1, 2. Saulu Damaskant vochon kitem korunk sodhtalo?

 DADLEANCHO ek zomo Damaskachea vatter asa, ani tannim kitem tori vaitt korunk ievjilam. Tem mhunnttlear, te khub dves kortale tea Jezuchea xisank tanchea ghorantlean bhair kaddunk, tankam bandunk, tanchi loz korunk ani Jeruzalemantlea Mha-sobhent voddun vhoron tankam xikxa diunk tharailam.

² Saulu, hea zomeacho fuddari zaun aslo. a Ani halinch, Jezucho visvaxi xis, Istevak fatraun jivexim marlo tednam thoim ubo ravon taka fatraitale tankam tannem sangat dilʼlo. (Itihas 7:57–8:1) Uprant, Jeruzalemant aslolea Kristanvank to dhumallo diunk laglo. Punn atam her xaramnim aslolea Jezuchea xisank sodhun tankam dhumallo diunk to fuddakar ghetalo. “Somiachea Vatten” choltoleank to kabar korun uddounk sodhtalo, karonn he lok tankam ek bhirankull pidda koxi zaun asli.—Itihas 9:1, 2; “ Sauluk Damaskant Aslolo Odhikar” hem boks polloiat.

3, 4. (a) Sauluk kitem zalem? (b) Ami khoinchea prosnanche zobab polloitolim?

³ Punn te vatter astana, okosmat mollbar thaun ek uzvadd Sauluchea charui vatten fanklo. Tachea sangateank ho uzvadd dixtti poddtta. Punn tanchea tonddantlean utranch suttonant. Toxench, hea uzvaddak lagon Saulu kuddʼddo zata ani zomnir poddtta. Tednam, taka sorgar thaun ek avaz ieta, “Saulu, Saulu, tum mhaka dhumallo kiteak dita?” Ojap zaun Saulu taka vicharta: “Somia, tum konn?” Tea vellar Sauluk mellʼllolo zobab aikon to ekdom thottaklo astolo. Karonn taka oso avaz ieta, “Hanv Jezu, zaka tum dhumallo dita.”—Itihas 9:3-5; 22:9.

⁴ Tor, Jezuchea survatechea utrantlean ami kitem xikonk zata? Saulu Kristanv zalo tea vellar jeo ghoddnneo ghoddleo teo zannam zalear amkam koso faido zata? Saulu Kristanv zalea uprant, sobhek mellʼllolo xanticho kall tannim jea ritin uzar kelo tantuntlean ami kitem xikonk zata?

5, 6. Jezun Sauluk mhunnttlolea utrantlean ami kitem xikonk zata?

⁵ Jezun Sauluk Damaskachea vatter thamboun oxem vicharunk na:  “Tum mhojea xisank dhumallo kiteak dita?” Tachea bodlek, tannem oxem vicharlem: “Tum mhaka dhumallo kiteak dita?” (Itihas 9:4) Hantuntlean, Jezuchea xisank konnui dhumallo dita tednam, Jezuk khub dukh bhogta mhunn amkam kollon ieta.—Mt. 25:34-40, 45.

⁶ Tumi Kristacher bhavarth dovorla dekhun tumkam dhumalleacho fuddo korunk poddtta zalear, Jehova ani Jezu tumchi poristhiti bore bhaxen zannant mhunn khatri dovrat. (Mt. 10:22, 28-31) Sodʼdheak Jehovan ghoddie tumche tras kaddunk na astole. Punn ugddas dovrat, Saulun jednam Istevak fatraunk sangat dilo, toxench Jeruzalemant aslolea Jezuchea her visvaxi xisank tanchea ghorantlean voddun bhair haddle tednam, Jezu hem soglem polloitalo. (Itihas 8:3) Tori astana, tea vellar Jezun Sauluk addaunk na. Punn Istevak ani her xisank visvaxi ravonk goroz asli ti ghottai, Jehovan Jezu Kista udexim tankam dili.

7. Dhumallo ieta tednam Jehovak visvaxi ravonk ami kitem korunk zai?

⁷ Dhumallo sosunk him char panvlam ghetlear amkam pasun modot zaunk xokta: (1) Poristhiti kitem-i asum, Jehovak visvaxi ravat. (2) Magnnem korun Jehova lagim adar magat. (Filp. 4:6, 7) (3) Bodlo gheupachem kam Jehovachea hatant soddat. (Rom. 12:17-21) (4) Jehova tumche tras kaddun uddoum poriant, te sosunk to tumkam ghottai ditolo mhunn tacher visvas dovrat.—Filp. 4:12, 13.

