OBHEASACHO LEKH 11
GIT 57 Porgottʼttat Sogleank Bori Khobor
Porgottnni Korunk Jezu Bhaxen Urba Dakhoiat
“Somian . . . jea-jea xaramnim ani ganvamnim apunn voicho aslo thoim vochonk dog-dog zannanchi zoddi korun tankam aplea poilim dhaddle.”—LUK. 10:1.
MUKHEL MUD’DO
Porgottnni korunk ami khoinchea char vattamnim Jezu bhaxen urba dakhounk zata tem polloum-ia.
1. Apunn Kristanv mhunn sangtat tea lokam poros Jehovachim Sakxi koxim vegllim asat?
JEHOVACHIM sevokam urben porgottnni kortat. Hea pasot, apunn Kristanv mhunn sangtat tanchea poros tim vegllim asat. (Tit. 2:14) Punn ek-ek pavtt tumkam porgottnnent vochonk urba asona zait. Tumkam ghoddie khub vavr korpi ek vhoddila sarkem dista zait. Tannem mhunnttlem: “Ek-ek pavtt mhaka porgottnnent vochonkuch disona.”
2. Porgottnnent amchi urba samballunk amkam thodde pavtti kiteak kotthin zait?
2 Punn porgottnni korchea poros Jehovache sevek zuddlolim her kamam korunk amkam avoddtta zait. Karonn ami Raj-ghoram bandtat ani tancho samball kortat tednam, vo odruxttak sampoddlolea amchea bhav-bhoinnank modot kortat tednam vo tankam her vattamnim urba ditat tednam amkam rokddoch boro porinnam pollounk melltta. Ani haka lagon ami khuxal zatat. Toxench amchea modem mog ani xanti asa ani ami kortat tea kamank lagon, bhav-bhoinnam amche upkar attoitat. Punn dusre vatten, ami ghoddie zaitea vorsam thaun ekuch vattarant porgottnni kortat ani thoincho choddso lok bore khobrek ghoddie kanuch dinant. Toxench, tim amcho sondex nakartat. Tea bhair, xevott lagim pavta toso amkam anikui virodh sosunk poddot. (Mt. 10:22) Tor porgottnnent amchi urba samballunk vo ti vaddounk amkam koxi modot zaunk xokta?
3. Lukas 13:6-9-antle voparintlean amkam Jezu vixim kitem xikonk melltta?
3 Jezuchea udharonnancher dhean dilʼlean porgottnnechea kamant amchi urba samballunk amkam modot zatoli. Jezun porgottnnent apli urba kednanch unni zaunk diunk na. Punn vell soron gelo toso tannem porgottnni korunk anikui chodd vavr kelo. (Lukas 13:6-9 vachat.) Jezun drakxanchea molleant kam korpi eka munxachi vopar sangli. Tea munxan molleant aslolea anjirachea zhaddak follam zaunk tin vorsam vavr kelo, punn taka ekui foll mellonk na. Teach bhaxen, Jezun Judevank tin vorsam porgottnni keli punn choddxea zannamnim tachea sondexak kan diunk na. Torui tea munxan apleak foll mellttolem mhunn bhorvonso soddun diunk na toso, Jezun pasun Judevank porgottnni korop bond korunk na. Tachea bodlek, porgottnnent tannem anikui chodd vavr kelo.
4. Jezu koddlean ami khoinche char mudʼde xiktat?
4 Hea lekhant, Jezu hea prithumer aslo tea nimannea sov mhoineamnim tannem porgottnnechea kamant koxi urba dakhoili tem ami polloitolim. (Lukas 10:1-acher aslolo “After these things” study note polloiat.) Tannem jem sanglem tem xiklolean ani tachi dekh ghetlolean amkam pasun aiz porgottnnent urba dakhounk modot zatoli. Tor ami Jezu koddlean xiktat tea char mudʼdeancher dhean dium-ia: (1) Jehovachi khuxi korop tannem aplea jivitant poilea zagear dovorli, (2) Devachea bhasaunneancher tannem bariksannen dhean dilem ani tea pormonnem kam kelem, (3) Jehova apleak modot kortolo mhunn tannem visvas dovorlo, ani (4) konn-na-konn bori khobor aikotolo mhunn tannem sodanch bhorvonso dovorlo.
