KONNEM-I tumkam zhoddttecho dis mhunn sanglem zalear, tumchea monant kitem ieta? Tea disa, kotteamnim atme Devachea xinvasona mukhar ube ravtole mhunn zaite lok chintat. Ani thoim Dev dor eka munxachi zhoddtti kortolo oxem tankam dista. Thoddeank, sorginchem sukh favo zatolem ani thoddeank sasnak vollvolle sosche  poddttole. Punn Bible hea disa vixim dusrench kitem sangta. Devachem utor, to ek bhirankull vell nhoi, punn munxam pasot khuxalkai ani boreponn haddtta toslo vell mhunn dakhoita.

Zhoddttechea disa vixim Apostl Juanv Prokasovnni 20:11, 12-ant mhunntta, “Uprant hanvem dekhlem ek vhoddlem dhovem xinvason ani tacher bosun aslo Taka hanvem pollelo. Tache mukha velim prithumʼ ani mollob pollun gelim ani tanchi savlli porian urunk na. Ani melʼlea monʼxank hanvem pollelim, vhoddank toxem lhanank: tim xinvasona mukhar ubim aslolim. Pustokam ugoddlim, ani uprant anink ek pustok ugoddlem; hem mhollear Jivitachem pustok. Pustokancher tancheo kornnio boroilʼleo asleo tea pormannem melʼleanchi monʼsubi zali.” Tor, hanga dakhoilolea pormonnem, nit konn kortolo?

Akʼkhea sonvsarant aslolea munxancho Jehova Dev ekloch nitidar zaun asa. Punn nit korunk tannem dusreak nemla. Itihas 17:31-ant apostl Paulu mhunntta, “Sonvsarachi nitivontponnan nit korunk tannim [Devan] ek dis tharaila, ani eka monʼxak nitidar nemla.” To nitidar mhunnttlear meloleantlo jivont zalʼlo Jezu Krist. (Juanv 5:22) Punn ho zhoddttecho dis kednam suru zatolo? Ani to dis kitlo lamb astolo?

Armagedʼdon zhuzant Soitanacho sonvsar kabar zalea uprant, zhoddttecho dis suru zatolo mhunn Prokasovnni hem pustok dakhoita. a (Prokasovnni 16:14, 16; 19:19–20:3) Armagedʼdon zhuz zalea uprant Soitan ani tachea sangati dutank, 1,000 vorsam porian bondkhonnint ghaltole. Hea vellar, sonvsarantle vinchun kaddlole 1,44,000 Kristanv, nitidar koxe ‘hozar vorsam-bhor Krista borabor razvottki choloitole.’ (Prokasovnni 14:1-3; 20:1-4; Romkarank 8:17)  Zhoddttecho dis fokot 24 vorancho nhoi. To dis ek hozar vorsancho astolo.

Hea ek hozar vorsachea vellar, Jezu Krist ‘jiveam ani melʼleanchi’ nit kortolo. (2 Timotak 4:1) ‘Jivim’ mhunnttlear, Armagedʼdonant salvar zata ti “vhodd lokanchi urponz” vo zomo. (Prokasovnni 7:9-17) Apostl Juanvan, “melʼlea monʼxank . . . xinvasona mukhar ubim aslolim” polloilim. Tor, meloleanchi-i zhoddtti zatoli. Jezun sanglolem toxem, “somadhimnim asat tim sogllim Tacho [Kristacho] tallo aikun tantlim bhair sortolim.” (Juanv 5:28, 29; Itihas 24:15) Punn tanchi zhoddtti koxi zatoli?

Apostl Juanvan dhorxonant polloilolea pormonnem, “Pustokam ugoddlim” ani “tancheo kornnio boroilʼleo asleo tea pormannem melʼleanchi monʼsubi zali.” (Prokasovnni 20:12) Hea pustokamnim, meloleancheo adleo korneo boroiloleo asat kai? Na. Hi zhoddtti, lokamnim morchea adim kelʼlea korneam pormonnem zaunchi na. Hem ami koxem mhunnonk zata? “Monʼxam morta tedna, tim patkache podventlim suttlim” mhunn Bible sangta. (Romkarank 6:7) Porot jivont zatat, tea lokanchea adlea patkancho Dev hixob gheuncho na. Tea pasot, hea pustokamnim, Devacheo noveo adnea boroiloleo astoleo. Armagedʼdonant salvar zalʼlo ani porot jivont zatolo to lok sasnak jietolo zalear, tankam Devache sogle kaide pallche poddttole. Hea kaideam modem, ek hozar vorsanchea vellar dilole nove kaide-i astole. Tor zonn ekleachi zhoddtti, tea hozar vorsanchea kallar tim koxim jietat tea pormonnem zatoli.

Zhoddttecho dis kotteamnim lokank, Deva vixim xikonk ani tache khuxe pormonnem jieunk sondhi ditolo. Tor sonvsaracher, vhodd promannan Jehova Deva vixim xikounchem kam choltolem. Khorench, “sonvsarantlea monʼxank promannikponn vollkhunk melltolem.” (Izaias 26:9) Punn soglinch Devache khuxe pormonnem cholonk sodhchimnant. Izaias 26:10 sangta, “Noxttea monʼxak doia dakhoili zalear-ui, promannikponn kitem tem tim  xikonant. Promannikponnachea desant tim vaitt korit ravtat, Sorvesporachi thorai tankam dixtti poddona.” Hea noxttea lokancho, zhoddttechea disa sasnak nas zatolo.—Izaias 65:20.

Zhoddttecho dis sompot ieta tednam mhunnttlear, soglim munxam Adanv ani Eve patok korchea adim aslim, toxim sompurnn zatolim. (1 Korintkarank 15:24-28) Tea uprant ek nimanni porikxa astoli. Soitanak bondkhonnintlo bhair kaddttole, ani nimanne pavtt to munxank fosouncho proitn kortolo. (Prokasovnni 20:3, 7-10) Soitanachea fasak sampoddnant tea munxam vixim Bible oxi bhasaunni korta, “Des zatolo borea monʼxanchem daiz: thoim tim thikann kortolim sasnnachea sasnak.” (Stotr 37:29) Khorench, ho zhoddttecho dis, Devak visvaxi ravlolea soglea munxam pasot khub besanvam haddttolo!