¿PÜTÜJAA aaʼu nünülia chi wayuu katchinkai maʼin? Sansón nünülia, nekiipuʼu na israeliitakana. Katchinshi nia nutuma Jeʼwaa. Süpülapünaa jemein nia müshi Jeʼwaa sümüin tü niikat: ‹Kachonjeerü pia otta nia nükaaliinjeena na israeliitakana noulia na filisteokana›.

Wayuu mojulaashii na filisteokana, kepiashii naya Canaán, wainma surulaat namaa otta müliashii na israeliitakana natuma. Soʼu wanee kaʼi oʼunushi Sansón eemüin na filisteokana wanaaka nümaa wanee wasashi miyoʼu. Nuʼutaka naaʼin chi wasashikai süka najapü otta nuʼutaka naaʼin wainma filisteo.

Mapa nümüraajaka Sansón wanee jierü kanüliasü Dalila. Naashin na filisteokana naapüinjatü sümüin Dalila 1.100 nneerü pülaata süküjüle namüin tü katchinkat atuma Sansón. Süka sümaʼaneein tia neetkat, naʼaleewainyaaka shia Sansón otta na israeliitakana. Süsakirawaika nia süchiki tü katchinkat atuma nia.

Mapa nüküjaka Sansón sümüin Dalila tü katchinkat atuma nia. Nümaka sümüin: ‹Matüjüinsat oʼyotoonoo taʼwala, nüneeküin taya Maleiwa wanaa sümaa jemein taya süpüla taʼyataain nümüin. Shiʼyotoonule taʼwala matchinjeechi taya›.

Saapapa Dalila tü nünüikikat, sutunkiraka nia otta shikerotiraka wanee wayuu süpüla niʼyotooin tü nuʼwalakat. Nüchijiraapa Sansón, matchinsai. Nantaka na filisteokana nataʼülaka nia, nayuʼlaka tü noʼukot otta nachepchiaka nia.

Soʼu wanee kaʼi aainjüshii na filisteokana wanee miʼiraa süpüla naʼwaajüin chi namaleiwasekai Dagón, najuʼitiraka Sansón suluʼujee tü kaatsetkat süpüla nemeʼerainpalain nia. Miyoʼusü nuʼwala Sansón. Nümaka nümüin chi jintüi oʼunirakai nia: ‹Puuʼulaa taapaai suuʼui tü piichikat›. Naashajaaka Sansón nümaa Jeʼwaa süpüla katchinjachin nia, naapaaka suuʼui tü piichikat nuʼwaataka: ‹Puuʼulaa ouktai taya namaa na filisteokana›. Sünain tia miʼiraakat eejana 3.000 filisteo. Naapaapa Sansón suuʼui tü piichikat nujuttiraka shia ouktaka napüshuaʼa na mojulaashiikana.