OBHEASACHO LEKH 18
Tumi Jezucher Tumcho Bhavarth Halounk Ditolim Kai?
“Mhoje vixim zancho bhavarth halona tim monxam bhagi.”—MT. 11:6.
GIT 54 “This Is the Way”
KITEM XIKTOLIM a
1. Tumi Bible-a thaun xiklolem tem dusreank sangonk laglim tednam tumi ghoddie kiteak ojap zalim?
TUMKAM sot mellʼllem tea vella vixim chitat. Tumi Bible-a thaun xiktalim tem soglem tumkam somzolem ani dusreankui somzotolem mhunn tumkam dislem. Tumi xikleant tacher bhavarth dovorlo ani tachea udexim tumchem aichem ani fuddarachem jivit khuxalkaiechem zatolem mhunn tumkam khatri zali. (St. 119:105) Tor, tumi urben tumchea ixttank ani soireank tea vixim sangonk laglim. Punn kitem zalem? Ojapachem mhunnttlear, zaiteamnim tumi sanglem tem manun gheunk na.
2-3. Jezuchea disamnim choddxea lokamnim kitem kelem?
2 Ami sangtat to sondex lok nakarta tednam ami ojap zaunchi goroz na. Karonn Jezu prithumer aslo tednam to Devachea modotin vizmitam kortalo. Tori astana, taka choddxea lokamnim nakarlo. Udharonnak, Jezun Lazarak porot jivont kelo. Ani Judev dhormik fuddari hem sot nakarunk xokonasle. Tori astana, tannim Jezuk Mesias mhunn manun gheunk na. Ani te Jezuk ani Lazarak marunk pasun sodhtale!—Juanv 11:47, 48, 53; 12:9-11.
3 Choddxe lok apleak Mesias mhunn manun gheunchenant mhunn Jezu zannam aslo. (Juanv 5:39-44) Juanv Batistachea pattlavdarank tannem oxem sanglem: “Mhoje vixim zancho bhavarth halona tim monxam bhagi.” (Mt. 11:2, 3, 6) Tor, choddxea lokamnim Jezuk kiteak nakarlo?
4. Hea lekhant ami kitem xiktolim?
4 Poilea xekddeant choddxea lokamnim Jezucher kiteak bhavarth dovrunk na tachim karonnam, ami hea lekhant ani fuddlea lekhant polloitolim. Toxench, aiz zaito lok Jezuchi xikounn kiteak nakartat tem pasun ami polloitolim. Tea bhair, Jezucho pattlav korit ravonk, ghott bhavarth amkam koso modot korta tem pasun xiktolim.
(1) JEZU KHOIM ZOLMOLʼLO ANI TACHEM KAM KITEM ASLEM TEA VIXIM LOKANCHEM CHINTOP
Jezu khoim zolmolʼlo ani tachem kam kitem aslem tea vixim lokanchem chintop chukichem aslem. Hea karonnak lagon zaiteamnim Jezuk nakarlo. Teach toren aiz lok amkam kiteak nakarunk xoktat? (Peregraf 5 polloiat) b
5. Jezu bhasailʼlo Mesias zaunk xokona mhunn thoddeamnim ghoddie kiteak chitlem astolem?
5 Jezu ek boro xikoupi aslo ani tannem zaitim vizmitam kelʼlim. Tori astana, lokamnim taka nakarlo. Kiteak? Karonn tacho bapui ek gorib thovoi aslo ani to Nazaret xarant vaddlolo. Tea xarachea lokank unnea molache mhunn lekhtale. Karonn Jezucho xis Natanael-an pasun tachea vixim poilim oxem mhunnttlolem: “Nazaretantlem kitem-i tori borem ieunk xokta?” (Juanv 1:46) Hacho orth, taka ghoddie tea xarantle lok avoddnasle vo taka Mika 5:1-ant asloli bhasaunnim ugddasak aili astoli, zoim sanglolem ki Mesias Nazaretant nhoi, punn Bethlehemant zolmoncho aslo.
6. Jezuch Mesias mhunn lok koxe vollkhonk xoktale?
6 Devachea Utrant kitem sanglolem? Jezu “konn” ani to “khoim thaun ailolo” tea vixim Jezuche dusman zannam zaunk sodhche nant mhunn Izaiasan poilinch sanglolem. (Iz. 53:8 NW) Jezu vixim zaiteo bhasaunneo boroun dovorloleo. Ani lokamnim thoddo sodh kelʼlo zalear to Bethlehemant zolmotolo ani Davidachea sonstintlo astolo mhunn tankam kollon ietolem aslem. (Lukas 2:4-7) Tor Jezu, Mika 5:1-ant sanglolea bhasaunnea pormonnem Bethlehemant zolmolʼlo zalear lokamnim taka kiteak nakarlo? Karonn tannim sodh korinastana rokddoch nirnnoi ghetlo.
