¿PÜTÜJAA aaʼu kasaichi nünülia chi joʼuukai? Jesús nünülia. Jemeishi nia suluʼu shipia mürüt. Shiʼitaainjachi María nia suluʼu süpülajana shiküin mürüt. ¿Jamüshii suluʼuka shipia mürüt José otta María? Tia nnojotsü süpülajanain wayuu eeka jemeyuluin, ¿aashimüin?

Chashii naya süka naluwataanüin na wayuukana nutuma César Augusto chi sülaülakai Roma süpüla nashajirüin nanülia suluʼu tü mmakat eejanale jemein naya. Jemeishi José Belén. Nantapa chamüin nnojotsü atunkulee napüla. Makalaka natunkuin suluʼu shipia mürüt. Soʼu kaʼikat tia jemeishi Jesús.

¿Piʼrüin na arüleejülii antakana? Chajana naya wünaʼapü saʼwai, chuwatuuijaaka naʼütpünaa nutuma wanee aapiee. Nainkuuka aaʼin. Nümaka chi aapieekai: ‹Nnojo mmoluin jia, taküjüinjatü jümüin wanee pütchi anasü. Soʼu kaʼikat tüü, jemeishi yaaya Belén Cristo chi Senyotkai, chi oʼtteʼerüinjachikai wayuu. Koʼoyooshi süka kuluulu sünain juʼletachoin nia suluʼu süpülajana shiküin mürüt›. Nantamaataka kojuya aapiee süpüla naʼwaajüin Maleiwa. Noʼunaka na arüleejüliikana süpüla nachajaain nüchiki Jesús, nousütaka nia.

¿Pütüjaa aaʼu jamüshi anaka maʼin Jesús? ¿Pütüjaa aaʼu jarai maʼin nia? Soto paaʼin wekirajaain suʼttiajee tü karalouktakat nüchiki chi palajaikai Nüchon Maleiwa. Aʼyataashi nia nümaa sünain akumajaa tü sirumatuʼukat, tü Mmakat otta tü wanee kasakalüirua. ¡Chii, nia Jesús!

Nülateʼerüin Jeʼwaa chi Nüchonkai suluʼumüin süchonla María. Nukumajaaka wanee joʼuu süleʼeruʼu. Mapa jemeika nia Belén suluʼu shipia mürüt. ¿Pütüjaaipa aaʼu jamüshii talataka na aapieekana wanaa sümaa naküjüin namüin na wayuukana jemein Jesús?