Jintüliiwaʼaya taya chajachi taya kepiain pejesü sünain Leipzig, suluʼu antigua República Democrática Alemana, pejesü sünain Polonia otta sünain República Checa. Wanaa sümaa 6 touyase oʼunushii waya Brasilmüin süka niʼyataain chi tashikai chayaa jee süchikijee oʼunushii waya Ecuadormüin.

14 touyase aluwataanüshi taya tachikuaʼa Alemaniamüin natuma na kachonshiikana taya süpüla tekirajaain suluʼu wanee internado. Süka wattaichipain taya noulia tachajaainjatü takuwaʼipa tamüiwaʼa. Süka takatalaaichipain tamüiwaʼa nnojoluitpa kachipünaain taaʼin tü namakat na waneinnua tachiki.

Aleʼejüshii nachikuaʼa Alemaniamüin na kachonniikana taya wanaa sümaa 17 touyase. Kepiashi paala taya namaa nantaiwaʼaya, shiasaʼa süka kiʼrain tamüiwaʼain taya toʼunaka noulia 18 touyase.

Nnojotsü talatüin taaʼin sümaa tü takuwaʼipakat müsüjeseʼe tatüjaweein saaʼu jamüin eeka waya. Tekirajaaka süchiki waneirua organizaciones otta tayaawataka saaʼu anain maʼin teʼraajüle tü mmakat süpülapünaa namojujeʼerüin maʼin shia na wayuukana.

Tayaʼlajaka wanee mooto, toʼunaka chejee Alemania chamüin Áfricamüin. Shiasaʼa mapa, taleʼejaka tachikuaʼa Alemaniamüin süka sumojujaain tü mootokot. Süchikijee takumajirüin shia, toʼunaka sotpaʼamüin wanee palaa chayaa Portugal. Shiasaʼa yalapa taya jülüjaka taaʼin tooʼulaainjatüin tü mootokot süpüla toʼunuin suluʼu anuwa sainküin mmakat süpüshuaʼa.

Toʼunakalaka namaa waneinnua jimaʼalii jee majayünnüü yapakana süpüla nalatüin tü océano Atlántico münakat. Naʼaka nayakana eejatü Laurie, taʼwayuuseesü shia mapa. Chakuwaishii joo waya chayaa islas del Caribe jee yalejee wantaka Puerto Ricomüin. Süchikijee tia, aleʼejaa müshiijaʼa waya Alemaniamüin. Keeʼireesü waaʼin wayaʼlajüin wanee anuwa süpüla kepiainjanain waya suluʼu. Shiasaʼa apünüin kashi süchikijee wachajaain maʼin shia, wooʼulaain shia süka surulaalüin taya na chejeʼewaliikana Alemania.

Marineeroshi taya soʼu 15 kashi jee soʼunnaa tia kasaatshi taya sümaa Laurie. Ayatapejeʼe keeʼireein waaʼin wawaraijaain sainküinpünaa tü mmakat. Süpülapünaa surulaalüin taya, ayaʼlajüshii waya wanee anuwa jee wanaa sümaa chajachin surulaalüin taya teʼitaain loona sünain süpüla suʼunuinjatüin sutuma tü joutaikat. Tü jülüjakat waaʼin shia kepiainjanain waya suluʼu jee waraittüinjanain waya sainküinpünaa mmakat. Tojuʼitapa suulia surulaalüin taya jee nnojoluiwaʼaya kettaain tü anuwakat, antüshii wepialuʼumüin na Aküjaliikana pütchi jee nekirajaka waya sünain tü Bibliakat.

Anayaasü taaʼinruʼu paala takuwaʼipa. Kasaatshi taya sümaa Laurie otta ooʼulaashi taya suulia akamüjaa (Éfeso 5:5). Anayaasü taaʼinruʼu tü takuwaʼipakat wanaa sümaa waraittüin taya sainküinpünaa tü mmakat sümaa teʼrüin sukuwaʼipa tü nukumajakat Maleiwa.

Tayaawata aaʼulu taʼwanajaainjatüin waneirua kasa sünain takuwaʼipa. Wayuu yaleta aaʼinchi maʼin taya, nnojoishi eein wanee wayuu aluwataaka tooʼopünaa otta kamalainsü maʼin tamüin taashajaain süchiki tü kasa anasü taaʼinrakat jee tü tountakat. Tü alanaʼaleekat tamüin shia tü takuwaʼipakat neʼe tamüiwaʼa.