7. Aiz zaito lok Jehovachea Sakxeank kiteak nakartat?
7 Aiz lok amkam kiteak nakartat? Choddxe Jehovache Sakxi girest nant ani te “oxikxit ani chalte” mhunn lokank disonk puro. (Itihas 4:13) Tor, te padri ghetat toslem vhodd xikop gheinant dekhun te Bible xikonk purte nant mhunn thoddeank disonk puro. Tea bhair, Jehovache Sakxi ho ek “Amerikecho dhorm” mhunn thoddim sangtat. Punn khorem mhunnttlear, choddxe Jehovache Sakxi United States-ant nant. Anik thoddim, Jehovache Sakxi Jezuk maninant mhunn sangtat. Ani tim “Communists,” “Amerikeche bhedi” ani hinvse udexim sorkar bodolcho proitn kortat tosle mhunn sangtat. Karonn, khorem kitem tem tankam khobor na ani khobor aslear pasun tim manun gheinant.
8. Itihas 17:11 pormonnem Devache lok konn mhunn vollkhun gheunk lokamnim kitem korunk zai?
8 Aiz lokamnim aplo bhavarth koso ghott korunk zata? Bible boroupi Lukas-a bhaxen ani adlea tempa voilea Beroeantlea lokam bhaxen Bible xiktana tannim sarko sodh korchi goroz asa. Lukasan Jezu vixim “survatek thaun . . . sogllea ghoddnnianchi mhenotin chovkoxi” korun boroilem. (Lukas 1:1-4) Toxench, Beroeantlea Judevamnim Jezu vixim aikolem tednam tachea vixim Devachea Utrantlean tannim bariksannen topasnnim keli. (Itihas 17:11 vachat.) Tor tanche bhaxen lokamnim aiz kitem korunk zai? Devachea lokam thaun xiktat tem Bible-ant asa kai na mhunn tannim khatri korun gheunk zai. Ani aiz Devachea lokamnim kitem kelam tea vixim obheas korunk zai. Hea toren bariksannen obheas kortat tednam Devachea lokam vixim dusrim kitem sangtat tem aikon tancho bhavarth halcho na.
(2) APUNN MESIAS MHUNN DAKHOUNK JEZUN VIZMITAM KORUNK NANT
Apunn Mesias mhunn dakhounk Jezun vizmitam korunk nant. Hea karonnak lagon zaiteamnim Jezuk nakarlo. Teach toren aiz lok amkam kiteak nakarunk xoktat? (Peregraf 9-10 polloiat) c
9. Jezun lokank sorga veli ek khunna dakhounk na dekhun kitem zalem?
9 Jezuch Mesias mhunn khatri korun gheunk thoddeank fokot tachi xikounnuch nhoi, punn tachim vizmitam pasun pollounk zai aslim. Taka lagon, tannim ghoddie Daniel 7:13, 14 motin dovrun Jezuk “sorga veli ek khunna dakhoi” mhunn sanglem. (Mt. 16:1) Punn tea versamnim sangloli bhasaunni tea vellar purnn zaunchi nasli. Jezuchi xikounn aikon to Mesias mhunn tea lokamnim khatri korun gheunk zai asli. Punn tankam zai asli tosli khunna Jezun korun dakhounk na dekhun tannim taka nakarlo.—Mt. 16:4.
10. Mesiasa vixim Izaiasan sanglolem tem Jezun koxem purnn kelem?
10 Devachea Utrant kitem sanglolem? Mesiasa vixim Izaias provadean oxem sanglem: “To bob marina, aroddna, aplo tallo rosteancher konnak aikunk to dina.” (Iz. 42:1, 2) Jezun porgottnni keli tednam tannem lokanchem dhean apnnacher oddun gheunk proitn korunk na. Tannem vhoddlim-vhoddlim dev-mondiram bandunk nant vo tannem dhormik fuddari ghaltale tosle kopdde ghalunk nant. Ani toxench, lokamnim taka khas nanvamnim apoilʼlem naka aslem. Herod Raza tachi zoddtti kortalo tednam tacho jiv dhokeant aslo. Punn tednam pasun vizmit korun tannem Razak khuxal korunk proitn korunk na. (Lukas 23:8-11) Jezun thoddim vizmitam kelim khorim, punn tachem dhean porgottnnechea kamacher aslem. Taka lagon, tannem aplea xisank sanglem: “Heach pasot Hanv ailam”.—Marku 1:38.
