1, 2. (1) ¿Jamüsü saaʼin Yoshiko sutuma tü sümakat Isaías 41:10? (2) ¿Jaralii na atütüleʼennakana aaʼin sutuma tü sümakat Isaías 41:10?

EEJATÜ wanee wawala Yoshiko sünülia, süküjain wanee tottoolu sümüin outajatüin shia soʼu palitchon kashi. ¿Jamüsüche saaʼin sutuma tü münakat sümüin? Antajaasü suluʼu shikii Yoshiko wanee pütchi suluʼujee tü Wiwüliakat kamalainka maʼin sümüin, shia Isaías 41:10 (paashajeʼera). Nnojotsü ayoʼujaain saaʼin otta sümaka sümüin tü tottootkat: «Nnojotsü taya mmoluin süka najattüin taya Jeʼwaa». * Amülialaasü saaʼin sutuma tia wetsiikulokot otta shiʼitaain maʼin saaʼin nünain Jeʼwaa. Eesü süpüla naaʼinrüin Jeʼwaa tia wapüleerua sülatapa kasa mojusü wamüin. Süpüla watüjaain saaʼu tü naaʼinrakat Jeʼwaa süpüla jimatüinjatüin waaʼin, wekirajaa sünain jamüin nüküjaka Jeʼwaa tia pütchikat nümüin Isaías.

² Nüküjain Jeʼwaa tia pütchikat nümüin Isaías süpüla nümülialüin naaʼin na israeliita amaanakana Babiloniamüin. Otta müsia nüshajirüin Jeʼwaa tia pütchikat suluʼu tü Nünüikikat süpüla nütütüleʼerüin naaʼin napüshuaʼa na aʼyataashiikana nümüin (Is. 40:8; Roma 15:4). Atütülaasü maʼin waaʼin sutuma tü pütchi sümakat tü karaloʼutakat Isaías, shialeekajaʼa maaʼulu süka müliain maʼin saaʼin wayuu (2 Tim. 3:1).

3. (1) ¿Kasa nüküjaka achiki paala Jeʼwaa suluʼu tü pütchi aneekünakat süpüla tü juyakat 2019? (2) ¿Jamüsü choʼujaaka wamüin tü nüküjakalü achiki paala Jeʼwaa?

³ Sünain ekirajaayakat tüü, wekirajaajeerü anain apünüinsü kasa nüküjaka achiki paala Jeʼwaa otta sükatchinreerü wanoula. Ayuʼluushi shia suluʼujee Isaías 41:10, tü pütchi aneekünakat  süpüla tü juyakat 2019. Tü palajatkat kasa nüküjaka Jeʼwaa wamüin shia eeinjachin nia wamaa. Tü wane, shia nüküjain wamüin niain chi Wamaleiwasekai. Jee tü chiiruaajatkat shia nükaalinjeenain waya. ¿Jamüsü choʼujaaka wamüin nikeraajüin tü nüküjakalü achiki paala? * Shia süka sülatüin kasa mojusü wamüin wapüshuaʼa maʼaka sülatüin sümüin Yoshiko. Eejiraashii waya sümaa tü kasa nooʼulakakalü aka waaʼin na nümaajanakana Satanaa. Eeshii wawalayuu eʼrakana müliaa sutuma napüleeruaanüin aaʼin natuma na sülaülashiikana mma.

4. (1) ¿Jarat tü palajatkat kasa nüküjaka Jeʼwaa wamüin wekirajaainjatka anain? (Paashajeʼera tü nootakat). (2) ¿Jamüsü nünüiki Jeʼwaa wamüin süpüla niiʼiyatüin alin waya nüpüla? (3) ¿Jamüsü paaʼin sutuma tü nümakat Jeʼwaa?

