«Tekirajaa anainrü wanee pütchi jekenainka katsüinka atuma tanoula. Eetaayaai tatüjaain saaʼu müinjatüin shia». ¿Eesüjaʼa müirüle pünüiki mayaa? Tia pütchikat nüküjain chi wawalakai Geoffrey Jackson suluʼu tü aipiruakat kasa namakat na Laülaashii Jülüjakana Aaʼin na Aküjaliikana Pütchi soʼu 2020. «Kapüleʼereesüjeʼe maʼin wamüin wakatsüinrüin wanoula soʼunnaa tü ayuulii eekat maaʼulu nnojorüle eein wamaʼana JW Library. Nikirajüin waya Jeʼwaa süpüla yapainjanain waya soʼunnaa tü müliaa weʼrakat», müshi niaʼaya.

 ¿Jamüshii watüjaainnapaka süpüleerua JW Library? ¿Kasa aainjünaka süpüla anaʼleeinjatüin maʼin shia?

 Soʼu maayoʼu 2013, na Laülaashii Jülüjakana Aaʼin na Aküjaliikana Pütchi, nachuntuin namüin na wawalayuu aʼyataakana suluʼu departamento de programación de MEPS süpüla nakumajüinjatüin wanee aplicación kaluʼuinjatka Traducción del Nuevo Mundo jeketka ojuʼitüin. «Nnojotyülia akumajünüin wanee kasa eekai müin aka saaʼin tia», müshi Paul Willies wanee wawala aʼyataakai sünain Programación de MEPS. «Aneekajünüshii waneinnua wawalayuu süpüla naʼyataainjanain namaa waneinnua aʼyataaka suluʼu naata Departamento süpüla nakumajüinjatüin tü aplicaciónkot. Oʼuraajashaanashii maʼin waya nümüin Jeʼwaa süpüla nükaalinjainjanain waya. Jaʼrai kashi süchikijee, ojuʼitüsü tü aplicaciókot, aküjünüsü shia suluʼu tü Outkajawaa Aainjünawaikat Juyawai sutuma Watch Tower», müsü nünüiki chi wawalakai Paul Willies.

 Tü wanee kasa kapüleekat maʼin wamüin shia shiʼitaanüinjatüin suluʼu tü aplicaciónkot karaloʼutairua suluʼu wainma anüikii naatajatü. Soʼu eneeroʼu 2015 eejatü suluʼu tü aplicaciónkot kojuyasü karaloʼuta suluʼu Inglés, soʼu aipirua kashi süchikijee, eeitpa süpüla südescargaajünüin wainma karaloʼuta suluʼu wainma anüikii naatajatü.

 Anaʼleesia maʼin natuma na wawalayuukana maaʼulu tia aplicaciónkot, wainma video jee karaloʼutairua suluʼu jee kottusü natuma süpüla wekirajaainjanain sünain tü outkajawaakat. Müleka watüjaweere saaʼu sooʼomüin wanee wetsiikulo jee shiale wanee pütchi, wousüteerü tü aküjünakat süchiki suluʼu Nachajaayainjatü pütchi na aküjaliikana pütchi nüchiki Jeʼwaa.

 Wainma na ekerotokana suluʼu JW Library, soʼukaiwai nojutalüin shia 8 miyoone wayuu otta kashiwai, eetaashii maʼaka 15 miyoone na ekerotokana suluʼu. ¿Kasa aainjünaka süpüla mapüleeinjatüin ekerotoo suluʼu JW Library? «Choʼujaasü sunoutunawalin waneepia wanee aplicación, müsüjeseʼe waʼyataain maʼin sünain süpüla anainjatüin maʼin shia otta mapüleeinjatüin sümüin wayuu ekirajawaa süka. Aʼwanajaanawaisü waneepia tü kanüliakat Sistema Operativo, choʼujaasüjeseʼe sunoutunawalin waneepia tü aplicaciónkot süpüla anainjatüin maʼin sukuwaʼipa suluʼupünaa serulaat, tableta otta computador. Wanoutawalinjatü sukuwaʼipa JW Library süpüla anainjatüin anajaa otta aapajaa tü kasa jeketü eʼitaanakat suluʼu», müshi chi wawalakai Paul Willies. Suluʼu JW Library eetaasü maʼaka saaʼin 200.000 karaloʼuta jee 600.000 pütchi akürawaajuushi jee videoirua.

 Süpüla anainjatüin maʼin JW Library, nnojotsü neʼe choʼujaain wainmainjatüin computador. Choʼujaasü waneirua programa kojutuka maʼin. Sülia waneesia 1.500 dólar juyawai. Na wawalayuu aʼyataakana sünain Programación de MEPS, nakataajüin 10.000 dólar juyawai sünain nayaʼlajüin computador, tableta otta serulaat süpüla natüjaainjatüin saaʼu anale maʼin JW Library suluʼu.

