1, 2. (1) ¿Jamüsü mapüleeka nutuma Jesuu tü naainjakat sünain tü Outkajawaakat eere Sotuin Waaʼin Outuin nia? (2) ¿Kasa wekirajaainjatka anain süchiki nukuwaʼipa Jesuu?

¿PUUNTEETCHE püküjain kasain waaʼinrawalin juyawai sünain tü Outkajawaakat eere Sotuin Waaʼin Outuin Jesuu? Puunteerü püküjain, nnojotsü wattain saalii kasa aainjünawaika sünain tia outkajawaakat. Eepejeʼe wayuu makana anüiki: «¿Jamüsüche nnojotka wainmain kasa aainjünaka sünain tia outkajawaakat eerejeʼe kojutuin maʼin shia?».

² Soʼu yaajachin Jesuu mmapaʼa, mapüleechonsat tü kasa nikirajakalü anain, pansaasü shia otta shiyaawata aaʼu wayuu (Mat. 7:28, 29). Jamüsüjaʼa wanaa sümaa niʼiküin na nikirajüinkana süpüla sotuinjatüin naaʼin * naapajiraain nikii saaʼu saainjala wayuu, mapüleesat shia nutuma otta kojutuinjatü shia namüin naashin. Wekirajaa maʼin süchiki tia outkajawaakat sümaʼaleʼeya waneirua kasa naaʼinraka Jesuu otta tü naashajaakalü achiki. Sükajee tia, wayaawateerü aaʼu nnojoluin yaletüin naaʼin, meimmoluin nia otta aipüralin nia wayuu. Wekirajaweerü anain kasain waaʼinrajatüin süpüla müin wakuwaʼipa maʼaka nukuwaʼipa Jesuu.

3. (1) Sünainjee tü sümakat Mateo 26:26-28, ¿jamüsü nnojotka wattain saalii kasa naaʼinraka Jesuu soʼu niʼitaain shikii tü Outkajawaakat eere Sotuin Waaʼin Outuin nia? (2) ¿Kasa kayaawaseka tü pankat otta tü wiinokot?

³ Soʼu niʼitaain Jesuu shikii tü Outkajawaakat eere Sotuin Waaʼin Outuin nia, eejana nümaa na polookana waneemüin aluwataaushii,  na waneepiakana nümaa. Sünain tia ekawaakat, shia neʼe eejatka nümaʼana tü pan maʼakasatkat soolojia otta tü wiino apütaakat sünainjee tü Pascuakat (paashajeʼera Mateo 26:26-28). Nüküjain Jesuu namüin na nikirajüinkana shiyaawasein nüsha tü wiinokot otta tü pankat, shiyaawasesü naapajiraain nikii waaʼu. Nnojotsü ponuin naaʼin na nikirajüinkana nnojoluin wainmain kasa naainjaka Jesuu sünain tia ekawaakat. ¿Jamüsüche nnojotka ponuin shia naaʼin?

4. Sünainjee tü nümakat Jesuu sümüin Marta, ¿jamüsü nnojoluinjatka wainmain kasa aainjünaka sünain tü Outkajawaakat eere Sotuin Waaʼin Outuin nia?

⁴ Nnojotsü ponuin naaʼin tü naaʼinrakat Jesuu sutuma wanee kasa alataka maʼaka jeʼra kashi süpülapünaa tia ekawaakat, wanaa sümaa apünüin juya Jesuu sünain aküjaa pütchi. Chajachi nia nipialuʼu Lázaro, Marta otta María, naʼaleewainyuu naya makana, nikirajaka naya soʼu tia. Shiasaʼa Marta nnojotsü jülüjain saaʼin nünüiki süka shapaain saaʼin sünain aʼlakajawaa wainma kasa niyaaluʼu. Saaʼinrüin tia süka kojutuin maʼin Jesuu sümüin. Nüküjapejeʼe Jesuu sümüin nnojoluin choʼujaain wainmainjatüin kasa süʼlakajaaka (Luc. 10:40-42). Shia naaʼinraka Jesuu tia wanaa sümaa niʼitaain shikii tü Outkajawaakat eere Sotuin Waaʼin Outuin nia. Nnojotsü wainmain tü kasa naaʼinrakat sünain tia ekawaakat. ¿Kasa watüjaka sünainjee tü naaʼinrakat Jesuu?

