NUJUʼITAPA Adán sümaa Eva suluʼujee Edén müliashii, aʼyataashii maʼin süpüla neküinjanain süka nnojoluipain eein wunuʼulia eeka ekünaajuulin süchon, shiaipa eeka jamücheʼe otta mojuui. Alatüsü tia namüin süka nnojoluinnapain naʼaleewain naya Maleiwa otta süka nnojoluin noonooin nümüin.

Mapa ouktushii naya. Soto paaʼin ouktuinjanain naya naashin Maleiwa neküle süchon tü wunuʼukat. ¡Malakanache maʼin süka nnojoluin noonooin nümüin Maleiwa!

Kachonshi Adán sümüin Eva süchikijee najünajaanüin suluʼujee Edén. Sutuma tia napüshuaʼa na nachonniikana laülaainjana ooʼulaka ouktuinjana.

Noonoole Adán otta Eva nümüin Jeʼwaa anasüjee nakuwaʼipa otta nachonnii. Talatüshiijee otta katüsüjee noʼu waneepia saaʼu tü Mmakat. Nnojotsüjee laülaain, ayuulin ooʼulaka ouktuin wayuu.

Keeʼireesü naaʼin Jeʼwaa katüinjatüin noʼu na wayuukana waneepia sümaa talatüin naaʼin otta nikeraajeerü tia mapeena. Nnojoleerü ayuulin wayuu, aleewajiraajeena otta aleeweena nümaa Maleiwa.

Akatsaʼa Eva nnojoluipa naʼaleewain Maleiwa makalaka müliain shia jemeyutpa. Wainma kasa mojusü alataka sümüin süka nnojoluin soonooin nümüin Maleiwa.

Wainma nüchonnii Adán sümüin Eva, Caín nünülia chi palajachikai otta chi nutujeejachikai Abel nünülia. ¿Pütüjaa aaʼu tü alatakat namüin?