⁴ Anuu nünüiki Jeʼwaa wamüin süpüla nütütüleʼerüin waaʼin: «Nnojo mmoluin pia, anii taya pümaa». * Süpüla wayaawatüin saaʼu eein Jeʼwaa wamaa, niiʼiyatüin waalin nüpüla otta jülüjashii waya naaʼin, müshijeseʼe nümüin wamüin: «Anasü maʼin pukuwaʼipa toʼuluʼu, kojutushi pia tamüin otta aishi maʼin pia tapüla» (Is. 43:4). Nnojotsü eein wanee kasa ooʼuleʼerüinjachikai Jeʼwaa suulia alin waya nüpüla. Ayateechia waneepiain nia wamaa, jaʼitasü kasain alatüin (Is. 54:10). Yalayalasü maʼin waaʼin süka waʼaleewain Jeʼwaa otta alin waya nüpüla. Naaʼinmajeena waya maʼaka naaʼinmajüin Abram (Abraham), chi naʼaleewainkai. Müshi Jeʼwaa nümüin: «Abramkalee, nnojo mmolüin pia. [...] Taya aaʼinmajüika pia, makai aka saaʼin wane nuunjulaaya wane atkaai suulia niʼipolo» (Gén. 15:1).

5, 6. (1) ¿Jamüsü watüjaaka saaʼu nükaalinjeein waya Jeʼwaa soʼunnaa müliaa? (2) ¿Kasa watüjaka sünainjee sukuwaʼipa Yoshiko?

⁵ Watüjaa aaʼu nükaalinjeein waya Jeʼwaa soʼunnaa weʼrüin müliaa, müshijeseʼe nümüin wamüin: «Pülatüinjachire shirokupünaa wüin, shiimainshaata eejeechin taya pümaa; pülatüinjachire wanee süchi, nnojoleechi wüinsirüin pia. Waraitüinjachire pia saʼakapünaa siki, nnojoleechi jamajüin pia sutuma, jaʼitairü chuwatashaatain maʼin tü sikikat» (Is. 43:2). ¿Kasa aküjüneeka wamüin suluʼu tia wetsiikulokot?

⁶ Nnojotsü nüküjain Jeʼwaa wamüin nüsünneʼerüinjatüin woulia tü müliaa weʼrakat.  Nnojoleenapajaʼa niyüülajüin waya Jeʼwaa saʼaka tü müliaa makalü aka saaʼin wanee süchi isaka wachiki walatüin otta tü makalü aka saaʼin siki chuwatüsü müliaka atuma waya. Naapüin Jeʼwaa nünüiki wamüin sünain nükaaliijeenain waya süpüla eejiraain waya sümaa tü müliaakat. Nükaaliijeena waya Jeʼwaa süpüla jimatüin waaʼin jee süpüla waneepiain waya nümaa, jaʼitaina woʼutuneein aaʼin jee wanainre wanee ayuulii mepisat (Is. 41:13). Tia shia tü naaʼinrakat Jeʼwaa süpüleerua Yoshiko. Anuu sünüiki süchon tü wawalakat Yoshiko: «Ponusü maʼin waaʼin süka weʼrüin jimatüin saaʼin maama. Jaʼyasü saaʼu naapüin Jeʼwaa wanee anaa sümüin. Jaʼitakajeʼe soʼu tü kaʼi sünaajaakalü oʼu, aküjüsia shia pütchi nüchiki Jeʼwaa sümüin tü perümeerakalüirua otta na wane ayuuishiikana». ¿Kasa watüjaka sünainjee sukuwaʼipa Yoshiko? Katsüinjeerü otta yalayaleerü waaʼin wanoujale sünain eejeechin Jeʼwaa wamaa waneepia, jaʼitairü kasain alatüin wamüin.

7, 8. (1) ¿Jarat tü piamakat kasa wekirajaainjatka anain otta jamaluʼulu shia? (2) ¿Jamüsü nüküjaka Jeʼwaa namüin na judíokana nnojoluinjatüin shapaain naaʼin? (3) ¿Kasa nüküjaka Jeʼwaa suluʼu Isaías 46:3, 4 süpüla nütütüleʼerüin naaʼin na judíokana?

