Chaa Filipos, eejatü wanee jiet piuuna kaseyuusü, shiyaawata aaʼu tü alatajatkat. Wainma nneerü sükanajüin namüin na sülaamainkana. Wanaa sümaa nantapaatain Pablo nümaa Silas Filiposmüin, nachiiruaakuʼu namüsü tia jietkat soʼu wainma kaʼi. «Wayuukana naa, aʼyataashii nümüin chi Maleiwa Miyoʼushikai maʼin suulia tü waneirua eekai eein», maʼwaisü sutuma kaseyuuin shia. «Saaʼu nünülia Jesús, tamüsü paala pia: ¡Pujuʼita suulia tü jintutkat!», nümaka Pablo sümüin tü süseyuukat. Shiasaʼa süchikijeechon nümüin sümüin, sujuʼitaka suulia.

Natüjaapa saaʼu na sülaamainkana tü wayuukot nnojoluitpain süpüla nakanajüinjanain nneerü sükajee, aashichijaashii naya. Nataʼülaka Pablo nümaa Silas. Noʼunitka naya namaʼanamüin na laülaayuukana otta na akumajüliikana sukuwaʼipa kasa sünain maa namüin: «Judíokana naa, nekeʼeja aaʼinrü tü wayuukalüirua sümaa nekirajüin sünain akuwaʼipaa nnojotkat achekünüin wapüleerua sünain waaʼinrüinjatüin». Nayasaʼa na akumajüliikana sukuwaʼipa kasa, naluwataaka süpüla naʼyaajünüin Pablo nümaa Silas. Nekerotinnaka suluʼumüin tü kaatsetkat. Jee chi kaatsetpüʼükai, nikerotirüin naya sümaa niʼitaain naya chaʼayaa shiinaluʼu maʼin tü püreesapüleekat sümaa suʼuttunuin nasaʼa süʼlatiraluʼupünaa wanee wunuʼu süpülajana püreesasü suulia isajüin.

Niasaʼa Pablo nümaa Silas, eeʼirajüshii naya nümüin Jehová süpüla naʼwaajüinjachin nia. Jee müshiʼiya na wanee püreesashiikana, naapajüin neeʼirain. Jee süseʼeruʼu aikat, sukutkujaʼalaa sümakalaka tü mmakat sümaa süliatüin tü kaatsetkat, sujutajaaka tü soʼukalüirua süpüshuaʼa. Jee sujunuujaaka tü kaleenakalüirua noulia na püreesashiikana napüshuaʼa. Wanaa sümaa niirakaain chi kaatsetpüʼükai sümüin tü soʼukalüirua tü püreesapüleekat jutajutalüin, naapaaka nüchajaruutse süpüla nuʼuniraainjachin naaʼin süka isajayaain na püreesashiikana naaʼinruʼu.

Nuʼwaatakalaka Pablo nümüin: «¡Nnojo puʼuniraain paaʼin! Anaʼaya waya wapüshuaʼa». Nuwataaka chi kaatsetpüʼükai nünainmüin Pablo otta Silas, nüsapainkaka nia namülatuʼu. «¿Kasa taaʼinrajatka süpüla toʼtteʼennüin?», nümaka namüin. «Punouja nünain Jesús. Meenaya na püpüshikana nanoujale wanaa pümaa», namaka nümüin. Ekirajünüshii naya nutuma Pablo nümaa Silas sünain tü nünüikikat Jehová. Woutiisaka mapa chi kaatsetpüʼükai sümaa nüpüshi.