ODHEAI 7
Devachem Raj Mhunnttlear Kitem?
1. Devachem Raj mhunnttlear kitem?
Kiteak lagun Jezu ek favo toslo boro Raza? —MARKU 1:40-42.
Devachem Raj mhunnttlear Devan ghoddun haddlolo ek sorkar. Ho sorkar, sorgar thaun prithumecher raj choloitolo. To sorkar, munxanche soglle sorkar kaddun, Devachi khuxi sorgar ani toxich prithumecher ghoddun ieta toxi kortolo. Dev aplea Rajea udhexim oxem kortolo, hi ek bori khobor zaun asa. Munxakullak ek borea sorkarachi goroz asa, ti goroz Devachem Raj veginnuch bhagoitolem. Tem Raj prithumecher jietolea sogllea munxam modem ekvott haddttolem.—Daniel 2:44; Matev 6:9, 10; 24:14 vachat.
Eka sorkarak zoso ek mukheli asta, toso Jehovan Aplea Put Jezu Kristak, Aple Razvottkecho Raza nemla.—Prokasovnni 11:15 vachat.
Devachem Raj Mhunntlear Kitem? ho viddeo polloiat
2. Kiteak lagun Jezu ek favo toslo boro raza zaun asa?
Devacho Put Jezu, doiall ani nitik thir asa dekhun to ek favo toslo boro Raza mhunn amchean mhunnom ieta. (Matev 11:28-30) Tea bhair, sogllea lokank adar korunk taka boll asa, karonn to sorgar thaun akʼkhe prithumecher raj choloitolo. Melʼleantlo jivont zalea uprant to sorgar choddlo ani raz-podvi mello-porian Jehovachea uzveak bosun ravlo. (Hebrevank 10:12, 13) Xekim, Devan taka raj cholounk podvi dili. —Daniel 7:13, 14 vachat.
3. Jezu sangata konn raj choloitole?
Jezu sangata sorgar razvott cholounk munxancho ek lhan zomo Devan vinchun kaddlolo asa. (Prokasovnni 5:10) Prithumecher astana, Jezun thoddea lokank aple khas xis mhunn vinchun kaddle. Tankam apostl mhunnttleat. Sorgar razvott cholounk vinchun kaddloleam modle, he visvaxi munis poile zaun asat. Tedna thaun aiz meren, Jehova visvaxi dadleam ani bailank tea zomeache bhagidar zaunk vinchun kaddit asa. Jezu bhaxen, Dev tankam-i atmik kudd diun novean jivont korta.—Juanv 14:1-3; 1 Korintkarank 15:42-44 vachat.
Kitle zann sorgar vetole? Jezun tea zomeak, “supurlo hindd” mhunnttla. (Lukas 12:32) Soglle mellon xekim 1,44,000 zann Jezu borabor sorgar thaun prithumecher raj choloitole.—Prokasovnni 14:1 vachat.
4. Jezun raz cholounk suru kelem tedna kitem ghoddlem?
Devachem Raj 1914 vorsak suru zalem. a Raza zaun Jezun rokddoch Soitanak ani tachea dutank prithumecher xevttile. Uchamboll zaun Soitan, akʼkhe prithumecher munxank piddapidd diunk laglo. (Prokasovnni 12:7-10, 12) Tedna thaun, munxakullache koxtt anink-ui vaddleat. Zhuzam, jevnnacho dukholl, voxeachi pidda ani bhuim-kamp, hem sogllem mellon ek “khunna” zaun asa. Hi khunna Devachem Raj hea prithumecher ieunchem zalem mhunn amkam dakhoun dita.—Lukas 21:7, 10, 11, 31 vachat.
5. Devachem Raj kitem kortolem?
Sonvsarbhor porgottnechea vavra udhexim Devachem Raj sogllea raxttranchea lokank eka-meka thaim xantin ani ekvottan jieunk ektthaim korit asa. Lakhʼanim khalte monache lok Jezuche razvottke khala ravunk toiar zaleat. Devachem Raj vaitt sonvsaracho xevott korta tedna oslea khaltea monachea lokank salvar kortolem. Dekhun Devachea Rajeant ravunk khuxi asa tannim Jezuchea adneank pallo diunk xinkunk zai.—Prokasovnni 7:9, 14, 16, 17 vachat.
Munxakulla passot Devacho mull-udhex aslo to, Devachem Raj ek hozar vorsam bhitor purnn kortolem. Akʼkhi prithum ek sobit bhag zatoli. Ek hozar vorsam somptokoch, Jezu tem Raj Bapache adhin kortolo. (1 Korintkarank 15:24-26) Devachea Rajea vixim konnank sangunk tumkam borem distolem?—Stotram 37:10, 11, 29 vachat.
a 1914 vorsak Devachem Raj sthapon zalem, hem Bible amkam koxem dakhoita tem zannam zaunk Bible Khorench Kitem Xikoita? pustokacher 215-218 panar polloiat.