⁷ Anuu tü piamakat kasa nüküjaka Jeʼwaa nükajee Isaías: Nnojo shapaain paaʼin, taya chi Pümaleiwasekai. ¿Jamaluʼulu tia pütchikat? Süka tia pütchikat suluʼu hebreo, shia aküjüneeka nüchiki «wanee wayuu eirakaakai nüchiirua suulia kasain sülatüin nümüin» jee «niale wanee wayuu eirakaakuʼu makai sutuma mmoluin nia».

⁸ ¿Jamüsü nüküjaka Jeʼwaa tia pütchikat namüin na judío amaanüinjanakana Babiloniamüin? Shia süka mmoleerüin maʼin tü wayuukalüirua sushutunapa saaʼu Babilonia natuma na chejeʼewaliikana Medopersia. Sülatapa 70 juya süchikijee namaanüin na judíokana, taashinjana naya nutuma Jeʼwaa nakajee na chejeʼewaliikana Medopersia (Is. 41:2-4). Wanaa sümaa naapüin na babiloniokana jee na wayuu suluʼujeejanakana wanee mma naatajatü sünain nalüʼülüin na naʼünüükana, «katchin jaaʼin» münüshii süpüla nnojoluinjanain mmoluin naya. Jee müsia, akumajüshii sooʼomüin namaleiwase süpüla naaʼinmajünüin natuma (Is. 41:5-7). Akaajasaʼa na judíokana, nnojoishii mmoluin süka sotuin naaʼin tü nüküjakalü achiki paala Jeʼwaa, anuu nünüiki namüin: «Piakai Israelkai, tachepchiakai». Otta müsü nünüiki Jeʼwaa süpüla nnojoluin shapaain naaʼin: «Taya chi Pümaleiwasekai» (Is. 41:8-10). Wanaa sümaa «taya chi Pümaleiwasekai» nümüin Jeʼwaa namüin na judío waneepiakana nümaa, shia nüküjeeka achiki nnojoluin motuin naya naaʼin otta ayatayüliin nupueulosein naya. Otta taasia, nüküjain Jeʼwaa namüin nümaainjanain naya otta nükaalinjainjanain süpüla taashin naya. Atütülaakajasaʼa maʼin naaʼin na judíokana sutuma tü nümakat Jeʼwaa namüin (paashajeʼera Isaías 46:3, 4).

9, 10. ¿Jamüsü nnojoluinjatka shapaain maʼin waaʼin? Püküja wanee shiyaawase.

⁹ Shapaasü maʼin saaʼin wayuu maaʼulu sutuma mojuin maʼin tü mmapaʼakat. Mayaainjeʼe müliain waya sutuma tia, nnojoluinjatü shapaain maʼin waaʼin, süka jamüin, müshi Jeʼwaa wamüin: «Taya chi Pümaleiwasekai». Jimatüsü waaʼin sutuma tia pütchikat. ¿Jamüsü jimataka waaʼin sutuma?

¹⁰ Jülüjataa waaʼin tüü: eeshii piamashii wayuu suluʼujana wuusü, David nünülia wanee jee chi wane Juan. Mojusü maʼin tü wopu suʼunakalü aluʼu tü wuusükat, yalejewaain müsü shia. Nümaka joo chi chupeetkai: «Nnojo jiyoʼujaain aaʼin. Aneena jia jooluʼu walatapa süchikumüin tü mojushiikat». Mmotshi maʼin David. «Nnojo mmoluin jia, tantireena jia süka anakalü akuwaʼipa», nümaka joo nüchikuaʼa chi chupeetkai. «¿Jamüsüche maka nünüiki sümaa müliain  maʼin waya niʼrüin?», nümaka David. «¿Jamüshi nnojoika mmoluin pia?», nümaka nümüin Juan. Nusoutaka Juan: «Nia chupeetka papaa. Atüjashi nia chupeeraa. Taküjapa pümüin tü nütüjakalü apüleerua papaa, nnojoleechi pia mmoluin maʼaka nnojoluin mmoluin taya».

11. ¿Kasa watüjaka sünainjee tü alatakat nümüin Juan nümaa David?