8, 9. Jezun Ananiasak Saulu lagim ulounchem kam dilem tednam taka koxem bhoglem astolem?

⁸ “Somia, tum konn?” Sauluchea hea prosnak zobab dilea uprant, Jezun taka oxem mhunnttlem: “Utth ani xarant voch, thoim tunvem kitem korunk zai tem tuka ek munis sangtolo.” (Itihas 9:6) Hea vellar Saulu kuddʼddo aslo. Tor tachea sangata aslolea munxamnim taka Damaskant vhelo. Thoim tannem tin disam pasot upas kelo ani magnnem kelem. Tea mhunnosor, Jezu Saulu vixim tea xarant aslolea Ananias nanvachea eka xisa lagim uloita, zo Damaskant ravtalo. Ani “thoim ravpi sogle Judev tachi tokhnnai kortale.”—Itihas 22:12.

 ⁹ Hea vellar Ananiasak koxem bhoglem astolem tem chintat. Sobhecho Mostok Jezu, zo jivont zalʼlo, to svota zaun tachea lagim uloilo ani tannem taka ek khas kam korunk vinchun kaddlo. Ananiasak ho khorench ek vhodd man aslo. Punn Jezun taka dilʼlem kam ekdom kotthin aslem. Tor tannem Saulu lagim ulounchem aslem mhunn Jezun taka sanglem tednam, Ananiasan mhunnttlem: “Somia, hea munxan Jeruzalemant tujea povitr sevokank kitle tras dileat tea vixim hanvem zaitea lokam koddlean aikolam. Ani tujem nanv ghetat tea sogleank dhorun vhoronk taka mukhel iadnikamnim odhikar dila.”—Itihas 9:13, 14.

10. Jezu Ananiasa lagim jea ritin vaglo tantuntlean ami kitem xikonk zata?

¹⁰ Ananiasan apleak koxem bhoglem tem Jezuk sanglem tednam, Jezun taka tapounk na. Punn tannem kitem korunk zai tea vixim taka spoxtt ritin margdorxon  dilem. Toxench, tannem hem kotthin kam kiteak korunk zai tem sangon Jezun taka man dilo. Jezun Saulu vixim oxem mhunnttlem: “Videxiank toxench razank ani Izraelachea putank mhojea nanva vixim govai diunk hanvem taka vinchla. Mhojea nanva pasot taka kitle tras sosunk poddttole te taka hanv spoxttponnim dakhoun ditolom.” (Itihas 9:15, 16) Uprant, Ananiasan rokddench Jezun sanglolem toxench kelem. To Kristanvancho dusman aslolea Sauluk mellonk voita ani taka mhunntta: “Saulu, mhojea bhava, tum ietalo tea vatter jea Somia Jezun tuka dorxon dilʼlem, tannench tuji dolleanchi dixtt porot ieunchi ani tum povitr xokten bhorcho mhunn mhaka tuje lagim dhaddla.”—Itihas 9:17.

11, 12. Jezu, Ananias ani Saulu vixim aslolea ghoddnnentlean ami kitem xiktat?

¹¹ Jezu, Ananias ani Saulu vixim aslolea hea ghoddnnentlean amkam zaitem xikonk melltta. Udharonnak, Jezun bhasailʼlem toxem, to porgottnnechea kamant fuddakar gheta mhunn ami zannam zatat. (Mt. 28:20) Punn aiz to svota zaun dor eklea lagim uloina tem khorem. Tori astana, visvaxi chakra udexim to porgottnnechea kamant fuddakar gheta ani aiz tannem tankam aplea ghorantlea sevokancher odhikar dila. (Mt. 24:45-47) Tor Sonchalon Monddollachea margdorxona khala, porgottnnaram ani pioneer sevokam, Krista vixim anik xikonk axetat tankam tim sodhtat. Ani ami fattlea odheai-ant polloilʼlem toxem, hanchea modlea zaitea zannamnim Devachem margdorxon maglolem. Ani tea uprant rokddench Jehovachea Sakxeamnim tankam porgott kelem.—Itihas 9:11.

