EKIRAJAAYA 28
Kojuta pümüin tü naaʼinrakat Jehová nümaa Jesús püpüleerua
Nüsülajüle pümüin wanee paʼaleewain wane kasa anaka maʼin, ¿aashin talatüin paaʼin sümaa otta püchajaain sukuwaʼipa süpüla paaʼinrüin wanee kasa nüpüleerua? Anaʼleepejeʼe maʼin tü naaʼinrakat Jehová nümaa Jesús wapüleerua, taashinjanain waya suulia kaainjalaa jee outaa. Wekirajaa sünain tü waaʼinrajatkat kojutule wamüin tia.
1. ¿Kasa waaʼinrajatka kojutule wamüin tü naaʼinrakat Maleiwa nümaa Jesús wapüleerua?
Saashin tü Bibliakat, eesü süpüla katüin noʼu waneepia na wayuu eʼitaakana naaʼin nünain Jesús (Juan 3:16, TNM). ¿Jamüsü süpüla watüjaain saaʼu niʼitaale naaʼin wanee wayuu nünain Jesús? Watüjaain saaʼu sünainjee tü kasa nüneekakat jee tü kasa naaʼinrakat (Santiago 2:17). Kanourale maʼin waya, jaʼyeerü shia sünainjee tü kasa waaʼinrakat jee tü wamakat. Müle shia watuma, aleeweena maʼin waya nümaa Jesús otta nümaa Jehová (paashajeʼera Juan 14:21).
2. ¿Jeʼtsü tü outkajawaa woʼunajatkalü anain kojutule wamüin tü naaʼinrakat Jehová nümaa Jesús wapüleerua?
Wanee ai süpülapünaa outuin Jesús, nüküjain namüin na nikirajüinkana tü wane kasa naaʼinrajatkat kojutule namüin naapajiraain nikii naaʼu. Nüikaleʼerüin sukuwaʼipa tü Outkajawaakat eere Sotuin Waaʼin Outuin Jesús (1 Corinto 11:20, TNM). Sükajee tia, niʼitaain sukuwaʼipa napüleerua na aluwataaushikana jee wapüleerua sotuinjatüin waaʼin naapajiraain nikii saaʼu wayuu süpüshuaʼa. «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» müshi Jesús süchiki tia outkajawaakat (Lucas 22:19). Puʼunawaire sünain tia outkajawaakat, kojuteerü pümüin alin maʼin waya nüpüla Jehová nümaa Jesús.
WEKIRAJAA SOOʼOMÜIN
Wekirajaa sooʼomüin waneirua kasa waaʼinrajatka süpüla kojutuin wamüin tü naaʼinrakat Jehová nümaa Jesús wapüleerua otta jamüin kojutuinjatka wamüin tü Outkajawaakat Eere Sotuin Waaʼin Outuin Jesús.
3. ¿Kaseerü waaʼinraka kojutule wamüin tü naaʼinrakat Jehová?
Jülüjataa paaʼin nükaalinjale pia wanee wayuu suulia wüinsirajüin pia. ¿Motomaateetche paaʼin tü naaʼinrakat püpüleerua? ¿Kaseerü paaʼinraka süka kojutuin pümüin tü naaʼinrakat?
Nia Jehová kateechika atuma woʼu waneepia. Jaashajeʼera 1 Juan 4:8-10 otta yooto jia süchiki tüü:
-
¿Jamüsü anaka maʼin tü naaʼinrakat Jesús?
-
¿Jamüsü paaʼin sutuma tü naaʼinrakat Jehová nümaa Jesús püpüleerua?
¿Kasa waaʼinrajatka kojutule wamüin tü naaʼinrakat Jehová nümaa Jesús wapüleerua? Jaashajeʼera 2 Corinto 5:15 otta 1 Juan 4:11; 5:3. Süchikijee jaashajeʼerüin tia wetsiikulokalüirua yooto jia süchiki tüü:
-
¿Kasa eeka süpüla waaʼinrüin kojutule wamüin tü naaʼinrakat Jehová nümaa Jesús wapüleerua?