¹¹ ¿Kasa watüjaka sünainjee tü alatakat nümüin Juan nümaa David? Meimmoluinjana waya maʼaka naaʼin Juan süka weʼraajüin nukuwaʼipa Jeʼwaa, chi Washi iipünaajachikai. Watüjaa aaʼu nükaalinjeenain waya Jeʼwaa süpüla walatüin süchikumüin tü müliaa weʼrakat maaʼutpünaa (Is. 35:4). Mayaainjeʼe mmoluin maʼin tü wayuukalüirua, nnojoishii mmoluin waya süka weʼitaain waaʼin nünain Jeʼwaa (Is. 30:15). Waküjain sümüin wayuu jamüin weʼitaaka waaʼin nünain Jeʼwaa maʼaka naaʼinrüin shia Juan wanaa sümaa nüküjain süchiki tü nütüjakalü apüleerua chi nüshikai. Süka waküjain tia sümüin wayuu, eesü süpüla neʼitaain naaʼin sünain nükaalinjeenain naya Jeʼwaa soʼunnaa müliaa.

12. (1) ¿Jarat tü apünüinkat kasa wekirajaainjatka anain? (2) ¿Jamüshi nümünaka Jeʼwaa niain wanee Aluwataai pülashikai maʼin?

¹² Anuu tü apünüinkat kasa nüküjaka Jeʼwaa nükajee Isaías: «Shiimain katsüinjeerüin paaʼin tatuma. Shiimainshaata maʼin takaalinjeechin pia». Nüküjatüjülia Isaías tü naaʼinrajatkat Jeʼwaa süpüla nükatsüinrüin saaʼin tü nupueulosekat. Müshi Isaías: Anteechi «Jeʼwaa sümaa katchin nia, nieechi aluwataaka süka pülashin nia» (Is. 40:10). Sünainjee tü nümakat Isaías, wayaawata aaʼuchi niain Jeʼwaa wanee Aluwataai pülashikai maʼin. Jamüshiijaʼa na aʼyataashiikana nümüin Jeʼwaa sümaiwa paala, akaalinjünüshii jee aaʼinmajünüshii naya nutuma sükajee tü nüpülainkat. Akaʼaya maaʼulu yaa, nükatchinrüin otta naaʼinmajüin Jeʼwaa na anoujashii eʼitaakana naaʼin nünain (Deut. 1:30, 31; Is. 43:10).

13. (1) ¿Joujawaisü nükatsüinrüin waaʼin Jeʼwaa? (2) ¿Kasa nüküjaka Jeʼwaa süpüla nükatchinrüin waaʼin jee süpüla weʼitaain waaʼin nünain?

 ¹³ Shiimainya nükatsüinrüin Jeʼwaa waaʼin, shialeekajaʼa soʼunnaa wapüleeruaanüin aaʼin natuma na waʼünüükana. Suluʼu waneirua mma, eesü süpülajünüle tü aküjaakat pütchi jee tü kasa saaʼinrakat nupueulose Maleiwa. Nnojotpejeʼe shapaain maʼin waaʼin sutuma tü kasa mojusü aainjünakat. Anuu tü nümakat Jeʼwaa süpüla nükatchinrüin waaʼin jee süpüla weʼitaain waaʼin nünain: «Jaʼitairü kasain maʼin aainjüneein pümüin, amalajaajeerü shia» (Is. 54:17). Sünainjee tia nümakat Jeʼwaa wamüin, sotusü waaʼin apünüinsü kasa.

14. ¿Jamüsü nnojotka ponuin waaʼin wapüleeruaanüle aaʼin natuma na nüʼünüükana Maleiwa?

¹⁴ Tü palajatkat kasa sotuinjatka waaʼin shia maalinjeenain waya süpüla wayuu (Mat. 10:22). Nüküjatüjülia Jesuu namüin na nikirajüinkana mülieenain maʼin naya atumawaa sülüʼütpa sükalia süpüla sajaʼttajatüin kasa süpüshuaʼa (Mat. 24:9; Juan 15:20). Tü wane kasa sotuinjatkat waaʼin shia wainmeerüin kasa nooʼulakeetka aka waaʼin na waʼünüükana süka naʼürülain waya. Soʼutku tia makat, shia nemeejeein waya, naküjain alawaa wachiki otta napüleeruain waaʼin (Mat. 5:11). Nuuʼulaajeerü Jeʼwaa nooʼulaküin waaʼin na waʼünüükana sükajee tia (Éf. 6:12; Alat. Map. 12:17). Nnojoliinjanapejeʼe mmoluin waya. ¿Jamüshii nnojoluinjanaka mmoluin waya?