11. Aiz lok amkam kiteak nakartat?
11 Aiz lok amkam kiteak nakartat? Aiz lokank vhoddlea-vhoddlea ani sobit igorzamnim vochonk avoddtta. Thoinchea dhormik fuddareank vhodd-vhodd podvi asloli tankam zai. Ani toxench, tankam festam ani porbo monounk avoddttat, jim Bible-a pormonnem chukichim asat. Punn oslea zagear voitat te lok tanchea dhorma thaun Deva vixim ani Devachea udʼdhexa vixim kainch xikonk pavonant. Punn jim konn Jehovachea Sakxeanchea Raj-ghorant mittingek hajir zatat tim Jehova tanchea thaun kitem opekxa korta ani tachi khuxi purnn korunk tannim kitem korunk zai tem xiktat. Tanchim Raj-ghoram vhoddlim-vhoddlim asonant. Punn tim nitoll astat. Raj-ghorant fuddakar ghetat te khas toreche kopdde ghalinant. Toxench, tankam khas torechea nanvamnim apoinant. Tanchi xikounn ani patienni Devachea Utracher adarit asta. Tor, aiz zaite lok amkam nakartat karonn ami tanchea chali-riti pormonnem Devachi bhokti korinant. Ani ami jem xikoitat ani tankam jem aikonk avoddtta tachea modem ontor asa.
12. Hebrevank 11:1, 6-ant sanglolea pormonnem amcho bhavarth kiteacher adarit asonk zai?
12 Ami amcho bhavarth koso ghott korunk zata? Romantlea Kristanvank apostl Paulun sanglem: “Kristacho sondex kanar poddcho; ani to kanar-poddun, bhavarth utpon zauncho.” (Rom. 10:17) Tor, Bible-ant nasloleo riti-rivazo kitleo-i sobit disom, teo ami nakarun Bible obheas kortat tednam ami amcho bhavarth ghott korunk pavtat. Amcho bhavarth khorea gineanacher adarit asonk zai. Karonn “bhavartha viret konnacheanuch Devak manonk zaina.” (Hebrevank 11:1, 6 vachat.) Tor, amchea lagim sot asa vo na tem zannam zaunk amkam sorga voilea eka vizmitachi goroz na. Punn Bible-achea xikounneancher ami bariksannen sodh kortat tednam amkam ti khatri zata ani amche dubhav pois zatat.
(3) JEZUN JUDEVANCHEO ZAITEO RITI-RIVAZO PALLUNK NANT
Jezun Judevancheo zaiteo riti-rivazo pallunk nant. Hea karonnak lagon zaiteamnim Jezuk nakarlo. Teach toren aiz lok amkam kiteak nakarunk xoktat? (Peregraf 13 polloiat) d
13. Zaitea lokamnim Jezuk kiteak nakarlo?
13 Jezuche xis upas korinant mhunn Juanv Batistache pattlavdar ojap zale. Jezun tankam apunn jivo aso-sor upas korchi goroz na mhunn sanglem. (Mt. 9:14-17) Toxench, Sabatachea disa Jezun eka duent munxak boro kelo tednam to riti-rivazo pallina mhunn Farizev ani her virodhi tacher khub ragar zale. (Marku 3:1-6; Juanv 9:16) Te apunn Sabat kaido mantat mhunn vhoddle-vhoddle uloitale, punn thoddeank te dev-mondirant veapar-dhondo korunk ditale. Jezun tankam hea vixim sanglem tednam tankam rag ailo. (Mt. 21:12, 13, 15) To Nazaretant aslolea devsthanant lokank porgott kortalo tednam tannem tankam Israelitkaram bhaxen svarthi ani bhavarth naslolim oxem mhunnttlem. (Lukas 4:16, 25- 30) Tor, tankam zai toxem tannem korunk na mhunn tannim Jezuk nakarlo.—Mt. 11:16-19.
14. Jezun munxancheo riti-rivazo kiteak nakarleo?
14 Devachea Utrant kitem sanglolem? Jehovan Izaias provadea udexim mhunnttlolem: “Ho lok fokot utram gheun Mhoje-xim ieta, fokot onttamnim Mhaka vakhannta, punn tanchem kalliz Mhoje-sun pois asa. To korta ti Mhoji puza fokot monxamnim ghodlolea kaideanchi, patt kelʼlea xastranchi puza.” (Iz. 29:13) Tor, Jezun tancheo riti-rivazo nakarun Devachea Utra pormonnem sarkem tench kelem. Ani jea lokamnim Devachem Utor kuxik dovrun munxacheo riti-rivazo apnnaileo, tannim Jehovak ani tannem nemlolea Mesiasak nakarlo.
15. Aiz zaito lok Jehovachea Sakxeancher kiteak ragar zatat?
15 Aiz lok amkam kiteak nakartat? Aiz Jehovache Sakxi Bible sangona tosleo riti-rivazo vo festam-porbo korinant. Zoxem, te birthday ani Christmas korinant, toxench mornna sombondit chali-riti, ani des-bhokte sombondit porbo korinant. Hem polloun lok tancher ragar zatat ani apunn manta tem Devak manvota oxem tankam dista. Punn khorem mhunnttlear, tim Bible soddun munxancheo riti-rivazo pallttat zalear tim Devak manvonk pavchimnant.—Mark 7:7-9.
