1. ¿Jamüsü nünüiki Pablo namüin na anoujashii chainjanakana aluwataain iipünaa?

«JUUʼULAA suulia ashataa nakuaippa na manoujainsaliikana», müshi chi aluwataaushikai Pablo namüin na anoujashii chainjanakana iipünaa (Roma 12:2). ¿Jamüsüche makaʼa nünüiki Pablo namüin sümaa nanoujain jee chainjanain naya aluwataain iipünaa? (Roma 1:6, 7).

2, 3. (1) ¿Kasa naaʼinraka Satanaa süpüla wakayalaain nuulia Jeʼwaa? (2) ¿Kasa waaʼinrüinjatka süpüla wasünneʼerüin tü kasa mojusü ichekat suluʼu waaʼin?

² Nnojotsü anain naaʼin Pablo süka eein na anoujashii aaʼinrakana tü namakat na ekirajüliikana sünain alawaa otta na ashatakana tü jülüjakat naaʼin na manoujainsaliikana (Éf. 4:17-19). Eesü süpüla sülatüin wamüin tia. Watta saalii tü kasa nimeejakalü aka waya Satanaa süpüla wakayalaain nuulia Jeʼwaa. Najayatüin suchuntaain waaʼin washireein waya jee weʼnnaajüneein maʼin. Süpüla wanaawain tü wakuwaʼipakat sümaa tü keeʼireekat naaʼin, nimeejüin waya sükajee tü wakuwaʼipapuʼukat paala, tü ekirajünakalü anain waya suluʼu koleejia otta tü naaʼinrakat na wayuu kepiakana waʼütpünaa.

³ ¿Eesüche süpüla wasünneʼerüin tü kasa mojusü ichekat suluʼu waaʼin? (2 Cor. 10:4, TNM). Anuu nünüiki Pablo: «Wasünneʼerüin tü alawaa ekirajünakalü anain otta waneirua kasa nnojotka pansaain sümaa tü ekirajünakat nüchiki Maleiwa otta wanoutuin tü jülüjakat saaʼin wayuu süpüla saaʼinrüin tü nümakat Kürisüto» (2 Cor. 10:5, TNM). Nükaalinjeena waya  Jeʼwaa süpüla wanoutuin tü alawaa ekirajünakalü anain. Nnojoleerü washatüin nakuwaʼipa na nuluwataakana aaʼu Satanaa. Aneena waya sutuma tü Nünüikikat Maleiwa maʼaka anain waya sutuma wepinase.

4. ¿Kasa wooʼulaaka oulia wanaa sümaa wekirajaain sünain tü Nünüikikat Maleiwa?

⁴ Soto waaʼin wainmain tü kasa mojusü wooʼulaakalü oulia wanaa sümaa wekirajaain sünain tü Nünüikikat Maleiwa jee waʼyataain nümüin (1 Cor. 6:9-11). Anakuwaʼipalii maʼin waya makaʼa nükaalinjain waya Maleiwa süpüla wooʼulaain suulia tü kasa mojusü waaʼinrapuʼukat.

5. Püküja tü piamasükat kasa waaʼinrüinjatka saashin Roma 12:2.

⁵ Eeyütpejeʼe tü kasa wanoutuinjatkat suluʼu wakuwaʼipa. Mayaapejeʼe wooʼulaain suulia waaʼinrüin tü kasa mojusü waaʼinrapuʼukat süpülapünaa woutiisain waya, wachajaainjatü sukuwaʼipa süpüla nnojoluinjatüin waaʼinrüin shia süchikuaʼa. ¿Kasa waaʼinrüinjatka süpüla wountuin tia? Anuu nünüiki Pablo: «Juuʼulaa suulia ashataa nakuaippa na manoujainsaliikana. Nnojo jülüjüin jaaʼin maa aka tü jülüjakat naaʼin nayakana» (Roma 12:2). Waaʼinrüinjatü piamasü kasa. Tü palajatkat shia wooʼulaainjanain suulia ashataa nakuwaʼipa na manoujainsaliikana. Tü piamakat shia weeʼiratüinjatüin tü kasa mojusü jülüjakat waaʼin.

6. ¿Kasa watüjaka sünainjee tü nümakat Jesuu suluʼu Mateo 12:43-45?