TANNEM JEHOVACHI KHUXI POILEA ZAGEAR DOVORLI
5. Jezun porgottnnechea kamak sogleam-von chodd mhotv dilem mhunn koxem kolltta?
5 Jezun “Devachea Rajeachi bori khobor” urben porgott keli karonn Devan taka teach pasot dhaddla mhunn taka khobor asli. (Luk. 4:43) Jezun porgottnnechea kamak sogleam-von chodd mhotv dilem. Morchea thoddeach mhoineam poilim pasun Jezu “xaram-xaramnim ani ganvam-ganvamnim vochon” xikoit ravlo. (Luk. 13:22) Toxench tannem porgottnni korunk anikui xisank proxikxonn dilem.—Luk. 10:1.
6. Porgottnnechem kam ami Jehovachea sevent kortat tea her soglea kamank koxem zuddlolem asa? (Chitr pasun polloiat.)
6 Aiz pasun ami porgottnnechea kamak chodd mhotv dilʼlem Jehovak ani Jezuk zai. (Mt. 24:14; 28:19, 20) Karonn, hem kam ami Jehovache sevent kortat tea her soglea kamank zuddlolem asa. Udharonnak, ami porgottʼttat tea lokamnim ektthaim ieun Jehovachi bhokti korunk ami Raj-ghoram bandtat. Toxench, porgottnnechea kamank tenko diunk lagon sonvsarbhor bhav-bhoinnam Bethel-amnim seva kortat. Tea bhair, ami odruxttak sampoddloleank modot kortat. Karonn oxem kelʼlean, bhav-bhoinnank fokot gorjecheo vostuch mellonant punn tim porot mittingek mellon ieunk ani porgottnni korunk pavtat. Tor porgottnnechem kam ekdom gorjechem asa, ani ami hea kamacher chodd dhean dilʼlem Jehovak zai mhunn ami ugddas dovortat tednam, ami anikui urben ani chukonastana tem kam korunk fuddem sortolim. Hea vixim Hungary-ntlo, Janos nanvacho ek vhoddil oxem sangta: “Ami Jehova pasot kortat, tea her khoinchea-i kamam poros porgottnnechem kam sogleam-von chodd mhotvachem mhunn hanv mhakach ugddas kortam.”
Her khoinchea-i kama poros ami aiz porgottnnechea kamacher chodd dhean dilʼlem Jehovak ani Jezuk zai (Peregraf 6 polloiat)
7. Ami porgottit ravlolim Jehovak kiteak zai? (1 Timotak 2:3, 4)
7 Soglea torechea lokamnim bori khobor aikon ti apnnailʼli Jehovak zai. (1 Timotak 2:3, 4 vachat.) Ani ami lokank Jehova lekhta toxim lekhtat tednam, ami urben tankam porgottunk pavtolim. Hi khobor tancho jiv salvar korunk xokta dekhun ti tanchea kallzak lagta tea toren ami tankam sangloli Jehovak zai. Ani oxem korunk to amkam proxikxonn dita. Udharonnak, Mog Dakhoiat—Xis Korat hea pustikentlean, ami dusream lagim ulovop suru korunk xiktat. Hea vorvim, tim fuddarak Bible obheas korunk ani Jezuchim pattlavdaram zaunk fuddem soronk xoktat. Punn tim atam amchem aikonant zalear pasun, ami tankam kitem sanglolem tem tankam fuddarak ghoddie ugddas ieit ani tim Jehovachi seva korunk panvl gheit. Ani oxem korunk vhodd sonkoxtt sompchea poilim pasun tankam sondhi asa mhunn ami ugddas dovrunk zai. Punn toxem zatolem zalear, ami porgottit ravonk zai.
