Piama kashi süchikijee noʼunuin na israelitakana Egiptojee, antüshii naya eemüin tü uuchikat Sinaí jee makataka naya yala. Nuʼunakalaka Moisés nümüiwaʼa süraloʼumüin tü uuchikat. «Toʼtteʼerüin na israelitakana. Müleka noonoole sümaa tanüiki jee naaʼinrüle tü taluwataakalü anain naya, taneekeena naya süpüla nayainjanain tapueulosein», nümaka Jehová nümüin. Nüshakatapa Moisés saaʼujee tü uuchikat, nüküjain namüin na israelitakana tü nümakat Jehová. ¿Jamakaʼa nanüiki nümüin Moisés? «Waaʼinreerü süpüshuaʼa tü kasa nuluwataakalü anain waya Jehová» müshii naya.

Nuʼunaka mapa nüchikuaʼa Moisés süraloʼumüin tü uuchikat. «Soʼu apünüin kaʼi taküjeerü sümüin tü pueulokot wanee kasa. Paapira tü wayuukalüirua suulia noʼunuin saaʼumüin tü uuchikat Sinaí», nümaka Jehová nümüin. Nüshakatapa Moisés saaʼujee tü uuchikat, nüküjain namüin na israelitakana yapainjanain naya süpüla naapajüin nünüiki Jehová.

Sülatapa apünüin kaʼi, neʼrüin na israelitakana shiyaa juya jee süsirumajaaka chaa saaʼu tü uuchikat. Naapaka sütüttüin tü juyakat jee shiʼyalajinnüin suʼuwa paaʼa. Neʼraka suchuwajaain iipünaajee tü nüpülainkat Jehová. Ayoʼujaasü maʼin naaʼin na israelitakana. Kaituuisü saaʼupünaa tü uuchikat jee akutkujaasü tü mmakat. Otta emetutsü maʼin tü shiʼirakat suʼuwa paaʼa.

Nuʼunaka nüchikuaʼa Moisés süraloʼumüin tü uuchikat nüküjaka Jehová nümüin tü naaʼinrüinjatkat na israelitakana süpüla naʼwaajüin nia jee jamüinjatüin nakuwaʼipa. Nüshajaka Moisés tia jee naashajeʼeraka shia namüin na israelitakana. «Waaʼinreerü süpüshuaʼa tü nuluwataakalü anain waya Jehová», namakalaka nümüin Moisés.