De Josia isch 8i, wo er König vo Juda wird. I dere Ziit het s Volk vil mit Zauberei z tue und betet falschi Götter a. Wo de Josia 16i isch, wett er usefinde, wie mer Jehova richtig abetet. Mit 20i fangt er a, alli Götze und Altär im ganze Land z zerstöre. Und wo de Josia 26i isch, organisiert er, dass de Tempel renoviert wird.

Im Tempel findet de Hilkija, de Hohe Prieschter, d Buechrolle mit em Gsetz vo Jehova. Mer nimmt a, dass das d Buechrolle isch, wo de Moses selber gschribe het. De Sekretär vom Josia, de Schaphan, bringt ihm die Buechrolle und fangt grad a s Gsetz vorzlese. Wo de Josia das ghört, wird ihm eso richtig bewusst, dass s Volk sit vilne Jahr nüm Jehova folget. Er seit drum em Hilkija: «Jehova isch sehr verruckt uf üs. Gang und red mit Jehova. Er wird üs denn säge, was mir sölled mache.» Jehova git denn d Antwort dur d Prophetin Hulda: «S Volk vo Juda het mich verlaa. Ich wird si bestrafe, aber erscht, wenn de Josia nüm König isch. Er het nämlich demüetig reagiert und er het alles genau eso gmacht, wie ichs gseit ha.»

Wo em König Josia d Antwort überbracht wird, gaht er zum Tempel und rüeft s ganze Volk vo Juda zäme. Er list denn allne s Gsetz vo Jehova vor. De Josia und s Volk verspreched, dass si Jehova vo ganzem Herze wend folge.

Z Juda het mer ganz vil Jahr s Passah nüm gfiiret. Wo de Josia im Gsetz list, dass s Passah jedes Jahr muess gfiiret werde, befihlt er em Volk: «Tüend es Passah für Jehova fiire.» De Josia tuet ganz vil Opfer vorbereite und stellt im Tempel en Chor vo Sänger uf. De König und s Volk fiired denn s Passah und nachher no s Fescht vo de ungsüürete Brot, wo sibe Täg lang gaht. Sitdem de Samuel glebt het, isch nie meh eso es Passahfescht gfiiret worde. De Josia het s Gsetz vo Jehova würklich sehr gern! Und du? Freusch du dich au, wenn öppis über Jehova lernsch?