AYATAʼAYA PIKIRAJÜIN WAYUU
EKIRAJAAYA 9
Kapüla paaʼin sukuwaʼipa wayuu
Pütchi shiyuʼluushika anainjee: «Talata jaaʼin namaa na talatakana aaʼin, jiʼyalaja namaa na aʼyalajakana» (Roma 12:15).
Tü sukuwaʼipakat nutuma Jesús
1. Pünaja tü VIDEOKOT jee shiale paashajeʼerüin Marcos 6:30-34. Süchikijee tia püsakira sünain pütchikat tüü:
Tü watüjakat nünainjee Jesús
2. Kapürale waaʼin nakuwaʼipa na wayuukana jülüjeena naya waaʼin, nnojoleerü shiain neʼe waaʼinmaain tü pütchi waküjakat.
Waaʼinra tü naaʼinrakat Jesús
3. Kacheʼeja pia sümüin tü sümakat wayuu. Puuʼulaa saashajaaiwa wanee wayuu, nnojo pusounnajaain. Puuʼulaa süküjaiwa pümüin jamüin saaʼin, kasain shapaain atuma saaʼin jee kasain shiyoutuin atuma tü pütchikat. Kacheʼejüle pia sümüin sünüiki wayuu jaʼyeerü paaʼu kachipünaain paaʼin tü jülüjakat saaʼin.
4. Jülüja paaʼin chi wayuu ekirajaweekai pümaa. Sünainjee tü yootiraakalü achiki pia nümaa, püsakira sünain tüü:
-
1. «¿Jamüsüche choʼujaaka nümüin chi wayuukai naapajüinjatüin tü pütchi shiimainkat?».
-
2. «¿Jamüsüche aneetka nukuwaʼipa chi wayuukai sünainjee nikirajaain sünain tü Bibliakat jee jamüsü aneetka nukuwaʼipa mapeena?».
5. Püküja nümüin wanee kasa akaalinjeechika nia. Püküjamaata nümüin susoutuneerüin eʼipajee tü nüsakirakalü anain jee niʼreechin anaa suluʼujee nikirajaain sünain tü Bibliakat.