Soʼu wanee kaʼi taashajeʼerüin tü nikirajakalü anain Jesús suluʼu Mateo 5 sünainmüin 7. Ponusü maʼin taaʼin tü nikirajakalü anain Jesús süchiki tü talataakalü aaʼin. Nüküjain anakuwaʼipaliin na wayuu loteekana atuma sukuwaʼipa wanee kasa (Mateo 5:6). Tasakirawaika taaʼin jamüsü süpüla talatüin naaʼin wanee wayuu lotule nutuma sukuwaʼipa wanee kasa. Sümaʼinruʼu tekirajaain sünain tü Bibliakat, tayaawata aaʼulu choʼujaain chi Maleiwakai wamüin wapüshuaʼa maʼaka nüküjain shia Jesús: «Anakuwaʼipalii na wayuu ayaawatakana saaʼu choʼujaain chi Maleiwakai namüin» (Mateo 5:3).

Oʼttushii waya piamale sünain ekirajawaa sünain tü Bibliakat chaa Alemania, süchikijee akolojooshii waya Franciamüin, shiasaʼa joo mapa chaa Italiamüin. Eepünaweere waya eeshii na Aküjaliikana pütchi. Wanee kasa ponoko maʼin taaʼin shia aijiraain naya jee paaʼinwajiraain naya. Tayaawataka saaʼu wanaawain nakuwaʼipa sainküinpünaa mmakat süpüshuaʼa (Juan 13:34, 35). Shiasaʼa joo mapa woutiisashii waya.

Mayaainjeʼe taküjalin pütchi nüchiki Jehová tayaawatüin saaʼu ayatüinjachin taya tanoutuin takuwaʼipa. Wanaawasü saaʼin Laurie tamaa süpüla waraittüinjanain waya suluʼupünaa tü anuwakat chamüin jülüʼülümüin África, walatüin tü kanüliakat Atlántico chamüinreʼeya Estados Unidos. Wanaa sümaa chajachin taya sümaa tü taʼwayuusekat pasanain sünain tü palaakat, tayaawata aaʼu joʼuuchoin maʼin waya nuuʼulia chi Kakumajalakai waya. Süka nnojoluin süpüla waaʼinrüin wainma kasa chayaa, toʼttaka sünain aashajeʼeraa tü Bibliakat. Taashajeʼerapa shia kamalainsü maʼin tamüin tü nukuwaʼipakat Jesús, mayaainjeʼe maainjalain nia wainma kasa anasü eeka sünain nukuwaʼipa. Nnojotsü jülüjain naaʼin kapülainjachin nia saaʼin wayuu. Nia alanaʼaleeka ojutu chi Nüshikai nutuma.

Wanaa sümaa tasakireʼerüin taaʼin sünain tü nukuwaʼipakat Jesús, tayaawata aaʼulu shiain palajanainjatüin tatuma tü aʼyatawaakat nümüin Maleiwa (Mateo 6:33). Wantapa Estados Unidosmüin nnojoluinnapa waraittüin waya sainküin mmakat shia waaʼinmaaka tü waʼyataainkat nümüin Maleiwa.

Paala sümaiwa wanaa sümaa jülüjapuʼuin neʼe taaʼin takuwaʼipa tamüiwaʼa, nnojotsü maʼin tayaawatüin saaʼu tü eejeetkat sutuma tü taneekakat. Jooluʼu tanta anainrü wanee atüjawaa anaka maʼin (Isaías 48:17, 18). Tatüjaaitpa aaʼu tü taaʼinrajatkat süka takuwaʼipa: taʼwaajüin Maleiwa jee takaalinjain na wayuukana süpüla neʼraajüin nia.

Anaitpa maʼin takuwaʼipa sümaa Laurie süka woonooin sümaa tü sümakat tü Bibliakat. Anasü maʼin wakuwaʼipa nutuma Jehová süka naapüin wamüin tü wachonkat, shiʼraajüin nia otta aishi nia süpüla.

Nnojotpuʼusü anain maʼin tü wakuwaʼipakat, nnojoliipejeʼe nüpütüin Jehová waya wamüiwaʼa. Müsüjeseʼe masütaajüin waya sünain aʼyatawaa nümüin otta weʼitaain maʼin waaʼin nünain (Proverbios 3:5, 6).