Nüküjüin Je’waa nükajee Pablo kekiyaalajüinjatüin wanee anoujüsü sünain aainjaa waneeirua kasa sünainpünaaka shiʼyataain nümüin Je’waa. ¿Joujainjatü otta jamüsü kekiyaalajüinjatka shia? Wekirajaa sünain tü nümakat Pablo suluʼu 1 Corinto 11:3-16 süpüla watüjaain saaʼu tü saainjüinjatkat otta kojutüin Maleiwa sünainjee. Naashin Pablo apünüinsü tü kasa jülüjüinjatkat saaʼin: 1) tü aʼyatawaa kekiyaalajüinjatkat apüla shia; 2) jalainjatüin saainjüin tia aʼyatawaakat otta 3) tü saainjakat anainjee tü nuluwataakat anain Je’waa.

Tü aʼyatawaakat. Nüküjüin Pablo piamasü kasa kekiyaalajüinjatka anain shia: süchuntüle nümüin Maleiwa otta saapirüle wayuu nutuma (wersiikulo 4, 5). Maʼaka watüjaain saaʼu, achuntaa nümüin Je’waa shia wanee kasa waʼwaajaka aka nia otta tü aapiraakat wayuu shia ekirajaa tü sümakat tü Wiwüliakat. Tia, naʼyataain tooloyuu otta jieyuu. Sünainjee tia, ¿kekiyaalajüinjatü waneepia tü anoujüsükat süchuntüle nümüin Maleiwa otta shikirajüle wayuu süka tü Wiwüliakat? Nnojo. Süpüla kekiyaalajüin shia jülüjüinjatü saaʼin tü piamakat kasa: jalainjatüin saainjüin tü aʼyatawaakat.

Jalainjatüin saainjüin. Nüküjüin Pablo kekiyaalajüinjatüin tü anoujüsükat saainjüle wanee aʼyatawaa nümüin Maleiwa saʼaka süpüshi otta naʼaka na anoujüshiikana. Müshi nia: ‹Chi laülaashikai  saaʼu wanee jierü, nia suʼwayuuse. Wanee jierü anakajaʼa kekiyaalajüle shia wanaa sümaa süchuntüin nümüin Maleiwa suʼupala wayuu jee wanaa sümaa saapirüin wayuu nutuma Maleiwa. Mojutüyaasai suʼwayuuse sutuma nnojorüle kekiyaalajain› shia (wersiikulo 3, 5). Nüneeküin Je’waa chi toolokoi süpüla laülaain nia saaʼu tü jietkat. Sutuma tia, ¿kasa alataka saainjüle wanee kasa naapaka Je’waa nümüin chi toolokoi? Mojuteechi sutuma nnojorüle shiiʼiyatüin niain laülaain saaʼu. Waashajaa süchiki waneeirua kasa eeka süpüla sülatüin. Shikirajüinjatüle wanee anoujüsü sünain tü Wiwüliakat sümaa eein suʼwayuuse kekiyaalajüinjatü süpüla shiiʼiyatüin kojutüin sümüin laülaain nia saaʼu. Saainjüinjatü tia, jaʼitaichi nuwoutisaajüin jee nnojoire nuwoutisaajüin. * ¿Jama shikirajüinjatüle wanee anoujüsü otta süchuntajatüle nümüin Je’waa sümaa eein wanee jintüi süchon woutiisashi? Mayaapejeʼe nnojoluin laülaain nia saaʼu nüpüshi, kekiyaalajüinjatü shia. ¿Jamüsü? Shia süka kojutüin sümüin niʼitaain Je’waa na tooloyuu woutiisakana süpüla laülaain naya napüleerua na anoujüshiikana.

Tü piamakat kasa eere kekiyaalajüinjatüin tü anoujüsükat shia sünain wanee aʼyatawaa nümüin Je’waa naʼaka na anoujüshiikana, müshi Pablo: ‹Shia wakuaippakaʼaya tia suluʼu tü outkajaaleekat. Nnojo jüʼülüjaain saaʼujee tia› (wersiikulo 16). Niʼitaain Je’waa tooloyuu woutiisashii süpüla laülaain napüleerua na anoujüshiikana (1 Timoteo 2:11-14; Hebreokana 13:17). Sutuma tia, nayainjana neʼe na tooloyuukana eʼitaanaka süpüla naaʼinmajüin na anoujüshiikana maʼaka naaʼin na laülaashiikana otta na neʼipajanakana (Aluwataaushikana 20:28). Akatsaʼa eesü saainjüle wanee anoujüsü wanee aʼyatawaa naainjaka neʼe wanee toolo woutiisashi atüjaka süpülee. Maʼaka saaʼin nekiipüʼüle shia na wawalayuukana sünain tü outkajawaakat süpülapünaa ojuʼitaa sünain aküjaa pütchi süka nnojolin wanee toolo aainjüinjachika shia. Otta müsia shikirajüinjatüle sünain tü Wiwüliakat sümaa eein wanee wawala woutiisashi. Tia, süpüshi tü aainjünakat süpüla ekirajaa na wawalayuukana otta niainjachi wanee wawala shikiipüʼüka. Makalaka kekiyaalajüinjatüin shia süka saainjüin wanee aʼyatawaa naainjüinjatka neʼe wanee toolo.

