1. Ek doiall munis koso vagta?

EK doiall munis mogall ani udar kallzacho asta. Oslo munis koso vagta tem somzonk Jezun eka Samariekarachi vopar sangli. Tea voparint, eka Samariekaran choranchea hatant sampoddlolea eka Judevak ‘doia dakhoili.’ ‘Taka tache churchure disle’ ani tannem tachi kallji ghetli. (Lukas 10:29-37) Tor hea voparint, ami doia hea gunnam vixim xiktat. Ani ho gunn Jehova dor disak amkam veg-vegllea toren dakhoita karonn to amcho mog korta.

2. Ek munis anik khoinche toren doia dakhounk xokta?

² Ek munis anik eke toren doia dakhounk xokta. Tem mhunnttlear, xikxa favo aslolea eka munxak thoddea karonnank lagon ghoddie to xikxa dinastana ravta. Jehova Dev pasun amchea thaim oxech toren vagta. Ek munis patok korta tednam thodde pavtti Jehova taka xist laita tem khorem. Punn stotrkaran sanglam toxem, “amchea patkank favo tea mapan To khast laina.”—St. 103:10.

3. Ami khoinchea prosnanche zobab polloitolim?

³ Hea lekhant, Devachem Utor fuddlea tin prosnanche kitem zobab dita tem ami polloitolim. Te prosn mhunnttlear: Jehova kiteak doia dakhoita? Ekleak khor xist dita tednam pasun taka doia dakhounk zata kai? Ani doia dakhounk amkam kitem modot korta?

4. Jehova kiteak doia dakhoita?

⁴ Jehovak doia dakhounk avoddtta. Apostl Paulun oxem boroilem: ‘Devachi konnvallai vo doiallai kitli vhodd.’ Tor tannem oxem kiteak boroilem? Karonn Jehova Devan aplea obhixikt kelʼlea oporipurnn sevokank sorgar jieuncho bhorvonso dila. (Ef. 2:4-7) Punn Jehova Dev fokot obhixiktankuch doia  dakhoita kai? Na. Karonn stotrkar Davidan oxem boroilem: “Somestank Sorvespor kitlo boro! Sogllea Aplea rochnnank Kitlo maiemogacho!” (St. 145:9) Tor, Jehova sogleancho mog korta dekhun favo tednam to tankam doia dakhoita.

5. Jehova kitlo doiall tem Jezu koso zannam zalo?

⁵ Hea prithumer ieunchea hozaramnim vorsam poilim, Jezu aplea Bapai sangata sorgar aslo. Tor Jehovak doia dakhounk kitlem avoddtta tem to ekdom bore bhaxen zannam aslo. (Mho. 8:30, 31) Toxench, patki munxank Jehovan zaite pavtti koxi doia dakhoili tem pasun tannem polloilʼlem. (St. 78:37-42) Ani hea pasot, prithumer ailea uprant lokank xikoitana Jehova kitlo doiall tem Jezun dakhoun dilem.

6. Jehova kitlo doiall tem somzaunk Jezun amkam koxi modot keli?

⁶ Jehova kitlo doiall tem somzaunk, Jezun amkam sanddlolea putachi ek vopar sangli. Ani he vopare vixim ami fattlea lekhant polloilʼlem. Ho put ghor soddun gelo ani ek “mostem jivit jieun tannem aple girestkaiechi vatt laili.” (Lukas 15:13) Punn uprant taka apli chuk kollon aili, tannem poschatap kelo, aplem vaitt jivit soddun dilem ani to portun ghora ailo. Tor tachea bapain kitem kelem? Jezun tea voparint fuddem sanglem toxem, “poisuch astana tachea bapain taka dekhlo ani tachem kalliz churchurlem; ani dhanvun vochun tannem taka veng marli ani tache ume gheit ravlo.” Hea putan ek vhoddli chuk keli. Tori astana, tachea bapain taka loz korunk na vo taka kainch vaitt mhunnonk na. Punn tannem khorench poschatap kelo dekhun tachea bapain taka doia dakhoun bhogxilo ani portun taka aplea familint ghetlo. Jehova Dev heach bapai sarko zaun asa. To doia dakhoun, patok korta taka bhogsunk toiar asa. Hi kallzak lagta tosli vopar sangon, Jehova khorench poschatap kortat tankam bhogsunk toiar asa mhunn Jezun dakhoilem.—Lukas 15:17-24.