TANNEM DEVACHEA BHASAUNNEANCHER DHEAN DILEM
8. Bible-antleo bhasaunneo zannam zalʼlean aplo vell bore toren uzar korunk Jezuk koxi modot zali?
8 Bible-antleo bhasaunneo koxeo purnn zatoleo tem Jezuk khobor aslem. Udharonnak, hea sonvsaracher apunn fokot sadde-tin vorsam seva kortolo mhunn to zannam aslo. (Dan. 9:26, 27) Toxench, apunn kednam ani koso mortolo tea vixim kelʼli bhasaunni pasun to zannam aslo. (Luk. 18:31-34) Ani hem zannam zalʼlean, tannem aplo vell bore toren uzar kelo. Tannem urben porgottnni keli ani Devan dilʼlem kam sompoilem.
9. Bible-antleo bhasaunneo zannam zalʼlean urben porgottnni korit ravonk amkam koxi modot zata?
9 Amchea disamnim purnn zatat, ani fuddarak purnn zatoleo, tea bhasaunneam vixim niall kelear urben porgottnni korunk amchi itsa vaddttoli. Hea noxttea sonvsaracho xevott ekdom lagim pavla mhunn ami zannant. Ami jietat tea kallar, lokancho sobhav koso astolo ani kosleo ghoddnneo ghoddttoleo tea vixim Bible-ant jem sanglam tem ami amchea dolleam mukhar pollounk xoktat. Toxench Bible-ant oxi-i bhasaunni kelʼli asa ki “xevottacho kall pavtoch” ut’torecho raza ani dokxinnecho raza eka-meka add zhuztole. (Dan. 11:40, NW) Hi bhasaunni, Anglo America-chi Sonvsarache Vorixtt Razvottki ani Russia ani tachea vangddi raxttram modem aslolea dusmankaiek suchit korta mhunn ami zannant. Tea bhair, Daniel 2:43-45-antle bhasaunne pormonnem, tea murtiche paim Anglo America-che razvottkek suchit kortat mhunn amkam kollʼllam. Hem zannam zalʼlean, ami nimanneachea-nimannea disamnim jietat ani Devachem Raj beginuch munxachea sorkarancho nas korun uddoitolem mhunn khatri zata. Tor atam amchea lagim aslolo vell anikui urben porgottunk uzar korum-ia.
10. Bible-antleo bhasaunneo anik khoinchea vattamnim amkam urben porgottit ravonk modot kortat?
10 Bible-antlea bhasaunneam vorvim amkam fuddara pasot ek bhorvonso pasun melltta dekhun urben porgottnni korunk ami fuddem sortat. Hea vixim Dominican Republic-antli, bhoinn Carrie sangta: “Jehovan fuddara vixim sanglolea borea vostum vixim hanv chintʼtam tednam, hanvem dusreankui tea vixim sangchem oxem mhaka dista. Karonn lok aiz zaite tras sostat. Tor Jehovan dilʼlea bhorvonxea vixim tim-ui zannam zalʼlim mhaka zai.” Toxench porgottnnechea kamant Jehova amkam modot korta mhunn Bible-antlea bhasaunneam vorvim amkam khatri zata, ani urben porgottunk modot zata. Hea vixim Hungary-int ravpi, bhoinn Leila sangta: “Jehovache modotin konnui bodlunk xokta mhunn Izaias 11:6-9-antlean kolltta. Hea pasot bori khobor aikochim nant oxem dista, tea lokank pasun porgottnni korunk mhaka modot zalea. Tea bhair Zambia-ntlo bhav Christopher sangta: “Marku 13:10-ntlea bhasaunne pormonnem, bori khobor sonvsarbhor porgott zait asa. Ani hi bhasaunni purnn zata toxi, mhaka-i tantunt vantto gheunk sueog mellʼlla mhunn mhaka gorv bhogta.” Tumkam Bible-antlea khoinchea bhasaunneam vorvim urben porgottit ravonk modot zalea?