 Akatsaʼa, nnojotsü kekiyaalajüinjatüin shia sünain aainjaa waneeirua kasa. Maʼaka saaʼin shiyalerüin sajapü süpüla aashajawaa sünain tü outkajawaakat, ojuʼitaa sünain aküjaa pütchi nümaa suʼwayuuse jee niale wanee wawala woutiisashi, achuntaa nümüin Je’waa otta ekirajaa na süchonnii nnojoliikana woutiisain. Akatsaʼa, ¿kasa saainjüinjatka nnojorüle sütüjaain aaʼu kekiyaalajüinjatüle shia sünain wanee kasa naata suulia tia? Palajana shikirajaainjatü anain tü saainjüinjatkat. * Ayatüle nnojoluin shiyaawatüin saaʼu otta anale shia saaʼin sümüin eesü süpüla kekiyaalajüin shia, maʼaka piʼrüin suluʼu tü ayaakuaakat.

Tü saainjakat anainjee. Suluʼu wersiikulo 10, TNM, aküjünüsü piamasü kasa kekiyaalajüinjatka anainjee shia: «Tü jietkat eeinjatü wanee kasa sünain shikii shiyaawaseka eein wanee laülaakai saaʼu, sükajee eein na aapieekana». Sünainjee tü pütchikat: ‹wanee kasa shiyaawaseka eein wanee laülaakai saaʼu› watüjaa aaʼu tü palajatkat kasa kekiyaalajüinjatka anainjee wanee anoujüsü. Shiimain, tü shikiyaalajakat shiyaawase kojutüin sümüin laülaain nutuma Je’waa na tooloyuu woutiisakana. Kekiyaalajüle shia shiiʼiyatüin alin süpüla Maleiwa otta waneepiain shia nümaa. ¿Jarat tü piamakat kasa kekiyaalajaka anainjee shia? Maʼaka süküjüin tü wersiikulokot, shia «sükajee eein na aapieekana». Akatsaʼa, ¿jamüsü nanainpünaaka na aapieekana kekiyaalajüin tü anoujüsükat?

Jülüjüshii naaʼin na aapieekana napüshuaʼa na nuʼunirakana Je’waa süka nütchin saaʼu tü Mmakat jee sirumatuʼu otta tü naainjakat süpüla neeʼiyatüin kojutüin namüin niain laülaain naaʼu. Anasü nakuwaʼipa na aapieekana süka nashatüin nakuwaʼipa na wayuukana sünain oonowaa. Otta müshiʼiya na aapieekana, neeʼiyatüinjatü jüüjüüin naya nümüin Maleiwa süka laülaain nia naaʼu, eeshii na nnojoliikana aainjüin tia sümaiwa (Judas 6). Maaʼulu anasü maʼin namüin na aapieekana sukuwaʼipa wanee anoujüsü jüüjüüka  nümüin wanee wawala laülaakai nümüin Je’waa saaʼu, jaʼitairü sütüjüin maʼin süpülee aainjaa wainma kasa jee kekiin maʼin shia nuulia. Otta analeesia maʼin namüin shiale neʼrüin sukuwaʼipa wanee anoujüsü chainjatka sirumatuʼu. ¿Jamüsü? Süka naʼakainjatüin shia na aluwataainjanakana nümaa Cristo sirumatuʼu, analeesia tü shiʼyataainjatkat anain noulia na aapieekana. Sutuma tia, anasü maʼin tü aʼyatawaa aapünakat namüin na jieyuu anoujüshiikana. Sutuma waneepiain naya nümaa Je’waa otta jüüjüüin naya nümüin, wainma maʼin na aapiee ashatakana nakuwaʼipa sünain oonowaa otta nnojoluin yaletüin naaʼin.