Nachdem Jesus öppe anderhalb Jahr prediget het, muess er öppis Wichtigs entscheide. Er brucht Männer, wo eng mit ihm zämeschaffed und wo er cha biibringe, wie mer zu de Chrischteversammlig luegt. Wer söll er uswähle? Das möcht Jesus mit de Hilf vo Jehova entscheide. Drum gaht er uf en Berg ufe, dass er cha allei sii und di ganzi Nacht zu Jehova bete. Am Morge rüeft er es paarne Jünger und wählt us ihne sini 12 Aposchtel us. Weisch, wie si heissed? Si heissed Petrus, Andreas, Jakobus, Johannes, Philippus, Bartholomäus, Thomas, Matthäus, Jakobus (das isch de Sohn vom Alphäus), Thaddäus, Simon und Judas Iskariot.

Di 12 Aposchtel begleited Jesus uf sine Reise. Und bevor dass er si in Predigtdienscht schickt, tuet er si vorbereite und seit ihne alles, wo si müend wüsse. Jehova git ihne d Macht, dass si chönnd Dämone ustriibe und Chranki heile.

Wie Jesus chömmed fascht alli Aposchtel us Galiläa und es paar vo ihne sind ghürate. D Pharisäer finded, dass d Aposchtel nume eifachi Lüt ohni gueti Usbildig sind. Aber Jesus tuet si guet uf ihri Ufgab vorbereite. I de wichtigschte Moment vo sim Lebe sind d Aposchtel debii, zum Bispil vor sim Tod und nach sinere Uferstehig. Jesus seit, dass di 12 sini Fründe sind und er vertraut ihne.

D Aposchtel sind nid vollkomme und mached Fehler. Mängisch säged si öppis, ohni gross z überlege, oder entscheided öppis nid so guet. Mängisch sind si au ungeduldig und si striited sogar mitenand, wer de Wichtigscht seig. Aber si sind gueti Mensche und hend Jehova gern. Wenn Jesus nüm uf de Erde isch, werded si e wichtigi Rolle i de erschte Chrischteversammlige ha.