OJUNTAPÜNAASHI Jesús eeka wanee ishi chaaʼaya Samaria süpüla neemeraain. Oʼunushii na nikirajüinkana sünain aʼyalajaa eküülü. Ajaʼitüsü wüin tü jiet naashajaakat amaa Jesús. Nümaka sümüin: ‹Tasa maa wüin›.

Ponoko saaʼin Jesús süka Judíoin nia otta shia samariajeʼewat. Nnojoishii anajiraain na judíokana namaa na samariajeʼewaliikana, manüisalii namüin. Akaisaʼa Jesús aisü nüpüla wayuu süpüshuaʼa. Nümaka sümüin: ‹Pütüjaale naaʼu jaralin chi achuntakai wüin pümüin, achuntusüjee pia nümüin wanee wüin kataka atuma soʼu wayuu›.

Sümaka nümüin: ‹Oʼutusü tü ishikat otta nnojotsü waatte pümaʼana. ¿Jalainjatü puusütuin tü wüin katakat atuma soʼu wayuu?›

Nümaka Jesús: ‹Püsüle tü wüin suluʼukat tü ishikat, aseejeerü pia wüin püchikuaʼa. Tü wüin taapakat kateerü soʼu wayuu waneepia sutuma›.

Sümaka nümüin: ‹Püsiʼra taya tia wüinkat süpüla nnojoluin tajaʼitüin waneepia›.

Aashajayaashi Jesús saashin tü jietkat süchiki tü wüin wasakat. Tü naashajaakat achiki shia tü shiimainkat nüchiki Maleiwa otta tü nuluwataayakat. Tia müsü aka saaʼin wüin kataka atuma soʼu wayuu waneepia.

Nümaka Jesús sümüin tü jietkat: ‹Püsaaja chi puʼwayuusekai›.

Sümaka: ‹Maʼwayuusesat taya›.

Nümaka Jesús: ‹Shiimain tü pümakat. Jaʼraituairü pia ooʼulaain puʼwayuuse otta chi pümaakai maaʼulu nnojoishi puʼwayuusein›.

Ainkuusü saaʼin tü jietkat süka shiimain tü nümakat. ¿Jamüsü nütüjaaka Jesús saaʼu tia? Shia süka nuluwataalain nia Maleiwa otta nüküjüin shia nümüin. Mapa naleʼejaka na nikirajüinkana Jesús, ponoko naaʼin naashajaain sümaa wanee wayuu samariajeʼewat.

¿Kasa shikirajaka anain waya tia? Anamiainjana waya sümüin wayuu süpüshuaʼa maʼaka naaʼin Jesús. Nnojotsü mojulaainjatüin saaʼin wamüin wayuu eeka naatain shiʼiruku. Nücheküin Jesús neʼraajüin napüshuaʼa na wayuukana tü shiimainkat nüchiki Maleiwa süpüla katüin noʼu waneepia. Wakaaliinjüinjana naya sünain tia.