EKIRAJAAYA 59
Püchechereerü paaʼin jaʼitaichi müliain pia saaʼujee punoula
Apüleeruaaneerü naaʼin napüshuaʼa na anoujashiikana jee mülieerü naaʼin saaʼujee nanoujain. ¿Mmoluinjanache waya sutuma tia?
1. ¿Jamüsü nnojoluinjatka ponuin waaʼin müliain waya saaʼujee wanoula?
«Chi wayuu eekai keisalain sümüin nukuaippa nuʼupala Maleiwa, shiʼreechi amüin nia wayuu saaliijee nünoujain nünain Jesucristo» müsü tü Bibliakat (2 Timoteo 3:12). Aʼürülaana anainchi Jesús süka nnojoluin wanaawain naaʼin sümaa wayuu manoujainsat. Müshiʼiya wayakana, müliashii waya natuma na sülaülashiikana mma jee natuma na shikiipüʼükana tü iküleesiakalüirua süka nnojoluin wanaawain wakuwaʼipa namaa na manoujainsaliikana (Juan 15:18, 19).
2. ¿Kasa waaʼinrajatka süpüla wachecherüin waaʼin?
Weʼitaainjatü waaʼin nünain Jehová, oʼuraajawalinjana waya, waashajeʼerawalinjatü tü Bibliakat otta outkajaʼawalinjana waya namaa na wawalayuukana. Müle shia watuma, katchinjeerü jee meimmoluinjeerü waaʼin süpüleeruaanapa waaʼin jaʼitainna nayain apüleeruain waaʼin na wapüshikana. Alatüsü tia nümüin chi aluwataaushikai Pablo. «Nia teenakaka chi Maleiwakai süpüla nükaalinjain taya. Nnojoleechi taya mmolüin seema tü saaʼinreetkat tü taʼünüükolüirua» müshi nia (Hebreokana 13:6).
Yalayaleerü waaʼin waküjawaire pütchi. Jamüshiijaʼa waküjale maʼin pütchi, weʼitaajeerü waaʼin nünain Jehová jee meimmoluinjeena waya seema wayuu (Proverbios 29:25). Meimmoluinre paaʼin maaʼulu yaa, mapüleejeerü pümüin püküjain pütchi napülajapa woulia waʼyataain nümüin Maleiwa na sülaülashiikana mma (1 Tesalónica 2:2).
3. ¿Kasa anasü weʼreetka wachecherüle waaʼin?
Nnojotsü anain wamüin müliale waya saaʼujee wanoula. Akatchinraapejeʼe wanoula wachecherüle waaʼin soʼunnaa tia. Jee müsia aleewashii waya nümaa Jehová otta weʼrüin nükaalinjain waya soʼunnaa iseein shia wachiki saaʼin wamüin (paashajeʼera Santiago 1:2-4, TNM). Aisü nümüin Jehová tü wamülialakat. Talatapejeʼe naaʼin niʼrapa ayatüin wachecherüin waaʼin. «Akaajasa müleka jüchecherüle jaaʼin suʼutpünaa wane müliaa eekai jiʼrüin saaliijee aaʼinraa neʼe kasa anasü, shiimüin aʼwaajüneechin pia nütüma Maleiwa sükajee tia» müsü tü Bibliakat (1 Pedro 2:20). Kateerü noʼu waneepia suluʼu wanee mma anasü napüshuaʼa na wayuu achechetkana naaʼin soʼunnaa müliaa otta na oonookana waneepia nümaa Jehová. Suluʼu tia mmakat, nnojoleerü wayuu apülajeetka woulia waʼwaajüin Jehová (Mateo 24:13).
WEKIRAJAA SOOʼOMÜIN
Wekirajaa süchiki eein süpüla waneepiain waya nümaa Jehová jaʼitashii weʼrüin müliaa saaʼujee wanoula otta wekirajaa süchiki tü kasa anasü naapeetkat wamüin.
4. Püchechereerü paaʼin napüleeruale paaʼin na püpüshikana
Nüküjain Jesús nayouteerüin waneinnua wapüshi waʼwaajüin Jehová. Jaashajeʼera Mateo 10:34-36 otta yooto jia süchiki tüü:
-
Niʼyataweepa wanee wayuu nümüin Jehová, ¿jameetche shia namüin na nüpüshikana?
Anuu nachiki waneinnua wayuu alatakana amüin tia. Jünaja tü VIDEOKOT. Süchikijee, yooto jia süchiki tüü:
-
¿Kaseerü paaʼinraka nüpüleeruale paaʼin wanee püpüshi jee niale wanee paʼaleewain süpüla puuʼulaain suulia anoujaa?
