1. Jehovachi seva korunk kednam kotthin zaunk puro?

JEHOVACHI seva korunk kednam kotthin zaunk xokta, tumkam zaiteo somosia astat tednam vo somosia nant tednam? Amkam somosia astat tednam ami rokddinch Jehovacher bhavarth dovortat, punn amchea jivitant soglem borem asta tednam ami Jehovachi seva korunk visortat kai? Oxem zaunk xokta mhunn Jehovan Israelitkarank xittkailolem.—D.S. 6:10-12.

2. Raza Asan koslem borem udharonn dovorlam?

² Borea ani vaitt poristhitint Jehovachi seva kelolea Raza Asachem amkam ek borem udharonn asa. To zannvaien vaglo ani Jehovacher sodanch patieun ravlo. Jivitbhor, “Asachem kalliz Sorvespora sovem sodanch visvaxi aslem.” (1 Raz. 15:14.) Judant choltoli khotti bhokti tannem kaddun uddoili. Hea toren, tannem purnn kallzan Jehovachi bhokti keli mhunn dakhoilem. Tannem ‘porki devancheo vedi ani unch zage moddun uddoile. Thoinche khambe moddle, tech porim Ashera devichi murti moddun uddoili’ mhunn Bible sangta. (2 It. 14:2, 4) Tannem aple ajecho mhunnche Maakah-cho, rannieponnacho pod pasun kaddun uddoilo. Kiteak? Karonn tinnem eke murtichi bhokti korunk lokank urba dil’li.—1 Raz. 15:11-13.

3. Hea lekhant ami kitem bhasabhas kortolim?

³ Asan fokot Judant asloleo murteoch kaddun uddounk nant, punn lokank Jehovaxim portun ieunk modot korun khori bhokti stapon keli. Jehovan Asak ani Judachea  lokank xanti * diun tancher besanv ghatlem. Asa raza aslo tednam dha vorsam meren tache “ak’khe razvottkent xanti vostali.” (2 It. 14:1, 3, 5) Xanti asli tea vellar Asan kitem kelem, tea vixim ami hea lekhant bhasabhas kortolim. Poilea xekddeantlea Kristanvank pasun ek xanticho vell aslo. Tea vellar tannim Asa bhaxen kitem kelem tea vixim ami uprant xiktolim. Xevottak ami hea prosnancho zobab zannam zatolim. Tumi ravtat tea desant Jehovachi bhokti korunk sorkara thaun porvangi asa zalear tumi ho xanticho vell koso xanneponnan uzar korunk xoktat?

4. 2 Itihas 14:1, 5, 6 pormonnem, Asan xanticho vell koso uzar kelo?

⁴ 2 Itihas 14:1, 5, 6 vachat. “Sogllea vattamnim xanti favo” korpi Jehova mhunn Asan lokank sanglem. Xanticho ho vell suseg gheuncho vell mhunn Asan chintunk na. Tannem xara, durgam, gopur ani darvontte bandunk suru kele. Tannem Judachea lokank mhunnttlem, “Ho des amchea hatant asa.” To kitem mhunnonk sodhtalo? Devan dil’lea desant dusmanacho virodh nastana lok bhonvonk xoktale ani te bandkam korunk xoktale mhunn to sangonk sodhtalo. Tor tankam aslolo ho xanticho vell bore toren uzar korunk tannem lokank urba dili.

5. Asan apli zhuzachi fouz kiteak ghott keli?

⁵ Asan ho xanticho vell apli zhuzachi fouz ghott korunk pasun uzar kelo. (2 It. 14:7) Hacho orth taka Jehovacher visvas naslo kai? Toxem nhoi. Karonn to ek raza zal’lean fuddarak ieta tea transancho fuddo korunk lokank toiar korop apli zobabdari mhunn taka khobor asli. Tea bhair, Judant aslolo xanticho vell sodanch aschona mhunn to zannam aslo ani toxench zalem.

6. Poilea xekddeantlea Kristanvamnim xanticho vell koso uzar kelo?

⁶ Poilea xekddeantlea Kristanvank zaite pavtt dhumallo soscho poddlo tem khorem. Punn tankam thoddo vell xanti pasun asli. Xisamnim ho vell koso uzar kelo? Him visvaxi Kristanvam bori khobor urben porgottit ravlim ani tannim aplem dhean ‘Jehovachi bhokti korchea’ kamacher dovorlem. Hea karonnak lagon tim ‘vaddot gelim.’ Xantichea hea vellar tanchea urbebhorit porgottnnecher Jehovan besanv ghatlem mhunn hantuntlean kollon ieta.—Itihas 9:26-31.

7-8. Porgottnni korchi sondhi asli tednam Paulu ani heramnim kitem kelem? Somzaiat.

⁷ Poilea xekddeantlea Kristanvamnim dor ek sondhi melltta thoim porgottnni keli. Udharonnak, Efezant apunn zaiteank porgottunk xokta mhunn Apostl Pauluk koll’llem tednam to tea xarantuch ravlo ani thoim tannem porgottnni keli.—1 Kor. 16:8, 9.

