeseʼe waküjawalin pütchi sümüin wayuu jaʼitasü naatain tü jülüjakat saaʼin woulia, nnojoluin suʼunüin suluʼu wanee iküleesia jee manoulain shia. Sünain tü wane ekirajaayakat, wekirajaweerü anain kasain waaʼinrajatüin süpüla waküjain pütchi namüin naya wayuukana.