1-2. (a) Thodde sorkar Jehovachea lokam sangata koxe toren vagtat, tori astana Jehovacho lok kitem korta? (b) Amkam dhumallo sosunk poddlear pasun ami kiteak khuxal zaunk zata? (Masikachea fuddlea panacher aslolem chitr polloun pasun zobab diat.)

 AIZ sonvsarbhor sumar 30 desam poros chodd desamnim amchea kamacher bondi asa. Ani thoddea desantlea odhikareamnim amchea bhav-bhoinnank bondkhonnint ghatleant. Punn Jehovache nodren tannim kainch guneanv korunk na. Tim fokot Bible vachtat, mittingek hajir zatat, porgottnni kortat ani rajkaronnant bhag ghenant mhunn tankam itlo dhumallo sosunk poddtta. Punn hem soglem sosunk poddlear pasun tim Jehovak visvaxi asat, tem mhunnttlear, tim Jehovachi bhokti korit asat. Ani hea karonnak lagon tim khuxal asat!

² Ami ghoddie hea dhirvont bhav-bhoinnam modlea thoddea zannanche fottu polloileat zait. Tankam polloitana tim kiteak khuxal distat? Karonn tim Jehovak visvaxi asat ani hem Jehovak manvota mhunn tim zannant. (1 It. 29:17a, NW) Heach karonnak lagon Jezun oxem mhunnttlem: “Sarkem tem kortat dekhun dhumallo sostat tim khuxal . . . khuxal ani sontosbhorit zaiat, karonn sorgar tumkam vhoddlo inam mellcho asa.”—Mt. 5:10-12.

3. Itihas 4:19, 20-a pormonnem, poilea xekddeantlea apostlank dhumallo sosunk poddlo tednam tannim kitem kelem, ani kiteak?

³ Aiz amchea bhav-bhoinnank sorkaram thaun dhumallo sosunk poddtta tea bhaxen poilea xekddeantlea apostlank pasun,  te Jezu vixim porgottʼttale dekhun dhumallo sosunk poddlo. Judevanchea mha-dhorm sobhechea neai-korpeamnim porot-porot “Jezuchea Nanvan anink uloina zaunk tankam xiddkaile.” (D.I. 4:18; 5:27, 28, 40) Punn apostlamnim tanchem aikolem kai? Na. (Itihas 4:19, 20 vachat.) Tea sorkari odhikaream poros, chodd odhikar aslolea konnem tori tankam ‘soglea lokank porgott korunk ani Jezu Krista vixim sakx diunk adnea dilea’ mhunn tannim vollkhon ghetlem. (D.I. 10:42) Tor Pedrun ani Juanvan, dhiran tea neai-korpeank, te munxanchi nhoi punn Devachea adneak pallo ditole ani Jezu Krista vixim porgott korit ravtole mhunn sanglem. Eka orthan, tannim tea neai-korpeank oxem sanglolea bhaxen zaun aslem, ‘Lokamnim Devachem aikochea bodlek tujem aikonk, tum tujea jivak Deva poros vhodd mhunn somzota?’

4. Itihas 5:27-29-a pormonnem, apostlamnim amchea pasot ek bori dekh koxi dovorlea, ani ami tanchi dekh koxi gheunk zata?

⁴ Apostl Devak visvaxi asat mhunn tankam marlea uprant, “Jezuchea Nanva pasot beman sosunk apnnank bhag mellʼllem mhonn khuxal zaun, te Mha-Dhormsobhentle bhair sorle” ani porgottnnechem kam korit ravle. (D.I. 5:40-42) Tor tannim ‘munxanchi adnea nhoi, punn Devachi adnea pallun’ amchea pasot ek bori dekh dovorlea. Ani tednam thaun khorim Kristanvam oxem korit aileant.—Itihas 5:27-29 vachat.

5. Amchea monant kosle prosn ieunk puro?

⁵ Punn apostlamnim jem kitem kelem tea vorvim amchea monant thodde prosn ieunk puro. Udharonnak, ‘sorkari odhikareank khaltim ravchea’ borabor, apostlamnim munxanchi nhoi punn Devachea adneak koso pallo dilo? (Rom. 13:1) Ani apostl Paulun sanglem toxem, aiz ‘sordarank ani sorkari odhikareank khaltim ravchea’ borabor, amcho vorto Raza Jehova Devak ami visvaxi koxim ravonk xoktat?—Tit. 3:1.

6. (a) Romkarank 13:1-ant sanglole ‘sorkari odhikari’ konn, ani ami tanchea sangata koxe toren vagonk zai? (b) Soglea sorkari odhikareank ani rajki fuddareank aslolea odhikara vixim ami kitem ugddas dovrunk zai?

