“Aplo mog kortat toso, potimnim aplea potinnincho mog korunk zai. Aple potinnicho mog korta to aploch mog korta. Konnuch monis aple kuddicho dves korina, punn ti posta ani ticho poramos korta.”​—EFEZKARANK 5:28, 29.

Ek ghov familicho mostok vo vhoddil zaun asa. (Efezkarank 5:23) Punn to vhoddil mhunn aplea baile sangata vaitt toren vagona vo soglem apleak zai toxench korina. Taka aplea bailechi kallji asa dekhun to ticheo sogleo gorzo purnn korta. Ti dukhi asta tednam to tika borim utram sangon urba dita. To tika khuxal dovrunk sodanch proitn korta. To apleak zai toxem aple bailen korunk zai mhunn ticher dobhav ghalina. (Filipkarank 2:4) To aplim bhavnam ani apunn kitem chintʼta tem tika ukteponnim sangta. Tech bhaxen, ti uloita tednam to dhean diun aikota. Toxench, ek boro ghov aplea baile sangata ‘khoraien vagona,’ mhunnche, to tika dukhoita toslim utram mhunnina vo tika marina.​—Koloskarank 3:19.

“Potinnin aplea potik man diuncho.”​—EFEZKARANK 5:33.

Ek bail aplea ghovak man dita zalear, to gheta tea nirnnoi-ak ti tenko ditoli. To chuklear pasun ti taka man ditoli. (1 Pedru 3:4) Ti tacheo chuki porot-porot voir kaddchi na, vo dusreank sangchi na. Koslea-i karonnak lagon ti bejar asa zalear aplea ghova lagim ulounk ti boro vell vinchun kaddttoli, ani respedan uloitoli. Tor oxem kelem zalear ghorabeant xanti astoli.​—Upodexok 3:7.

“Heach pasot dadlo . . . eke bailek ektthovta ani tim dogam-i zonnam ekuch kudd zatat.”​—UTPOTI 2:24.

Kazar zalea uprant ghov ani baile modem ek ghott natem suru zata. Hem natem ghott korunk tim aplea kallzant asa tem eka-meka lagim uloitat. Teach bhaxen, tim eka-mekachi kallji ghetat mhunn lhan-lhan kamamnim dakhoitat. Tim aplea kazari sangatea bhair dusrea lagim kuddicho sombond dovornant ani toslem chintop pasun tim aplea monan haddinant. Dekhun tancho eka-meka voilo visvas tuttchona ani familint ekvott urtolo.—Hebrevank 13:4.

‘Bhurgeank nitt vatt xikoi; Zantto zata porian te vattevoilim, tim khoddsorchim nant.’​—MHONNʼNNEO 22:6.

Bhurgeank xikounchi zobabdari Devan avoi-bapaink dilea. Bhurgeank fokot oxem kor, oxem korinaka mhunn sanglear puro nhoi. Punn  avoi-bapaimnim bhurgeank ek bori dekh dovrunk zai. (Dusri Somurt 6:6, 7) Ek bhurgem chuk korta zalear, avoi-bapain tacher ekdom ragar zaun taka tapounchem vo marchem nhoi. Xist diunchea poilim avoi bapaimnim aplea bhurgeanchem bore bhaxen aikonk zai. (Jakob 1:19) Bhurgeank xist diunk zai zalear, ti ragan nhoi punn mogan diunchi.

“Bhurgeamno, tumchea avoi-bapaichem aikat . . . ani Tumchea avoi-bapaik man diat.”​—EFEZKARANK 6:1, 2.

Bhurgeamnim aplea avoi-bapaichem aikonk zai ani tankam man diunk zai. Tim oxem kortat tednam ghorant xanti, khuxalkai, ani ekvott asta. Vhodd zalea uprant pasun bhurgeamnim aplea zannttea avoi-bapaik man diunk zai ani tanchi kallji gheunk zai. Bhurgim dusrea zagear ravtat zalear pasun tannim aplea avoi-bapaik ghorachi dekh-rekh korunk adar diunk zai ani poixeanchea vatten goroz ti modot korunk zai.—1 Timotak 5:3, 4.