Chi pürekutsootkai nia wanee wayuu akutujakai wopu palajana süpüla sülatüin wayuu nüchiirua. Pürekutsootshi Jesuu süka nüjütünüin yaamüin süpüla akaaliinjaa wayuu: müsü nukutujakai saaʼin tü wopu süpünainjatkat wayuu sünainmüin tü kataakalü oʼuu (Mateo 20:28). Washatüin nukuwaʼipa Jesuu, müshiijeseʼe walatirüin wainma kaʼi sünain ekirajaa wayuu maaʼulu (Mateo 28:19, 20). Eeshii wawalayuu eekai pürekutsoolüin.

Aʼyataashi waneepia nümüin Maleiwa. Aküjüshii pütchi napüshuaʼa na wawalayuukana. Akatsaʼa eein na achajaakana nakuwaʼipa süpüla pürekutsoolüin rekulaat naya, alatitshii 70 oora kashiwai sünain aküjaa pütchi. Aʼyataʼawaishii naya shiatapünaa kaʼi shiyaaluʼu tü choʼujaakat namüin. Eeshii na aneekünakana süpüla pürekutsoolüin pesiaat naya, ajütünüshii eere choʼujaain aküjülii pütchi: alatitshii naya 130 oora sünain ekirajaa wayuu jee aküjaa pütchi. Nnojoishii oʼunüin süchiirua kamaʼanaa wainma kasa otta natüjaa aaʼu naapeerüin Jeʼwaa tü choʼujaakat namüin (Mateo 6:31-33; 1 Timoteo 6:6-8). Na isakana achiki pürekutsoolüin rekulaat jee pesiaat, eeshii süpüla pürekutsoolüin aaʼusiliaat naya, alatitshii 50 jee 30 oora sünain aküjaa pütchi soʼu wanee kashi.

Aishi nüpüla Maleiwa otta na wayuukana. Amülialaasü waaʼin maʼaka nümülialaain aaʼin Jesuu naaliin na wayuu meʼraajüinkana Maleiwa (Marcos 6:34). Akatsaʼa watüjaain aaʼu tü kasa aneetkalü atuma nakuwaʼipa maaʼulu jee mapeena. Akatatshi kaʼi wanee pürekutsoot süpüla nüküjüin maʼin pütchi süka alin nüpüla na wayuukana (Mateo 22:39; 1 Tesalónica 2:8). Talatsü naaʼin süka niʼrüin kooʼomüin nunoula jee aleewain nia nümaa Maleiwa (Aluwataaushikana 20:35).

• ¿Kasa naainjaka wanee pürekutsoot?

• ¿Kasa pürekutsootka atuma wanee wayuu?