⁸ Jerusalem-antlea apostlamnim ani vhoddilamnim 49 K.X.-ant sunote vixim nirnnoi ghetlo tednam, Paulu ani her Kristanv zaiteank porgottnni korunk pavle. (Itihas 15:23-29) Tea nirnnoi-a vixim Paulun ani heramnim sobhank kolloilea uprant soglim ‘Jehovachem Utor’ porgottunk khub vavurlim. (Itihas 15:30-35) Hacho porinnam kitem zalo? “Povitr-Sobha odik-odik bhavarthan mozbut zaleo ani disan dis tanchi sonkia-i vaddon geli” mhunn Bible sangta.”—Itihas 16:4, 5.

9. Aiz zaitea desamnim porgottnni korchi poristhiti koxi asa, ani ami amkanch kitem vicharunk zai?

⁹ Aiz zaitea desamnim dhumallo nastana ami porgott korunk xoktat. Tumi oslea eka desant ravtat kai? Tor tumi tumkanch vicharat, ‘Xanticho ho vell hanv koso uzar korta?’ Hea nimannea disamnim Jehovachea lokank ek vhodd kam asa. Sonvsarant tachea poilim kednanch zaunk na titlea vhoddlea promannan choltolea porgottnnechea ani xikounchea kamant te bhag ghetat. (Marku 13:10) Hea kamant ami zaitem korunk xoktat.

10. 2 Timotak 4:2 amkam kitem korunk urba dita?

¹⁰ Xanticho vell tumi borea toren koso uzar korunk xoktat? (2 Timotak 4:2 vachat.) Tumi vo tumchea familintlo ek sodoxio porgottnnent chodd korunk xokta mhunn tumi bariksannen chintunk pollounk zata kai? Ghoddie tumchea jivitant tumi thodde bodlav korun, tumi pioneer zaun seva korunk zata kai? Poixe ani girestkai ektthaim korcho ho vell nhoi karonn vhodd sontapa thaun par zaun bhair sortana heo vostu amchea lagim ascheo nant.—Mho. 11:4; Mt. 6:31-33; 1 Juanv 2:15-17.

11. Zata titlea lokank porgottunk thoddeamnim kitem kelam?

¹¹ Lokank Jehova vixim xikounk zaite porgottnnar ek novi bhas xikleat ani tankam adar diunk Jehovachea songottnnen chodd ani chodd bhasamnim Bible adarit prokaxonam toiar keleant. Udharonnak, 2010-ant amchim prokaxonam sumar 500 bhasamnim aslim. Punn aiz amkam tim prokaxonam 1,000-a von chodd bhasamnim mellttat.

12. Devachea Rajeachi khobor lok aplea bhaxent aikotat tednam tankam koso faido zata? Ek udharonn diat.

¹² Devachem Utor aplea bhaxent aikotat tednam lokancher koslo probhav poddtta? Memphis, Tennessee, U.S.A.-nt zalolea eka pradexik odhivexona thaun eke bhoinnik koso faido zalo tem polloiat. Hem odhivexon Kinyarwanda hea bhaxent zal’lem. Ti bhas  chodd korun Rwanda, Congo (Kinshasa), ani Uganda hea desant uloitat. Odhivexona uprant Kinyarwanda bhas uloitolea hea bhoinnin mhunnttlem: “17 vorsa poilim hanv United States-ant ailem tednam thaun aiz meren poile pavtti mhaka eka odhivexona thaun purnn faido zalo.” Khorench tea bhoinnin ti kariavoll aplea bhaxen aikoli dekhun ti tichea kallzak lagli. Ghoddtta zalear, tumi tumchea vattarantle lok uloitat ti anik ek bhas xikonk zata kai? Tumchea vattarantlea thoddea lokank dusri ek bhas anik bori somzota zalear tumi tea bhaxent uloitat tem tanchea kallzak bore toren lagot kai? Tumi hea toren vavurtat tednam tumkam khub khuxalkai mellttoli.

13. Russia-ntlea amchea bhav-bhoinnamnim xanticho vell koso uzar kelo?

¹³ Sonvsarantlea soglea bhav-bhoinnank dhumallo nastana porgottnni korunk mellona. Karonn thoddea desamnim amchea bhavanchem porgottnnechem kam sorkaran addaun dovorlam. Udharonnak, Russia-ntlea amchea bhavam vixim polloiat. Zaitim vorsam dhumallo soslea uprant, Mars 1991-ant thoinchea sorkaran amchea bhavank ukteponnim Jehovachi bhokti korunk porvangi dili. Tea vellar, Russia-nt sumar 16,000 Sakxi asle. Punn vis vorsa uprant, thoim 1,60,000 Sakxi zale. Porgottnni korunk svotontrtai asli tednam bhav-bhoinnam zannvaien vagle mhunn amkam hantuntlean sarkem dison ieta. To xanticho vell chodd temp uronk na. Aiz tea desantli poristhiti bodol’lea. Tori astana, Jehovache Sakxi apleachean zata tem soglem korun urben tachi seva kortat.

14-15. Asak modot korunk Jehovan apli xokti koxi uzar keli?

