Jehovan kuttumbachi manddavoll keli tednam tannem bhurgeank samballchi zobabdari avoi-bapaik dili. (Koloskarank 3:20) Bhurgeak Jehovacho mog korunk xikovop ani taka ek boro munis zaunk modot korop hi avoi-bapaichi zobabdari zaun asa. (2 Timotak 1:5; 3:15) Tumchea putachea vo dhuvechea kallzant kitem asa tem zannam zavop gorjechem. Punn ugddas dovrat, tumi ek borem udharonn dovrunk zai. Bhurgeank Jehovachem Utor bore toren xikoitolim zalear, tem poilem tumchea jivitant lagu korop gorjechem.—Stotr 40:8.

BIBLE KITEM SANGTA: ‘Ami aikunk suddsuddit zaunchim, punn amkam ulovpant uttavollai aschi nhoi.’ (Jakob 1:19) Tumchim bhurgim ukteponnim uloilʼlim tumkam zai zalear, tim ulounk sodhtat tednam tumi aikonk toiar asat mhunn tankam disonk zai. Xantponnan vaglear tankam ulounk sompem zatolem. (Jakob 3:18) Tumi ragar zaun tanchoch guneanv kortolim oxem tankam dislear, tim aplea kallzant asa tem sangonk fattim sortolim. Tumchea bhurgeam thaim pasiensan vagat ani tumi tancho mog kortat mhunn porot- porot tankam khatri diat.—Matev 3:17; 1 Korintkarank 8:1.

TUMI KITEM KORUNK ZATA:

• Bhurgim tumchea lagim ulounk sodhtat tednam tankam vell diat

• Tumchea bhurgeank oddchonneo astat tednanch nhoi, punn tanchea lagim sodanch uloiat

BIBLE KITEM SANGTA: “Monxachim utram khol udka bhaxen.” (Mhonnʼnneo 18:4) Bhurgeanchea kallzant khorench kitem asa tem zannam zaunk tim sangtat tench aikolear puro nhoi. Tumi tanchim bhavnam somzon gheunk zai. Karonn zaite pavtti bhurgim vaddoun sangtat vo chintinastana uloitat. Bible mhunntta, “Zobab diunchea adim poilem aik na tor tuka piso koso lekhtole.” (Mhonnʼnneo 18:13) Tor besttinch tancher bejear zainakat.— Mhonnʼnneo 19:11.

TUMI KITEM KORUNK ZATA:

• Tumchim bhurgim uloitat tednam, tumi modench ulounchimnant vo rokddinch ragar zaunchimnant mhunn nichov korat

• Tumi tanche piraiechim aslim tednam tumkam koxem bhogtalem ani tumkam kitem mhotvachem aslem tem chintat

BIBLE KITEM SANGTA: “Mhojea puta tujea bapaichi adnia aik, tuje avoiche xikovnnechi beporva kori naka.” (Mhonnʼnneo 1:8) Jehovan bapaik ani avoik bhurgeacher odhikar dila. Tumi tumchea bhurgeank tumkam resped diunk ani tumchem aikonk xikounk zai. (Efezkarank 6:1-3) “Tumi eka monachim ani eka motachim” nant zalear tumchea bhurgeank tem kollon ietolem. (1 Korintkarank 1:10) Tumchem chintop vegllem asa zalear pasun bhurgeam mukhar hea vixim uloinakat. Karonn toxem kelear tumchea pasot tancho resped unno zaunk xokta.

TUMI KITEM KORUNK ZATA:

• Tumi tumchea bhurgeank koxim xist ditolim tea vixim uloiat ani nirnnoi gheiat

• Bhurgeank koxem xikounchem tea vixim tujem ani tujea sangateachem chintop vegllem asa zalear tumcho sangati toxem kiteak mhunntta tem chintun polloiat

BIBLE KITEM SANGTA: “Bhurgeank nitt vatt xikoi.” (Mhonnʼnneo 22:6) Bhurgeank nitt vatt apxinch mellchi na. Tumi bori toiari korun ani chintun tankam xikounk zai. Xikoitana tankam thodde pavtt xist pasun diunk poddot. (Stotr 127:4; Mhonnʼnneo 29:17) Xist divop mhunnttlear fokot xikxa lavop nhoi, punn tumi tankam umkench kor vo korinakat mhunn kiteak sangtat tem somzonk tankam modot korunk zai. (Mhonnʼnneo  28:7) Tankam Jehovachea Utracho mog korunk xikoiat ani toxench, tantuntlim totvam lagu korunk tankam adar korat. (Stotr 1:2) Oxem kelʼlean, tankam ek nitoll ontoskornn dovrunk modot zatoli.—Hebrevank 5:14.

TUMI KITEM KORUNK ZATA:

• Jehova khorench asa ani tacher bhorvonso dovrunk zata mhunn patieunk tankam modot korat

• Internet vo Social Network-a voile noitik ritiche dokhe vollkhon, te pois korunk tankam modot korat. Loingik ritin otʼteacher kortat toslea munxam thaun tankam apli rakhonn korunk xikoiat