JEHOVA APNNAK MODOT KORTOLO MHUNN TANNEM VISVAS DOVORLO
11. Urben porgottunk Jezun sodanch Jehovacher kiteak patieun ravonk zai aslem? (Lukas 12:49, 53)
11 Urben porgottit ravonk, Jezu sodanch Jehovacher patieun ravlo. To lokam lagim respedan uloitalo. Torui, Rajeache bore khobrek lagon lok tacher ragar zatolo ani virodh pasun kortolo mhunn taka khobor asli. (Lukas 12:49, 53 vachat.) Udharonnak, Jezu porgottʼttalo tednam, dhormik fuddareamnim tacho virodh kelo ani zaite pavtti tacho jiv pasun kaddunk proitn kelo. (Ju. 8:59; 10:31, 39) Punn Jezu porgottit ravlo. Karonn Jehova sodanch tachea sangata asa mhunn Jezuk khobor asli. Tannem oxem mhunnttlem: “Hanv ekttom na, punn mhaka dhaddla to mhozo Bap mhojea sangata asa . . . tannem mhaka eksuro sanddunk na, karonn hanv sodanch taka manvota teo vostu kortam.”—Ju. 8:16, 29.
12. Dhumallo ailear pasun porgottnni korit ravonk Jezun aplea xisank koxi urba dili?
12 Aplea xisamnim pasun Jehovacher patieun ravonk zata mhunn Jezun tanchea ugddasak haddlem. Dhumallea vellar Jehova tankam modot kortolo mhunn tannem xisank porot-porot khatri dili. (Mt. 10:18-20; Luk. 12:11, 12) Toxench tannem tankam chotur ravonk pasun sanglem. (Mt. 10:16; Luk. 10:3) Tancho sondex aikonk sodhinant tancher dobhav ghalinakat mhunn Jezun tankam sanglem. (Luk. 10:10, 11) Toxench dhumallo ailear thoinsorlean pollon vochonk lailem. (Mt. 10:23) Tor Jezu Jehovacher patietalo ani urben porgottʼttalo tem khorem, punn aplo jiv dhokeant aslo tednam, to tea dhokea thaun pois ravlo.—Ju. 11:53, 54.
13. Jehova tuka modot kortolo mhunn tunvem kiteak khatri dovrunk zata?
13 Aizui lok amcho virodh kortat tednam urben porgottit ravonk amkam Jehovachi modot zai. (Prok. 12:17) Tor Jehova tuka modot kortolo mhunn tunvem kiteak khatri dovrunk zata? Juanv odheai 17-ant Jezun kitem maglolem tacher dhean diat. Tannem Jehova lagim aplea apostlancho samball kor mhunn vinoti keli. Ani Jehovan tachem magnnem aikolem. Khub dhumallo aslearui dhiran porgottnni korunk Jehovan apostlank koxi modot keli tem amkam Itihas pustokantlean kolltta. Tumi hacherui dhean diunk zata ki Jezun tea magnneant, fokot aplea apostlan pasot nhoi, punn je tanche utor aikon tancher bhavarth dovortat, tankam lagon pasun vinoti keli. Hacho orth, tannem tujea pasotui vinoti keli. Ani Jehova aiz poriant tachem magnnem aikot asa. Tor Jehovan apostlank modot keli toxi to tuka-i modot kortolo mhunn kainch dubhav na!—Ju. 17:11, 15, 20.
14. Kotthin vellar pasun ami urben porgottit ravonk pavtolim mhunn ami kiteak khatri dovrunk zata? (Chitr pasun polloiat.)
14 Hea sonvsaracho xevott lagim pavta toso, amkam bori khobor porgottunk anikui kotthin zait. Punn urben porgottit ravonk amkam goroz ti modot astoli mhunn Jezun amkam bhas dilea. (Luk. 21:12-15) Jezu ani tachea xisam bhaxen ami pasun lokancher dobhav ghalinant ani tanchea sangata vad-vivad korinant. Amchea kamacher bondi asa thoim pasun amchim bhav-bhoinnam porgott korit ravonk xokleant. Karonn tim svotacher nhoi punn Jehovacher patieun ravtat. Jehovan poilea xekddeantlea Kristanvank xokti dili toxi, ‘purnn toren porgottnni korunk’ Jehova aiz amkam-i xokti dita. (2 Tim. 4:17) Tor ami Jehovacher patietat zalear ami urben porgottnni korit ravonk pavtolim!