¹² Ananiasan khaltikaien Jezun dilʼlem kam kelem ani taka besanv mellʼllem. Tor aiz porgottnnechem kam kortana tumkam thoddi bhirant dista zalear pasun, bore bhaxen sakx diunk dilʼli adnea tumi pallttat kai? Thoddeank ghoran-ghor vochon onvollkhi lokam lagim ulounk bhirant dista. Herank tanchea kamachea zagear, vatter, chitti boroun vo fona udexim porgottnni korunk kotthin zata. Punn ugddas dovrat, Ananias apli bhirant pois korun, Sauluk povitr xokti mellonk modot korunk pavlo. Ani taka ho ek vhodd man aslo! b Ananiasak ies mellʼllo karonn tannem Jezucher visvas dovorlo ani tannem Sauluk aplo bhav koso polloilo. Tor Ananiasa bhaxen, ami pasun amchi bhirant pois korunk zata. Oxem korunk, Jezu porgottnnechea kamant fuddakar gheta mhunn ami visvas dovrunk zai. Ami porgottnni kortat tea lokank somzon gheunk zai ani porgottnnent amkam tras ditat te munis pasun amche bhav zaunk xoktat mhunn ami chintunk zai.—Mt. 9:36.

13, 14. Tumi Bible xiktat ani azunui bautizm gheunk na zalear Sauluchea udharonnantlean tumi kitem xikonk zata?

¹³ Kristanv zalea uprant, Saulu jem xiklo tea pormonnem tannem aplea jivitant rokddech bodlav kele. Tachea dolleanchi dixtt porot aili tednam, tannem  bautizm ghetlo ani to Damaskant aslolea xisam sangata mellon ieunk laglo. Punn itlench nhoi, Bible tachea vixim sangta: “Rokddench tannem thoinchea sobha-ghoramnim Jezuch Devacho Put mhunn porgottunk suru kelem.”—Itihas 9:20.

¹⁴ Tumi Bible xiktat ani azunui bautizm gheunk na zalear, Saulu bhaxen tumi xikleant tea pormonnem, tumchea jivitant bodlav korunk tumi toiar asat kai? Jezun kelʼlem vizmit Saulun aplea jivitant polloilʼlem ani hea karonnak lagon, to Jezucho xis zaunk pavlo tem khorem. Punn thoddeamnim Jezun kelʼlim vizmitam polloilʼlim, tori astana tancher kainch porinnam zaunk na. Zoxem, Farizevanchea eka zomean, Jezun eka ar zalʼlea munxak boro kelʼlo tem polloilʼlem. Toxench, Jezun Lazarak jivont kelʼlo mhunn zaito Judev lok zannam aslo. Tori astana, te Jezuche pattlavdar zaunk nant. Tachea bodlek, te Jezucho virodh korunk lagle. (Marku 3:1-6; Juanv 12:9, 10) Punn Saulu tanchea bhaxen naslo. Tannem aplea jivitant rokddoch bodlav kelo. Karonn taka munxam poros Devachi chodd bhirant asli ani Jezun apleak doia dakhoilea mhunn to khub upkari aslo. (Filp. 3:8) Tumi Sauluchi dekh ghetlear, porgottnnechea kamant bhag gheunk suru korunk ani bautizm gheunk purte zaunk, tumkam koslich addkholl aschina.

15, 16. Saulun sobha-ghoramnim kitem kelem, ani Saulu porgottʼttalo tednam Damaskant aslolea Judevamnim kitem kelem?

¹⁵ Saulu sobha ghoramnim Jezu vixim porgottʼttalo tednam lokank koxem dislem astolem tem chintat. Thoddeank ghoddie rag ailo astolo ani thoddim thottaklim astolim. Tea pasot tannim vicharlem: “Jeruzalemant Jezuchem nanv ghetoleank dhumallo ditalo to hoch munis nhoi?” (Itihas 9:21) Punn Saulun tankam aplo sobhav kiteak bodolʼlo tem somzailem. Toxench, ‘purave diun Jezuch Krist mhunn dakhoun dilem.’ (Itihas 9:22) Itlea spoxtt toren tankam somzaun pasun sogleamnim manun gheunk na. Karonn tim riti-rivazam pormonnem choltalim vo to lok khub gorvixtt aslo. Ani hea pasot Saulu tanchem chintop bodlunk xoklona. Tori astana, to porgottnni korit ravlo.

¹⁶ Tin vorsam uprant pasun, Damaskant aslole Judev, Sauluk virodh korit ravle ani xevottak te taka jivexim marunk sodhtale. (Itihas 9:23; 2 Kor. 11:32, 33; Gal. 1:13-18) Hea vixim Sauluk kollʼllea uprant to xanneponnan vaglo. Ani xarachea vonnttik aslolea eka zonelantlean thoddea munxamnim taka eka pantteant ghalun denvoilo. Te ratik taka pollon vochonk modot kelʼlea munxam vixim Lukas sangta, ki te ‘Sauluche xis’ asle. (Itihas 9:25) Tor hantuntlean, Saulu Damaskant porgottʼttalo tednam thoddeamnim aikolem ani te Kristache pattlavdar zale mhunn kollon ieta.

