MÜLIASHII maʼin na wayuukana sünain aʼyatawaa natuma na tooloyuu piʼrakana yaaya. ¡Piirakaa nümüin chi aʼyaajakai chi wayuukai! Na aʼyataakana nüpüshi Jacob, israeliita nanülia. Nachepchiashii naya na egipciokana. ¿Jamakuwaʼipat tia?

Anapuʼusü nakuwaʼipa na nüpüshikana Jacob chaaʼaya Egipto soʼu wainma juya. Aaʼinmajünüshii naya nutuma José, chi kojutukai maʼin sutuma wayuu nüchikijee Faraón. Süchikijee ouktuin José aluwataashi saaʼu Egipto wanee jekechi Faraón, maaliisalii nüpüla na israeliitakana.

Nüchepchiashii naya Faraón. Mojulaashii na wayuu aʼyateʼerakana naya, nakumajirüin naya piichi nümüin Faraón. Akanasaʼa na israeliitakana awainmalaashii maʼin. Mapa mmotka na egipciokana suulia wainmain na israeliitakana otta suulia katchin naya noulia.

¿Kasa naainjaka Faraón sutuma tia? Aashajaashi nia namaa na jieyuu eemeijüliikana na israeliitakana. Nümaka: ‹Juʼuta naaʼin joʼuu eeka tooloin›. Anamia na jieyuukana nnojotka naainjüin tia.

Nümaka Faraón namüin na egipciokana: ‹Juʼuta naaʼin nachonnii na israeliitakana, joʼuu eeka tooloin, juuʼulaa eeka jierüin›. ¿Mojusü tü nuluwataakat anain Faraón? Waashajeʼera süchiki nukuwaʼipa wanee joʼuu toolochon.