Amchea kamacher bondi asta tednam pasun, bhav-bhoinnam dusreank bori khobor sangonk vatto sodhun porgottnni korunk urba dakhoitat (Peregraf 14 polloiat) a
TANNEM BHORVONSO DOVORLO
15. Konn-na-konn bori khobor aikotolo mhunn Jezun bhorvonso dovorlo mhunn koxem kolltta?
15 Konn-na-konn bore khobrek kan ditolo mhunn Jezun bhorvonso dovorlo dekhun, to urben porgottit ravonk pavlo. Udharonnak, porgottnni suru korun sumar ek vorsa uprant, zaitim zannam bori khobor aikonk toiar asat mhunn tannem polloilem. Ani tannem tankam, lunvnni korunk toiar aslolea eka xetak sor kelim. (Ju. 4:35) Sumar eka vorsa uprant, tannem aplea xisank oxem mhunnttlem: “Pik khub asa.” (Mt. 9:37, 38) Ani uprant tannem porot oxem sanglem: “Pik khub asa . . . xetachea Dhoniak lunvnni korunk anik vavraddi dhadd mhunn vinoti korat.” (Luk. 10:2) Tor lok bori khobor aikotolo mhunn Jezun bhorvonso soddun diunk na dekhun to porgottnnent apli urba samballunk pavlo. Ani tannim tacho sondex aikolo tednam to khub khuxal zalo.—Luk. 10:21.
16. Jezuchea voparim vorvim porgottnnechea kamant boro porinnam zatolo mhunn koxem kolltta? (Lukas 13:18-21) (Chitr pasun polloiat.)
16 Porgottnnechea kamant tankam khub boro porinnam mellttolo mhunn sangon, Jezun aplea xisank porgottnni korit ravonk urba dili. Udharonnak, Jezun tankam don vopareo sangleo. (Lukas 13:18-21 vachat.) Poile voparint, Jezun Rajeache bore khobrek eka sansvache biek sor keli, ji uprant vaddon ek vhoddlem zhadd zalem. Hea vorvim, addkholleo aslearui zaito lok ti apnnaitolo mhunn Jezun sanglem. Dusre voparint, Jezun Rajeache bore khobrek khomirak sor keli. Karonn ti soglea sonvsarak porgott zatoli asli ani hea udexim lok aplea jivitant bodol kortolo aslo. Te bodol amkam rokddech disonant zait. Tor hea donui voparim vorvim, tanchea porgottnne udexim zaitea lokank modot zatoli mhunn Jezun aplea xisank khatri dili.
Konn-na-konn bori khobor aikotolo mhunn ami Jezu bhaxen sodanch bhorvonso dovortat (Peregraf 16 polloiat)
17. Kitem ugddas dovorlolean ami urben porgottit ravonk pavtolim?
17 Aiz pasun porgottnne udexim sonvsarbhor zaitea lokank koxi modot zata tem chintlolean, urben porgottunk amkam modot zata. Dor vorsa, koroddamnim lok Ugddas Disak hajir zata ani Bible obheas kortat. Toxench, lakʼkhamnim lok bautizm ghetat ani porgottnnaram zatat. Tor fuddarak anikui kitlo lok bore khobrek kan ditolo tem ami nokllo. Punn vhodd sonkoxttantlean salvar zatolea eka vhodd zomeak, Jehova ektthaim korit asa mhunn ami zannant. (Prok. 7:9, 14) Jehova xetacho Dhoni zaun asa, ani anikui zaito lok bore khobrek kan ditolo mhunn taka khatri asa. Hea karonnak lagon ami porgottit ravom-ia!
18. Dusreank amche vixim kitem kollon ailolem amkam zai?
18 Jezuchea xisamnim bori khobor sodanch dhiran porgott kelea. Zoxem tachea apostlamnim itlea dhiran ani urben porgottnni keli, ki lokank “te Jezu Krista borabor astale mhunn kollon ailem.” (D.I. 4:13) Aiz ami urben porgottʼttat tednam ami pasun Jezuchim pattlavdaram mhunn lokank kollon ieunk xokta.
GIT 58 Xantichea Ixttank Sodhum-ia
a CHITRACHI MAHITI: Petrol pump-ar ailʼlea eka munxak ek bhav chotraien sakx dita