17. (a) Bible-antlim sotam aikolea uprant lok kitem korta? (b) Ami kitem korit ravonk zai, ani kiteak?

¹⁷ Tumi Bible-antlean jem xiklim tem tumi tumchea ixttank, ghorcheank ani herank sanglem tednam, tim-ui tumchea bhaxen sot apnnaitolim oxem tumi chintlem astolem. Karonn Bible-antlim sotam somzonk khub sompim asat. Bhov thoddeamnim ghoddie tumchem aikolem. Punn choddxea zannamnim tumchem aikonk na astolem. Ani tumcheach ghorcheamnim tumkam dusmanam koxim lekhlim astolim. (Mt. 10:32-38) Punn ugddas dovrat, tumi Bible-antlim sotam somzaunk  tumchi tank anik bore toren uzar korit ravtat ani tumchi vagnnuk bori dovortat zalear, aiz tumcho virodh kortat tancho sobhav pasun bodlonk xokta.—Itihas 17:2; 1 Ped. 2:12; 3:1, 2, 7.

18, 19. (a) Saulu pasot Barnabas uloilo tednam kitem zaunk pavlem? (b) Ami Barnabas ani Sauluchi dekh koxi gheunk zata?

¹⁸ Saulu Jeruzalemant ailo tednam, to ek xis zala mhunn her bhav-bhoinnam manun gheunk toiar naslim. Tor to khoreaninch ek xis zala mhunn Barnabas tachea pasot apostlam lagim uloita. Tednam te apostl, Sauluk manun ghetat ani Saulu thoddo temp poriant tanchea sangata Jeruzalemant ravta. (Itihas 9:26-28) Saulun dhiran bori khobor dusreank sangli, punn to xittuk aslo. (Rom. 1:16) Eka vellar tannem Jeruzalemant Jezuchea xisank dhumallo diunk suru kelʼlo, teach zagear to dhiran porgottnni korunk laglo. (Itihas 9:26-28) Hem polloun Judev lok ekdom ragar zale. Karonn Kristanv dhorm kabar korunk fuddakar ghetalo toch munis atam ek Kristanv zalʼlo. Ani hea pasot te taka jivexim marunk sodhtale. “Hea vixim bhavank kollon ailem tednam te [Sauluk] Sezarient gheun aile.” (Itihas 9:30) Ani thoim thaun tannim taka Tarsusak dhaddlo mhunn Bible-ant amkam sanglam. Bhavam udexim Jezun taka dilʼlem margdorxon Saulun khaltikaien manun ghetlem. Oxem kelolean, Sauluk toxench sobhek pasun faido zalo.

¹⁹ Barnabas, Sauluk modot korunk fuddem sorlo mhunn dhean diat. Ani Barnabasan hea toren doiallai dakhoili dekhun, Jehovache he dogui urbevont sevok ekdom bore ixtt zaunk pavle mhunn kosloch dubhav na. Tor tumi Barnabasa bhaxen sobhent novim asat tankam adar diunk, porgottnnent tanchea sangata kam korunk, ani Jehova sangata tanchi ixttagot ghott zaunk tankam modot korunk toiar asat kai? Hoi zalear, tumkam zaitim besanvam mellttolim. Tumi halinch porgottnnaram zaleant zalear, Saulu bhaxen tumi dusream koddlean modot ghetat kai? Onubhov aslolea bhav-bhoinnam sangata tumi porgottnni kortat kai? Hoi zalear, tumi tumchi porgottnni anik bore bhaxen korunk pavtolim, tumchi khuxalkai vaddttoli, ani sasnak togta tosli bori ixttagot tumi zoddunk pavtolim.

20, 21. Adim ani atam pasun Devachea lokank mellʼllolo “xanticho kall” tannim koso uzar kela?