¹⁴ Asachea disamnim aslolo xanticho vell pasun ek dis kabar zalo. Dha lakh soinikanchi ek vhodd fouz, Ethiopia thaun Juda add  aili. Apli fouz Judak haroitoli mhunn tea foujecho mukheli Zera-ak khatri asli. Punn Asan aplea fouzacher nhoi, punn Jehova Devacher bhorvonso dovorlo mhunn amkam hantuntlean sarkem dison ieta: “Sorvespora amchea Deva, amchea adarak pav. Tujer patieun ani Tujea Nanvan hea vorixtt porjek ami fuddo korunk vetanv. Sorvespora, Tum amcho Dev.”—2 It. 14:10.

¹⁵ Ethiopiechi fouz Judache fouje poros sumar don pavtti chodd asli. Punn Jehova bollixtt asa ani to aplea lokank modot kortolo mhunn Asak khobor asli. Jehovan aplea lokank modot keli ani Ethiopiechi fouz harli.—2 It. 14:7-13.

16. Xanticho vell sodanch urcho na mhunn ami koxim zannant?

¹⁶ Fuddarak amchea dor ekleachem kitem zatolem tem amkam khobor na. Punn Jehovachem lok atam onnbhovtat to xanticho vell sodanch urcho na mhunn ami zannant. Ugddas korat, nimannea disamnim aplea xisancher ‘soglim raxttram zollttolim’ mhunn Jezun adinch sanglolem. (Mt. 24:9) Toxench “Jezu Krista sovem bhoktiponnan jieunk sodtat tim sogllim dhumallo sostolinch” mhunn apostl Paulun pasun sanglem. (2 Tim. 3:12) Soitan “bhov ragixtt” zal’lo asa dekhun tachea raga thaun ami sutt’ttolim mhunn chintop pixemponn zatolem.—Prok. 12:12.

17. Khoinchea vattamnim ghoddie amchea bhavarthachi porikxa zatoli?

¹⁷ Fuddarak beginuch amchea sogleanchea bhavarthachi porikxa zatoli. Ani thoddeach tempa uprant “sonvsarachea orombak thaun tem atam porian zaunk na . . . toslo ek vhodd sontap” ietolo. (Mt. 24:21) Tea vellar amchea familiche sodoxio ghoddie amcher add ieunk puro ani sorkar ghoddie amchea porgottnnechea kamacher bondi ghalunk puro. (Mt. 10:35, 36) Tea vellar, modot ani surokxotaiek lagon ami dor eklim Asa bhaxen Jehovacher patietolim kai?

18. Hebrevank 10:38, 39-a pormonnem, xanticho vell sompta tednam amcho bhavarth ghott dovrunk amkam koxi modot zatoli?

¹⁸ Fuddarak amcho bhavarth ghott dovrunk lagon, Jehova amkam aiz toiar korta. Tea vellar ami ghott ravonk, Jehova aiz “visvaxi ani xannea chakrak” uzar korun, amkam “vogtar jevonn” diun goroz tem soglem dita.  (Mt. 24:45) Punn ami dor eklean amcho bhavarth ghott dovrunk, zata titlem vavrunk zai.—Hebrevank 10:38, 39 vachat.

19-20. 1 Itihas 28:9 vachlea uprant, ami amkanch khoinche prosn vicharunk zai, ani kiteak?

¹⁹ Raza Asa bhaxen ami “Jehovak sodhunk” zai. (2 It. 14:3; 15:1, 2) Ami Jehova vixim xiktat ani bautizm ghetat tednam ami Jehovak sodhunk suru kortat. Jehovacher aslolo amcho mog ghott korunk ami zata tem soglem kortat. Hem ami kortat kai na tem topasunk, ami amkanch ho prosn vicharunk zata, ‘Hanv mittingek chukonastana hajir zata kai?’ Ami mittingek hajir zatat tednam Jehovachi seva korit ravonk amkam ghottai melltta ani amchea bhav-bhoinnam thaun amkam urba melltta. (Mt. 11:28) Ami amkanch ho prosn vicharunk zata, ‘Hanv chukonastana svotacho Bible obheas korta kai?’ Tumi tumchea famili sangata ravtat zalear tumchea familint dor sumanak kuttumbik bhokti cholta kai? Vo tumi ekttim ravtat zalear eka familint asloli kuttumbik bhoktek lagon umko vell tharaitat, teach toren tumi-i vell tharaitat kai? Toxench tumi herank porgottunk ani xikounk zata tem soglem kortat kai?

²⁰ Ami he prosn kiteak vicharunk zai? Bible sangta Jehova amchim kallzam topasta ani monantlim chintnam parkita. Tor, ami-i amchea vixim toxench korunk zai. (1 Itihas 28:9 vachat.) Uprant ami dovorlole dhei vo amchea sobhavant vo chintnant bodol korchi goroz asa mhunn amkam dista zalear, te bodol korunk ami Jehova lagim magonk zai. Fuddarak ieunche asat tea porikxencho fuddo korunk toiar zauncho ho vell zaun asa. Xanticho ho vell bore bhaxen uzar korunk tumkam kitench addaunk dium nakat.