5. (1) ¿Kasa watüjaka nüchiki Jesuu sünainjee nnojoluin wainmain kasa naainjaka sünain tü Ekawaa Aipaʼajatkat nutuma? (2) ¿Jamüsü sünüiki Filipos 2:5-8 süchiki tia?

⁵ Jaʼyasü naaʼu Jesuu nnojoluin yaletüin naaʼin sükajee tü kasa naaʼinrakat otta tü nüküjakat. Müsüjeseʼe niiʼiyatüin müin nukuwaʼipa süpülapünaa outuin nia (Mat. 11:29, TNM). Nütüjaa aaʼu Jesuu sülüʼülüin nükalia süpüla naapajiraain nikii saaʼu saainjala wayuu otta nütüjaa aaʼu nüsoʼiraainjachin aaʼin nutuma Jeʼwaa otta niʼitaainjachin nia sünain Aluwatawaa chaa iipünaa. Nnojoipejeʼe aʼwaataain Jesuu suluʼu nukuwaʼipa otta nnojotsü naaʼinrüin wanee ekawaa eere wattain saalii kasa aainjünaka sünain süpüla sotuinjachin waaʼin nia. Shia neʼe nüküjaka namüin na nikirajüinkana sotuinjachin nia naaʼin juyawai sükajee wanee outkajawaa eere nnojoluin wattain saalii kasa aainjünaka (Juan 13:15; 1 Cor. 11:23-25). Sutuma naaʼinrüin tia, jaʼyasü naaʼu nnojoluin yaletüin naaʼin. Anataʼaleesüjaʼa maʼin nukuwaʼipa chi Aluwataainjachikai waaʼu (paashajeʼera Filipos 2:5-8, TNM).

6. Sülatüle kasa mojusü wamüin, ¿kasa waaʼinrajatka süpüla nnojoluin yaletüin waaʼin maʼaka nnojoluin yaletüin naaʼin Jesuu?

⁶ Wanee kasa waaʼinrajatka süpüla nnojoluin yaletüin waaʼin maʼaka nnojoluin yaletüin naaʼin Jesuu, shia kapülainjatüin waaʼin nakuwaʼipa na waneinnua (Filip. 2:3-5). Jülüjataa waaʼin tü naaʼinrakat  Jesuu wanee ai süpülapünaa outuin nia. Aisü nümüin Jesuu namüliala na nikirajüin waneepiakana nümaa, nnojotsü jülüjain naaʼin nuʼutunajachin aaʼin. Müshiijeseʼe nikirajüin naya, nütütüleʼerüin naaʼin otta nümülialüin naaʼin (Juan 14:25-31). Kapülasü naaʼin Jesuu nakuwaʼipa na waneinnua suulialeʼeya nukuwaʼipa. Anashaatasü maʼin nukuwaʼipa wapüleerua.

7. ¿Kasa naaʼinraka Jesuu süchikijee niʼitaain shikii tü Ekawaa Aipaʼajatkat nutuma niiʼiyataka akajee meimmoluin nia?

⁷ Eesü wanee kasa naaʼinraka Jesuu süchikijee niʼitaain shikii tü Ekawaa Aipaʼajatkat nutuma. Meimmoluinsai nia sünain naaʼinrüin tia. Anashiisü nümüin naaʼinrüin tü nuluwataakalü anain Maleiwa, jaʼitaichi eʼrüin japülii nia sutuma süküjünüin alawaa nüchiki otta nuʼutunuin aaʼin (Mat. 26:65, 66; Luc. 22:41, 42). Oonooshi nia sümaa nünüiki Maleiwa otta kojutushi nia nutuma. Niiʼiyatüin sükajee nukuwaʼipa niain neʼe Maleiwa anain süpüla aluwatawaa jee müshia Jesuu, outushi nia süpüla katüinjatüin noʼu waneepia na oonookana sümaa nünüiki Maleiwa. Otta müshia nia, niʼiküin na nikirajüinkana süpüla eejiraainjanain naya sümaa tü alatajatkat namüin.

8. (1) ¿Kasa nüküjaka Jesuu namüin na nikirajüin chainjanakana iipünaa? (2) Sülatapa maʼaka jeʼra juya süchikijee outuin Jesuu, ¿kasa ayatakaʼaya naaʼinrüin na nikirajüinkana?

