Aisü maʼin wamüin nujuʼitinnüle wanee wapüshi jee niale wanee waʼaleewain naʼakajee na anoujüshiikana süka nnojoluin niyaawajaain suulia kaainjalaa. Akatsaʼa tü waainjakat sükajee tü sümakat tü Wiwüliakat süchiki tia, shiiʼiyateerü shiimainre alin wapüla Je’waa otta nümaale waya waneepia. * Sutuma tia, wekirajaa sünain waneeirua kasa sünainpünaaka tia.

¿Jamüinjatü wakuwaʼipa namüin na ojuʼitinnakana? ‹Na jükatalaainjanakana oulia, naya na juwalayuukana eekai naʼluwajiraain nakuaippa, washireein maʼi naaʼin, kamaleiwaseyaain, mojuin nanüiki, neperüliin, je kemeeraliin sükorolo wayuu. Jaʼitaina jia neenakirüin sünain wane ekawaa namaa.› (1 Corinto 5:11.) Otta müsü tü Wiwüliakat: «[Chi nnojoikai] ayatüin sünain tü nikirajakat anain Cristo [...], nnojo jücheküin nia jipialuʼu otta nnojo jüsaküin nia. Chi asakakai nia wanaawashi nümaa sünain tü kasa mojusü naainjakat» (2 Juan 9-11, TNM). Müsü La Atalaya ojuʼitaka nowienpüroʼu 15, 1981, süpana 19: «‹¡Jamaya pia!› wamüle nümüin wanee wayuu, shia tü palajatkat kasa waainjaka süpüla waashajaain otta aleewain waaʼin nümaa. Nnojotsü waainjüin tia nümaa wanee wayuu eeka nujuʼitinnüin naʼakajee na anoujüshiikana». Makalaka nujuʼitinnüle wanee wayuu, nnojoishii nünainpünaainjanain waya sünain aainjaa wanee kasa otta sünain wanoula.

¿Choʼujaasü nnojoluin nanainpünaain maʼin waya? Aa, choʼujaasü waainjüin tia sükajee apünüinsü kasa. Tü palajatkat shia süka nümaweein waya Je’waa waneepia otta waainjeein tü sümakat tü Wiwüliakat. Sükajee alin maʼin wapüla Je’waa, oonoweeshii waya waneepia nümüin, jaʼitairü kapüleein wamüin. Otta müsia, watüjaa aaʼu lotuin nukuwaʼipa, alin waya nüpüla otta anain wakuwaʼipa sutuma tü nuluwataakat anain (Isaías 48:17; 1 Juan 5:3). Tü piamakat shia süka mojeerüin wakuwaʼipa nutuma chi kaainjarai nnojoikai ayaawajaain suulia  naainjala. Nnojoliire aleewain waya nümaa waaʼinmajeerü wanoula, wakuwaʼipa suulia waainjajüin kasa yarüttüsü otta ayateerü anain sümaa wulein pütchi nachiki na wawalayuukana (Galacia 5:7-9). Tü apünüinkat shia süka aneerüin nukuwaʼipa chi kaainjaraikai. ¿Jamüsü süpüla sülatüin tia? Ayatüle waainjüin tü sümakat tü Wiwüliakat otta wacheküle tü namakat na laülaashiikana eesü süpüla nünoukteʼerüin tü suluʼukat naaʼin chi kaainjarai nnojoikai ooʼulaain nükaaliinjünüin. Makalaka niiʼiranajaweerüin tü jülüjakat naaʼin niʼrüle tü waainjakat. Niyaawatapa saaʼu nnojoluin anain nukuwaʼipa sümaa nüpüshi, eeshi süpüla ‹niyaawajaain aaʼin›, nütüjaain saaʼu mojuin maʼin tü naainjakat otta nuʼwanajaain nukuwaʼipa süpüla niitaain sünain aʼyatawaa nümüin Je’waa (Lucas 15:17).

¿Jama nujuʼitinnüle wanee wapüshi naʼakajee na anoujüshiikana? Eesü kapüleere maʼin wamüin nümawaa Je’waa waneepia nujuʼitinnüle wanee wapüshi aleewapuʼuka amaa waya. Sülatüle wamüin tia, ¿jamüinjatü wakuwaʼipa nümüin? Süka nnojoluin eein süpüla waashajaain süchiki süpüshuaʼa tü eekat süpüla sülatüin, piamasü neʼe tü waashajaainjatkat achiki.

Eeshi kepiale chi ojuʼitinnüshikai sümaa nüpüshi. Sutuma nnojoluin nükatalaain suulia nüpüshi sükajee nujuʼitinnüin, ayatüshi nia nanainpünaain otta sünainpünaain tü naaʼinrakat nepialuʼu. Akatsaʼa süka namaweein Je’waa waneepia na nüpüshikana nnojoishii süpüla aleewain naya nümaa süka niyouktüin paaʼinwain namaa sünain anoujaa. Nekirajaapa sünain tü Wiwüliakat, eeshii süpüla nacheküin nüchiki sünain, akatsaʼa nnojoluinjachi aashajaain. Akaisaʼa jintüire chi ojuʼitinnakai, na kachonshiikana eeshii süpüla nekirajüin nia sünain tü Wiwüliakat süka nayainjanain ekirajüin otta achiaain nachonnii (Proverbios 6:20-22; 29:17). *

¿Jama nnojoire kepiain chi ojuʼitinnüshikai sümaa nüpüshi? Müle shia, na anoujüshii shiimainshiikana, neʼitaain tü naashajaainjatkat achiki namaa. Naainjüin tia naashajaainjanale  namaa süchiki wanee kasa sünainpünaaka napüshi. Nnojotsü naainjayaain wanee kasa shiiʼiree namaweein nia. Süka nacheküin nümaweein naya Je’waa waneepia otta na nuʼunirakana süka nütchin, kojutüsü namüin sünüiki tü Wiwüliakat nachiki na ojuʼitinnakana. Keeʼireesü naaʼin aneein nukuwaʼipa chi napüshi ojuʼitinnakai. Noonoole na nüpüshikana sümüin sünüiki tü Wiwüliakat eesü süpüla nünoukteʼerüin nukuwaʼipa (Hebreokana 12:11). *