Nachdem sich Jesus het la taufe laa, füehrt ihn de heilig Geischt i d Wildnis. Dört isst Jesus 40 Täg lang nüt und drum het er richtig Hunger. Da chunnt de Tüfel und versuecht, Jesus zu öppis Schlechtem z überrede: «Wenn du würklich de Sohn vo Gott bisch, denn säg dene Stei, si sölled sich i Brot verwandle.» Aber Jesus git zur Antwort: «I de Schrifte staht: ‹Zum Lebe brucht mer nid nume öppis zum Esse, sondern mer muess au uf alles lose, wo Jehova seit.›»

Als Nöchschts tuet ihn de Tüfel wider teschte und seit: «Wenn du würklich de Sohn vo Gott bisch, denn gump doch vom höchschte Punkt vom Tempel abe. Wil es staht doch i de Schrifte: ‹Gott schickt sini Engel, zum dich ufzfange.›» Jesus seit: «I de Schrifte staht aber au: ‹Du söllsch Gott nid uf d Prob stelle.›»

Nachher zeigt de Tüfel ihm alli Königriich vo de Welt, mit ihrem Riichtum und ihrer Schönheit und seit: «Das alles gib ich dir, wenn du mich nume ei Mal abetisch.» Aber Jesus seit: «Gang weg, Satan! I de Schrifte staht: ‹Du söllsch nume Jehova abete.›»

Da gaht de Tüfel weg und sofort chömmed Engel und bringed Jesus öppis zum Esse. Nachher fangt Jesus a, vo de guete Botschaft vom Königriich z verzelle. Für die Ufgab isch er nämlich uf d Erde gschickt worde. Und d Mensche liebed das, wo er lehrt, und göhnd überall mit ihm mit.