Imene Land öschtlich vo Israel glaubed d Mensche, dass d Sterne ihne chönnd helfe und si tüend füehre. Einisch inere Nacht gsehnd es paar Männer vom Oschte öppis am Himmel, wo sich bewegt und hell lüchtet wie en Stern. Si laufed dem vortüschte «Stern» nache, wo si bis uf Jerusalem füehrt. Si wüssed, dass dört es Chind isch, wo de König vo de Jude sött werde. Und drum fraged si d Lüt: «Wo isch das Chind? Mir sind cho, wil mir üs vor ihm wend verbüge.»

Wo de König vo Jerusalem, de Herodes, vomene neue König ghört, macht ihm das grossi Sorge. Er fragt d Oberprieschter: «Wo sött dee König gebore werde?» Si erkläred ihm: «D Prophete hend gseit z Bethlehem.» De Herodes holt d Männer vom Oschte zu sich und seit ihne: «Göhnd uf Bethlehem das Chind go sueche. Wenn ihrs gfunde hend, chömmed ihr zrugg und säged mir, wos isch. Ich wett mich au vor dem Chind verbüge.» Aber das isch gloge.

De «Stern» bewegt sich wiiter und d Männer laufed ihm nache bis uf Bethlehem. Dört bliibt er übereme Huus stah und d Männer göhnd ine. Dinne gsehnd si Jesus, wo bi sim Mami, de Maria, isch. Si verbüged sich vor ihm und gebed ihm wertvolli Gschenkli: Gold, Weihrauch und Myrrhe. Was meinsch, het Jehova die Männer zu Jesus gfüehrt? Nei.

I de Nacht warnt Jehova de Joseph imene Traum: «De Herodes wett Jesus töte. Nimm dini Frau und dis Chind und flüchted uf Ägypte. Bliibed dört, bis ich dir säge, dass es da wider sicher isch und ihr chönnd zruggcho.» De Joseph bringt sini Familie grad uf Ägypte in Sicherheit.

Jehova seit zu dene Männer us em Oschte, si sölled nid zrugg zum Herodes. Wo de Herodes merkt, dass d Männer nüm chömmed, wird er richtig verruckt. Wil er nid weiss, wo Jesus isch, git er de Befehl, dass alli Chind im Gebiet vo Bethlehem, wo öppe im Alter vo Jesus sind, sölled umbracht werde. Jesus isch aber in Sicherheit, wiit weg in Ägypte.

Nachdem de Herodes gstorbe isch, seit Jehova zum Joseph: «Ihr chönnd jetzt wider zrugg uf Israel. Es isch dört wider sicher für euch.» De Joseph und d Maria göhnd mit Jesus wider zrugg und wohned vo denn a z Nazareth.