⁶ Naashin Pablo nnojotsü anayaainjatüin wakuwaʼipa suʼupalapünaa wayuu, shiimainjatü anain shia (paashajeʼera tü pütchikat  «¿Anayaasüche pukuwaʼipa? ¿Piiʼiratataapa shia?»). Weeʼiratüinjatü tü kasa mojusü suchuntaakat waaʼin, tü kasa mojusü eekat suluʼu wakuwaʼipa otta tü suluʼukat waaʼin.  Makalaka anain wasakirüle suluʼu waaʼin: «¿Shiimainche tasünneʼerüin tü kasa mojusü suluʼukat taaʼin jee tü kasa mojusü jülüjakat taaʼin? ¿Anayaasüche takuwaʼipa suʼupalapünaa wayuu?». Nüküjain Jesuu suluʼu Mateo 12:43-45 wanee sukuwaʼipa otta nüküjain wamüin tü waaʼinrüinjatkat (paashajeʼera). Nüküjain Jesuu nnojoluinjatüin wasünneʼerüin neʼe suluʼujee waaʼin tü kasa mojusükat, weeʼiratüinjatü shia sükajee tü kasa talatakalü atuma naaʼin Maleiwa.

7. ¿Kasa waaʼinrüinjatka süpüla weeʼiratüin tü kasa mojusü suluʼukat waaʼin?

⁷ ¿Eesüche süpüla weeʼiratüin tü kasa mojusü suluʼukat waaʼin? Anuu nünüiki Maleiwa süchiki tia: «Anashii müleka juuʼulaale suulia tü kasa mojusü jaaʼinrapüʼükat je tü mojusü jülüjapüʼükat jaaʼin. Je saaʼu shiiʼiranajaaitpain jukuaippa, anakaja jaaʼinrüle waneepia tü nüchekakat chi Maleiwakai jüpüleerua süpüla müinjanain aka jia naaʼin sünain jaaʼinrüin tü anasükat saaʼu jükatannüinapain suulia jaainjala» (Éf. 4:22-24). Eesü süpüla weeʼiratüin wakuwaʼipa saashin tia pütchikat, jaʼitairü kapüleein maʼin shia. Nnojotsü wachecherüinjatüin neʼe waaʼin suulia tü kasa mojusü suchuntaakat waaʼin jee tü kasa mojusü waaʼinrakat. Ooʼulaainjana waya suulia tia. Weeʼiratüinjatü tü kasa mojusü jülüjakat waaʼin. Shia weeʼratüinjatka tü waaʼinrakalü anainjee wanee kasa, tü kasa mojusü suchuntaakat waaʼin otta tü kasa mojusü eekat suluʼu wakuwaʼipa. Wachajaainjatü sukuwaʼipa süpüla wountuin tia.

8, 9. (1) ¿Jamüsü weeʼiratüinjatka tü kasa mojusü suluʼukat waaʼin? (2) Püküja tü naaʼinrakat wanee wawala.

⁸ Anuu süchiki nukuwaʼipa wanee wawala mojulaapuʼukai nümaiwa, asüipuʼu jee katkaaraipuʼu nia. Kojutushi Jeʼwaa natuma na wayuu kepiakana nüʼütpünaa sutuma neʼrüin niiʼiratüin tü nukuwaʼipakat jee woutiisain nia. Soʼu wanee ai, antüshi wanee wayuu epeʼtshi nipialuʼumüin jee atkaweeshi nia nümaa chi wawalakai. Nüchecherayaainjeʼe naaʼin paala suulia atkawaa. Mojukalaka nünüiki chi wayuukai nüchiki Jeʼwaa. Nüsheʼejaanaka nutuma chi wawalakai. ¿Jamüsüche naaʼinraka tia sümaa nikirajaain sünain tü Wiwüliakat? Nnojotsü niiʼiratüin jee nnojotsü nüsünneʼerüin tü kasa mojusü suluʼukat naaʼin.

⁹ Mayaainjeʼe naaʼinrüin tia, nnojotsü yüülain naaʼin (Prov. 24:16). Akaalinjünüshi nia natuma na laülaashiikana süpüla niiʼiratüin nukuwaʼipa jee mapa aneekünüshi nia süpüla laülaashinjachin. Soʼu wane ai anuuipaʼa sünain tü Piichi Outkajaaleekat, nüntataalaka wanee wayuu epeʼtshi jee nüsheʼeteeka wanee laülaashi. ¿Kasakaʼa naaʼinrüin chi wawalakai? Nüchiaain chi epeʼtshikai süka anaka akuwaʼipa jee niʼikajaaka nia nipialuʼumüin. ¿Jamüshiche nnojoika naashichijaain nooʼomüin chi epeʼtshikai? Shia süka niiʼiratüin tü kasa mojusü jülüjakat naaʼin. Niiʼiratüin tü nukuwaʼipakat, anamiaichipa nia jee nnojolitchipa katkaaralin. Anasü pütchi nüchiki Jeʼwaa sutuma tü nukuwaʼipakat.

