Nukumajaiwaʼaya Jeʼwaa na wayuukana niʼitaain na kachonshiikana süpüla nepijüin nachonnii (Colosas 3:20). Piainjachi ekirajaka püchonnii süpüla alin Jeʼwaa napüla otta wayuuinjanain laülaa aaʼinchii naya (2 Timoteo 1:5; 3:15). Püsakirüinjana naya kasain jülüjüin naaʼin. Otta müsia choʼujaasü maʼin anain pukuwaʼipa napüleerua. Shia anaka maʼin suluʼule paaʼin tü nikirajakat Jeʼwaa süpüla pülatirüin shia namüin püchonnii (Salmo 40:8).

TÜ SÜMAKAT TÜ WIWÜLIAKAT: Ee jaaʼin sünain tü nüküjakat wanee juwala jümüin otta nnojo jusouktüin pejeewa (Santiago 1:19). Shia püchekaka maʼin naküjüin pümüin na tepichikana tü jülüjakat naaʼin. Puunteerü tia paapajüle nanüiki naashajaapa pümaa. Nnojo paashichijaain namüin naküjapa pümüin tü jülüjakat naaʼin (Santiago 3:18). Nnojoleerü naküjüin tü shiimainkat neʼrüle paashichijaweein otta airuʼurule pünüiki namüin. Nnojo püshapajaain aaʼin, shia anaka aluʼu püküjawaire alin naya püpüla (Mateo 3:17; 1 Corinto 8:1).

TÜ EEKAT SÜPÜLA PAAINJÜIN:

• Paapaja nanüiki naashajaweere pümaa

• Paashajaa weinshi namaa püchonnii, nnojotsü shiainjatüin neʼe mojupa natuma wanee kasa

TÜ SÜMAKAT TÜ WIWÜLIAKAT: «Kekiire wanee wayuu sünain wanee kasa, aneerü sukuwaʼipa nutuma» (Proverbios 16:20, TNM). Nnojotsü jülüjüinjatüin neʼe paaʼin nanüiki püchonnii, piyaawatüinjatü saaʼu jamüin naaʼin. Wainma kasa naküjayaaka na tepichikana, eesü naküjüle tü nnojotkat jülüjüin naaʼin. Anuu sünüiki tü Wiwüliakat: «Nusounnajaale wanee wayuu süpülapünaa naapajüin wanee pütchi malaa neʼe tü naainjakat otta eʼrüshi japülii» (Proverbios 18:13, TNM). Müshijeseʼe nnojolinjachin jashichijaamaatüin pia (Proverbios 19:11).

TÜ EEKAT SÜPÜLA PAAINJÜIN:

• Jalia pusounnajaʼalayaai wanaa sümaa naashajaain chi püchonkai otta nnojo püinkuuin aaʼin sutuma tü nümakat

• Soto paaʼin jamapuʼuin paaʼin otta kasain kapülapuʼuin paaʼin jintüliiwaʼaya pia

TÜ SÜMAKAT TÜ WIWÜLIAKAT: «Poonoo sümaa nünüiki püshi otta nnojo piyouktüin tü suluwataakalü anain pia tü püikat» (Proverbios 1:8, TNM). Niʼitaain Jeʼwaa chi toolokoi sümaa tü jietkat süpüla laülaain naya naaʼu nachonnii. Nekirajüinjana naya süpüla jaa namüin otta kojutüin wayuu namüin (Éfeso 6:1-3). Nayaawata aaʼu na tepichikana wanaawajiraale jaaʼin (1 Corinto 1:10). Müshiijeseʼe nnojoliinjanain aʼülüjiraain jia saaʼu wanee kasa nnojotka wanaawain anain jaaʼin noʼupala na jüchonniikana, mojuteena jia namüin jaaʼinrüle tia.

TÜ EEKAT SÜPÜLA JAAINJÜIN:

• Kettaaja jutuma tü sukuwaʼipainjatkat nachiajaaya jüchonnii

• Piyaawatüinjatü aaʼu jamüin nnojotka wanaawain sünüiki puʼwayuuse pümaa süchiki nekirajia na tepichikana

TÜ SÜMAKAT TÜ WIWÜLIAKAT: «Pikiraja püchon wanaapünaa sümaa tü wopu nuʼunüinjatkalü aluʼu» (Proverbios 22:6, TNM). Aneere nekirajia püchonnii, kettaaja putuma jamüinjatüin nekirajia otta nachiaaya (Salmo 127:4; Proverbios 29:17). Nnojo piʼyaatüin neʼe naya, püküja namüin jamüin püpülajaka waneeirua kasa noulia (Proverbios 28:7). Pikiraja naya süpüla kojutüin namüin tü Wiwüliakat otta süpüla nayaawatüin saaʼu tü pütchi suluʼukat (Salmo 1:2). Müle shia putuma, nnojoleerü jülüjüin naaʼin tü kasa mojusükat (Hebreokana 5:14).

TÜ EEKAT SÜPÜLA PAAINJÜIN:

• Pikiraja maʼin püchonnii süpüla shiimainjachin Maleiwa namüin otta neʼitaainjatüin naaʼin nünain

• Piyaawatira naya tü kasa nayouktajatkat suluʼu Internet otta tü aainjünakat suluʼu redes sociales. Püküja namüin nayouktajatüin tü namakat na ataüjaaliikana tepichi