7. Jehova jea toren doia dakhoita tantuntlean tachi zannvai koxi dison ieta?

⁷ Jehova zannvaien bhorlolo Dev zaun asa. Hea pasot, Jehova gheta te nirnnoi amkam sodanch faideak poddttat. Zoxem Bible sangta, ‘sorgar thaun ieta ti zannvai konnvallaien vo doiallaien bhorloli ani borea kornnianchem pik dita tosli.’ (Jak. 3:17) Ek mogall avoi vo bapai sarko, Jehova amkam doia dakhoita tednam amkam tem faideachem zata mhunn to zannam. (St. 103:13; Iz. 49:15) Ani hea pasot, ami oporipurnn aslear pasun tannem amkam doia dakhoun fuddara pasot ek bhorvonso dila. Taka  zannvai asa dekhun amkam doia dakhounk karonn asa zalear, to amkam doia dakhoita. Punn teach zannvaiek lagon, doia dakhovop kednam sarkem zaunchem na vo vaittak tenko dilʼlea sarkem zatolem, tem pasun to zannam ani teach bhaxen to vagta.

8. Thodde pavtti kitem korchem poddtta, ani kiteak?

⁸ Chintat, Devacho ek sevok mudʼdom zaun patkachea vatten cholta. Tednam ami kitem kortolim? Jehovachea preronnan Paulun mhunnttlem, oslea munxachea “songotik tumi poddum nakat.” (1 Kor. 5:11) Tor poschatap korina toslea munxank sobhentlean bhair kaddttat. Oxem kelolean ami Devache noitik dorje samballunk pavtat ani sobhent aslolea bhav-bhoinnank tea vaitt vatten cholona zaunk modot zata. Punn thoddeank ghoddie hea manddavollik lagon, Dev doiall nhoi oxem disonk puro. Tem khorem kai? Polloum-ia.

9-10. Hebrevank 12:5, 6-a pormonnem, konnakui sobhentlean bhair kaddttat tednam Jehova taka doia dakhoita mhunn ami kiteak mhunnonk zata tem ek udharonn diun somzaiat.

⁹ Konnakui sobhentlean bhair kaddttat tednam ani khas korun, tim amkam lagim astat tednam amkam khub dukh zata. Ani tea munxak sobhentlean bhair kaddop khorench gorjechem aslem kai mhunn ami chintunk puro. Punn, xist favo asa taka xist divop zannvaiechem zaun asa ani tea vorvim ami tea munxak mog ani doia dakhoitat. (Mho. 13:24) Tea bhair, sobhentlean bhair kaddlolea munxak apli vatt bodlunk modot zata. Udharonnak, gombhir patok adarlolea bhav-bhoinnank sobhentlean bhair kaddlolean, zaitea zannank tim kitle vaitt vatter asat tem kollon ailem, ti vatt bodlunk tankam modot zali ani Jehova sangata porot ixttagot zoddunk tankam adar zalo.—Hebrevank 12:5, 6 vachat.

¹⁰ Hem somzonk ek udharonn polloum-ia. Ek xelliek dusreank posronk xokta toslem ek duens zalem zalear gonvlli tika her xelliam thaun pois dovorta ani tichem hem duens borem korunk tichi kallji gheta. Oxem kelolean, ti xelli bori zaunk pavtoli ani her xelliank tem duens lagonk pavchem na mhunn to zannam. Punn tea xelliek ghoddie hem kotthin zaunk puro. Karonn xelliank eka-meka sangata ravchi sonvoim asta. Tor tea gonvllian hem pavl ghetlolean, to doia dakhoina oxem nhoi, punn soglea xellianchea borea khatir to oxem korta.—Levi Xastr 13:3, 4 sor korun polloiat.

11. (a) Sobhentlean bhair kaddlolo bhav vo bhoinn tea duent xellie bhaxen zaun asa oxem ami kiteak mhunnonk zata? (b) Jehova sangata apli ixttagot porot ghott korunk modot mellonk tannem kitem korunk zai?

¹¹ Sobhentlean bhair kaddlolo bhav vo bhoinn, tea kuxin kaddlolea duent xellie bhaxen zaun asa. Tachi ixttagot Jehova sangata piddʼddear zalea dekhun eka orthan to duent asa oxem mhunnonk zata. (Jak. 5:14) Ani tem duens dusreankui posronk xokta, mhunnche to her bhav-bhoinnankui vaitt kamam korunk urba diunk xokta. Dekhun taka sobhentlean bhair kaddpachi goroz asa. Oxem kelolean, sobhentlea visvaxi bhav-bhoinnanchi rakhonn zata ani sobhentlean bhair kaddla taka apli vatt soddun poschatap korunk modot zata. Punn taka hi xist melltta tednam pasun sobhentlea mittingek hajir zaun, toxench JW Broadcasting^®-antlean ani her prokaxonantlean faido gheun tannem aplo bhavarth ghott korunk zata. Ani to bodlav korta tem vhoddil polloitat tednam te taka solʼlo ditat ani Jehova sangata tachi ixttagot ghott korunk ani portun Jehovacho Sakxi zaunk taka modot kortat. *