16. Stotr 119:97, 113, 163-165-a pormonnem ami kitem korunk zai, ani ami kitem korchem nhoi?
16 Ami amcho bhavarth koso ghott korunk zata? Ami Jehovachea kaideancho ani totvancho mog korunk zai. (Stotr 119:97, 113, 163-165 vachat.) Ami Jehovacho mog kortat zalear taka manvona teo riti-rivazo ami pallchimnant. Ani Jehova poros chodd ami kiteachoch vo konnachoch mog korchimnant.
(4) JEZUN SORKAR BODOLCHO PROITN KORUNK NA
Jezun sorkar bodolcho proitn korunk na. Hea karonnak lagon zaiteamnim Jezuk nakarlo. Teach toren aiz lok amkam kiteak nakarunk xoktat? (Peregraf 17 polloiat) e
17. Jezuchea disamnim Mesiasan kitem kelʼlem tankam zai aslem?
17 Jezuchea disamnim thoddeank Romi Sorkarachea trasam thaun Mesiasan tankam suttka dilʼli zai asli. Punn te Jezuk Raza korunk sodhtale tednam tannem tanchem aikonk na. (Juanv 6:14, 15) Tea bhair, iadnik ani her thodde zann Jezu sorkar bodlunk proitn kortolo mhunn usketale. Toxem zalem zalear Romi sorkar ragar zaun tankam dila to thoddo odhikar tanche koddlean kaddun gheunk xoktalo. Hea don karonnak lagon zaitea Judevamnim Jezuk nakarlo.
18. Zaitea lokamnim Mesiasa vixim aslolea khoinchea bhasaunneancher dhean diunk na?
18 Devachea Utrant kitem sanglolem? Mesias zoitivont zhuzari zatolo mhunn zaiteo bhasaunneo keloleo. Punn tachea poilim tannem amchea patkam pasot moronk zai mhunn pasun bhasaunneo kelʼleo. (Iz. 53:9, 12) Tor, Mesiasa vixim lokanchem chintop kiteak chukichem aslem? Karonn jeo bhasaunneo tancheo somosia beginuch suttaveo korcheo nasleo tancher tannim dhean diunk na.—Juanv 6:26, 27.
19. Aiz lok amcho sondex kiteak nakartat?
19 Aiz lok amkam kiteak nakartat? Aiz ami rajkaronnant bhag gheinant ani election-a vellar vote korinant dekhun lok amkam nakartat. Punn khorem mhunnttlear, ami munxank vote kortat zalear ami Jehovak nakarlea bhaxen zata. (1 Sam. 8:4-7) Tea bhair, ami lokam pasot kitem tori korunk zai, zoxem iskolam vo hospital-am bandunk zai mhunn thoddeank dista. Tor, sonvsaracheo somosia suttaveo korchea bodlek ami porgottnnechea kamacher dhean ditat tednam lok amcho sondex nakartat.
20. Matev 7:21-23-a pormonnem, ami amchem purnn dhean khoim dovrunk zai?
20 Ami amcho bhavarth koso ghott korunk zata? (Matev 7:21-23 vachat.) Jezun amkam porgottnnechem kam dilam tacher ami amchem purnn dhean dovrunk zai. (Mt. 28:19, 20) Amkam lokam pasot mog ani kallji asa hem khorem. Punn sonvsaracheo somosia suttaveo korunk gelear, porgottnnechea kama thaun amchem dhean haltolem. Tea bhair, lokank modot korunk sogleant bori vatt mhunnttlear, tankam Devachea rajea vixim xikovop ani Deva lagim ek ghott ixttagot korunk modot korop.
21. Ami kitem nichov korunk zai?
21 Poilea xekddeantlea Kristanvamnim Jezuk kiteak nakarlo ani aiz thoddo lok amkam kiteak nakartat, tachim char karonnam ami hea lekhant xiklim. Punn hea bhair, anik char karonnam ami fuddlea lekhant xiktolim. Jezuk nakarinastana sodanch tacher bhavarth dovrunk ami nichov korum-ia!
GIT 56 Make the Truth Your Own
a Jezu sogleam-von boro xikoupi aslo. Tori astana, choddxea zannamnim tachi xikounn nakarli. Khoinchea char karonnank lagon tannim taka nakarlo? Aiz zaite lok, Jezuche xis kitem xikoitat tem aikon ani te kitem kortat tem polloun tankam kiteak nakartat? Ani amkam Jezucher ghott bhavarth aslolean tacho pattlav korit ravonk amkam koxi modot zaunk xokta? Hea prosnanche zobab ami hea lekhant polloitolim.