⁶ Romkarank 13:1 vachat. Hea versant sanglolem ‘sorkari odhikari’ hem utor, munxancher odhikar choloitolea sorkarank vo odhikareank suchit korta. Ani ami hea sorkarank khaltim ravchi goroz asa. Karonn te somazant xanti  samballttat, soglo lok kaide pallttat mhunn khatri kortat, ani thoddea vellar Jehovachea lokanchi rakhonn kortat. (Prok. 12:16) Ani heach pasot ami tankam farik korunk zai to tax ani tankam favo to man ani resped diunk zai mhunn Jehovan amkam adnea dilea. (Rom. 13:7) Punn fokot Jehova Devan sorkari odhikareank odhikar dila dekhun te odhikar cholounk xoktat. Hem amkam Jezun Romi Razpal Pilatak sanglolea utrantlean kollon ieta. Jezuk jivo dovrunk vo tacho jiv kaddunk taka odhikar asa mhunn Pilatan Jezuk sanglem tednam Jezun oxem mhunnttlem: “To tuka voir sorgar thaun diunk naslo zalear, Mhojer tuka kosloch odhikar ascho naslo.” (Ju. 19:11) Tor Pilata bhaxen, aiz khoincheach sorkarak ani rajki fuddareak purnn toren odhikar na.

7. Ami sorkari odhikareanchem kednam aikonk zaina, ani sorkari odhikareamnim kitem ugddas dovrunk zai?

⁷ Jea meren sorkari odhikari amkam Devachea add vochonk lainant, tea meren ami tanchem aikotat. Punn jednam sorkari odhikari, Jehovan kor mhunn sanglam tem korinakat mhunnttat vo korinakat mhunn sanglam tem kor mhunn sangtat tednam ami tanchea adneak pallo dinant. Udharonnak, te ghoddie amchea tornnattea bhavancher military-nt bhag gheunk dobhav ghalunk xoktat. * Vo te amchea Bible-acher vo Bible-achea adarit prokaxonancher, porgottnnechea kamacher vo amchea mittingecher bondi ghalunk xoktat. Tor sorkari odhikari aplo odhikar sarke toren uzar korinant, zoxem to odhikar te amkam dhumallo diunk uzar kortat zalear, tannim Jehovak hixob diuncho poddttolo. Karonn Jehova tankam polloita!—Up. 5:7.

8. ‘Sorkari odhikari’ ani Jehova Deva modem koslo ontor asa, ani hem zannam zavop kiteak gorjechem?

⁸ Sorkari odhikareank, sarkem tem korunk ani dusreancher odhikar cholounk podvi asot. Punn hacho orth, tankam purnn toren odhikar asa ani te vorte asat oxem nhoi. Karonn fokot Jehova Devak purnn toren odhikar asa ani Bible-ant taka char pavtti ‘Bhov Vorto’ oxem mhunnttlam.—Dan. 7:18, 22, 25, 27.

9. Provadi Danielan dorxonamnim kitem polloilem?

⁹ Sogleam odhikaream poros fokot Jehovak bhov vorto odhikar asa mhunn provadi Danielan dorxonamnim polloilem. Danielan poilim char vhoddlim zonvaram polloilim jim adim razvottki choloitolea sonvsarachea vorixtt razvottkenk, tem mhunnttlear, Babilon, Medie-Persie, Gres, ani Rom, toxench atam razvottki choloitolea sonvsarachi vorixtt razvottki Anglo-America-k suchit kortat. (Dan. 7:1-3, 17) Magir Danielan Jehovak, sorginchea neai-sobhent aplea xinvasonar bosla to polloilo. (Dan. 7:9, 10) Ani uprant tannem kitem polloilem tem aiz razvottki choloitolea odhikareank ek xittkaunni zaun asa.

10. Daniel 7:13, 14, 27-a pormonnem, Jehova Dev prithume voir konnank odhikar dita, ani hantuntlean amkam Jehova vixim kitem kollon ieta?

¹⁰ Daniel 7:13, 14, 27 vachat. Jehova Dev soglea sorkari odhikaream thaun podvi ani odhikar kaddun gheta ani to ‘munxachea puta sarkea konn ekleak’ ani ‘Raz-odhikar ghetat tea Bhov Vortea Devachea bhoktank’ dita. Tem mhunnttlear, Jehova ho odhikar Jezu Kristak ani tachea sangata “sasnnachea sasnnak” raj kortolea 1,44,000 makhlolea Kristanvank dita. (Dan. 7:18) Karonn tankam to odhikar favo ani tim sorkari odhikaream poros chodd xoktivont. Hantuntlean, Jehova Dev ekloch ‘Bhov Vortoʼ dekhun to soglea sorkari odhikareancho odhikar kaddun gheun to dusreank diunk xokta mhunn amkam kollon ieta.