12. Ek bhav vo bhoinn poschatap korunk sodhich na tednam vhoddil kitem korun taka vo tika mog ani doia dakhoitat?

 ¹² Punn poschatap korunk sodhinant toslea munxankuch sobhentlean bhair kaddttat mhunn ami ugddas dovrunk zai. Ani ho ek gombhir nirnnoi mhunn vhoddil vollkhon ghetat. Karonn Jehova eka munxak “favo titlich” xist laita mhunn te zannant. (Jer. 30:11) Tor Jehova sangata tea munxachi ixttagot piddʼddear zata toslem kainch vhoddil korunk sodhinant karonn te aplea bhav-bhoinnancho mog kortat. Punn to bhav vo bhoinn poschatap korunk sodhich na zalear vhoddil taka vo tika sobhentlean bhair kaddun mog ani doia dakhoitat.

13. Korint sobhentlea eka munxak sobhentlean bhair kaddcho nirnnoi kiteak gheuncho poddlo?

¹³ Heach toren, poilea xekddeantlea Korint sobhent, ek Kristanv poschatap korunk toiar naslo tednam apostl Paulu tachea sangata koso vaglo tem ami pollounk zata. Ho munis ekdom vitt haddtta toslem kam kortalo. Tem mhunnttlear, to aplea bapaichea baile sangata ek onoitik jivit jietalo. Ani pozoddponna vixim Jehovan Israelitkarank kitem kaido dilʼlo tem apostl Paulu zannam aslo, zoim sanglolem: “Konnui aplea bapaiche eke bailek ekvottʼta, to aplea bapaik beman korta; taka ani tika-i jivexim marchim.” (Lev. 20:11) Punn hea munxak jivexim marcho nirnnoi Paulu gheunk xokonaslo. Tea pasot, tannem tea sobhek hea noxttea munxak tumche modlo bhair uddoiat mhunn sanglem. Karonn tachea onoitik vagnnukecho sobhent aslolea herancher ek vaitt porinnam zalolo ani to korta tem ek gombhir patok nhoi oxem pasun thoddea zannank dislem!—1 Kor. 5:1, 2, 13.

14. Korint sobhentlean bhair kaddlolea munxak apostl Paulun koxi doia dakhoili, ani kiteak? (2 Korintkarank 2:5-8, 11)

¹⁴ Punn uprant, hea gombhir patok adarlolea munxan, khorench poschatap korun vhodd bodlav kele mhunn apostl Pauluk kollon ailem. Hea munxan aplea sobhechem nanv piddʼddear kelʼlem tem khorem. Tori astana, Paulu tachea sangata chodd khor toren vagonk sodhinaslo. Tea pasot, tannem tea sobhechea vhoddilank ‘taka bhogsunk ani dhir diunk’ sanglem. ‘Na zalear to munis aple vhodd khontint buddon voitolo’ mhunn to zannam aslo. Apostl Pauluk hea poschatap kelʼlea munxachi doia disli ani tea munxan apnnem kelʼlea patka pasot khontint buddon, bhogsonnem magchem soddun dilʼlem taka naka aslem.—2 Korintkarank 2:5-8, 11 vachat.

15. Patok adarta taka vhoddil kednam xist laitat ani kednam doia dakhoitat?

 ¹⁵ Jehova bhaxen, vhoddilank pasun doia dakhounk avoddtta. Tor patok adarta taka doia dakhounk borim karonnam asat tednam te taka doia dakhoitat. Punn taka xist diunchi goroz poddtta tednam te taka xist-ui ditat. Na zalear tannim tea vaitt kamak tenko dilʼlea bhaxen zatolem. Punn fokot vhoddilamnim doia dakhounk zai kai?

16. Mhonnʼnneo 21:13 pormonnem, doia dakhoinant tanchea sangata Jehova koso vagta?

¹⁶ Jehovachi dekh gheun ami sogleamnim doia dakhounk vavrunk zai. Karonn ami oxem korinant zalear Jehova amchem magnnem aikochona. (Mhonnʼnneo 21:13 vachat.) Ani oxem zalolem amkam naka. Taka lagon, amchim bhav-bhoinnam dukhant vo trasant astat tednam amche kan bhere korchea bodlek “dublleachea uleak” kan diunk zai ani tanchea sangata chodd khor toren vagchea bodlek ami tankam doia dakhounk sodanch toiar asonk zai. Toxench, Devachea Utrant dilʼlo solʼlo pasun ami apnnaunk zai. Thoim sanglam: “Peleak doia dakhounk na tea monxanchi zhoddti kortana Dev-ui tankam doia dakhouncho na.” (Jak. 2:13) Tor amkam Jehovachea doiechi kitli goroz asa tem ami khaltikaien manun ghetat tednam dusreank doia dakhounk amkam anik sompem zatolem. Ani chodd korun poschatap korun ek munis sobhent porot ieta tednam taka doia dakhounk ami fattim sorchim nant.