⁸ Meimmoluinsai Jesuu sükajee nnojoluin kapülain naaʼin tü kasa shapaakalü atuma naaʼin, shia kapülaka naaʼin tü choʼujaakat namüin na aluwataaushii waneepiakana nümaa. Süchikijee nüjütüin Judas, niʼitaain shikii tü Outkajawaakat eere Sotuin Waaʼin Outuin nia otta nnojotsü wainmain kasa naaʼinraka sünain. Sünainjee tia ekawaakat, sotuinjatü naaʼin na nikirajüin Jesuu chainjanakana iipünaa, anainjatüin nakuwaʼipa otta nüpansaajüin wanee pütchi namaa (1 Cor. 10:16, 17). Nüküjain namüin kasain nuluwataain anain naya Jeʼwaa nümaa niakai süpüla waneepiainjanain naya nümaa otta süpüla chainjanain naya iipünaa  (Juan 15:12-15). Jee nüküjain namüin kasain eejiraainjanain amaa naya otta nüma amüinchii meimmoluinjanain naya maʼaka meimmoluin nia (Juan 16:1-41; Juan 16:33, TNM). Sülatapa maʼaka jeʼra juya, ayatüshiʼiya meimmoluin na nikirajüinkana otta kapülasü naaʼin nakuwaʼipa na waneinnua jaʼitashii müliain naya. Naaʼinrüin tü naaʼinrapuʼukat Jesuu (Heb. 10:33, 34).

9. ¿Kasa waaʼinrajatka süpüla meimmoluin waya maʼaka naaʼin Jesuu?

⁹ Akaʼaya maaʼulu yaa, meimmoluinsalii waya maʼaka naaʼin Jesuu. ¿Kasa waaʼinrajatka süpüla wountuin tia? Wakaaliijainjana na wawalayuu apüleeruaanakana aaʼin saaʼujee nanoula. Eeshii na püreesakana sümaa nnojoluin kasain naainjalain. Müshiijeseʼe woʼuraajüinjanain napüleerua jee asoutajana waya naaʼu chaa laülaapialuʼu otta jamajüle naya natuma na aluwataashiikana (Filip. 1:14; Heb. 13:19). Wanee kasa meimmoluinka akajee waya shia nnojoliire wooʼulaain suulia aküjaa pütchi (Aluw. 14:3). Maʼaka naaʼin Jesuu, ayatüshii waya aküjain süchiki sukuwaʼipa tü Aluwatawaa niʼitaakat Maleiwa. Waaʼinrüin tia, jaʼitaina müliain waya jee süpüleeruaanüin waaʼin. ¿Kasache waaʼinrajatka müleka mmorüle waya?

10. (1) ¿Kasa waaʼinrajatka maʼaka jeʼra semaana süpülapünaa tü Outkajawaakat eere Sotuin Waaʼin Outuin Jesuu? (2) ¿Jamüsü waaʼinrajatka tia?

¹⁰ Wanee kasa meimmoluinjeenaka atuma waya shia jülüjale waaʼin tü kasa naapüinjatkat Maleiwa wamüin sünainjee naapajiraain nikii Jesuu waaʼu (Juan 3:16, TNM; Éf. 1:7). Maʼaka saaʼin jeʼra semaana süpülapünaa tü Outkajawaakat eere Sotuin Waaʼin Outuin Jesuu, anasü maʼin waapüle analuʼut nümüin Jeʼwaa saaʼujee taashin waya nutuma suulia waainjala. Soʼu tia semaanakalüirua, waashajeʼera suluʼujee tü Wiwüliakat süchiki tü alatakat nümüin Jesuu süpülapünaa outuin nia. Shiasaʼa woutkajaapa süpüla Sotuin Waaʼin Outuin Jesuu waaʼu, wayaawateerü nnojoluin shiʼitaanüsüin neʼe tü pankat sümaa tü wiinokot otta kojutushaatain maʼin naapajiraain nikii Jesuu waaʼu. Waʼatapajashaatain maʼin tü naapüinjatkat  Jeʼwaa wamüin otta meimmoluinsalii waya sutuma wayaawatüin saaʼu tü naaʼinrakat Jesuu nümaa Jeʼwaa wapüleerua otta süpüleerua wapüshi (Heb. 12:3).

11, 12. ¿Kasa wekirajaaitpaka anain?