11. Danielan boroilʼlea anik khoinchea utrantlean Jehova bhov vorto mhunn kollon ieta?

¹¹ Danielan dorxonant jem polloilem tem tannem adim kitem sanglolem tea pormonnem  sarkem asa. Danielan mhunnttlolem: ‘Sorgincho Dev, razank sodrer bosoita ani sodre voile nikllaita.’ Tannem oxem-i mhunnttlolem: “Bhov Vorto Dev monʼxanchea rajeam voir sorvodhikar choloita . . . Apnnak zai tachea hatant To razodhikar ghalta.” (Dan. 2:19-21; 4:14) Tor hea toren, Jehovan koso odhikar dilo vo to kaddun ghetlo tem ami polloum-ia.

12. Adlea kallar Jehovan razam koddlean odhikar koso kaddun ghetlo tachim thoddim udharonnam diat. (Chitr polloiat.)

¹² Soglea ‘sorkari odhikaream’ poros, apleak bhov vorto odhikar asa mhunn Jehovan sarkem dakhoun dilem. Hea vixim ami tin ghoddnneo polloum-ia. Faraohn Israelitkarank, Ejiptant koidi kelʼlim ani to tankam soddounk sodhinaslo. Punn Jehova Devan tankam soddoilim ani Faraohk Tambddea Doriant buddoun marlo. (Sutt. 14:26-28; St. 136:15) Toxench, Babilonacho Raza Belshazaran ek fest dovorlem ani tannem ‘Sorginchea Dhoniachi porva keli na.’ Jehovak mhoima diunchea bodlek, tannem ‘bhangrachea ani rupeachea devank mhoima dili.ʼ (Dan. 5:22, 23) Tea pasot, Jehovan taka budh xikoili. “Tech rati” Belshazarak jivexim marlo ani tachem raj Midiani ani Parsi lokank dilem. (Dan. 5:28, 30; 6:1) Tea bhair, Palestinacho Raza, Herod Agripa I, hannem apostl Jakobak jivexim marunk lailo ani to apostl Pedruk pasun marunk sodhtalo dekhun, tannem Pedruk bondkhonnint ghatlo. Punn Jehovan Herodak Pedruk marunk diunk na. Karonn “Sorvesporachea dutan taka xikxa dili” ani to melo.—D.I. 12:1-5, 21-23.

13. Zomeamnim ektthaim zaun ailolea razancho Jehovan koso nas kelo tachem ek udharonn diat.

¹³ Toxench, razamnim, zomeamnim ektthaim zaun Jehovachea lokancher akromonn kelem tednam pasun apunn Bhov Vorto mhunn Jehovan dakhoun dilem. Udharonnak, Jehova Devan Israelitkarank 31 Kanaanit razanchea eka zomeacho nas korunk ani Bhasailʼlea Desantle vhoddle-vhoddle vattar aplea tabeant korunk tankam modot keli. (Josh. 11:4-6, 20; 12:1, 7, 24) Tea bhair, Raza Ben-Hadad ani tachea sangata Sirieche 32 her raza Israelacher akromonn korunk aile tednam Jehovan ekuch dhopkean tancho nas korun uddoilo.—1 Raz. 20:1, 26-29.

14-15. (a) Jehovachea odhikara vixim Raza Nebukadnezzaran ani Raza Dariusan kitem mhunnttlem? (b) Eka stotrkaran Jehova ani tache porje vixim kitem mhunnttlem?

¹⁴ Tor Jehovan zaite pavtti apunn Bhov Vorto mhunn dakhoun dilem. Ani thoddea razamnim  pasun hem manun ghetlem. Zoxem, Babilonacho Raza Nebukadnezzaran, khaltikaien Jehovak sogli mhoima favo mhunn vollkhon gheunchea bodlek, ‘aplich vhoddli xokti ani mhoimechi’ boddai keli tednam Jehovan taka piso kelo. Magir to boro zalea uprant tannem ‘Bhov Vortea Devachi stuti keli’ ani ‘Jehovachem raj sasnachem rajʼ mhunn manun ghetlem. Ani “konnacheanuch Tacho hat addaun dovrunk zaina” oxem mhunnttlem. (Dan. 4:27, 30-32) Tea bhair, Danielachea visvasachi porikxa zali ani Jehovan taka xinvanchea khonnintlean salvar kelea uprant, Raza Dariusan oxem mhunnttlem: “Soglleamnim Danielachea Deva mukhar bhirantin kampchem, kiteak Toch jivo Dev, To sodankal jieta, Tachea rajeachem kednanch nisontton zaunchem na, ani Tachi razvottki togtoli sodam-sorvodam.”—Dan. 6:8-11, 19-22, 26, 27.