10. ¿Kasa waaʼinrüinjatka süpüla weeʼiratüin wakuwaʼipa?

¹⁰ Nnojotsü eeʼiratamaatüin tü wakuwaʼipakat uwatuwoʼushi. Eesü kakaliale süpüla shiiʼiratüinjatüin wakuwaʼipa (2 Ped. 1:5). Jaʼitaina kakaliainnain waya sünain anoujaa, nnojotsü eeʼiratamaatüin wakuwaʼipa sünainjee tia. Wachajaainjatü sukuwaʼipa süpüla weeʼiratüin tü kasa mojusü suluʼukat waaʼin. ¿Kasa waaʼinrüinjatka süpüla wountuin tia? Wekirajaa sünain waneirua kasa waaʼinrüinjatka.

11. ¿Jamüsü weeʼirateetka tü kasa mojusü jülüjakat waaʼin woʼuraajüle?

¹¹ Tü palajatkat kasa waaʼinrüinjatkat shia woʼuraajüinjanain. Müinjatü wanüiki maʼaka naaʼin chi ashajakai salmo: «Wule taaʼin putuma Maleiwakalee, ana putuma waneepia tü jülüjakat taaʼin» (Sal. 51:10). Wacheküinjatü achiki weeʼiratüin tü kasa mojusü jülüjakat waaʼin jee achuntuinjana waya nümüin Jeʼwaa süpüla nükaalinjain waya. ¿Jamüsü watüjaaka saaʼu nükaalinjeenain waya? Anuu tü nümakat namüin na israeliita eʼrüliikana wayumüin soʼu nükalia Ezequiel: «Wanaaweerü tü naaʼinkat tatuma otta teeʼirateerü tü jülüjakat naaʼin; [...] otta jüüjüweerü naaʼin tatuma», tia shia jüüjüüinjanain naya sümüin nünüiki Maleiwa (Ezeq. 11:19). Atütülaasü waaʼin sutuma tia pütchikat. Maʼaka nükaalinjeein Jeʼwaa na israeliitakana süpüla neeʼiratüin nakuwaʼipa, nükaalinjeenaʼaya waya süpüla weeʼiratüin wakuwaʼipa.

12, 13. (1) ¿Kasa wasakireʼerüinjatka suluʼu waaʼin saashin Salmo 119:59? (2) ¿Jamüinjatü wanüiki wasakireʼerapa suluʼu waaʼin?

¹² Tü wanee kasa waaʼinrüinjatkat shia wasakireʼerüinjanain suluʼu waaʼin. Waashajeʼerüinjatü tü Wiwüliakat weinshi otta wasakireʼerüinjatü suluʼu waaʼin kasain tü wanouteʼerüinjatkat suluʼu wakuwaʼipa (paashajeʼera Salmo 119:59; Heb. 4:12; Sant. 1:25). Eere wanee kasa suluʼu wakuwaʼipa wanaawaka sümaa nakuwaʼipa na manoujainsaliikana, wanouteʼerüinjatü tia. Wayaawatüinjatü aaʼu kasain mojuin suluʼu wakuwaʼipa jee wanoutuinjatü shia.

¹³ Süpüla waaʼinrüin tia, meesü wanüiki wasakireʼerapa suluʼu waaʼin: «¿Achunjasüche taaʼin saaʼujee wanee kasa?» (1 Ped. 2:1). «¿Aʼwaataasüche taaʼin suluʼu takuwaʼipa, tatüjain karaloʼuta jee kanneetsein taya?» (Prov. 16:5). «¿Yaletüsüche taaʼin noulia na wayuu nnojoliikana eein kasa namaʼana?» (Sant. 2:2-4). «¿Suchuntaainche taaʼin tü kasa noʼunakat maʼin achiirua na manoujainsaliikana?» (1 Juan 2:15-17). «¿Anashiisüche tamüin anajaa kasa sünainpünaaka amaʼüjirawaa akuwaʼipaa otta sünainpünaaka atkawaa?» (Sal. 97:10; 101:3; Amós 5:15). Wasoutapa shiʼipajee tia pütchikalüirua, watüjaajeerü aaʼu tü wanouteʼerüinjatkat suluʼu wakuwaʼipa. Wasünneʼerüle tü kasa mojusü ichekat suluʼu wakuwaʼipa, talateechi Jeʼwaa wamaa (Sal. 19:14).

14. ¿Jamüsü choʼujaaka aleewain waya namaa na aikana apüla Jeʼwaa?

