Anashaatasü maʼin tü pütchi suluʼukat tü Wiwüliakat. Paashajeʼerüle shia waneepia sümaa piʼitaain sünain pukuwaʼipa tü paashajeʼerakat suluʼu, aneerü maʼin pukuwaʼipa sutuma (Josué 1:8; Salmo 1:​1-3). Pütüjaajeerü aaʼu sutumaya tü nukuwaʼipakat Maleiwa sümaa tü nukuwaʼipakat Jesuu, jee eesü süpüla katüin poʼu waneepia paaʼinrüle tü sümakat (Juan 17:3).

¿Jamüinjatche sukuwaʼipa putuma süpüla paashajeʼerüin tü Wiwüliakat? Wainma sukuwaʼipa. Eesü süpüla paashajeʼerüin tü Wiwüliakat sükajee tü karaloʼutakat Paashajeʼera tü Wiwüliakat; otta eesü süpüla paashajeʼerüin shiaʼaya sükajee tü sünüliachennii yalakat suluʼu. Jamüsüjaʼa paashajeʼerüle tü karaloʼutairua suluʼukat tü Wiwüliakat, pütüjaajeerü aaʼu tü nukuwaʼipapuʼukat Maleiwa namaa na israeliitakana. Eesü süpüla paashajeʼerüinya tü karaloʼutairua aashajaakat süchiki nakuwaʼipa na anoujashii eejanakana soʼu nükalia Jesuu, pütüjaajeetka saaʼu jamüin nakuwaʼipa süpüla nawainmalaain. Paashajeʼerüle maʼaka jeʼrasüirua kapiitulo soʼukaʼiwai, puunteerü paashajeʼerüin süpüshuaʼa tü pütchi suluʼukat tü Wiwüliakat soʼu wanee juya.

Pütüjaweere aaʼu jamüinjatüin sukuwaʼipa süpüla paashajeʼerüin tü Wiwüliakat soʼukaiwai, jee shiale süpüla paashajeʼerüin süpüshuaʼa tü pütchi suluʼukat tü Wiwüliakat soʼu wanee juya jee shiale neʼe süpüla puʼttüin sünain aashajeʼeraa tü Wiwüliakat, anasü püshatüle tü aküjünakat suluʼu tü karaloʼutakat Paashajeʼera tü Wiwüliakat. Eesü süpüla püdescargaajüin sümaa piʼinpürimiijüin shia puʼttaiwa sünain aashajeʼeraa tü Wiwüliakat soʼukaijeʼereʼeya.