Eeshii süsirajüle waka wayuu otta jashichire naya wamüin sükajee waküjüin pütchi nüchiki Jeʼwaa. Sutuma sülatüin tia, eeshii wooʼulaale suulia waküjüin pütchi nüchiki Jeʼwaa. ¿Alatüirü pümüin tia?... Saashin tü Wiwüliakat, eejachi wanee jimaʼai aikai apüla Jeʼwaa. ¿Jarai nia? Nia Jeremías. Pejechonshi maʼin Jeremías süpüla nuuʼulaain suulia aküjaa pütchi nüchiki Jeʼwaa. Jooʼu wekirajaai nüchiki Jeremías.

Aluwataanüshi Jeremías nutuma Jeʼwaa sünain achiawaa na wayuukana suulia naainjüin kasa mojusü. Kapüleesü maʼin nümüin Jeremías naainjüin tia otta mmotshi nia. Nümakalaka nümüin Jeʼwaa: «Matüjüinsai taya yootoo. Jintüi neʼe taya». Nümakalaka Jeʼwaa nümüin: «Nnojo mmoluin pia. Takaaliinjeechi pia».

 Nüküjüin Jeremías namüin na wayuukana mülieenain naya nutuma Maleiwa nnojoliire nooʼulaain suulia aainjaa kasa mojusü. ¿Oonooshiiche na wayuukana sümaa tü nümakat Jeremías?... Nnojo. Asirajüshii nüka otta aashichijaashii nooʼomüin Jeremías, makalaka noʼuteein naaʼin. ¿Jamüsüche naaʼin Jeremías sutuma tia?... Eimmolojooshi sümaa nümüin: «Müichia taya nnojolin yootuin nüchiki Jeʼwaa». ¿Ooʼulaashiche Jeremías suulia aküjaa pütchi nüchiki Jeʼwaa?... Nnojottaa. Aishi maʼin Jeʼwaa nüpüla Jeremías makalaka ayatüinya nia yootuin nüchiki. Sutuma naainjüin tia, akaaliinjünüshi nia nutuma Jeʼwaa.

Na wayuu mojulaakana nümüin Jeremías, nashakatirüin nia suluʼumüin wanee ishi oʼutüsü otta poopoosü. Meküinsai nia otta masüinsai nia wüin. Noʼutee aaʼinchi Jeremías. Akaisaʼa nükaaliinjünüin nutuma Jeʼwaa nakajee waneeinnua wayuu.

¿Kasa shikirajaka anain pia nukuwaʼipa Jeremías?... Mayaapejeʼe niimolojooin paala Jeremías, nnojoishi ooʼulaain suulia aküjaa pütchi nüchiki Jeʼwaa. Yootule pia nüchiki Jeʼwaa, eejeena na wayuu asirajakana püka otta eejeena na aashichijaakana pooʼomüin. Eeshi süpüla japülin pia otta piimolojooin. Sülatüle tia pümüin, nnojo puuʼulaain suulia aküjaa pütchi nüchiki Jeʼwaa. Nükaaliinjeechi pia Jeʼwaa waneepia maʼaka nükaaliinjüin Jeremías.