15, 16. (1) ¿Jarat tü wane kasa sotuinjatkat waaʼin? (2) ¿Jamüsü sünainpünaaka tia tü sümakat Isaías 25:4, 5? (3) ¿Kasa alateetka namüin na waʼünüükana saashin Isaías 41:11, 12?

¹⁵ Tü wane kasa sotuinjatkat waaʼin shia nüküjain Jeʼwaa amalajaajeerüin tü kasa aainjüneetkat waka. Maʼaka saaʼinmajünüin wanee wayuu suulia wanee wawai sutuma wanee süsepü piichi, naaʼinmajeena waya Jeʼwaa noulia na müliakana atuma waya (paashajeʼera Isaías 25:4, 5). Jaʼitairü kasain aaʼinnüin waka, kateeria neʼe woʼu waneepia nutuma Jeʼwaa (Is. 65:17).

¹⁶ Süpüla weʼitaain maʼin waaʼin nünain Jeʼwaa,  nüküjain wamüin tü alatajatkat namüin na aainjeekana kasa mojusü wamüin (paashajeʼera Isaías 41:11, 12). Jaʼitairü kasain maʼin naainjain na süʼünüükana nupueulose Maleiwa, akanajuweena jee ajaʼttinneena naya.

17, 18. (1) ¿Jamüsü weʼitaajeetka maʼin waaʼin nünain Jeʼwaa waashajeʼerüle waneepia tü Wiwüliakat? Püküja wanee shiyaawase. (2) ¿Jamüsü jülüjainjatka maʼin waaʼin tü pütchi süpülajatkat tü juyakat 2019?

¹⁷ Weʼitaajeerü maʼin waaʼin nünain Jeʼwaa müleka weʼraajüle maʼin tü nukuwaʼipakat. Wountuin tia waashajeʼerüle tü Wiwüliakat otta wasakireʼerüle waaʼin sünain tü sümakat. Ashajünüsü suluʼu tü Wiwüliakat süchiki tü kasa naaʼinrakat Jeʼwaa süpüla naaʼinmajüin tü nupueulosekat sümaiwa. Sutuma tia, watüjaa aaʼu naaʼinmajeenain waya Jeʼwaa maaʼulu yaa.

¹⁸ Jülüja waaʼin tü nümakat Isaías süpüla watüjaain saaʼu tü naaʼinrakat Jeʼwaa süpüla naaʼinmajüin waya. Nüküjain Isaías müin Jeʼwaa maʼaka naaʼin wanee anneetpüʼü aaʼinmajaka naʼanneetsechein. Müshi Isaías: «Kotteerü nutuma tü anneetcheinkalüirua; nüpataajeerü süpüla nutuʼuin shiairua» (Is. 40:11). Wanaa sümaa nükaalinjain waya Jeʼwaa, müshii nutuʼukai waaʼin, müshiijeseʼe nnojoluin mmoluin waya süka naaʼinmajüin waya Jeʼwaa. Aneekünüsü tü pütchi süpülajatkat tü juyakat 2019 suluʼujee Isaías 41:10, tü makalü mayaa: «Nnojo shapaain paaʼin, taya chi Pümaleiwasekai». Nüneeküin tia pütchikat chi achepchiee oonookai otta kekiikai maʼin süpüla jimatüinjatüin waaʼin soʼunnaa tü müliaa weʼrakat. Jülüja maʼin waaʼin tia pütchikat. Waaʼinrüle tia, katsüinjeerü waaʼin otta eejiraweena waya sümaa tü kasa alatajatkat soʼu palitchon kaʼi.