તમને રમતગમત પસંદ છે, જ્યારે કે તમારા લગ્‍નસાથીને વાંચવું ગમે છે. તમે બધી જ વસ્તુઓ વ્યવસ્થિત રાખો છો, પણ તમારા સાથી વસ્તુઓ ગમે ત્યાં મૂકી દે છે. તમને લોકો સાથે હળવું-મળવું ગમે છે. પણ, તમારા સાથીને એકાંત પસંદ છે.

તમને કદાચ થશે કે, ‘અમારી વચ્ચે મનમેળ જ નથી. જ્યારે અમે ડેટિંગ કરતા, ત્યારે એ બાબતો પર કેમ ધ્યાન ન આપ્યું?’

કદાચ અમુક હદે તમે એના પર ધ્યાન આપ્યું હશે. પણ, એ સમયે તમારામાં જતું કરવાની ભાવના હતી. જોકે, લગ્‍ન પછી તમારે એવું વલણ વધારે બતાવવાની જરૂર છે. એમ કરવા આ લેખ તમને મદદ કરશે. ચાલો, પહેલા અમુક બાબતો વિશે જોઈએ જેમાં તમારી વચ્ચે મનમેળ નથી.

અમુક મતભેદો ગંભીર હોય છે. એકબીજા વચ્ચે મનમેળ છે કે નહિ એ ડેટિંગનો મુખ્ય હેતુ છે. તેથી, ડેટિંગ વખતે જો કોઈ ગંભીર મતભેદ જણાય, તો ઘણા લોકો સંબંધને આગળ વધારવાને બદલે ત્યાં જ અટકાવી દે છે. પણ, અમુક મતભેદો વિશે શું જે દરેક લગ્‍નજીવનમાં ઊભા થાય છે?

કોઈ પણ બે વ્યક્તિ એકસરખી નથી. એ ધ્યાનમાં રાખતા નીચે બતાવ્યા પ્રમાણે અમુક બાબતમાં લગ્‍નસાથીના વિચારો અલગ હોય શકે:

પસંદગી. આન્‍ના a કહે છે: ‘મને આનંદપ્રમોદ માટે બહાર હરવું-ફરવું ક્યારેય નથી ગમતું. પરંતુ, મારા પતિને પહેલેથી જ બરફીલા પહાડો પર ચડવું અને દિવસો સુધી ટ્રેકિંગ કરવું ગમે છે.’

આદત. બ્રાયન જણાવે છે: ‘મારી પત્ની મોડે સુધી જાગીને પણ વહેલી સવારે પાંચ વાગે આરામથી ઊઠી શકે છે. પણ, જો મને સાતથી આઠ કલાકની ઊંઘ ન મળે તો હું ચિડાઈ જાઉં છું.’

ઉછેર. તમારો સ્વભાવ શાંત હશે. જ્યારે કે, તમારા સાથીને દિલ ખોલીને વાત કરવી ગમતી હશે. ડેવીડ જણાવે છે: ‘મારો ઉછેર એ રીતે થયો છે કે, હું મારી મુશ્કેલીઓ કોઈને જણાવતો નથી. પરંતુ, મારી પત્ની એવા કુટુંબમાંથી આવે છે જ્યાં બધા જ ખુલ્લા દિલે વાત કરે છે.’

બીજી રીતો પણ સારી હોય શકે. હેલેના નામની પત્ની જણાવે છે: ‘મારી રીત સારી હોય શકે. પણ, એનો અર્થ એ નથી કે ફક્ત એ જ એક રીત છે.’

સાથ આપો. એડમ કહે છે: ‘મારી પત્ની કેરનને રમતગમતમાં જરાય રસ નથી. છતાં, તે મારી સાથે ઘણી રમતો જોવા આવે છે અને એની મજા માણે છે. બીજી બાજુ, તેને આર્ટ મ્યુઝિયમ જોવાનું ખૂબ ગમે છે. એટલે તે ચાહે એટલો સમય હું તેની સાથે ત્યાં વિતાવું છું. તેના માટે એ ખૂબ મહત્ત્વનું છે એટલે હું પણ એમાં રસ લઉં છું.’—બાઇબલ સિદ્ધાંત: ૧ કોરીંથી ૧૦:૨૪.

બીજાની નજરે જુઓ. લગ્‍નસાથી તમારાથી જુદું વિચારે એનો અર્થ એ નથી કે તે ખોટું વિચારે છે. એલેક્સને એ શીખવા મળ્યું છે. તે કહે છે: ‘મને હંમેશાં એવું લાગતું કે, કોઈ કામ કરવાની એક જ સારી રીત છે. અને બીજી રીતો અસરકારક હોતી નથી. પણ, લગ્‍ન કરવાથી હું સમજી શક્યો છું કે, કોઈ કામ કરવાની ઘણી બધી રીતો હોય છે. અને દરેક રીત અસરકારક નીવડી શકે છે.’—બાઇબલ સિદ્ધાંત: ૧ પીતર ૫:૫.

હકીકત સ્વીકારો. તમારા વચ્ચે મનમેળ હોવા માટે જરૂરી નથી કે તમે સરખું જ વિચારો. એટલે, અમુક મતભેદો ઊભા થાય તો, એવું ન માની લો કે લગ્‍ન કરીને ભૂલ કરી છે. ધ કેસ અગેન્સ્ટ ડિવૉર્સ નામનું પુસ્તક જણાવે છે કે, ‘ઘણા લોકો બહાનું કાઢે છે કે, “હું પ્રેમમાં આંધળો થઈ ગયો હતો.”’ આ પુસ્તક આગળ જણાવે છે: ‘તમે દરેક દિવસ ખુશીથી વિતાવો છો તો, એ બતાવે છે કે મતભેદ હોવા છતાં તમે એકબીજાને પ્રેમ કરી શકો છો.’ પવિત્ર શાસ્ત્ર ઉત્તેજન આપે છે કે ‘જો તમને કોઈની વિરુદ્ધ ફરિયાદ હોય તોપણ તેનું સહન કરો.’—કોલોસી ૩:૧૩.

આમ કરી શકો: તમને તમારા સાથી વિશે શું ગમે છે અને કઈ વાતે મનમેળ છે એ લખી લો. પછી, સાથી વિશે શું નથી ગમતું અને કઈ વાતે મનમેળ નથી એ પણ લખી લો. એના પરથી જોવા મળશે કે, તમારા વચ્ચેનો મતભેદ એટલો ગંભીર નથી જેટલો તમે ધારો છો. એ યાદી બતાવશે કે, તમે સાથીને કેટલો ટેકો આપશો અને કેટલું સહન કરશો. કેનેથ જણાવે છે કે, ‘મારી પત્ની મારા માટે જ્યારે ફેરફાર કરે છે, ત્યારે હું એની કદર કરું છું. એ જ રીતે, હું ફેરફાર કરું ત્યારે તે મારી કદર કરે છે. તેને ખુશ રાખવા મારે જતું કરવું પડે તોપણ હું એમ કરું છું. કેમ કે, તેને ખુશ જોઈને મને પણ ખુશી મળે છે.’—બાઇબલ સિદ્ધાંત: ફિલિપી ૪:૫. (g15-E 12)