 Sutuma eeitpain JW Library, nnojoluitpa akataajünüin wainma nneerü sünain shiʼinpürimiijünüin, sukumajünüin otta suluwataanüin waneirua karaloʼuta. Jamüsüjaʼa tü karaloʼutakat Pikirajaa waneepia sünain tü Nüchikimaajatkat Maleiwa, eʼinpürimiijünüsü maʼaka saaʼin 12 miyoone soʼu tü juyakat 2013. Akatsaʼa soʼu 2020, eʼinpürimiijünüsü neʼe maʼaka saaʼin 5 miyoone tia karaloʼutakat mayaainjeʼe eejanain maʼaka 5.700.000 na wayuu aashajeʼerawaikana shia suluʼu karaloʼutain. ¿Jamüsü palitka tü eʼinpürimiijünakat? Shia süka wainmaleeinnapain na wayuu aashajeʼerawaika shia suluʼu JW Library. a

 Wainma kasa anasü neʼraka na wayuukana suluʼu JW Library. Jamüsüjaʼa Geneviève, kepiaka chaa Canadá, kamalainsü maʼin sümüin shikirajaain sünain tü Bibliakat süka mapüleein shia sümüin. «Müleka tekirajaainjatüle süka wainma karaloʼuta, isasüjeʼe tachiki taaʼinrüin shia soʼukaiwai. Tousütapejeʼe suluʼu JW Library süpüshuaʼale tü tekirajaaweekalü anain, akatsüinraasü maʼin tanoula jee aleewasü maʼin taya nümaa Jeʼwaa sutuma».

 Jalouisü maʼin JW Library soʼunnaa tü ayuuliikat COVID-19. Anuu tü sümakat Charlyn, chejeʼewat shia Estados Unidos: «Mayaainjeʼe sülatüirüin wanee juya nnojoluin sujuʼitüin tü karaloʼutakalüirua eekat sutuma nupueulose Jeʼwaa, katsüinsü maʼin tü wanoulakat sutuma eein JW Library. Taapüin analuʼutka nümüin Jeʼwaa saaʼu tia».

 Wainma wayuu wanaawaka saaʼin sümaa Faye, kepiasü shia Filipinas. Müsü shia: «Kooʼomüinsü tanoula sutuma tü suluʼukat JW Library. Taashajeʼerawalin shia wattaʼa maalü, taapajawalin pütchi suluʼu sujuuna taaʼinrüin waneirua kasa otta tekirajaain süpüla tü outkajawaakat, ekirajaasü taya süpüla tekirajüin wayuu, tanajüin video teemeraapa jee taashajeʼerüin waneirua karaloʼuta taʼatapajapa wanee kasa. Shia wanee kasa anashaataka maʼin».

 Anasü maʼin JW Library süpüla waküjain pütchi, jamüsüjaʼa wanee wawala kepiaka chaa Camerún, shiʼrüin saashajeʼerüin wanee wawala sümaajatka sünain aküjaa pütchi wanee wetsiikulo anaka maʼin. Shiasaʼa jeʼra semaana süchikijee tia, saashajeʼereein tü wawalakat tia wetsiikulokot sümüin wanee wayuu, nnojotpejeʼe sotuin saaʼin jetsüin shia. Anuu tü sümakat: «Tojutalaka JW library, tachajaaka eere tü Bibliakat wanee pütchi sotoka taaʼin, tousütamaataka tü wetsiikulokot. Eesü süpüla tousütüin suluʼu JW Library wainma wetsiikulo motowaika taaʼin».

 Süka tü nneerü jüsülajakat suluʼupünaa donate.jw.org, wountuin wakumajüin JW Library otta wanouteʼerüin shia napüla na wawalayuukana sainküin mmakat süpüshuaʼa. Waapüin analuʼutka jümüin süka jüsülajüliin maʼin.

1. Ojuʼitüsü JW Library soʼu oʼutuupüroʼu 2013, eʼitaanüsü Traducción del Nuevo Mundo suluʼu.

2. Soʼu eneeroʼu 2015, eʼitaanüsü karaloʼuta suluʼu Inglés jee suluʼu wainma anüikii.

3. Soʼu nowienpüroʼu 2015 eeitpa süpüla wejeettüin tü pütchi wekirajaakalü anain.

4. Soʼu maayoʼu 2016, eʼitaanüsü suluʼu tü wekirajaainjatkalü anain sünain tü outkajawaakat.

5. Soʼu maayoʼu 2017, eeitpa süpüla washajüin suluʼu tü wekirajaakalü anain.

6. Soʼu tisienpüroʼu 2017, eʼitaanüsü suluʼu süpüla kooʼomüinjatüin watüjain wanee wetsiikulo.

7. Soʼu maatsoʼu 2019, eeitpa süpüla wadescargaajüin tü pütchikalüirua otta tü videokalüirua, otta eesü süpüla wachajaain pütchi suluʼujee Nachajaayainjatü pütchi na aküjaliikana nüchiki Jeʼwaa.

8. Soʼu eneeroʼu 2021, anaʼleesia maʼin JW Library süpüla mapüleeinjatüin ekirajaa wayuu süka tü karaloʼutakat Anainjatka atuma pukuwaʼipa waneepia.