¹⁵ Jehova vixim eka stotrkaran oxem mhunnttlem: “Raxttrancheo manddnnio Sorvespor fiskottaita, porzancheo kolpona To nirfoll korun soddta.” Toxench, tannem mhunnttlem: “Sorvesporak aplo Dev mhonn vollkhota ti porza bhagi: osle porjek Aplem daiz korun Tannem vinchun kaddlea.” (St. 33:10, 12) Khorench, Jehovak visvaxi ravonk amchea lagim borem karonn asa nhoi!

16. ‘Vhodd sonkoxttacheaʼ vellar Jehova kitem kortolo mhunn ami khatri dovrunk zata, ani kiteak? (Chitr polloiat.)

¹⁶ Tor atam meren, Jehovan aplea lokanchi koxi rakhonn keli ani apunn Bhov Vorto mhunn koxem dakhoun dilem tachim thoddim udharonnam ami polloilim. Fuddarakui Jehova oxench kortolo. Beginuch, ‘vhodd sonkoxttacheaʼ vellar Magogacho Gog, to mhunnttlear, raxttrancho zomo sonvsarbhor aslolea Jehovachea sevokancher akromonn kortolo tednam Jehova aplea visvaxi sevokanchi rakhonn kortolo mhunn ami khatri dovrunk zata. (Mt. 24:21; Dan. 12:1) Hea raxttranchea zomeant, United Nations songottnnentlim 193 raxttram mellon asat zalear pasun, tim Bhov Vorto Jehova  Dev ani tachea sorginchea fouje mukhar ubim pasun ravonk pavchimnant. Karonn Jehova Devan oxem bhasailam: “Oso Hanv Mhakach vhoddvik zoddtolom ani Mhoji povitrtai fankoitolom ani tea zaitea raxttrank Mhaka vollkhun gheunk pavoitolom. Ani Hanv Sorvespor mhonn tim vollkhun ghetolim.”—Ez. 38:14-16, 23; St. 46:10.

17. Hea ‘sonvsarantlea razank’ ani Jehovachea visvaxi sevokank fuddarak kitem zatolem mhunn Bible-ant sanglam?

¹⁷ Magogachea Gogachea akromonnak lagon, Jehova Armageddonachem zhuz kortolo. Ani tednam hea ‘sonvsarantlea razanchoʼ to nas korun uddoitolo. (Prok. 16:14, 16; 19:19-21) Punn ‘aplea visvaxi bhoktank to rakhtoloʼ ani tim sodankal hea prithumer jietolim.—St. 31:23; Mho. 2:21.

18. Khorea Kristanvamnim kitem korcho nichov kela, ani kiteak? (Daniel 3:95)

¹⁸ Xekddeamnim vorsam thaun, Jehovachea zaitea sevokamnim apli svotontrtai ani aplo jiv pasun dhokeant ghatla. Karonn tim Jehovacho mog kortat ani fokot takach raz cholounk odhikar asa mhunn tim manun ghetat. Bible-ant sanglolea tin Hebrevancho ugddas korat. Tankam ujeachea konddant ghatlole punn te pasun Bhov Vortea Jehovak visvaxi ravle dekhun Jehovan tankam salvar kele. Tanchea bhaxen, aiz khorea Kristanvamnim Jehovak visvaxi ravonk nichov kela.—Daniel 3:95 vachat.

19. Jehova kitem polloun amcho neai kortolo, ani ami aiz kitem korunk zai?

¹⁹ Ami Jehovak visvaxi ravop kitlem mhotvachem hea vixim, stotrkar Davidan oxem mhunnttlem: “Sorvespor khoroch raxttrancho Monsubidar! Kallzan hanv promannik ani niropradi: [“visvaxi,” NW] mhaka favo to nivaddo di, Sorvespora!” (St. 7:8) Toxench Davidan oxem-i boroilem: “Nennttuvai [“visvaxiponn,” NW] ani promannikponn mhaka samballum.” (St. 25:21) Tor amchea jivitant kitem-i zaum, Jehovak visvaxi ravop, sogleam-von bori vatt zaun asa. Karonn Jehova amchem visvaxiponn polloun amcho neai kortolo. Ani ami Jehovak visvaxi ravtat tednam amkam stotrkara sarkench distolem. Tannem mhunnttlem: “Nitoll nirmoll jivitachim, [“Visvaxi ravtat tim,” NW] Sorvesporachi Somurt samballtat tim, khorench sukhest!”—St. 119:1.