²⁰ Saulu Kristanv zalea uprant ani Jeruzalemant surokxit pavlea uprant, “akʼkhea Judeiant, Galilient ani Samariachea sobhamnim xanticho kall suru zalo.” (Itihas 9:31) Xisamnim ho xanticho kall koso uzar kelo? (2 Tim. 4:2) Hea vixim Bible amkam sangta, ki sobha bhavarthant “ghott zait geleo.” Tor apostl ani fuddakar ghetolea her bhavamnim xisancho bhavarth ghott korunk ani sobhank, ‘Jehovachea bhirantin cholot ravonk, toxench povitr xokte thaun bhuzvonn mellonk’ modot keli. Udharonnak, Lidda ani Sharonant aslolea xisank urba diunk Pedrun ho vell uzar kelo. Ani tachea hea vavrak lagon, tea vattarant ravtole zaite lok “Somiacher bhavarth dovrunk lagle.” (Itihas 9:32-35) Toxench, hea vellar ek susegad jivit melloun gheunk, xisamnim vavr korunk na. Tachea bodlek, eka-mekachi kallji gheunk ani bori khobor porgottunk tannim vavr kelo. Oxem kelolean, thoincheo sobha “vaddot geleo.”

 ²¹ Sumar 1990 hea vorsa, zaitea desamnim aslolea Jehovachea Sakxeamnim osloch “xanticho kall” onubhovlo. Karonn zaitea vorsam pasot Devachea lokank khub dhumallo ditale te sorkar okosmat poddle. Hea pasot thoddea desamnim porgottnnechea kamacher asloli bondi kaddli. Ani amchea kamacher bondi aslolea her desamnim, porgottnni korunk sompem zalem. Tor hea sondhecho faido gheun, hozaramnim Sakxeamnim porgottnnechem kam kelem ani zaitea lokamnim bori khobor aikoli.

22. Tumkam asloli svotontrtai tumi bore bhaxen koxi uzar korunk zata?

²² Tumkam asloli svotontrtai vo xanticho kall tumi bore bhaxen uzar kortat kai? Tumi ravtat tea desant bondi na zalear, Soitan tumkam Jehovachi seva korchea bodlek, hea sonvsarachi girestkai ektthaunk fas manddunk xokta. (Mt. 13:22) Punn fosonakat! Tumkam aslolo xanticho kall xanneponnan uzar korat. Bore bhaxen sakx diunk ani sobhank urba diunk hi sondhi uzar korat. Karonn tumchi poristhiti okosmat bodlonk xokta mhunn ugddas dovrat.

23, 24. (a) Tabitachea ghoddnnentlean ami khoinchim lisanvam xiktat? (b) Ami kitem korunk nichov korunk zai?

²³ Adlea kallar jielʼlea, Tabita vo Dorkas nanvachea eke Kristi bhoinni sovem kitem ghoddlem tem ami polloum-ia. Ti Lidda laginch aslolea, Jopa xarant ravtali. Ti aplo vell ani vostu xanneponnan uzar kortali. Toxench, ti “zaitim borim kamam kortali ani dan pasun ditali.” Punn okosmat ti duent poddli ani meli. c Tichea mornnak lagon, Jopant aslolea xisank ani tinnem modot kelʼli tea vidvank khub dukh zalem. Uprant, tichi kudd purunk toiar kortalim tednam, Pedru thoim pavlo. Ani Jezuchea khoincheach apostlan korunk naslem toslem ek vizmit tannem kelem. Tem mhunnttlear, Pedrun magnnem kelem ani Tabitak jivont keli! Uprant, Pedrun xisank ani vidvank, Tabita asli thoim apoilim. Tabita jivont zalea tem polloun tankam kitli khuxalkai bhogli astoli tem chintat! Hea ghoddnnek lagon tancher fuddem je tras ieunche asle tea pasot tankam ghottai mellʼlli mhunn kosloch dubhav na. Ani “hi khobor akʼkhea Jopant posorli, ani zaitea lokamnim Somiacher bhavarth dovorlo.”—Itihas 9:36-42.

²⁴ Tabitachea ghoddnnentlean ami kitem xiktat? (1) Amchea jivitant okosmat kitem-i zaunk xokta. Tor Deva lagim ek borem nanv zoddunk amchea lagim zo vell asa to ami bore ritin uzar korunk zai. (Up. 7:1) (2) Melolim jivont zatolinch mhunn amkam bhorvonso asa. Tabitan kelʼlim zaitim borim kamam Jehovan polloilim ani tannem tika  inam dilo. (Heb. 6:10) Tech bhaxen, Dev amchim borim kamam polloita ani ami Armageddona poilim melim zalear, to amkam jivont kortolo. Tor ami xantichea kallar vo kotthin vellar jietat zalear pasun, Jezu Krista vixim bore bhaxen sakx diunk ami amche lagim zata titlem-i korum-ia.—2 Tim. 4:2.