Jaashajeʼera Salmo 27:10 otta Marcos 10:29, 30, TNM. Süchikijee, yooto jia süchiki tüü:
-
¿Jamüsü katsüinjeetka paaʼin sutuma tia pütchikat napüleeruapa paaʼin püpüshi jee paʼaleewainyuu?
5. Ayataʼaya puʼwaajüin Jehová jaʼitashi müliain pia saaʼujee punoula
Yalayalainjatü waaʼin süpüla ayatüin waʼyataain nümüin Jehová jaʼitasü süpülajünüin woulia. Jünaja tü VIDEOKOT otta yooto jia süchiki tüü:
-
¿Kasa anasü naaʼinraka naya wawalayuukana yalayaleetka atuma paaʼin?
Jaashajeʼera Aluwataaushikana [Hechos] 5:27-29 otta Hebreokana 10:24, 25. Süchikijee, yooto jia süchiki tüü:
-
Süpülajünüle woulia natuma na sülaülashiikana mma waküjain pütchi jee woutkajaain, ¿jamüshi ayatüinjachika waʼwaajüin Jehová?
6. Nükaalinjeechi pia Jehová süpüla püchecherüin paaʼin
Sainküin mmakat, wainma na wawalayuu achechetkana naaʼin mayaainjeʼe müliain naya saaʼujee anoujaa. ¿Kasa naaʼinraka süpüla nountuin tia? Jünaja tü VIDEOKOT. Süchikijee, yooto jia süchiki tüü:
-
¿Kasa naaʼinraka naya wawalayuukana süpüla nachecherüin naaʼin?
Jaashajeʼera Roma 8:35 otta 37-39 jee 2 Corinto 4:7. Süchikijee, yooto jia süchiki tüü:
-
¿Jamüsü sükatchinreetka paaʼin wetsiikulokot tüüirua jaʼitashi müliain pia saaʼujee punoula?
Jaashajeʼera Mateo 5:10-12, TNM otta yooto jia süchiki tüü:
-
¿Jamüsü aneetka paaʼin jaʼitashi müliain pia saaʼujee punoula?
Watta naalii na aʼyataakana nümüin Jehová achechetkana naaʼin süpüleeruaanapa naaʼin sünainjee nanoula. Puunteerü paaʼinrüin tia süpüleeruaanapa paaʼin.
EESHII WAYUU EEKAI NAMÜIN: «Iseerü tachiki tachecherüin taaʼin müliale taya saaʼujee tanoujain».
-
¿Jarat tü wetsiikulo paashajeʼereetkat süpüla pükatchinrüin naaʼin chi jülüjakai aaʼin tia?
WATÜJAAITPAKA AAʼU
Kojutusü nümüin Jehová waneepiain waya nümaa jaʼitashii müliain waya saaʼujee wanoula. Nükaalinjeena waya süpüla wachecherüin waaʼin.
Pusouta shiʼipajee
-
¿Jamüsü nnojotka ponuin waaʼin müliale waya saaʼujee wanoula?
-
¿Kasa paaʼinrajatka maaʼulu yaa süpüla püchecherüin paaʼin?
-
¿Jamüsü pütüjaaka saaʼu püchechereerüin paaʼin sünain aʼyatawaa nümüin Jehová jaʼitairü kasain alatüin?
PÜNAʼLA SOOʼOMÜIN
Anuu tü naaʼinrakat Jehová süpüla nükaalinjain wanee wawala jimaʼai püreesakai saaʼujee niyoutuin surulaalüin nia.
Wachechera waaʼin jaʼitashii müliain waya saaʼujee wanoula (2:34)
Anuu tü naaʼinrakat wanee wayuu sümaa nuʼwayuuse süpüla naʼyataain waneepia nümüin Jehová mayaainjeʼe süpülajünüin noulia.
Aʼyataashii waya nümüin Jehová mayaainjeʼe süpülajünüin woulia (7:14)
Paashajeʼera süchiki tü waaʼinrajatkat süpüla meimmoluin waaʼin jaʼitashii müliain waya saaʼujee wanoula.
«Kettaaja waya süpülapünaa müliain waaʼin atumawaa» (Aapiria Wayuu, juulioʼu 2019)
Anuu tü waaʼinrajatkat süpüleeruaanüle waaʼin natuma na wapüshikana otta süpüla anajiraain waya namaa jee nnojoliinjanain waya ooʼulaain suulia anoujaa.
«Eesü mojujirawaa sünainjee tü shiimainkat» (Aapiria Wayuu, oʼutuupüroʼu 2017)
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