17. Raza Davidan koxe toren doia dakhoili?

¹⁷ Khor toren vagchea bodlek dusreank doia dakhounk Bible-antlim udharonnam amkam modot korunk xoktat. Zoxem, Raza Davidachem. Tannem zaite pavtti dusreank doia dakhoili. Udharonnak, raza Saulu taka marunk sodhtalo tednam pasun Devachea hea makhlolea razak tannem vaitt korunk vo tacho bodlo gheunk chintunk na, punn taka doia dakhoili.—1 Sam. 24:9-12, 18, 19.

18-19. David khoinchea don vellar doia dakhounk chuklo?

¹⁸ Punn Davidan sodanch doia dakhounk na. Udharonnak, ekdom khor sobhav aslolo Nabal, Davidachea munxam sangata vaitt toren uloilo ani tankam jevonn diunk nakarlem tednam Davidan ragar zaun taka ani tachea ghorabeak jivexim marunk chintlem. Punn doiall ani pasiens asloli Nabalachi bail, Abigailan taka addailo dekhun David toxem korunk pavonk na.—1 Sam. 25:9-22, 32-35.

¹⁹ Dusrea eka vellar, provadi Nathanan Davidak ek vopar sangon tea vixim ek prosn vicharlo tednam Davidan doiallai dakhounk na mhunn kollon ieta. Nathanan taka eka girest munxa vixim sanglem, zannem tachea gorib xezareachi xelli chorli. Somurti pormonnem, konnem-i ek xelli chorli zalear tannem char xellio farik korunk zai asleo. (Sutt. 22:1) Ani hea kaidea vixim David zannam aslo. Tori astana, tannem ragan oxem mhunnttlem: “Devachean, oxem kelam tea monxak moronn favo!” (2 Sam. 12:1-6) Davidachea hea utrantlean to doiallaien nhoi punn khor toren  vaglo mhunn kollon ieta. Davidan tea voparint sanglolea guneanva poros vhodd-vhodd patkam kelʼlim. Ani tim dakhoun diunk Nathanan taka hi vopar sangli. Punn Davidan tea voparintlea chorachi nit keli toxi Jehovan tachi nit korunk na, tachea bodlek tannem taka khub doia dakhoili.—2 Sam. 12:7-13.

20. Davidachea udharonnantlean ami kitem xikonk zata?

²⁰ David khub ragar zalo tednam Nabalachi nit korun taka ani tachea ghorabeachea soglea munxank tannem jivexim marunk chintlem. Ani uprant, Nathanachea voparintlea girest munxachi nit korun taka moronn favo mhunn tannem sanglem. Hea dusrea poristhitint, Davida sarko doiall munis itlea khor ritin kiteak vaglo mhunn ami chintunk xoktat. Ugddas dovrat, tea vellar Davidachem ontoskornn nitoll naslem. Tor konnui khor ritin dusreanchi nit korta tednam Jehova sangata tachi ixttagot ghott na mhunn amkam kollon ieta. Hea pasot, Jezun aplea xisank oxem mhunn xittkaile: “Tumi nit korum nakat, ani Dev tumchi nit korcho na; kiteak tumi nit korxat tech toren To tumchi nit kortolo.” (Mt. 7:1, 2) Tor ‘vhodd konnvallai vo doiallai’ dakhoita tea Devachi dekh gheun khor ritin vagop pois korunk ami vavrum-ia.

21-22. Dusreank doia dakhounk thoddeo vatto khoincheo?

²¹ Doia dakhovop mhunnche fokot dusreanche churchure disop nhoi, punn tankam modot korunk fuddem sorop. Amchea familint, sobhent, vo ami ravtat tea zagear konnank doia dakhounchi goroz asa tanchea vixim ami chintunk zata. Zoxem, konnank ghoddie buzvonnechi goroz asa tankam ami buzvonn diunk zata, vo jevonn haddun diunk vo her kosli-i modot zai tankam ami modot korunk zata, vo porot Jehovache Sakxi zaloleank ami buzvonn ani urba diunk zata. Ani ami mellttat tea dor eka munxak Rajeachi bori khobor sangon buzvonn divop, tankam doia dakhounchi ek ekdom bori vatt zaun asa.—Job 29:12, 13; Rom. 10:14, 15; Jak. 1:27.

²² Tor hea toren, dusreanchea gorzancher ami dhean ditat tednam tankam doia dakhounk amkam zaiteo sondhi mellttoleo. Ani oxem ami kortat tednam ‘vhodd konnvallai vo doiallai’ aslolo amcho sorgincho Bap, Jehova khuxal zatolo!