¹¹ Sünainjee tü Outkajawaakat eere Sotuin Waaʼin Outuin Jesuu, watüjaa aaʼu kojutuinjatüin wamüin naapajiraain nikii Jesuu waaʼu, nnojoluin yaletüin naaʼin otta meimmoluin nia. Tia, shia tü wekirajaaitpakalü anain. Waapüin analuʼutka nümüin Jesuu saaʼujee müin nukuwaʼipa, shialeekajaʼa jooluʼu süka nusoutuin waaʼu nümüin Maleiwa, süka niain chi Sacerdoote Miyoʼushikai (Heb. 7:24, 25). Outkajaʼawalinjana waya süpüla sotuin waaʼin outuin nia saaʼu waainjala, sükajee tia waapeerü tü analuʼutkat nümüin (Luc. 22:19, 20). Outkajaʼawaishii waya juyawai soʼu 14 tü kashikat nisán. Tia outkajawaakat shia tü kojutuleekalia maʼin wamüin.

¹² Wayaawateerü aaʼu wanee nukuwaʼipa Jesuu anaka maʼin müleka jülüjale waaʼin nnojoluin wainmain kasa aainjünaka sünain tü Ekawaa Aipaʼajatkat. Eʼnnaajünüshi maʼin Jesuu sükajee tia akuwaʼipaakat yaaiwaʼaya nia mmapaʼa. Wekirajaa sünain tia.

13. (1) ¿Jamüsü sünüiki Juan 15:9 otta 1 Juan 4:8-10 süchiki saalin wayuu nüpüla Jeʼwaa otta Jesuu? (2) ¿Jaralii na anakana akuwaʼipa sutuma alin wayuu nüpüla Jeʼwaa otta nüpüla Jesuu?

¹³ Sünainjee süpüshuaʼa tü naaʼinrakat Jesuu, wayaawata aaʼu aishaatain waya nüpüla Jeʼwaa (paashajeʼera Juan 15:9; 1 Juan 4:8-10). Sükajee alin waya nüpüla Jesuu, outushi nia saaʼu waainjala. Na anoujashii chainjanakana iipünaa otta na kepiainjanakana yaa mmapaʼa, anasü nakuwaʼipa sutuma alin naya nüpüla Jeʼwaa otta sutuma naapajiraain nikii Jesuu naaʼu (Juan 10:16; 1 Juan 2:2). Wekirajaa sünain alin nüpüla Jesuu na nikirajüinkana otta kapülain naaʼin nakuwaʼipa, niiʼiyatüin tia sükajee niʼitaain shikii tü Ekawaa Aipaʼajatkat nutuma.

14. ¿Jamüsü watüjaaka saaʼu alin maʼin nüpüla Jesuu na nikirajüinkana?

¹⁴ Watüjaaitpa aaʼu alin maʼin nüpüla Jesuu na nikirajüinkana, müshiijeseʼe nnojoluin nuluwataain naya sünain aaʼinraa wainma kasa sünain tü Outkajawaakat eere Sotuin Waaʼin Outuin nia. Outkajaʼawaishii juyawai na anoujashiikana süpüla sotuinjachin naaʼin outuin Jesuu, jaʼitaina jalain naya, jaʼitakajeʼe püreesale naya ayatüshiʼiya outkajaain (Alat. Map. 2:10, TNM). Oonooshii naya sümaa tü nuluwataakalü anain Jesuu.

15, 16. ¿Kasa naaʼinraka waneinnua wawalayuu süpüla noutkajaainjanain soʼu tü Ekawaa Aipaʼajatkat nutuma chi Senyotkai mayaainjeʼe kapüleein shia namüin?

¹⁵ Nachajaain sukuwaʼipa na anoujashiikana süpüla noutkajaainjanain shiiʼiree sotuin naaʼin outuin Jesuu otta ayatayülia naaʼinrüin shia. Naainjawalin tü nuluwataakalü anain naya Jesuu jaʼitasü kapüleein shia namüin. Jamüshijaʼa chi wawalakai Harold King chajachi nia püreesain China otta nnojoishi nia aashajeʼennüin sümaa wayuu. Nüchajaaka sukuwaʼipa süpüla naainjain tü Outkajawaakat eere Sotuin Waaʼin Outuin Jesuu. Naainjawalin ojuunaa tü pankat otta tü wiinokot süka tü kasa eejatkat nümaʼana. Otta eirakaashi nia nümüin chi kashikai süpüla nütüjaain saaʼu kasoʼulüinjatüin tü outkajawaakat. Soʼu sükalia tü outkajawaakat, eeʼirajawaishi nia, oʼuraajawaishi otta ekirajaʼawaishi sünain wanee pütchi suluʼujeejatü tü Wiwüliakat eejachire nia asürünnüin.

