¿Jamüsü nnojoluinjatka shiʼitaanüin suluʼu wanee paajina naatajatü jee suluʼu redes sociales tü karaloʼutairua eekat wamaʼana?

Süka nnojoluin woikaain tü karaloʼutairua waapakat sümüin wayuu, eeshii na jülüjakana aaʼin eein süpüla nayuʼlüin koopia sünainjee jee neʼitaain shia suluʼu waneirua paajina suluʼu Internet jee suluʼu redes sociales. Eeirü kasachiki sünainjee tia süka neʼrayaain wayumüin sümüin tü pütchikat «Nnojoluinjatka Paaʼinrüin» * makat suluʼu tü paajinairua eekat wamaʼana. Aküjünüsü suluʼu tia pütchikat, nnojoluinjatüin shiʼitaanüin suluʼu wanee paajina naatajatü «wanee ayaakua eeka sünain tü karaloʼutairua eekat wamaʼana, tü karaloʼutairua eekat suluʼu wapaajinase, tü muusikakat, tü videokalüirua jee waneirua pütchi ojuʼitaka suluʼu (jee nnojotsü eʼitaanajatüin tia suluʼu redes sociales otta paajina süpülajatka alatiraa video otta pütchi)». ¿Jamüsüche nnojotka süpüla saainjünüin tia?

Süpüshuaʼa tü kasa eekat suluʼu tü wapaajinasekat suluʼu Internet aaʼinmajünüsü shia sükajee tü kanüliakat «derechos de autor». Anasü maʼin tia, süka jamüin, wainmain na ekirajüliikana sünain alawaa jee na süʼünüükana nupueulose Jeʼwaa achajaakana maʼin sukuwaʼipa süpüla neʼitaain tü karaloʼutairua eekat wamaʼana suluʼu napaajinase. Naaʼinrüin tia shiiʼiree nemeejeein na wawalayuukana jee waneinnua wayuu. Suluʼu tü napaajinasekat eesü pütchi wainmajaka atuma saaʼin wayuu saaʼu tü shiimainkat (Sal. 26:4; Prov. 22:5). Eeshii nayuʼrule pütchi suluʼujee tü karaloʼutairua eekat wamaʼana jee shiale tü logotipo jw.org wamaʼanakat süpüla neʼitaain sünain tü kasa noikaakat jee suluʼu aplicación süpülajatka serulaat jee tableta. Kasalajanapejeʼe tia laülaapialuʼu süka eein wamaʼana tü kanüliakat derechos de autor. Sutuma tia, eesü süpüla süpülajünüin suulia wayuu suikaainjatüin sükajee tia kasairua sukumajakat tü nupueulosekat Jeʼwaa (Prov. 27:12). Nnojoliipejeʼe süpüla wakaaliinjünüin laülaapialuʼujee wooʼulaale shiʼitaain wayuu tü karaloʼutairua otta tü logotipo jw.org wamaʼanakat suluʼu Internet jee sünain tü kasa noikaakat.

Nnojo wadescargaajüin tü karaloʼuta wamaʼanakat suluʼujee wanee paajina naata suulia jw.org. Naapüin Jeʼwaa tü choʼujaakat sümüin nupueulose nükajee neʼe «chi achepchiee oonookai otta kekiikai maʼin» (Mat. 24:45). Achepchieekai chia naapüin wamüin tü katsüinkalü atumaa wanoula sükajee tü paajinakat www.jw.org, tv.jw.org otta wol.jw.org. Jee müsia tü aplicación eekat neʼe wamaʼana süpüla serulaat otta tableta shia JW Language^®, JW Library^® otta JW Library Sign Language^®. Suluʼu tia paajinairua jee aplicación eekat wamaʼana nnojoleerü püntüin anain wanee kasa sünainpünaaka tü nuluwataakalü aaʼu Satanaa. Eekajasaʼa püdescargaajüle tü wakaraloʼutsekat suluʼujee wanee paajina naatajatü, eesüjaʼa naateerüle neʼe tü paashajeʼerakat süka eein süpüla shiiʼiratünüin (Sal. 18:26; 19:8).

Weʼitaale tü karaloʼutairua wamaʼanakat suluʼu wanee paajina eere nashajüin na wayuukana tü jülüjakat naaʼin süchiki, eeshiijaʼa nayeenale ashajüin na ekirajüliikana sünain alawaa jee na ayoujakana nupueulose Maleiwa. Eeshii wawalayuu aʼülüjiraainnaka namaa naya wayuukana jee mojusü neʼe pütchi nüchiki Jeʼwaa sünainjee tia. Nnojo waʼülüjiraain sümaa wayuu suluʼupünaa Internet shiiʼiree natüjaainjatüin saaʼu tü shiimainkat (1 Tim. 6:3-5; 2 Tim. 2:23-25). Otta müsia eesü paajina suluʼu Internet sünülialuʼuyaaka nupueulose Maleiwa otta eekai nanülialuʼuyaain na Laülaashii Jülüjakana Aaʼin na Aküjaliikana Pütchi sainküin Mma. Nnojoliipejeʼe kamaʼanain naya wawalayuukana wanee paajina jee nnojoliishii naya sünainpünaain redes sociales.

Waküjale süchiki jw.org sümüin wayuu, aʼyanaajiraajeena waya namaa na wawalayuukana sünain aküjaa «tü pütchi anasükat» (Mat. 24:14). Tü paajinairua otta tü aplicación eekat wamaʼana anoutunüsü shiʼipaʼaya. Jee waküjain süchiki tia sümüin wayuu süka keeʼireein waaʼin anain sukuwaʼipa sutuma. Eeshii süpüla waluwataain wanee karaloʼuta namüin na wayuukana suluʼupünaa correo electrónico jee waluwataain wanee enlace süpüla nadescargaajüin shia suluʼujee jw.org. Müle shia watuma, wakaalinjeerü wayuu süpüla süchajaain tü shiimainkat eere niʼitaanüin shia «chi achepchiee oonookai otta kekiikai maʼin».