I de Versammlig z Lystra isch en junge Brueder, wo Timotheus heisst. Sin Vater isch en Griech und sini Muetter isch e Jüdin. Sini Muetter, d Eunike, und sini Grossmuetter, d Lois, hend em Timotheus scho vo Jehova verzellt, wo er no en chliine Bueb gsi isch.

De Paulus chunnt uf sinere zweite Predigtreis wider uf Lystra. Er merkt, dass de Timotheus d Brüedere sehr gern het und immer parat isch zum Helfe. De Paulus tuet de Timotheus iilade, ihn uf sinere Reis z begleite. Dört bringt er em Timotheus bii, en guete Prediger und Lehrer vo de guete Botschaft z werde.

De heilig Geischt füehrt de Paulus und de Timotheus, ganz egal, wo si hii göhnd. Einisch inere Nacht het de Paulus e Vision und gseht en Maa, wo ihn fragt, öb er ihne uf Mazedonie chunnt cho helfe. De Paulus, de Timotheus, de Silas und de Lukas mached sich uf de Weg und göhnd dört go predige und helfed, neui Versammlige z gründe.

Z Mazedonie, i de Stadt Thessalonich, werded ganz vil Männer und Fraue Chrischte. Es paar Jude sind wege dem iifersüchtig uf de Paulus und uf sini Fründe. Si trummled e Gruppe vo Lüt zäme, schlepped d Brüedere zu de Herrscher vo de Stadt und schreied: «Die Männer sind Feinde vo de römische Regierig!» Für de Paulus und de Timotheus isch es lebensgfährlich. Drum flüchted si i de Nacht uf Beröa.

D Mensche z Beröa intressiered sich sehr für di gueti Botschaft. Vil Grieche und au Jude fanged a glaube. Aber denn chömmed Jude us Thessalonich und mached Problem. De Paulus muess wider flüchte und gaht uf Athen. De Timotheus und de Silas bliibed aber z Beröa, wil si de Brüedere wend Muet mache. Nachere gwüsse Ziit schickt de Paulus de Timotheus wider zrugg uf Thessalonich. D Brüedere dört werded fescht verfolgt und er söll ihne go helfe. Später schickt er ihn i ganz vil anderi Versammlige, demit er überall cha d Brüedere ermuntere.

De Paulus seit em Timotheus: «Jede, wo Jehova wett diene, wird verfolgt.» Au de Timotheus wird weg sim Glaube verfolgt und iigsperrt. So bewiist er sini Treui und Loyalität und das macht ihn glücklich.

De Paulus schribt de Brüedere z Philippi: «Ich schicke de Timotheus. Er wird euch erkläre, was es bedütet, en Diener vo Jehova z sii. Und er wird euch au zeige, wie mer tuet predige.» De Paulus weiss, dass er sich uf de Timotheus cha verlaa. Vil Jahr schaffed di beide zäme – als Glaubensbrüedere und Fründe.