¹⁶ Otta eeshii waneinnua wawalayuu jieyuu püreesashii soʼunnaa Segunda Guerra Mundial. Outkajaʼawaishii naya soʼu tü ai saainjünakalü oʼu tü Ekawaa Aipaʼajatkat nutuma chi Senyotkai, naaʼinrüin tia mayaapejeʼe eein süpüla noʼutünüin aaʼin. Outkajaashii naya ojuunaa süka nnojoluin wainmain kasa aainjünaka sünain tia outkajawaakat. Anuu nanüiki: «Shaʼwashawatshii waya, wakoʼoyoluin wanee tulu süka kuluulu kasuusü, weʼitaaka shia pasanain wanain jee weʼitaaka tü pankat sümaa tü wiinokot saaʼu. Nnojoishii waya achuwajaain luusa suulia weʼnnüin sutuma wayuu, shia wachuwajaaka wanee weela. [...]  Waküjain wachikuaʼa nümüin chi Washikai niainjachin waʼwaajüin neʼe nümüiwaʼa süpüla kojutuin nia watuma». ¡Anashaatasü maʼin nanoula naya wawalayuukana! Aishii waya nüpüla Jesuu, müshiijeseʼe woutkajaain süpüla Sotuin Waaʼin Outuin nia, jaʼitasü kapüleein tia wamüin.

17. ¿Kasa wasakireʼerüinjatka anain waaʼin?

¹⁷ Süka sülüʼülüin maʼin sükalia tü Outkajawaakat eere Sotuin Waaʼin Outuin Jesuu, anasü maʼin wasakireʼerüle waaʼin sünain tüü: «¿Kasa taaʼinrajatka süpüla alin tapüla wayuu maʼaka naaʼinrüin shia Jesuu? ¿Kapülasüche taaʼin nakuwaʼipa na waneinnua suulialeʼeya takuwaʼipa? ¿Jülüjasüche taaʼin eein kasa isaka nachiki? ¿Wainmataapasaʼa neʼe kasa tachuntaka namüin?». Müinjatü wakuwaʼipa waneepia maʼaka nukuwaʼipa Jesuu otta kapülainjatü waaʼin nakuwaʼipa na waneinnua (1 Ped. 3:8).

18, 19. (1) ¿Kasa tü ayateetkat sotuin waaʼin? (2) ¿Kasa paaʼinreeka amüin sünainjee tü pikirajaaitpakalü anain?

¹⁸ Soʼu palit kaʼi, nnojoleena waya outkajaain wachikuaʼa süpüla sotuin waaʼin outuin Jesuu. Soʼunnaa tü müliaa miyoʼusükat, nüsaajeena Jesuu na aneekuushii chainjanakana iipünaa yaayüliikana saaʼu tü Mmakat. Sülatapa tia, nnojoleerü aainjünüin süchikuaʼa tü Outkajawaakat eere Sotuin Waaʼin Outuin Jesuu (1 Cor. 11:26; Mat. 24:31).

¹⁹ Mayaapejeʼe nnojoleerüin saainjünüin süchikuaʼa tü Outkajawaakat eere Sotuin Waaʼin Outuin Jesuu, ayateeria shia sotuin waaʼin, shiyaawaseerü wamüin nnojoluin yaletüin naaʼin Jesuu, meimmoluin nia otta aipüralin nia wayuu. Nnojoishi eeichin wanee wayuu aaʼinrakai tia. Na wayuu antapuʼukana sünain tia outkajawaakat, naküjeerü süchiki tia namüin na wayuu kepiainjanakana wanaa namaa. Aneerü maʼin nakuwaʼipa sutuma naapüin süchiki tia outkajawaakat. Aneere wakuwaʼipa sünainjee tü Outkajawaakat eere Sotuin Waaʼin Outuin Jesuu, nnojoluinjatü yaletüin waaʼin maʼaka nnojoluin yaletüin naaʼin Jesuu, meimmoluinjana waya otta alinjatü wapüla wayuu. Aapeechi Jeʼwaa kasa anasü wamüin müle wakuwaʼipa maʼaka nukuwaʼipa Jesuu (2 Ped. 1:10, 11).