4. Washata nukuwaʼipa Jesús
Washatüle nukuwaʼipa Jesús, kojutusü wamüin tü naaʼinrakat wapüleerua. Jaashajeʼera 1 Pedro 2:21 otta yooto jia süchiki tüü:
-
¿Kasa paaʼinrajatka süpüla püshatüin nukuwaʼipa Jesús?
Kojutusü nümüin Jesús tü Nünüikikat Maleiwa. Aküjashi süchiki tü pütchi anasükat otta nükaalinjain na wayuukana.
5. Woutkajaa süpüla sotuin waaʼin outuin Jesús saaʼu waainjala
Süpüla pütüjaain saaʼu tü naaʼinrakat Jesús sünain tü Ekawaa Aipaʼajatkat nutuma, jaashajeʼera Lucas 22:14, 19, 20. Süchikijee, yooto jia süchiki tüü:
-
¿Kasa aaʼinnaka sünain tia outkajawaakat?
-
¿Kasa kayaawaseka tü pankat otta tü wiinokot? (Jaashajeʼera süchikuaʼa wetsiikulokot 19 otta 20).
Nuluwataain Jesús na nikirajüinkana süpüla noutkajaʼawaliinjanain juyawai süpüla sotuin naaʼin tü kaʼi outakalü oʼu nia. Outkajaʼawaishii juyawai na Aküjaliikana pütchi süpüla sotuin naaʼin tia kaʼikat. Ayatüsia müin natuma sukuwaʼipa tia outkajawaakat maʼaka naaʼinrüin shia Jesús. Süpüla pütüjaain saaʼu tü aaʼinnakat sünain tia outkajawaakat, jünaja tü VIDEOKOT. Süchikijee, yooto jia süchiki tüü:
-
Püküja süchiki tü aaʼinnakat sünain tü Outkajawaakat Eere Sotuin Waaʼin Outuin Jesús.
Tü pankat, shiyaawasesü tü niʼirukukat Jesús naapajiraaka waaʼu sümaa maainjalain nia. Jee tü wiinokot, shiyaawasesü tü nüshakat.
EESHII WAYUU EEKAI NAMÜIN: «Anoujaitpa taya nünain Jesús, nnojotsü choʼujaain tamüin tia».
-
Süpüla niyaawatüin saaʼu wanee wayuu nnojoluin shiain naaʼinrajatüin neʼe tia süpüla katüin noʼu, ¿jameerü putuma shikirajia Juan 3:16 otta Santiago 2:17?
WATÜJAAITPAKA AAʼU
Kojutusü wamüin tü naaʼinrakat Jesús wapüleerua weʼitaale waaʼin nünain jee woʼunule sünain tü outkajawaakat eere sotuin waaʼin outuin nia.
Pusouta shiʼipajee
-
¿Kasa paaʼinrajatka shiimainre kanoulain pia nünain Jesús?
-
Kojutule pümüin tü naaʼinrakat Jehová nümaa Jesús püpüleerua, ¿kaseerü paaʼinraka?
-
¿Jamüsü anaka puʼunule sünain tü outkajawaakat Eere Sotuin Waaʼin Outuin Jesús?
PÜNAʼLA SOOʼOMÜIN
Pünaja süchiki jamüin wanouteʼerüinjatka wakuwaʼipa sünainjee outuin Cristo.
Kojutushi Jehová nutuma Jesús sükajee wulein nukuwaʼipa (9:28)
Paashajeʼera süchiki tü anoujaakat otta tü waaʼinrajatkat kanourale waya.
«Weʼitaa waaʼin sünain nikeraajeerüin Jehová nünüiki» (Aapiria Wayuu, oʼutuupüroʼu 2016)
Sünain tü pütchikat «Wuleitpa takuwaʼipa jee jimatüitpa taaʼin» paashajeʼera süchiki wanee wayuu anoʼuteʼeraka sukuwaʼipa sükajee shiyaawatüin saaʼu jamüin naapajiraaka nikii Jesús.
«Sunouteʼerüin nakuwaʼipa tü Bibliakat» (Aapiria Wayuu, akoosütoʼu 1, 2011)
Pünaja jamüin nnojotka neküin tü pankat jee nasüin tü wiinokot napüshuaʼa na outkajaakana.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