¹⁴ Tü apünüinkat kasa waaʼinrüinjatkat shia aleewainjanain waya namaa na aikana apüla Jeʼwaa. Eesü süpüla anain jee mojuin wakuwaʼipa nanainjee na wayuu aleewakana amaa waya (Prov. 13:20). Koleejialuʼu jee waʼyataaleruʼu, naʼakashii waya wayuu nnojoliikana wanaawain akuwaʼipa sümaa tü keeʼireekat naaʼin Jeʼwaa. Aluʼusaʼa suluʼu tü outkajaaleekat, wainma na wawalayuu anakana süpüla waʼaleewain, nakaalinjeena waya süpüla aijiraainjanain waya jee süpüla waaʼinrüinjatüin tü kasa anasükat (Heb. 10:24, 25).

15, 16. ¿Kasa nimeejaka aka waya Satanaa shiiʼiree wanaawain wakuwaʼipa sümaa tü keeʼireekat naaʼin?

¹⁵ Soto waaʼin nimeejeein waya Satanaa shiiʼiree wanaawain wakuwaʼipa sümaa tü keeʼireekat naaʼin. Watta saalii tü alawaa nikirajakalü anain shiiʼiree nnojoluinjatüin waapaain sümaa Nünüiki Maleiwa.

¹⁶ Tü asakinnakalü anain Eva nutuma Satanaa shiaʼaya neʼe tü asakinnakalü anain waya maaʼulu: «¿Shiimüinsaʼaya nümüin [Maleiwa]  jümüin...?» (Gén. 3:1). Wainma na wayuu manoujainsalii asakirakana waya shiiʼiree woʼtchejaain sümaa tü wanoujakalü anain. Müshii naya: «¿Shiimainjasaʼaya nümüin Maleiwa jümüin mojuin wainmale nuʼwayuuse wanee wayuu? ¿Shiimainjasaʼaya nümüin Maleiwa jümüin mojuin jaainjale miʼiraa süntia juya jee shikeraajia juuyase? ¿Shiimainjasaʼaya nümüin Maleiwa jümüin mojuin shiʼitaanüle isha jünain? ¿Shiimainjasaʼaya nümüin Maleiwa jümüin mojuin jaashajaale nümaa eekai nujuʼitinnüin jaʼakajee?».

17. (1) ¿Kasa waaʼinrüinjatka süpüla nnojoluin wainmajüin waaʼin? (2) Saashin Colosas 2:6, 7, ¿jameena waya wayaawatüle saaʼu tü wanoujakalü anain?

¹⁷ Shiimainjatü wamüin tü wanoujakalü anain. Wainmajeerü waaʼin jee eemiajaajeerü wanoula nnojorüle wayaawatüin saaʼu tü wanoujakalü anain. ¿Kasakaʼa waaʼinrüinjatüin süpüla nnojoluin sülatüin wamüin tia? Naashin Maleiwa, weeʼiratüinjatü tü kasa mojusü jülüjakat waaʼin süpüla wayaawatüin saaʼu tü nüchekakat wapüleerua (Roma 12:2). Shiimainjeerü wamüin tü sümakat tü Wiwüliakat wekirajaale sünain waneepia. Jee müsia watüjaajeerü aaʼu süpülajatüin anain wakuwaʼipa tü nuluwataakalü anain Jeʼwaa. Sünainjee tia, meena waya maʼaka saaʼin wanee wunuʼulia eekai ichein suurala. Icheena waya waneepia sünain tü kasa nikirajakalü anain waya Maleiwa (paashajeʼera Colosas 2:6, 7).

18. ¿Kasa waaʼinrüinjatka süpüla wayoutuin tü alawaa nekirajakalü anain na manoujainsaliikana?

¹⁸ Nnojoishii nayainjanain na waneinnua icheka atuma tü wanoulakat, wayainjana icheka atuma shia. Makalaka wachajaainjatüin sukuwaʼipa süpüla weeʼiratüin tü kasa mojusü jülüjakat waaʼin. Woʼuraaja waneepia nümüin Jeʼwaa jee wachunta nümüin chi naaʼinkai. Wasakireʼera suluʼu waaʼin, weeʼirata tü kasa mojusü jülüjakat waaʼin otta tü waaʼinrakalü anainjee wanee kasa. Aleewa waya namaa na aikana apüla Jeʼwaa, namaa na akaalinjeenakana waya sünain eeʼirataa tü kasa mojusü jülüjakat waaʼin. Waaʼinrüle tia wayouteerü tü alawaa nekirajakalü anain na manoujainsaliikana otta wasünneʼereerü «waneirua kasa nnojotka pansaain sümaa tü ekirajünakat nüchiki Maleiwa» (2 Cor. 10:5, TNM).