SÜCHIKIJEE anain nutuma Jesús na piamashiikana moʼusalii, antüshi nia eeka wanee pueulo süʼütpaʼasü Jerusalén. Nümaka namüin 2 aluwataaushii: ‹Juʼuna eemüin tü pueulokat, jiʼreechi wanee püliiku. Jüsiwata otta jüntira nia yaamüin›.

Nüntinnapa, oʼotooshi Jesús naaʼu otta nuʼunaka Jerusalénmüin, nürütkaapa chamüin, wainma wayuu nüpanapa. Neʼitaain nasheʼinpala otta alana nüpüleerua suluʼu tü wopukot. Namaka: ‹¡Ana nukuwaʼipa nutuma Maleiwa chi aluwataai antakai sükajee nünülia Jeʼwaa!›

Sümaiwa antapuʼushi naaʼu wanee püliiku eeka nuluwataainjachin süpüla niʼraajünüin natuma na wayuukana. Tia shia tü naainjakat Jesús. Neeʼiyatüin na wayuukana nacheküin nuluwataain Jesús. Eeshii eeka nnojoluin nacheküin nia. Watüjaa aaʼu tia sükajee tü alatakat wanaa sümaa nuʼunuin Jesús eeka tü aʼwaajüleekat.

Niiyajüin Jesús suluʼu tü aʼwaajüleekat wayuu eeka ouktuin süsaʼa otta moʼuin. Neʼrapa na tepichikana tia, naʼwaajüin Jesús. Jashichika na sacerdotekana sutuma tia, namaka nümüin Jesús: ‹¿Paapüin nanüiki na tepichikana?›

Nümaka Jesús: ‹Aa, nnojottaale jaashajeʼerüin suluʼu tü Wiwüliakat tü pütchi makat: «Piʼitaain na tepichikana süpüla naʼwaajüin pia»›. Ayatüshi naʼwaajüin na tepichikana chi aluwataai nuluwataalakai Maleiwa.

Washateein nakuwaʼipa na tepichikana, ¿aashimüin? Eeshii wayuu eeka nnojoluin nacheküin waashajaain süchiki nuluwataaya Maleiwa. Ayatüinjana aashajaain waya süchiki tü kasa anasü naainjüinjatkat Jesús napüleerua na wayuukana.

Wanaa sümaa yaajachin Jesús Mmapaʼa nnojoishi aluwataain nia. ¿Joujeechi nuluwataaka? Natüjawee aaʼu tia na aluwataaushiikana. Wekirajaa sünain.